Enjoyim Wei for Studyim Seleva Word Bilong God

“Mi bae ting raonem evri waka bilong iu, and evri samting wea iu duim mi bae interest long hem.”—PSALM 77:12.

1, 2. (a) Why nao iumi mas markem taem for ting raonem samting? (b) Wanem nao hem minim for “ting raonem” samting?

FROM iumi olketa disaepol bilong Jesus Christ, main important samting long iumi nao hem shud wei wea iumi fren witim God and olketa reason wea muvim iumi for servem Hem. Bat distaem, planti pipol busy tumas gogo olketa no markem taem for ting raonem samting. Olketa busy tumas for aftarem material samting, baem samting, and lukaotem hapitaem wea no givim eni gud samting. Hao nao iumi savve stap klia long wei for aftarem olketa iusles samting olsem? Long sem wei wea iumi markem taem evriday for olketa important samting, olsem for kaikai and sleep, iumi mas markem taem each day tu for ting raonem olketa waka bilong Jehovah.—Deuteronomy 8:3; Matthew 4:4.

² Waswe, enitaem iu ting raonem samting tu? Wanem nao hem minim for ting raonem samting? Wanfala dictionary talem mining bilong disfala toktok olsem “for man tingting strong long samting: tingim or ting raonem samting.” And narafala mining bilong “ting raonem” hem “for ting abaotem; tingim samting . . . especially long kwaet, serious wei, and ting deep long samting.” Wanem nao diswan minim for iumi?

3. Wei for muv ahed long spiritual wei hem barava join witim wanem?

³ Wanfala samting nao, hem shud mekem iumi tingim samting wea aposol Paul raetem for fren bilong hem Timothy: “Taem mi no kam yet, go ahed for waka hard long wei for read long pablik, for givim kaonsel, for teach. . . . Ting raonem evri samting hia; tingting strong long olketa, mekem wei wea iu muv ahed savve showaot klia long evriwan.” Tru nao, Paul expectim hem for muv ahed, and toktok bilong hem showimaot wei for ting raonem olketa spiritual samting hem barava join witim wei for muv ahed. Hem semsem long distaem tu. For enjoyim wei for muv ahed long spiritual wei, iumi mas go ahed for “ting raonem” and “tingting strong” long olketa samting wea join witim Word bilong God.—1 Timothy 4:13-15.

4. Wanem nao olketa tul wea iu savve iusim for helpem iu ting raonem Word bilong Jehovah evritaem?

⁴ Best taem for iu ting raonem samting hem depend long iu and famili schedule bilong iu. Planti ting raonem wanfala Bible scripture long early morning taem olketa readim buklet Lukluk Long Olketa Scripture Evriday. Samting olsem 20,000 volunteer long olketa Bethel hom evriwea long world startim day bilong olketa long wei for lukluk long Bible scripture bilong datfala day for 15 minute. Nomata tu-thri member bilong Bethel famili nomoa givim koment evri morning, evri narawan ting raonem samting wea olketa talem and readim. Olketa nara Witness ting raonem Word bilong Jehovah taem olketa gogo for waka. Olketa lisin long kaset bilong Bible and Wastaoa and Wekap! magasin wea stap long samfala languis. Planti waef duim diswan taem olketa waka raonem haos. Tru nao, olketa followim Asaph, man wea raetem psalm, taem hem raet olsem: “Mi bae rememberim olketa samting wea Jah duim; from mi bae rememberim nambawan samting wea iu duim bifor kam. And mi bae ting raonem evri waka bilong iu, and evri samting wea iu duim mi bae interest long hem.”—Psalm 77:11, 12.

Stretfala Wei for Tingting Givim Gudfala Samting

5. Why nao wei for study seleva shud important long iumi?

⁵ Long taem bilong iumi wea pipol lukluk olowe long television, video, and computer, planti pipol no interest for read. Olketa Jehovah’s Witness shud no olsem. Tru nao, wei for readim Bible hem keepim iumi klos long Jehovah and protectim iumi. Samfala thousand year go finis, Joshua changem Moses olsem leader bilong Israel. For kasem blessing bilong Jehovah, Joshua mas readim Word bilong God. (Joshua 1:8; Psalm 1:1, 2) Datwan hem samting wea iumi mas still duim distaem. Bat, from olketa no skul gud, samfala maet faendem hem hard for read or hem boring. So, wanem nao savve helpem iumi for want for readim and studyim Word bilong God? Ansa hem stap long toktok bilong King Solomon long Proverbs 2:1-6. Plis openem Bible bilong iu and readim olketa verse hia. Then bae iumi storyim olketa verse hia tugeta.

6. Hao nao iumi shud ting long savve bilong God?

⁶ First samting, iumi kasem disfala encouragement: “Son bilong mi, sapos iu acceptim toktok bilong mi and tinghae long komandment bilong mi, for iu lisin gud long wisdom witim ear bilong iu, mekem iu savve tanem heart bilong iu long fasin for luksavve; . . . ” (Proverbs 2:1, 2) Wanem nao iumi lanem from olketa toktok hia? Each wan long iumi garem responsibility for study. Lukim datfala toktok “sapos iu acceptim toktok bilong mi.” Datwan hem bigfala “sapos” bikos staka pipol no lisin gud long Word bilong God. For iumi enjoyim wei for studyim Word bilong God, iumi mas willing for acceptim olketa toktok bilong Jehovah and ting long olketa olsem treasure wea iumi no want for lusim. Iumi shud no letem evriday schedule bilong iumi mekem iumi busy tumas or pullim tingting gogo iumi lus interest long Word bilong God, or maet garem daot abaotem tu.—Romans 3:3, 4.

7. Why nao iumi shud stap and lisin gud evritaem long olketa Christian meeting?

⁷ Waswe, iumi really “lisin gud” taem olketa explainim Word bilong God long olketa Christian meeting? (Ephesians 4:20, 21) Waswe, iumi “tanem heart” bilong iumi mekem iumi savve kasem fasin for luksavve? Maet speaker no garem bigfala savve, bat taem hem storyim Word bilong God, fitim iumi for barava lisin gud long hem. Tru tumas, for lisin gud long wisdom bilong Jehovah, iumi mas go evritaem long olketa Christian meeting. (Proverbs 18:1) Tingim wei wea olketa wea missim meeting long datfala rum antap haos long Jerusalem long Pentecost 33 C.E. barava sorre olketa missim datwan! Nomata no eni barava spesol samting olsem happen long meeting bilong iumi, iumi lukluk insaed main buk bilong iumi, Bible. So, evri meeting savve helpem iumi long spiritual wei sapos iumi lisin gud and lukluk insaed Bible bilong iumi.—Acts 2:1-4; Hebrews 10:24, 25.

8, 9. (a) Wei for duim study seleva minim iumi mas duim wanem? (b) Hao nao bae iu markem gud samting wea gold givim witim wei for minim savve bilong God?

⁸ Next toktok bilong wise king Solomon hem olsem: “And tu, sapos iu singaot for minim samting and ask for fasin for luksavve, . . . ” (Proverbs 2:3) Toktok hia showimaot wanem kaen feeling or tingting? Tru nao, hem strongfala feeling for laek minim Word bilong Jehovah! Toktok hia showimaot wei for willing for study witim goal for kasem fasin for minim samting, for luksavve wanem nao will bilong Jehovah. Tru tumas, diswan minim man mas waka hard, and datwan leadim iumi go long next toktok and tokpiksa bilong Solomon.—Ephesians 5:15-17.

⁹ Hem go ahed for sei: “Sapos iu go ahed for lukaotem [fasin for minim samting] olsem silver, and olsem riches wea haed iu go ahed for lukaotem, . . . ” (Proverbs 2:4) Diswan mekem iumi tingim bigfala waka bilong olketa man insaed planti handred year wea go pas wea dig for faendem gold and silver. Olketa man killim dae nara man for gold. Samfala narawan iusim full laef bilong olketa for trae for faendem. Nomata olsem, wanem gudfala samting nao gold hem garem? Sapos iu lus long wanfala desert and laek drink tumas, wanem nao bae iu chusim: wanfala pis gold or wanfala glass wata? Nomata olsem, olketa man strong tumas for aftarem gold, wea price bilong hem ap and daon!a Iumi shud garem barava moa strong winim datwan for luk aotem wisdom, fasin for luksavve, and fasin for minim God and will bilong hem! Bat wanem nao olketa gudfala samting wea kamaot from wei for lukaotem olsem?—Psalm 19:7-10; Proverbs 3:13-18.

10. Wanem nao iumi savve faendem sapos iumi studyim Word bilong God?

¹⁰ Toktok bilong Solomon go ahed olsem: “Then iu bae minim wei for fraet long Jehovah, and iu bae faendem barava savve bilong God.” (Proverbs 2:5) Datwan hem spesol samting—wei wea olketa man wea sin savve faendem “barava savve bilong God,” Jehovah, Sovereign Lord bilong universe! (Psalm 73:28; Acts 4:24) For planti handred year, olketa savveman and sekson wea pipol bilong world sei olketa wise, trae for minim olketa deep kwestin abaotem laef and universe. Nomata olsem, olketa fail for faendem “barava savve bilong God.” Why nao olsem? Nomata diswan stap insaed long Word bilong God, Bible, for planti thousand year, olketa rejectim olsem samting wea simpol tumas and from datwan olketa fail for acceptim and minim.—1 Corinthians 1:18-21.

11. Wanem nao samfala gudfala samting wea kamaot from wei for study seleva?

¹¹ Nara samting wea Solomon mekhae long hem nao olsem: “Jehovah seleva givim wisdom; savve and fasin for luksavve kamaot from mouth bilong hem.” (Proverbs 2:6) Jehovah willing and kaen tumas for givim wisdom, savve, and fasin for luksavve long eniwan wea willing for lukaotem olketa hia. Iumi garem planti reason for barava tinghae long wei for studyim Word bilong God, nomata iumi mas waka hard, disciplinem seleva, and mekem sakrifaes. Gud samting nao, iumi no need for copyim for iumiseleva wanfala Bible olsem olketa duim bifor, bat iumi garem olketa Bible wea olketa printim finis for iumi!—Deuteronomy 17:18, 19.

For Wakabaot Fitim Jehovah

12. Wanem nao shud reason for iumi aftarem savve bilong God?

¹² Wanem nao shud reason for iumi duim study seleva? For mekem iumi moabeta winim olketa narawan? For showim dat iumi garem bigfala savve? For kamap olsem man wea savve tumas long Bible? Nomoa. Goal bilong iumi hem for olsem Christian long evri samting iumi duim, and evritaem redy for helpem narawan long wei wea Christ helpem pipol, followim example bilong Christ for strongim man. (Matthew 11:28-30) Aposol Paul hem givim disfala warning: “Savve hem mekem man praod, bat love hem buildimap man.” (1 Corinthians 8:1) Dastawe, iumi shud garem hambol tingting wea Moses showim taem hem sei long Jehovah: “Mekem mi savve, plis, long olketa wei bilong iu, for mi savve long iu, mekem iu hapi long mi.” (Exodus 33:13) Tru nao, iumi shud want for garem savve, for mekem God hapi, no for show-off long olketa man. Iumi want for kamap olketa servant bilong God wea hambol and fit. Hao nao iumi savve kasem datfala goal?

13. Wanem nao man needim for kamap wanfala servant bilong God wea fit?

¹³ Paul givim disfala kaonsel long Timothy abaotem hao for mekem God hapi taem hem sei: “Duim best bilong iu for mekem God acceptim iu, wanfala wakman wea no shame long eni samting, wea iusim word bilong truth long stretfala wei.” (2 Timothy 2:15) Datfala toktok “iusim . . . long stretfala wei” hem kam from tufala Greek word wea firstaem hem minim ‘for katem samting stret.’ (Kingdom Interlinear) Samfala sei diswan givim idea bilong wanfala man for sewim kaleko wea katem kaleko followim wanfala pattern, or wanfala farmer wea houm graon long stret laen, and kaen olsem. Nomata olsem, samting wea kamaot from diswan mas tru, or stret. Main point hem olsem, for kamap servant bilong God wea fit and hem appruvim, Timothy mas ‘duim best bilong hem’ for mek sure teaching and fasin bilong hem fitim datfala word bilong truth.—1 Timothy 4:16.

14. Hao nao study seleva bilong iumi shud affectim wanem iumi duim and talem?

¹⁴ Paul talem sem point taem hem encouragem olketa Christian long Colossae for “wakabaot fitim Jehovah witim goal for mekem hem hapi evribit” long wei for “go ahed for garem frut long evri gudfala waka and grow long stretfala savve bilong God.” (Colossians 1:10) Long hia Paul joinim wei for kamap fitim Jehovah witim wei for “garem frut long evri gudfala waka” and tu for “grow long stretfala savve bilong God.” Diswan minim, important samting long Jehovah nao hem wei wea iumi tinghae long savve and tu haomas nao iumi followim Word bilong God saed long wanem iumi duim and talem. (Romans 2:21, 22) So, study seleva bilong iumi mas affectim tingting and fasin bilong iumi sapos iumi want for mekem God hapi.

15. Hao nao iumi savve protectim and kontrolem mind and tingting bilong iumi?

¹⁵ Distaem, goal bilong Satan hem for distroem spiritual saed bilong iumi thru long wei for spoelem tingting bilong iumi. (Romans 7:14-25) So, iumi mas protectim and kontrolem mind and tingting bilong iumi mekem iumi fit for garem Jehovah olsem God bilong iumi. Samting for faet wea iumi garem hem “savve bilong God,” wea fit for “mekem evri tingting obeyim Christ.” Diswan hem gudfala reason moa for studyim Bible evriday, from iumi want for aotem from mind bilong iumi tingting wea selfish and wea no fitim.—2 Corinthians 10:5.

Olketa Help for Minim Samting

16. Hao nao iumi savve kasem gudfala samting taem Jehovah teachim iumi?

¹⁶ Teaching bilong Jehovah givim iumi gudfala samting long spiritual and physical saed. Hem no samting wea no interesting and no savve helpem iumi. Dastawe iumi read olsem: “Mi, Jehovah, mi nao God bilong iufala, Datwan wea teachim iufala for kasem gud samting for iufala seleva, Datwan wea mekem iufala followim road wea iufala mas wakabaot long hem.” (Isaiah 48:17) Hao nao Jehovah mekem iumi wakabaot followim gudfala wei bilong hem? First samting, iumi garem Word bilong hem, Holy Bible. Diswan hem main teaching buk bilong iumi, wea iumi luk insaed evritaem. Dastawe hem gud for openem Bible and lukluk followim reading insaed long olketa Christian meeting. Olketa gudfala samting wea kamaot from wei for duim diswan hem stap long story bilong Ethiopian eunuch, long Acts chapter 8.

17. Wanem nao happen long datfala story abaotem Ethiopian eunuch, and wanem nao diswan hem showimaot?

¹⁷ Datfala Ethiopian eunuch hem man wea change go long Jew religion. Hem barava biliv long God, and studyim olketa Scripture. Hem gogo long chariot bilong hem, and readim scripture long Isaiah taem Philip ran saed long hem and ask olsem: “Waswe, iu minim samting wea iu readim?” Hao nao datfala eunuch hem ansa? “‘For tok stret, hao nao bae mi savve sapos no eniwan leadim mi?’ And hem askem Philip for klaemap and sidaon witim hem.” Then Philip, wea holy spirit leadim hem, helpem datfala eunuch for minim profesi bilong Isaiah. (Acts 8:27-35) Wanem nao diswan hem showimaot? Wei for readim Bible nomoa hem no inaf. Jehovah, thru long spirit bilong hem, iusim faithful and wise slave class for helpem iumi minim Word bilong hem long barava taem. Hao nao hem duim diswan?—Matthew 24:45-47; Luke 12:42.

18. Hao nao faithful and wise slave class helpem iumi?

¹⁸ Nomata datfala slave class hem “faithful and wise,” Jesus no sei hem bae no duim mistek. Evriwan wea insaed long disfala grup bilong olketa faithful anointed brata olketa Christian wea no perfect. Nomata olketa laek duim best samting, olketa savve duim mistek, long sem wei wea olketa man olsem duim samfala taem long first century. (Acts 10:9-15; Galatians 2:8, 11-14) Nomata olsem, klinfala samting nao muvim olketa, and Jehovah hem iusim olketa for givim iumi olketa pablikeson for studyim Bible for buildimap faith bilong iumi long Word bilong God and olketa promis bilong hem. Main tul for study seleva wea datfala slave givim iumi nao hem New World Translation of the Holy Scriptures. Distaem, full wan or samfala part bilong hem stap long 42 languis, and olketa printim finis 114 million copy bilong hem. Hao nao iumi savve iusim long gudfala wei taem iumi duim study seleva?—2 Timothy 3:14-17.

19. Wanem nao samfala part bilong New World Translation—With References wea savve help taem man duim study seleva?

¹⁹ Olsem example, tingim datfala New World Translation of the Holy Scriptures—With References. Hem garem olketa cross-reference, footnote, wanfala miniconcordance wea stap long sekson wea garem heding “Bible Words Indexed” and “Footnote Words Indexed,” and wanfala Appendix wea storyim 43 subject, and wea garem tu olketa map and chart. And hem garem “Introduction” tu wea explainim wea nao olketa tekem planti information for duim disfala nambawan transleison bilong Bible. Sapos hem stap long languis wea iu savve minim, duim best for savve gud long evri part bilong hem and mekius long hem. Tru nao, Bible nao hem start bilong study program bilong iumi, and New World Translation hem wanfala transleison wea barava mekhae long nem bilong God taem hem mekhae long Kingdom rul bilong Hem.—Psalm 149:1-9; Daniel 2:44; Matthew 6:9, 10.

20. Wanem nao olketa kwestin abaotem wei for study seleva wea needim ansa?

²⁰ Maet iumi ask: ‘Wanem help moa iumi needim for minim Bible? Hao nao iumi savve markem taem for study seleva? Hao nao iumi savve mekem wei wea iumi study kamap moabeta? Hao nao study wea iumi duim shud affectim narafala pipol?’ Next article bae ansarem olketa important kwestin hia saed long hao iumi savve muv ahed olsem Christian.

[Footnote]

Waswe, Iu Remember?

• Wanem nao hem minim for “ting raonem” samting?

• Wanem tingting nao iumi shud garem saed long wei for studyim Word bilong God?

• Wanem nao shud reason for study seleva?

• Olketa wanem help for minim Bible nao iumi garem?

[Piksa long page 15]

Olketa bilong Bethel famili faendem hem strongim olketa long spiritual wei for startim each day long wei for lukluk long wanfala Bible scripture

[Olketa Piksa long page 15]

Savve iusim taem long gudfala wei taem iumi lisin long olketa Bible kaset taem iumi travel

[Piksa long page 16]

Olketa man waka hard tumas for kasem gold. Haomas waka nao iu duim for studyim Word bilong God?

[Credit Line]

Courtesy of California State Parks, 2002

[Olketa Piksa long page 17]

Bible hem wanfala treasure wea savve lead go for laef olowe