“Kam Klosap Long God”
“Kam klosap long God, and hem bae kam klosap long iufala.”—JAMES 4:8.
1, 2. (a) Planti taem wanem nao olketa man savve talem? (b) Wanem toktok for encouragem man nao James talem, and why nao need kamap for talem datwan?
“GOD hem stap witim iumi.” Toktok hia stap long flag bilong planti nation and uniform bilong olketa soldia tu. “Iumi trust long God” hem stap long staka coin and pepa selen distaem. Planti taem olketa man sei olketa fren gud witim God. Bat waswe, iu agree hao for garem wei for fren olsem minim moa samting winim wei for tok abaotem or raetem olsem saen?
2 Bible showimaot hao man fit for fren witim God. Bat hem need for waka hard. Samfala anointed Christian long first century tu need for strongim wei wea olketa fren witim Jehovah God. Christian overseer James mas givim warning long samfala saed long samting wea body wantem and hao olketa lusim wei for klin long spiritual wei. Insaed datfala kaonsel hem talem disfala nambawan toktok for encouragem man: “Kam klosap long God, and hem bae kam klosap long iufala.” (James 4:1-12) Wanem nao James hem minim taem hem talem datfala toktok “kam klosap”?
3, 4. (a) Olketa wea readim leta bilong James long first century maet rememberim wanem, taem olketa lukim toktok “kam klosap long God”? (b) Why nao iumi sure iumi savve fren witim God?
3 James iusim wanfala toktok wea planti long datfala taem savve. Law bilong Moses talem olketa klia instruction long olketa priest abaotem hao pipol bilong Jehovah savve “kam klosap long” hem thru long olketa. (Exodus 19:22) Maet diswan mekem olketa wea readim leta bilong James for tingim moa hao wei for story witim Jehovah hem no samting for ting smol long hem. Jehovah nao garem barava hae position long full universe.
4 Long narasaed, wanfala man wea studyim Bible sei, “disfala encouragement [long James 4:8] showimaot wei for barava tingim gud saed.” James savve hao long loving wei Jehovah evritaem invaetem olketa man wea no perfect for kam klosap long Hem. (2 Chronicles 15:2) Sakrifaes bilong Jesus openem go moa datfala wei for kam long Jehovah. (Ephesians 3:11, 12) Distaem, wei for fren witim God hem open for planti million pipol! So, hao nao iumi savve iusim gud disfala nambawan chance? For lelebet taem iumi bae lukim thrifala wei wea iumi savve kam klosap long Jehovah God.
Go Ahed for “Kasem Savve” Abaotem God
5, 6. Hao nao example bilong Samuel showimaot wanem hem insaed long wei for “kasem savve” abaotem God?
5 Long John 17:3, Jesus sei: “Diswan nao minim laef olowe, for olketa kasem savve long iu, datfala only tru God, and long datwan wea iu sendem kam, Jesus Christ.” Planti transleison bilong disfala verse difren lelebet from New World Translation. Olketa no sei “kasem savve” long God, bat olketa transleitim datfala word olsem “for savve long” God or “go ahed for savve long” God. Bat, samfala savveman sei mining bilong first Greek languis hem minim samting wea go ahed for olowe, wea savve leadim man for barava savve and klos long narawan.
6 Wei for barava savve long God hem no niu samting long taem bilong Jesus. Olsem example, long Hebrew Scripture, iumi readim hao taem Samuel hem wanfala boy, “hem no savve yet long Jehovah.” (1 Samuel 3:7) Waswe, diswan minim Samuel savve lelebet nomoa abaotem God bilong hem? Nomoa. Iumi sure dadi and mami bilong hem and olketa priest teachim hem staka samting finis. Bat, wanfala savveman sei Hebrew word long datfala verse “hem fitim for iusim for wanfala barava klos fren.” Samuel no barava savve and klos fren yet long Jehovah, olsem hem bae duim taem hem serve olsem man for toktok for Jehovah bihaen. Taem Samuel go ahed for growap, hem barava savve long Jehovah, and fren long klos wei witim hem.—1 Samuel 3:19, 20.
7, 8. (a) Why nao iumi shud no fraet for studyim olketa deep teaching bilong Bible? (b) Wanem nao samfala deep truth insaed Word bilong God wea iumi shud studyim?
7 Waswe, iu kasem savve abaotem Jehovah witim goal for fren klos witim hem? For duim olsem, iu need for “barava hangre” for spiritual kaikai wea God provaedem. (1 Peter 2:2) No satisfae nomoa for kasem olketa main teaching. Waka hard for kasem olketa teaching bilong Bible wea moa deep. (Hebrews 5:12-14) Waswe, iu fraetem olketa teaching olsem, from iu ting olketa hard tumas for minim? Sapos olsem, remember hao Jehovah hem “Barava Nambawan Teacher.” (Isaiah 30:20) Hem savve hao for teachim olketa deep truth long mind bilong man wea no perfect. And hem savve blessim hard waka bilong iu for minim samting wea hem teachim long iu.—Psalm 25:4.
8 Hem gud tumas for lukluk long iuseleva saed long samfala “deep samting bilong God.” (1 Corinthians 2:10) Olketa hia no kaen boring subject wea pipol wea skulim religion and olketa bigman bilong church raoa abaotem. Olketa hia gudfala teaching wea mekem iumi savve long mind and heart bilong loving Father bilong iumi. Olsem example, datfala ransom, datfala “holy secret,” and olketa difren covenant wea Jehovah iusim for blessim pipol bilong hem and fulfillim olketa purpose bilong hem—olketa subject hia and planti moa olketa barava interesting subject for duim research and study long hem.—1 Corinthians 2:7.
9, 10. (a) Why nao hem danger samting for garem praod fasin, and wanem nao bae helpem iumi for stap klia long hem? (b) Long saed bilong savve abaotem Jehovah, why nao iumi shud trae for hambol?
9 Taem savve bilong iu long olketa deep spiritual truth kamap moa big, keakea long danger wea kamaot from wei for garem savve—praod fasin. (1 Corinthians 8:1) Praod fasin hem danger samting, from hem mekem olketa man stap farawe from God. (Proverbs 16:5; James 4:6) Remember, no eni man garem eni reason for tokplas abaotem savve wea hem garem. Olsem example, tingim olketa toktok hia from introduction bilong wanfala buk wea storyim olketa niu samting olketa lanem saed long science: “Taem mifala savve long moa samting, mifala barava luksavve hao mifala no savve long planti samting. . . . Evriting mifala lanem hem smol nomoa sapos mifala markem witim wanem mifala no lanem yet.” Kaen hambol fasin olsem hem gud tumas. So, saed long barava bigfala savve—savve abaotem Jehovah God—iumi garem moa reason for stap hambol olowe. Why nao olsem?
10 Lukim samfala toktok long Bible abaotem Jehovah. “Olketa tingting bilong iu barava deep.” (Psalm 92:5) “Savve bilong [Jehovah] barava winim eniting wea iumi savve talem.” (Psalm 147:5) “No eniwan savve minim wei bilong [Jehovah] for minim samting.” (Isaiah 40:28) “O riches and wisdom and savve bilong God hem deep tumas!” (Romans 11:33) Tru nao, iumi bae nating savve long evri samting abaotem Jehovah. (Ecclesiastes 3:11) Nomata hem teachim iumi planti nambawan samting finis, bae iumi olowe garem staka samting moa for lanem. Tru nao, datwan mekem iumi barava hapi and hambol! So, taem iumi go ahed for lane, iumi want for evritaem iusim savve bilong iumi for kam klosap long Jehovah and helpem nara pipol for duim olsem tu—no olsem wei for mekem iumiseleva hae winim nara pipol.—Matthew 23:12; Luke 9:48.
Showimaot Love Bilong Iu for Jehovah
11, 12. (a) Hao nao savve wea iumi kasem abaotem Jehovah shud affectim iumi? (b) Wanem nao showimaot sapos love wea man garem for God hem tru wan or nomoa?
11 Aposol Paul hem joinim savve witim love. Hem raet olsem: “Diswan nao mi go ahed for prea for hem, for love bilong iufala evritaem kamap moa big long stretfala savve and fasin for luksavve evribit.” (Philippians 1:9) Winim wei for mekem iumi fulap witim praod fasin, evri nambawan truth wea iumi lanem abaotem Jehovah and purpose bilong hem shud mekem love bilong iumi for Father bilong iumi long heven hem grow.
12 Tru, planti wea sei olketa lovem God no really lovem hem. Maet olketa garem trufala strong feeling insaed heart bilong olketa. Olketa feeling olsem gud tumas sapos man garem followim stretfala savve. Bat wei for garem olketa feeling no minim man hem lovem God. Why nao olsem? Lukim wanem Word bilong God talem abaotem mining bilong kaen love olsem: “Diswan nao mining bilong love bilong God, for iumi obeyim evri komandment bilong hem.” (1 John 5:3) So, love for Jehovah hem tru only taem man showimaot long wei for obey.
13. Hao nao wei for fraet long God bae helpem iumi for showimaot love bilong iumi for Jehovah?
13 Wei for fraet long God bae helpem iumi for obeyim Jehovah. Disfala bigfala wei for tinghae and garem deep respect for Jehovah hem kamaot from wei for kasem savve abaotem hem, for lane abaotem holy fasin, glory, paoa, justice, wisdom, and love bilong hem. Wei for fraet olsem hem important tumas sapos man laek for kam klosap long hem. Tru nao, lukim samting wea Psalm 25:14 hem talem: “Klos wei for fren witim Jehovah hem bilong olketa wea fraet long hem.” So sapos iumi garem stretfala wei for fraet for mekem Father bilong iumi long heven no hapi, iumi savve kam klosap long hem. Wei for fraet long God bae helpem iumi for followim wise kaonsel wea stap long Proverbs 3:6: “Long evri samting iu duim, lisin long hem, and hemseleva nao bae stretem gogo bilong iu.” Wanem nao datwan minim?
14, 15. (a) Wanem nao samfala samting wea iumi mas disaedem long evriday living? (b) Hao nao iumi savve disaedem samting long wei wea showimaot iumi fraet long God?
14 Iu mas disaedem samting evriday, olketa big and smol samting. Olsem example, wanem wei for story nao iu bae duim witim wakfren, skulfren, and olketa neiba? (Luke 6:45) Waswe, bae iu waka hard long samting iu mas duim, or bae iu luk aotem olketa wei for duim datwan bat no waka hard? (Colossians 3:23) Waswe, bae iu kamap moa klos long olketa wea showim lelebet or no eni love for Jehovah, or bae iu luk aotem olketa wei for strongim wei wea iu fren witim spiritual pipol? (Proverbs 13:20) Wanem nao bae iu duim, nomata long olketa smol wei, for saportim olketa samting bilong Kingdom bilong God? (Matthew 6:33) Sapos iu followim olketa principle insaed olketa Scripture hia long olketa samting iu disaedem evriday, then iu barava lisin long Jehovah ‘long evri samting wea iu duim.’
15 Hem olsem long evri samting wea iumi disaedem, iumi shud letem disfala tingting leadim iumi: ‘Wanem nao Jehovah bae wantem mi for duim? Wanem nao bae mekem hem barava hapi?’ (Proverbs 27:11) For showimaot wei for fraet long hem olsem hem nambawan wei for showimaot love for Jehovah. Wei for fraet long God bae muvim iumi tu for stap klin—long spiritual wei, saed long fasin, and body. Remember, long datfala sem verse wea James encouragem olketa Christian for “kam klosap long God,” hem givim disfala encouragement: “Klinim hand bilong iufala, iufala sinner, and mekem heart bilong iufala kamap klin, iufala wea no sure.”—James 4:8.
16. Wanem samting nao iumi no savve duim taem iumi give long Jehovah, bat wanem nao iumi savve win for duim evritaem?
16 Tru, wei for showimaot love bilong iumi for Jehovah hem minim moa samting winim wei for no duim nogud samting. Love muvim iumi tu for duim gudfala samting. Olsem example, long wanem wei nao barava bigfala kaenfala fasin bilong Jehovah affectim iumi? James raet olsem: “Evri gudfala present and evri perfect present hem from antap, from hem kam from Father bilong olketa laet long heven.” (James 1:17) Tru, taem iumi givim olketa samting bilong iumi long Jehovah, iumi no mekem hem moa rich. Hem ownim finis evri samting. (Psalm 50:12) And taem iumi givim taem and strong bilong iumi long Jehovah, iumi no duim samting wea hem needim tumas for iumi duim. Nomata sapos iumi no willing for preachim gud nius bilong Kingdom bilong God, hem savve mekem olketa ston for singaot! So, why nao iumi givim material samting, taem, and strong bilong iumi long Jehovah? Main samting nao, long wei olsem iumi showimaot love bilong iumi for hem witim full heart, soul, mind, and strong bilong iumi.—Mark 12:29, 30.
17. Wanem nao savve muvim iumi for hapi for give long Jehovah?
17 Taem iumi give long Jehovah, iumi shud duim witim hapi, “from God lovem man wea hapi for give.” (2 Corinthians 9:7) Principle wea stap long Deuteronomy 16:17 savve helpem iumi for hapi for give: “Datfala present long hand bilong each wan mas fitim wei wea God bilong iu Jehovah givim iu blessing.” Taem iumi ting raonem bigfala kaenfala fasin bilong Jehovah for iumi, diswan mekem iumi willing for give long hem. Wei for give olsem mekem heart bilong hem hapi, long sem wei wea smol present wea pikinini givim hem mekem dadi or mami hapi tumas. For showimaot love bilong iumi long wei olsem bae helpem iumi for kam klosap long Jehovah.
Buildim Klos Wei for Fren Thru Long Prea
18. Why nao hem gud for tingim hao for mekem olketa prea bilong iumi kamap moabeta?
18 Taem wea iumi prea seleva hem barava gudfala chance for story long klos wei witim Father bilong iumi long heven. (Philippians 4:6) From prea hem wanfala important wei for kam klosap long God, hem gud for ting abaotem hao gud nao prea bilong iumi. Diswan no minim olketa prea hia mas stael and followim wankaen order, bat olketa mas trufala toktok wea kam from heart. Hao nao iumi savve mekem olketa prea bilong iumi kamap moabeta?
19, 20. Why nao iumi mas tingting firstaem bifor iumi prea, and wanem nao samfala subject wea fitim iumi for ting raonem?
19 Maet hem gud for firstaem tingting raonem wanem for talem bifor iumi prea. Sapos iumi duim olsem, prea bilong iumi savve abaotem olketa important samting wea iumi tingim firstaem and garem mining, and bae iumi stap klia long wei for repeatim sem toktok wea kam kwiktaem long mind bilong iumi. (Proverbs 15:28, 29) Maet wei for ting raonem olketa subject wea Jesus talem insaed example prea bilong hem and then lukim hao nao olketa hia join witim living bilong iumi savve helpem iumi. (Matthew 6:9-13) Olsem example, iumi savve askem iumiseleva wanem smol part nao iumi hope for duim insaed wei for duim will bilong God long earth. Iumi savve talem Jehovah wei wea iumi want for hem iusim iumi long best wei wea fitim iumi and askem help bilong hem for duim eni assignment wea hem givim long iumi. Maet iumi garem hevi saed long material need. Maet iumi needim forgiveness for samfala sin, and maet iumi need for forgivim samfala long bigfala wei moa. Maet wanfala samting testim iumi, and iumi luksavve iumi barava needim protection bilong Jehovah long datwan.
20 And tu, maet iumi tingim samfala wea really needim help bilong Jehovah. (2 Corinthians 1:11) Bat, iumi mas no forgetim wei for sei thankiu. Sapos iumi tek taem for ting abaotem, iumi savve tingim olketa reason for sei thankiu long Jehovah and praisem hem each day for staka gud samting wea hem givim. (Deuteronomy 8:10; Luke 10:21) Wei for duim olsem bae givim nara gud samting—hem savve helpem iumi for barava tinghae and tingim gud saed bilong laef.
21. Wei for studyim olketa wanem example insaed Bible nao savve helpem iumi taem iumi story witim Jehovah insaed prea?
21 Wei for study savve helpem prea bilong iumi tu. Olketa nambawan prea bilong olketa faithful man and woman stap insaed Word bilong God. Olsem example, sapos iumi feisim wanfala bigfala problem, wea mekem iumi wari and maet feel fraet for laef bilong iumi or olketa wea iumi lovem, maet iumi savve readim prea bilong Jacob taem hem redy for meetim brata bilong hem Esau, wea laek for pei bak. (Genesis 32:9-12) Or maet iumi studyim prea bilong King Asa taem army bilong samting olsem wan million man from Ethiopia kam for againstim pipol bilong God. (2 Chronicles 14:11, 12) Sapos wanfala problem wea kasem iumi wea maet mekem pipol tok spoelem nem bilong Jehovah, then hem gud for readim prea bilong Elijah front long pipol wea worshipim Baal long Maunt Carmel, and tu prea bilong Nehemiah saed long wei wea Jerusalem hem nogud. (1 Kings 18:36, 37; Nehemiah 1:4-11) Wei for readim and ting raonem olketa prea olsem savve strongim faith bilong iumi and givim iumi olketa idea long wanem nao best wei for story witim Jehovah abaotem olketa wari wea hevi long iumi.
22. Wanem nao yeartext for 2003, and wanem nao iumi savve askem iumiseleva long datfala full year?
22 Tru nao, no eni honor hem moa hae, or goal wea moa hae, winim wei for followim kaonsel bilong James for “kam klosap long God.” (James 4:8) Iumi want for duim olsem long wei for go ahed for grow long savve bilong iumi abaotem God, long wei for showimaot love bilong iumi for hem long bigfala wei moa, and for fren long klos wei witim hem insaed olketa prea bilong iumi. Insaed long year 2003, taem iumi tingim evritaem James 4:8 olsem yeartext, iumi want for go ahed for lukluk gud long iumiseleva for lukim sapos iumi kam klosap long Jehovah. Bat, waswe long last part bilong disfala toktok? Long wanem wei nao Jehovah ‘bae kam klosap long iu,’ wea bae mekem iumi kasem olketa wanem blessing? Next article bae storyim diswan.
Waswe, Iu Remember?
• Why nao wei for kam klosap long Jehovah hem serious samting?
• Wanem nao samfala goal wea iumi savve markem saed long wei for kasem savve abaotem Jehovah?
• Hao nao iumi savve showimaot iumi garem really love for Jehovah?
• Wanem nao olketa wei wea iumi savve buildimap klos wei for fren witim Jehovah insaed long prea?
[Blurb long page 12]
Yeartext for 2003 hem: ‘Kam klosap long God, and hem bae kam klosap long iu.’—James 4:8.
[Piksa long page 8, 9]
Taem hem growap, Samuel kasem wei for savve gud long Jehovah
[Piksa long page 12]
Prea wea Elijah talem long Maunt Carmel hem gudfala example for iumi