“Long Future Iu Bae Kamap Wise”

“Staka man iusim olketa first year long laef bilong olketa for mekem olketa last year long laef bilong olketa barava nogud.” Hem nao toktok bilong Jean de La Bruyère, wanfala man for raet long France long mek-17 century. Tru nao, wanfala young wan wea no savve disaed strong maet no sure wanem for duim, and diswan mekem hem feel sorre and wiki. Long narasaed, wanfala young wan wea bighed maet go ahed long nogud wei, and diswan stopem hem for kasem hapi bihaen. Nomata wanem, wei for no duim samting wea stret or wei for duim rong samting savve lead go long sorre.

Hao nao man savve missim diswan? Taem hem givim warning againstim wei wea young wan no savve disaed strong, Word bilong God givim disfala advaes long young pipol: “Rememberim Nambawan Creator bilong iu taem iu young yet, bifor olketa nogud taem hem kam, or olketa year wea iu bae sei: ‘Mi no hapi long olketa.’” (Ecclesiastes 12:1) Sapos iu wanfala young wan, disaed strong for lane abaotem “Nambawan Creator bilong iu” taem iu young yet.

So, hao nao Bible helpem young pipol for stap klia long krangge fasin wea kamap taem man young? Hem sei: “Lisin long kaonsel and acceptim discipline, mekem long future iu bae kamap wise.” (Proverbs 19:20) Bible showim klia tu hao wei for rejectim wisdom bilong God wea kamaot from wei for fail for duim samting or bighed fasin taem man young, or long enitaem, savve kasem nogud samting. (Proverbs 13:18) Long narasaed, wei for followim instruction bilong God mekem man kasem “planti day and year bilong laef and peace,” laef wea garem mining and mekem man satisfae.—Proverbs 3:2.