Tingting Bilong Bible
Waswe, God Blessim Iumi Witim Riches?
“Blessing bilong Jehovah—hem nao mekem man rich, and hem no addim eni pain witim datwan.”—PROVERBS 10:22.
WASWE, scripture antap minim God blessim olketa servant bilong hem witim material riches? Samfala pipol ting olsem. Tingim toktok bilong man for raetem buk and man for preach long Pentecostal church long Australia: “Insaed buk [bilong mi] bae mi talem iu why iu needim moa selen and tu hao iu savve kasem moa selen . . . Sapos iu changem tingting bilong iu and garem stretfala tingting saed long selen, mi biliv bae iu kasem blessing and riches bilong God and no kasem eni problem moa saed long selen.”
Bat, kaen tingting olsem hem showimaot dat God no tinghae long poor pipol. Waswe, wei for rich long material wei hem really wanfala saen bilong blessing from God?
Kasem Blessing for Wanfala Purpose
Bible story abaotem samfala faithful servant bilong God wea hem blessim witim riches. Olsem example, Jacob lusim hom bilong hem witim stik bilong hem nomoa, bat 20 year bihaen, hem kam bak witim planti sheep, buluka, and donkey wea fit for formimap tufala camp. Bible sei, riches bilong Jacob hem wanfala present from God. (Genesis 32:10) Narafala example: Job lusim evriting bilong hem, bat bihaen Jehovah blessim hem witim “fotin thousand sheep and six thousand camel and tu thousand buluka and wan thousand mere donkey.” (Job 42:12) Jehovah givim staka riches long King Solomon gogo kam kasem distaem pipol still savve long hem olsem wanfala rich man.—1 Kings 3:13.
Long narasaed, Bible garem planti story abaotem olketa faithful pipol wea poor wea worshipim God. For sure God no panisim samfala witim wei for poor and blessim narawan witim riches. So, wanem nao purpose bilong God for givim riches long samfala?
Each taem hem duim for wanfala difren reason. Olketa material blessing bilong Jacob hem startim faondeson for buildim wanfala nation, for mek redy for promis Seed wea bae kam. (Genesis 22:17, 18) Gudfala living bilong Job showimaot klia hu nao mekem Job for kasem trabol, and datwan hem kliarem nem bilong Jehovah. (James 5:11) And Solomon iusim planti riches bilong hem for buildim wanfala nambawan temple. (1 Kings 7:47-51) Interesting samting, Jehovah iusim tu Solomon for raetem experience bilong hemseleva abaotem wei wea riches no savve givim hapi evribit.—Ecclesiastes 2:3-11; 5:10; 7:12.
Hao God Blessim Iumi
Jesus teachim olketa follower bilong hem for garem stretfala tingting saed long selen taem hem talem olketa for “no wari” abaotem olketa material samting. Hem talem olketa hao nomata Solomon wea garem bigfala glory hem no werem naes kaleko olsem olketa lily bilong field. Nomata olsem, Jesus sei: “So sapos God savve givim kaleko for olketa plant long field, . . . waswe, bae hem no givim kaleko long iufala, iufala wea garem smolfala faith?” Jesus promisim olketa Christian hao sapos olketa follower bilong hem luk aotem firstaem Kingdom and raeteous fasin bilong God, then bae olketa kasem kaikai, kaleko, and ples for stap. (Matthew 6:25, 28-33) Hao nao datfala promis hem fulfill?
Taem man followim kaonsel bilong Bible, samting wea kamaot from diswan nao hem olketa spiritual blessing. (Proverbs 10:22) Bat, man savve kasem olketa nara samting tu from diswan. Olsem example, Word bilong God sei olsem long olketa Christian: “Letem man wea steal no steal moa, bat letem hem duim hard waka.” (Ephesians 4:28) Hem sei tu hao “man wea waka witim lesy hand bae kasem lelebet samting nomoa, bat hand bilong man wea waka hard bae mekem hem rich.” (Proverbs 10:4) Planti boss laekem tumas olketa Christian wea honest and waka hard wea followim disfala kaonsel. Datwan hem barava wanfala blessing.
Bible teachim olketa Christian for stap klia tu long selfish hapitaem olsem wei for plei kura, wei for smoke wea savve mekem man dirty, and fasin for drunk wea savve mekem man kamap wik. (1 Corinthians 6:9, 10; 2 Corinthians 7:1; Ephesians 5:5) Olketa wea followim disfala advaes faendaot hao olketa no spendem staka selen and health bilong olketa kamap moabeta.
Winim Silver or Gold
Nomata olsem, for rich long material wei hem no main samting for showimaot God appruvim and blessim man. Olsem example, Jesus storyim poor spiritual living bilong samfala Christian long Laodicea taem hem sei: “Iu sei: ‘Mi rich and kasem staka samting and no needim eni samting moa,’ bat iu no savve iu barava no fit and iu no stap gud and iu poor and blind and naked.” (Revelation 3:17) Long difren wei, Jesus sei olsem long olketa wea poor long material wei bat healthy long spiritual wei: “Mi savve long trabol wea kasem iu and wei wea iu poor tumas—bat iu rich.” (Revelation 2:9) Nomata olketa faithful Christian hia safa saed long selen from pipol persecutim olketa, olketa garem riches wea winim silver or gold.—Proverbs 22:1; Hebrews 10:34.
Jehovah God blessim waka bilong olketa wea traem best for duim will bilong hem. (Psalm 1:2, 3) Hem strongim olketa for deal witim olketa test, for provaedem need bilong famili bilong olketa, and for luk aotem firstaem Kingdom bilong hem. (Psalm 37:25; Matthew 6:31-33; Philippians 4:12, 13) So, olketa tru Christian no ting long material samting olsem main blessing bilong God bat olketa trae kamap “rich long olketa gudfala waka.” Taem olketa mekem grow klos wei for fren witim Creator, olketa Christian “mekem for olketa seleva gudfala faondeson for future.”—1 Timothy 6:17-19; Mark 12:42-44.