Blessing Bilong Jehovah Mekem Iumi Rich
“Blessing bilong Jehovah—hem nao mekem man rich, and hem no addim eni pain witim datwan.”—PROVERBS 10:22.
1, 2. Why nao hapi hem no join witim wei for rich long material saed?
WEI for aftarem material samting hem rulim laef bilong planti million pipol distaem. Bat waswe, olketa material samting mekem olketa hapi? “Mi no savve rememberim wanfala taem wea pipol feel nogud tumas abaotem living bilong olketa winim distaem,” hem nao samting wea The Australian Women’s Weekly talem. Hem sei moa: “Hem krangge samting. Iumi herem hao Australia hem garem gudfala living saed long selen, and laef hem gud winim eni nara taem. . . . Nomata olsem, wei for expectim nogud samting hem big tumas long nation hia. Olketa man and woman feel samting hem miss from laef bilong olketa bat olketa no savve wanem nao datwan.” Bible barava talem tru samting taem hem showimaot hao wei for hapi and laef tu no kamaot from olketa samting wea iumi garem!—Ecclesiastes 5:10; Luke 12:15.
2 Bible sei hapi wea winim evri narawan hem kam from blessing bilong God. Proverbs 10:22 sei olsem abaotem diswan: “Blessing bilong Jehovah—hem nao mekem man rich, and hem no addim eni pain witim datwan.” Planti taem pain hem kamaot from wei for greedy for kasem staka material samting. Dastawe aposol Paul givim disfala warning: “Olketa wea wantem tumas for kamap rich kasem test and trap and planti krangge and nogud tingting, wea gogo spoelem and finisim olketa evribit. From fasin for lovem selen hem start bilong planti nogud samting, and from samfala trae for kasem datfala love olketa lusim faith finis and givim planti pain long olketa seleva.”—1 Timothy 6:9, 10.
3. Why nao olketa servant bilong God kasem test?
3 Long narasaed, olketa blessing wea no bringim eni pain barava kasem evriwan wea “go ahed for lisin long voice bilong Jehovah.” (Deuteronomy 28:2) Nomata olsem, samfala maet ask, ‘Sapos no eni pain join witim blessing bilong Jehovah, why nao planti servant bilong God safa?’ Bible sei God letem olketa test for kasem iumi bat olketa hia kam from Satan, wicked system bilong hem, and iumiseleva wea no perfect. (Genesis 6:5; Deuteronomy 32:4, 5; John 15:19; James 1:14, 15) Jehovah givim kam “evri gudfala present and evri perfect present.” (James 1:17) So, olketa blessing bilong hem no savve kosim eni pain. Bae iumi lukluk long samfala perfect present bilong God.
Word Bilong God—Present wea Barava Spesol
4. Wanem blessing and spesol present nao pipol bilong Jehovah enjoyim long disfala “taem bilong end”?
4 Long saed bilong “taem bilong end,” profesi bilong Daniel sei: “Trufala savve bae kamap staka.” Bat witim datwan hem sei: “No eni wicked man bae minim, bat olketa wea garem fasin for luksavve bae minim.” (Daniel 12:4, 10) Tingim datwan! Word bilong God—especially olketa profesi—hem showaot thru long wisdom bilong God long wei wea wicked pipol no savve really mining bilong hem, nomata pipol bilong Jehovah savve. Son bilong God prea olsem: “Mi praisem iu long pablik, Father, Lord bilong heven and earth, bikos iu haedem olketa samting hia from olketa wea wise and kleva, and showimaot olketa long olketa baby.” (Luke 10:21) Hem wanfala really blessing for garem spesol present bilong Word bilong God, Bible, and for stap midolwan long olketa wea Jehovah givim spiritual wei for minim samting!—1 Corinthians 1:21, 27, 28; 2:14, 15.
5. Wanem nao wisdom, and hao nao iumi savve kasem datwan?
5 Iumi bae no garem eni spiritual savve sapos iumi no kasem “wisdom from antap.” (James 3:17) Wisdom hem wei for iusim savve and wei for minim samting for stretem olketa problem, stap klia or missim danger samting, kasem olketa goal, or givim gudfala kaonsel. Hao nao iumi kasem wisdom bilong God? Proverbs 2:6 sei: “Jehovah seleva givim wisdom; savve and fasin for luksavve kamaot from mouth bilong hem.” Tru nao, Jehovah bae blessim iumi witim wisdom sapos iumi go ahed for prea for datwan, olsem hem givim King Solomon “wanfala heart wea wise and minim samting.” (1 Kings 3:11, 12; James 1:5-8) For kasem wisdom, iumi mas go ahed for lisin tu long Jehovah long wei for evritaem studyim and followim Word bilong hem.
6. Why nao hem wise for followim olketa law and principle bilong God insaed laef bilong iumi?
6 Olketa nambawan example bilong wisdom bilong God stap insaed olketa law and principle bilong Bible. Olketa hia helpem iumi long evri wei—saed long body, mind, feeling, and spiritual wei. Dastawe man wea raetem psalm sing olsem: “Law bilong Jehovah hem perfect, hem mekem soul kam bak. Man fit for trustim reminder bilong Jehovah, mekem man wea no garem savve for kamap wise. Olketa order from Jehovah olketa stret, mekem heart hem hapi; komandment bilong Jehovah hem klin, mekem eye shaen. Wei for fraet long Jehovah hem klin, hem stap olowe. Olketa judgment bilong Jehovah nao tru; olketa nao raeteous evribit. Olketa nao moabeta winim gold, yes, barava klinfala gold.”—Psalm 19: 7-10; 119:72.
7. Wanem nao kamaot from wei for no laek tingim olketa raeteous mark bilong God?
7 Long narasaed, olketa wea no want for followim olketa raeteous mark bilong God no faendem hapi and wei for free wea olketa lukaotem. Gogo, olketa luksavve hao no eniwan savve trikim God, bikos man bae harvestim samting wea hem plantim. (Galatians 6:7) Planti million pipol wea no laek tingim olketa Bible principle barava kasem olketa nogud samting olsem wei for babule nating, nogud sik, or kamap olsem slave long drug or drink. Sapos olketa no changem laef bilong olketa, bae gogo bilong olketa leadim olketa for dae and maet God killim olketa dae tu.—Matthew 7:13, 14.
8. Why nao olketa wea lovem Word bilong God hapi?
8 Bat, olketa wea lovem Word bilong God and followim bae barava kasem planti gudfala blessing distaem and long future. Olketa feel olsem law bilong God mekem olketa free, olketa barava hapi, and luk forward tumas long taem wea olketa bae kamap free from sin and olketa nogud samting bilong hem. (Romans 8:20, 21; James 1:25) Iumi fit for sure long disfala hope bikos hem garem faondeson long barava loving present bilong God for olketa man—ransom sakrifaes bilong only-born son bilong hem, Jesus Christ. (Matthew 20:28; John 3:16; Romans 6:23) Nambawan present hia hem barava pruvim deep love bilong God for olketa man and givim promis bilong planti moa blessing for evriwan wea go ahed for lisin long Jehovah.—Romans 8:32.
Tinghae Long Present Bilong Holy Spirit
9, 10. Hao nao iumi kasem gudfala samting from holy spirit wea hem present bilong Jehovah? Givim wanfala example.
9 Narafala loving present bilong God wea iumi shud tinghae long hem nao holy spirit bilong hem. Long day bilong Pentecost 33 C.E., aposol Peter hem encouragem bigfala sekson wea hipap long Jerusalem: “Repent, and letem each wan long iufala baptaes long nem bilong Jesus Christ for kasem forgiveness for sin bilong iufala, and iufala bae kasem free present bilong holy spirit.” (Acts 2:38) Distaem, Jehovah givim holy spirit long olketa servant bilong hem wea dedicate wea prea for datwan and want for duim will bilong hem. (Luke 11:9-13) Long taem bifor, disfala barava strongfala paoa wea winim evri narawan long universe—holy spirit or active force bilong God—strongim olketa man and woman bilong faith, and olketa Christian bifor tu. (Zechariah 4:6; Acts 4:31) Hem savve duim sem samting for iumi, nomata iumi maet feisim olketa hard samting or challenge olsem pipol bilong Jehovah.—Joel 2:28, 29.
10 Tingim example bilong Laurel, wea kasem polio and stap insaed wanfala machine for tekwind for 37 year.a Nomata datwan barava hard tumas, hem strong for servem God go kasem taem hem dae. Insaed olketa year wea go pas, blessing from Jehovah barava kasem Laurel. Olsem example, hem helpem samting olsem 17-fala difren wan for savve long truth bilong Bible, nomata hem stap insaed long datfala machine day and naet! Samting wea kasem hem mekem iumi tingim toktok bilong aposol Paul: “Taem mi wik, hem nao taem wea mi garem paoa.” (2 Corinthians 12:10) Tru nao, eni wei for win wea iumi kasem for preachim gud nius hem kam, no from savve and paoa bilong iumiseleva, bat from help bilong holy spirit bilong God, wea hem givim long olketa wea go ahed for lisin long voice bilong hem.—Isaiah 40:29-31.
11. Wanem nao olketa fasin wea spirit bilong God mekem grow insaed olketa wea werem “niufala fasin”?
11 Sapos iumi obey long wei for lisin long God, spirit bilong hem bae mekem grow insaed iumi olketa fasin bilong love, hapi, peace, patient for safa, kaenfala fasin, gudfala fasin, faith, kwaet fasin, and fasin for kontrolem seleva. (Galatians 5:22, 23) Disfala “frut bilong spirit” hem part long “niufala fasin” wea olketa Christian werem for changem olketa fasin wea olsem wild animal wea olketa garem bifor. (Ephesians 4:20-24; Isaiah 11:6-9) Disfala frut bilong love hem important tumas, wea hem nao “perfect wei for keepim wan mind.”—Colossians 3:14.
Christian Love—Lukaftarem Gud Disfala Present
12. Hao nao Tabitha and olketa nara Christian long first century showimaot love?
12 Christian love hem narafala nambawan present from Jehovah—wea iumi shud lukaftarem gud. Diswan hem love wea followim principle, bat hem garem bigfala feeling mekem olketa brata moa klos long each other and diswan winim famili tu. (John 15:12, 13; 1 Peter 1:22) Olsem example, tingim Tabitha, wanfala nambawan Christian woman long first century. “Hem fulap witim gudfala waka and givim planti present bilong mercy,” saed long olketa widow long kongregeson. (Acts 9:36) Olketa woman hia maet garem relative, bat Tabitha want for duim samting wea fitim hem for helpem and encouragem olketa. (1 John 3:18) Tabitha hem nambawan example! Love for brata hem muvim Prisca and Aquila for ‘putim laef bilong tufala long danger’ for Paul. Love tu muvim Epaphras, Luke, Onesiphorus, and olketa narawan for helpem datfala aposol taem hem stap insaed prison long Rome. (Romans 16:3, 4; 2 Timothy 1:16; 4:11; Philemon 23, 24) Tru nao, olketa Christian wea olsem distaem ‘garem love midolwan olketa seleva,’ wanfala present from God wea showimaot olketa nao trufala disaepol bilong Jesus.—John 13:34, 35.
13. Hao nao iumi savve showimaot iumi barava tinghae long Christian wei wea iumi evriwan brata?
13 Waswe, iu lukaftarem gud love wea stap insaed long Christian kongregeson? Waswe, iu tinghae long spiritual wei wea iumi evriwan brata, raonem full earth? Olketa hia tu naesfala present from antap wea olsem blessing. Hao nao iumi savve showimaot iumi tinghae long olketa? Long wei for duim holy service long God, share insaed olketa Christian meeting, and showimaot love and olketa narafala frut bilong spirit bilong God.—Philippians 1:9; Hebrews 10:24, 25.
“Olketa Present Olsem Man”
14. Wanem nao Christian needim mekem hem fit for serve olsem wanfala elder or ministerial servant?
14 Olketa Christian man wea want for servem nara brata olsem elder or ministerial servant garem gudfala goal. (1 Timothy 3:1, 8) For kamap fit for kasem olketa privilege olsem, brata mas wanfala spiritual man, wea savve gud long Bible and strong insaed field ministry. (Acts 18:24; 1 Timothy 4:15; 2 Timothy 4:5) Hem mas showimaot hambol fasin, wei for no ova tumas, and patient fasin, bikos olketa blessing bilong God no kasem pipol wea bighed, praod, and aftarem bignem. (Proverbs 11:2; Hebrews 6:15; 3 John 9, 10) Sapos hem marit, hem mas wanfala famili hed wea garem love and lukaftarem gud full famili bilong hem. (1 Timothy 3:4, 5, 12) Bikos hem tinghae long olketa spiritual riches, man olsem bae kasem blessing bilong Jehovah.—Matthew 6:19-21.
15, 16. Hu nao olsem “olketa present olsem man”? Givim olketa example.
15 Taem olketa wea serve olsem elder insaed kongregeson waka hard for talemaot gud nius, for olsem shepherd, and teacher, olketa givim iumi gudfala reason for tinghae long “olketa present olsem man.” (Ephesians 4:8, 11) Olketa wea kasem gudfala samting from loving wei wea olketa serve maet no evritaem talemaot thankiu, bat Jehovah lukim evri samting wea olketa faithful elder duim. Hem bae no forgetim love wea olketa showimaot for nem bilong hem long wei for minister long pipol bilong hem.—1 Timothy 5:17; Hebrews 6:10.
16 Tingim example bilong wanfala elder wea waka hard wea visitim wanfala Christian girl wea redy for kasem operation long brain. Wanfala fren bilong famili hem raet olsem: “Hem barava kaen tumas, givim bigfala saport, and kea. Hem ask for prea long Jehovah witim mifala. Taem hem go ahed for prea, dadi bilong girl hia [wea hem no wanfala Jehovah’s Witness] hem krae big, and wata foldaon from eye bilong evriwan insaed datfala hospital rum. Prea bilong datfala elder hem soft fogud, and Jehovah barava showimaot love for sendem hem long taem olsem!” Narafala Witness wea stap long hospital sei olsem abaotem olketa elder wea visitim hem: “Taem olketa wakabaot kam for bed bilong mi long intensive care unit, mi savve nomata wanem samting happen start long datfala taem, mi savve deal witim. Mi kamap strong and kasem peace.” Waswe, eniwan savve baem loving kea olsem? Barava nomoa nao! Hem wanfala present from God, wea hem givim thru long Christian kongregeson.—Isaiah 32:1, 2.
Present Bilong Field Ministry
17, 18. (a) Wanem present for serve nao Jehovah givim for evri pipol bilong hem? (b) Wanem help nao God provaedem mekem iumi savve duim ministry bilong iumi?
17 No eni honor hem moa big winim wei for servem Jehovah, wea hem Most Hae. (Isaiah 43:10; 2 Corinthians 4:7; 1 Peter 2:9) Nomata olsem, privilege for share insaed pablik ministry hem stap for evriwan—young and olo, man and woman—wea really want for servem God. Waswe, iu iusim evribit disfala spesol present? Samfala maet hol bak bikos olketa tingse olketa no garem savve, bat remember hao Jehovah givim holy spirit long olketa wea servem hem, and datwan nao bae help taem iumi short long eni samting.—Jeremiah 1:6-8; 20:11.
18 Jehovah givim waka for preachim Kingdom long olketa hambol servant bilong hem, no long olketa man wea praod and depend long savve bilong olketa seleva. (1 Corinthians 1:20, 26-29) Pipol wea hambol and no ova tumas luksavve long samting wea hard for olketa and depend long help bilong God taem olketa duim field ministry. Olketa tinghae tu long spiritual help wea kam from “datfala faithful wakman.”—Luke 12:42-44; Proverbs 22:4.
Hapi Famili Laef —Nambawan Present
19. Wanem nao olketa samting wea insaed long wei for win taem iu trainim pikinini?
19 Marit and hapi famili laef olketa nao present from God. (Ruth 1:9; Ephesians 3:14, 15) Olketa pikinini tu spesol ‘present from Jehovah,’ wea givim hapi long parents wea win for putim fasin bilong God insaed olketa. (Psalm 127:3) Sapos iu wanfala dadi or mami, go ahed for lisin long voice bilong Jehovah taem iu trainim olketa smol wan bilong iu followim Word bilong hem. Olketa wea duim olsem bae kasem saport and richfala blessing bilong Jehovah.—Proverbs 3:5, 6; 22:6; Ephesians 6:1-4.
20. Wanem nao maet helpem parents wea pikinini bilong olketa lusim tru worship?
20 Nomata parents wea followim God waka hard, maet samfala pikinini bilong olketa chus for lusim tru worship taem olketa kamap moa olo. (Genesis 26:34, 35) Diswan savve barava spoelem parents saed long feeling. (Proverbs 17:21, 25) Winim wei for givap evribit, hem maet helpem olketa for rememberim tokpiksa bilong Jesus abaotem son wea olabaot. Nomata datfala son lusim famili and aftarem olabaot gogo, bihaen, hem kam bak long haos bilong dadi bilong hem wea hapi tumas for welkamim hem long wei wea showimaot love. (Luke 15:11-32) Nomata wanem samting happen, faithful Christian parents savve sure Jehovah minim olketa, kea for olketa witim love, and saportim olketa evritaem.—Psalm 145:14.
21. Iumi shud lisin long hu nao, and why?
21 So, each wan long iumi mas disaedem wanem nao barava important long laef bilong iumi. Waswe, iumi strong for aftarem material samting, wea maet givim pain long iumi and famili bilong iumi? Or waswe, iumi aftarem ‘olketa gudfala and perfect present’ wea kam from “Father bilong olketa laet long heven”? (James 1:17) Satan, “father bilong laea,” wantem iumi for aftarem material samting and missim chance for kasem hapi and laef. (John 8:44; Luke 12:15) Bat, Jehovah laekem best samting for iumi. (Isaiah 48:17, 18) So, iumi mas go ahed for lisin long loving Father bilong iumi long heven and evritaem “kasem nambawan hapi” long hem. (Psalm 37:4) Sapos iumi aftarem gogo olsem, olketa nambawan present and bigfala blessing bilong Jehovah bae mekem iumi rich—and no eni pain witim datwan.
[Footnote]
a Lukim English Wekap!, January 22, 1993, page 18-21.
Waswe, Iu Remember?
• Wea nao iumi savve faendem barava nambawan hapi?
• Wanem nao samfala present wea Jehovah givim long pipol bilong hem?
• Why nao field ministry hem wanfala present?
• Wanem nao parents savve duim for kasem blessing bilong God taem olketa helpem pikinini bilong olketa for grow?
[Piksa long page 16]
Waswe, iu showimaot iu tinghae long Bible, present bilong God?
[Piksa long page 17]
Nomata barava hardfala samting, Laurel Nisbet strong for servem God
[Olketa Piksa long page 18]
Olsem Tabitha, planti pipol savve long olketa Christian distaem from wei for showimaot love
[Piksa long page 19]
Olketa Christian elder showimaot loving kea for olketa brata