Waka Hard for Garem Peace
“Iumi mas traem best for stap gud witim nara pipol.”—ROM. 14:19.
1, 2. Why nao Olketa Jehovah’s Witness garem peace?
DISTAEM staka pipol no stap gud witim narawan. Nomata pipol long sem kantri wea story long sem languis tu divaed bikos long religion, politik, selen, or education. Bat pipol bilong Jehovah garem peace nomata olketa kam from “evri kantri and tribe and pipol and languis.”—Rev. 7:9.
2 Staka reason stap why iumi garem peace. Main reason hem bikos iumi “fren gud witim God.” Iumi fren gud witim God bikos iumi showimaot faith long Son bilong hem wea dae for iumi. (Rom. 5:1; Eph. 1:7) Jehovah givim holy spirit tu long evriwan wea faithful long hem and datfala spirit mekem iumi for garem peace. (Gal. 5:22) Iumi garem peace and wan mind tu bikos iumi “no olsem pipol long world.” (John 15:19) Diswan minim iumi no saedem politik or joinim war. Bible sei pipol bilong Jehovah “hammerim naef for faet for kamap hou.”—Isa. 2:4.
3. (a) From iumi garem peace, datwan mekem iumi for duim wanem? (b) Wanem nao bae iumi storyim?
3 Iumi “lovem” evriwan long kongregeson nomata iumi kam from difren ples, garem difren kastom, or tingting. (John 15:17) From iumi garem peace, iumi laek for “duim gudfala samting long evriwan, . . . main wan nao olketa wea garem sem biliv.” (Gal. 6:10) Iumi tinghae tumas long wei wea iumi fren gud witim Jehovah and stap gud witim olketa brata and sista. Iumi mas no letem eni samting for spoelem datwan. Bae iumi storyim wanem iumi savve duim for garem peace witim olketa long kongregeson.
Taem Iumi “Sin”
4. Wanem nao iumi savve duim sapos iumi mekem narawan feel nogud?
4 Disaepol James sei: “Iumi evriwan savve sin staka taem. Sapos eniwan hem no sin long toktok bilong hem, hem wanfala perfect man.” (Jas. 3:2) So samfala taem maet wanfala brata no agree witim narawan or maet tufala garem problem witim each other. (Phil. 4:2, 3) Nomata olsem, tufala savve stretem datwan and no spoelem peace long kongregeson. Olsem example, sapos iumi mekem narawan feel nogud, tingim kaonsel wea Jesus talem iumi for followim.—Readim Matthew 5:23, 24.
5. Taem samwan mekem iumi feel nogud, wanem nao iumi savve duim for garem peace?
5 Waswe sapos samwan duim nogud samting long iumi? Waswe, iumi shud tingse datfala man nao shud kam and sei sorre long iumi? Long 1 Corinthians 13:5 hem sei: “[Man wea garem love] no tingim olowe nogud samting wea narawan duim long hem.” Taem samwan mekem iumi feel nogud, iumi showimaot iumi laek garem peace taem iumi forgivim hem and no tingim moa wanem hem duim. (Readim Colossians 3:13.) Datwan hem best samting for duim taem eni smol problem kamap bikos hem helpem iumi for gohed garem wan mind witim olketa brata and sista. Iumi hapi tu bikos iumi duim stret samting. Wanfala proverb sei wei for forgetim rong samting hem naes tumas.—Prov. 19:11.
6. Wanem nao iumi savve duim sapos samwan duim nogud samting wea hard for iumi forgetim?
6 Waswe sapos samwan duim nogud samting long iumi and hem hard for iumi forgetim? Hem no wise for storyim long nara pipol. Wei for gossip savve spoelem peace long kongregeson. So wanem nao iumi mas duim for stretem datfala problem? Matthew 18:15 sei: “Sapos brata bilong iu hem sin, iuseleva nao go story witim hem, mekem hem savve samting hem duim hem no stret. Sapos hem acceptim wanem iu talem, iu helpem hem nao for duim moa stret samting.” Nomata Matthew 18:15-17 storyim wanem for duim taem samwan duim bigfala sin, iumi savve followim principle long verse 15 for olketa nara problem tu. Taem iumi garem problem witim samwan, hem gud for iumi story witim hem nomoa. Iumi shud tok kaen and trae for mek peace witim hem.a
7. Why nao iumi shud kwiktaem stretem problem?
7 Aposol Paul sei: “Maet iufala kros, bat iufala mas no sin. Iufala mas finis for kros bifor sun hem go daon. No givim chance long Devil.” (Eph. 4:26, 27) Jesus sei: “Kwiktaem for stretem eni problem witim man wea laek tekem iu long kot.” (Matt. 5:25) So for gohed garem peace, iumi mas kwiktaem stretem problem. Sapos nomoa, datfala problem savve kamap big olsem soa wea iumi no kwiktaem putim medicine long hem. Iumi shud no letem wei for praod, jealous, and wei for lovem selen mekem iumi no kwiktaem stretem problem.—Jas. 4:1-6.
Taem Problem Kamap Midolwan Staka Pipol
8, 9. (a) Wanem nao olketa long kongregeson long Rome raoa abaotem? (b) Wanem kaonsel nao Paul givim long olketa?
8 Maet staka brata and sista nao insaed long problem wea kamap long kongregeson. Hem nao samting wea happen long Rome. Wanfala raoa kamap midolwan long olketa Jew Christian and olketa Christian wea no Jew. Samfala lukdaonem olketa wea konsens bilong olketa wik. Olketa judgem olketa long samting wea man seleva nao fit for disaedem. Wanem nao Paul talem long olketa brata and sista long datfala kongregeson?—Rom. 14:1-6.
9 Paul kaonselem tufala grup hia. Olketa wea garem konsens wea kasem gudfala training luksavve olketa no need for followim Law bilong Moses. Paul talem olketa for no lukdaonem olketa wea garem konsens wea wik. (Rom. 14:2, 10) Datwan savve mekem olketa wea konsens bilong olketa wik for lusim Jehovah. Paul sei: “No letem kaikai for spoelem waka bilong God.” Hem sei tu: “Hem gud for no kaikaim meat or drinkim wine or duim eni samting wea savve spoelem faith bilong brata bilong iu.” (Rom. 14:14, 15, 20, 21) Paul talem olketa wea garem konsens wea wik for no judgem narawan bikos olketa garem difren tingting. (Rom. 14:13) Hem sei: “Mi talem iufala evriwan for no tinghae tumas long iufala seleva.” (Rom. 12:3) Bihaen Paul kaonselem tufala grup hia, hem sei: “So iumi mas traem best for stap gud witim nara pipol and duim olketa samting wea savve strongim narawan.”—Rom. 14:19.
10. Olsem olketa Christian long kongregeson long Rome, wanem nao olketa wea insaed long problem shud duim?
10 Iumi savve olketa long kongregeson long Rome acceptim kaonsel wea Paul talem and changem wei bilong olketa. Sapos iumi followim wanem Bible talem, iumi savve stretem eni raoa wea kamap midolwan olketa brata and sista. Olsem olketa Christian long Rome, sapos eni problem kamap long kongregeson, evriwan wea insaed long datwan need for changem samfala samting mekem olketa “stap gud witim narawan.”—Mark 9:50.
Wanem Olketa Elder Savve Duim for Helpem Iumi
11. Wanem nao elder shud duim sapos samwan laek for story long hem abaotem problem wea hem garem witim nara brata or sista?
11 Waswe sapos samwan garem problem witim narawan long famili or witim Christian brata or sista and laek for storyim datwan long elder? Proverbs 21:13 sei: “Eniwan wea satem ear bilong hem and no herem man wea poor taem hem singaot, bae no eniwan tu herem hem taem hem singaot.” Elder bae no “satem ear bilong hem” taem samwan askem hem for help. Bat nara proverb sei: “Man wea toktok firstaem bae olketa tingse hem tok tru go kasem taem nara man kam askem olketa kwestin long hem.” (Prov. 18:17, New English Translation) Elder shud lisin gud, bat hem mas careful for no mekem eni disison taem hem no savve long full story. Bihaen elder herem wanem brata or sista talem, elder shud askem hem sapos hem story finis witim narawan wea mekem hem feel nogud. Elder savve storyim tu wanem Bible talem wea savve helpem hem for mek peace.
12. Wanem thrifala example nao showimaot hem no wise for kwiktaem disaedem samting sapos man no herem full story?
12 Hem no wise for kwiktaem disaedem samting sapos iumi no herem full story. Tingim thrifala example long Bible. Waef bilong Potiphar laea and sei Joseph trae for rapem hem. Potiphar bilivim wanem waef bilong hem talem. From hem kros tumas hem putim Joseph long prison. (Gen. 39:19, 20) Ziba, wakaman bilong Mephibosheth, talem King David hao Mephibosheth helpem olketa enemy bilong David. David bilivim Ziba and sei: “Evri samting wea hem bilong Mephibosheth, distaem mi givim long iu.” (2 Sam. 16:4; 19:25-27) Olketa enemy bilong olketa Jew talem King Artaxerxes hao olketa Jew buildim bak Jerusalem bikos olketa laek for againstim hem. King hia bilivim datfala laea and talem olketa Jew for stop for wakem temple bilong God. (Ezra 4:11-13, 23, 24) Hem wise for olketa elder followim kaonsel wea Paul talem long Timothy for no kwiktaem disaedem samting sapos olketa no savve long full story.—Readim 1 Timothy 5:21.
13, 14. (a) Taem tufala man raoa, wanem nao iumi mas tingim? (b) Wanem nao bae helpem olketa elder disaedem stret samting?
13 Bible sei: “Nomata sapos man tingse hem savve long samting, hem no savve gud yet long evri samting abaotem datwan.” (1 Cor. 8:2) Taem tufala man raoa, maet iumi tingse iumi savve long evri samting wea tufala raoa abaotem. Bat hem gud for tingim maet iumi no savve long evri samting wea happen and abaotem tufala tu. Olketa elder mas careful taem olketa lukluk long problem wea kamap and no letem olketa laea story or gossip affectim wanem olketa disaedem! Olketa shud no bilivim man nomoa bikos hem rich. Jehovah chusim Jesus for judge, and hem judgem pipol long stretfala wei. Hem no “judgem man followim samting wea hem lukim, or givim kaonsel followim samting wea hem herem.” (Isa. 11:3, 4) Jesus depend long holy spirit bilong God for leadim hem. Olketa elder tu mas duim sem samting.
14 Bifor olketa elder disaedem samting, olketa need for askem Jehovah for holy spirit. Taem olketa iusim Bible and buk wea “wakaman wea faithful and wise” provaedem, datwan showimaot olketa letem holy spirit leadim olketa.—Matt. 24:45.
Iumi Mas Gohed Fren Gud Witim God
15. Sapos iumi savve wanfala Christian duim bigfala sin, wanem taem nao iumi shud talem datwan long olketa elder?
15 Bible sei iumi mas traem best for garem peace. Hem sei tu: “Wisdom from heven hem mekem man for klin, stap gud witim narawan.” (Jas. 3:17) Bible sei first samting wea iumi mas duim hem for iumi klin. Datwan minim iumi followim wanem God sei hem stret and duim samting wea hem hapi long hem. Sapos iumi savve wanfala Christian duim bigfala sin, iumi shud talem hem for story long olketa elder. (1 Cor. 6:9, 10; Jas. 5:14-16) Sapos hem no duim datwan, iumi nao shud talem long olketa elder. Sapos iumi no story witim olketa elder bikos iumi laek gohed fren witim datfala brata or sista, iumi tu sin.—Lev. 5:1; readim Proverbs 29:24.
16. Wanem nao iumi lanem from samting wea Jehu duim long King Jehoram?
16 Samting wea Jehu duim showimaot hem important for duim stret samting winim wei for gohed fren witim man wea duim sin. God talem Jehu for panisim famili bilong King Ahab. King Jehoram hem son bilong Ahab and Jezebel and hem wanfala rabis king. Taem Jehoram go for meetim Jehu, hem sei: “Jehu, waswe, iu kam for mek peace?” Jehu sei: “Hao nao mi savve mek peace? Mami bilong iu Jezebel gohed for durong and duim staka samting wea join witim devildevil!” (2 Ki. 9:22) Then Jehu tekem bow and sutim Jehoram long heart. Olsem Jehu, olketa elder tu need for duim stret samting sapos man wea duim sin no repent. Hem no stret for olketa elder letem man olsem for gohed stap long kongregeson bikos olketa laek gohed fren witim hem. Olketa elder mas aotem man wea no repent mekem kongregeson gohed fren gud witim God.—1 Cor. 5:1, 2, 11-13.
17. Wanem nao evri Christian need for duim mekem olketa garem peace?
17 Staka taem olketa problem wea kamap hem no olketa bigfala sin. So hem important for showimaot love and no tingim moa mistek wea narawan duim. Bible sei: “Man wea forgivim narawan, hem showimaot love. Bat man wea gohed for storyim datwan hem spoelem wei for fren.” (Prov. 17:9) Sapos iumi duim wanem Bible talem, bae iumi garem peace long kongregeson and gohed fren gud witim Jehovah.—Matt. 6:14, 15.
God Blessim Olketa wea Garem Peace
18, 19. Taem iumi traem best for garem peace witim narawan, wanem gud samting nao bae iumi kasem?
18 Jehovah blessim iumi taem iumi traem best for garem peace witim narawan. Iumi bae fren gud witim Jehovah and kongregeson bae garem wan mind. Taem iumi traem best for garem peace witim olketa long kongregeson, datwan bae helpem iumi tu for stap gud witim pipol wea iumi preachim “gud nius abaotem peace” long olketa. (Eph. 6:15) Bae iumi “kaen long evriwan” and “no changem bak nogud samting wea narawan duim.”—2 Tim. 2:24.
19 Bible sei “pipol wea raeteous and pipol wea no raeteous bae laef bak.” (Acts 24:15) Diswan minim Jehovah bae mekem staka million pipol wea kam from difren ples or stap laef long difren taem for laef bak. Pipol wea laef “start kam long taem wea olketa man born long earth” bae laef bak tu. (Luke 11:50, 51) Hem bae nambawan privilege for teachim olketa wea laef bak for stap gud witim narawan. Training wea iumi kasem distaem bae barava helpem iumi long datfala taem!
[Footnote]
a Bible storyim wanem for duim taem bigfala problem kamap, olsem wei for talem laea for spoelem narawan or trikim pipol. Lukim Wastaoa, October 15, 1999, page 17-22.
Wanem Nao Iu Lanem?
• Wanem nao iumi mas duim sapos iumi mekem narawan feel nogud?
• Taem samwan mekem iumi feel nogud, wanem nao iumi savve duim?
• Taem tufala man raoa, wanem nao iumi mas tingim?
• Why nao hem important for duim stret samting winim wei for gohed fren witim man wea duim sin?
[Olketa Piksa long page 29]
Jehovah lovem olketa wea forgivim narawan