Olketa Servant Bilong God Olsem Olketa Tree—Long Wanem Wei?
TAEM hem story abaotem man wea hapi long olketa Bible principle and followim insaed living bilong hem, man for raetem psalm hem sei: “Hem bae kamap olsem wanfala tree wea olketa plantim klosap long planti smol wata, wea garem frut long taem bilong hem and wea leaf bilong hem no savve dae, and evri samting wea hem duim bae win.” (Psalm 1:1-3) Why nao disfala toktok hem fitim?
Samfala tree savve laef for barava longtaem. Olsem example, samfala olive tree long area bilong Mediterranean laef for samting olsem wan go kasem tu thousand year finis. And tu, olketa baobab tree long central Africa savve laef for barava longtaem, and wanfala bristlecone pine wea stap long California hem savve laef for samting olsem 4,600 year. Olketa full-grown tree insaed wanfala forest barava helpem datfala area. Olsem example, olketa tolfala tree givim shade for olketa smolfala tree for grow, and olketa leaf wea foldaon mekem graon long botom bilong olketa tree kamap niu.
Olketa barava tolfala tree long world olketa savve stap tugeta long olketa forest, long there each tree sapotim narawan. From maet rut bilong olketa grow tugeta, bae hem moa isi for wanfala grup tree for strong for feisim big wind winim sapos wanfala tree standap seleva long wanfala klia ples. Wei wea wanfala tree garem staka rut hem mekem hem kasem inaf wata and kaikai from graon. Samfala taem, olketa rut wea go daon deep insaed graon hem long winim datfala tree, or olketa rut maet grow level witim graon farawe from ples wea olketa leaf bilong tree kavarem.
Aposol Paul maet storyim wanfala tree taem hem explainim hao olketa Christian shud “go ahed for wakabaot long wan mind witim [Christ], garem rut and go ahed for grow long hem and kamap strong long faith.” (Colossians 2:6, 7) Tru nao, olketa Christian savve stand strong only sapos olketa hol strong long Christ long sem wei wea wanfala tree hol strong long graon witim rut bilong hem.—1 Peter 2:21.
Wanem moa samfala wei wea olketa servant bilong God olketa olsem tree? Long sem wei wea olketa tree wea grow tugeta kasem sapot from each other, olketa wea stap klosap long Christian kongregeson savve kasem sapot from olketa brata and sista. (Galatians 6:2) Olketa faithful and mature Christian wea garem olketa spiritual rut wea waed and deep savve helpem olketa niu brata for stap strong long faith, nomata taem pipol strong for againstim olketa. (Romans 1:11, 12) Olketa Christian wea niu savve grow gud taem olketa stap anda long “shade” bilong olketa wea servem God for longtaem finis. (Romans 15:1) And evri member bilong Christian kongregeson evriwea long world kasem spiritual kaikai for strongim olketa from olketa “bigfala tree bilong raeteous fasin,” wea hem nao anointed remnant.—Isaiah 61:3.
Hem samting wea mekem man barava hapi for savve hao evri servant bilong God garem hope for fulfillim promis wea stap long Isaiah 65:22, wea sei: “Olketa day bilong pipol bilong mi bae olsem olketa day bilong wanfala tree.”
[Piksa Credit Line long page 28]
Godo-Foto