Olketa Hapi Wedding wea Honorim Jehovah

Welsh And Elthea Marit Long Soweto, South Africa, Long 1985. Samfala Taem Tufala Lukluk Long Olketa Wedding Foto Bilong Tufala Witim Dota Bilong Tufala, Zinzi, And Tingim Bak Datfala Hapi Day. Zinzi Laek Tumas For Savve Hu Nao Kam Long Datfala Wedding And Hem Barava Laekem Olketa Foto Wea Showim Mami Bilong Hem Wea Luk Naes Tumas.

DATFALA wedding start witim wanfala marit tok long wanfala pablik hall long Soweto. Then wanfala kwaea bilong samfala young Christian singim samfala song for praisem God long foa-part harmony. Bihaen, olketa guest kaikai and herem music kaset wea pleim Kingdom melody. No eni alcohol drink stap, and no eni laod music or dance. Bat, olketa guest hapi for story tugeta and tok hapi long disfala niu hasband and waef. Datfala marit and kaikai go ahed for thrifala hour. Raymond, wanfala Christian elder, hem sei: “Hem wanfala wedding wea mi bae olowe hapi for tingim.”

Long taem wea Welsh and Elthea marit, tufala duim volunteer waka long branch bilong Watch Tower Bible and Tract Society long South Africa. Selen bilong tufala hem fitim smol wedding nomoa. Samfala Christian disaed for lusim full-taem ministry and olketa waka full-taem for kasem selen for mekem stael wedding. Bat, Welsh and Elthea nating sorre long wei wea tufala disaed for mekem smol wedding bikos datwan letem tufala for go ahed servem God olsem full-taem minister kasem taem Zinzi hem born.

Bat, waswe sapos tufala wea marit disaed for garem music bilong world and dance long wedding bilong tufala? Waswe sapos tufala disaed for provaedem wine or nara alcohol drink? Waswe sapos tufala garem selen for mekem bigfala, stael wedding? Hao nao tufala savve mek sure datfala wedding bae wanfala taem bilong hapi wea fitim pipol wea worshipim God? Man need for tingting gud raonem olketa kwestin olsem bikos Bible givim disfala komand: “Nomata iufala kaikai or drink or duim eni samting, duim evri samting for glory bilong God.”—1 Corinthians 10:31.

Stap Klia Long Wild Party

Hem hard for tingim wanfala wedding wea no hapi. Bat bigfala danger stap for marit garem hapitaem wea nogud tumas and no eniwan savve kontrolem. Long planti wedding wea no bilong Witness, olketa duim samting wea no honorim God. Olsem example, planti drinkim alcohol go kasem taem olketa drunk. Sorre tumas, diswan happen long samfala Christian wedding tu.

Bible givim warning hao “drink wea mekem man drunk hem tokpraod.” (Proverbs 20:1) Hebrew word wea olketa transleitim “tokpraod” hem minim for “mek-noise.” Sapos alcohol savve mekem man mek-noise, tingim wanem hem savve duim long staka pipol wea hipap tugeta and drink tumas! Hem klia, kaen hipap olsem hem isi for kamap taem for “drunk, wild party, and samting olsem,” wea Bible kolem “olketa samting wea body duim.” Olketa fasin olsem bae mekem eniwan wea no repent for no kasem laef olowe andanit long rul bilong Kingdom bilong God.—Galatians 5:19-21.

Greek word wea olketa iusim for “wild party” hem minim wanfala grup bilong young pipol wea wakabaot long road and wea haf drunk, mek-noise, singsing, dance, and pleim music. Sapos pipol drinkim tumas alcohol long wanfala wedding, and sapos laod music and olabaot dance tu go ahed, danger hem barava stap for datfala wedding kamap olsem wild party. Long taem olsem, olketa wea wik long spiritual wei savve isi for foldaon long test and nara samting wea body duim olsem “fornication, fasin wea no klin, olabaot fasin, [or garem] fasin for kros.” Wanem nao iumi savve duim for no letem diskaen samting wea body duim for spoelem hapi bilong wanfala Christian wedding? For ansarem datfala kwestin, tingim wanem nao Bible talem abaotem wanfala wedding.

Wanfala Wedding wea Jesus Attendim

Jesus and olketa disaepol bilong hem kasem invitation for attendim wanfala wedding long Cana bilong Galilee. Olketa acceptim datfala invitation, and Jesus help tu for mekem datfala wedding hem hapi wan. Taem wine hem short, hem duim mirakol for mekem extra wine wea barava naes. Bihaen disfala wedding, iumi sure eni left ova wine hem stap for disfala man wea marit and famili bilong hem.—John 2:3-11.

Iumi savve lanem samfala leson from datfala wedding wea Jesus attendim. First samting, Jesus and olketa disaepol bilong hem no forcem olketa seleva go long datfala marit feast nomata olketa no kasem invitation. Bible talem klia olketa kasem invitation. (John 2:1, 2) Olsem tu, long tufala tokpiksa abaotem marit feast, planti taem Jesus storyim hao olketa guest stap long there bikos olketa kasem invitation.—Matthew 22:2-4, 8, 9; Luke 14:8-10.

Long samfala kantri, hem kastom for evriwan long area for attendim marit feast nomata sapos olketa kasem invitation or nomoa. Bat, diswan savve mekem problem saed long selen. Tufala hia wea bae marit, and wea no rich, maet kaonem selen for mek sure inaf kaikai and drink stap fitim planti pipol. Dastawe, sapos tufala Christian wea marit disaed for mekem smol feast fitim samfala guest nomoa, olketa nara Christian brata wea no kasem invitation shud minim disfala disison and respectim. Wanfala man wea marit long Cape Town, South Africa, remember hem invaetem 200 pipol long wedding bilong hem. Bat, 600 pipol nao kam, and kaikai hem finis kwiktaem. Midolwan long olketa wea kam bat wea hem no invaetem nao hem pipol wea insaed wanfala bas wea visitim Cape Town long datfala weekend bilong wedding. Bas conductor hem laen bilong girl hia wea marit and tingse hem fit for tekem kam full sekson hia long datfala feast nomata hem no askem firstaem tufala wea marit!

Wanfala tru follower bilong Jesus wea no kasem invitation for attendim wanfala marit feast bae no go, bikos kaikai and drink hem for pipol wea kasem invitation nomoa, bat hem savve attendim only sapos olketa sei feast hia hem open for evriwan. Olketa wea laek go bat no kasem invitation shud askem olketa seleva olsem, ‘Sapos mi attendim marit feast hia, waswe, bae diswan no showimaot love for tufala hia wea marit? Waswe, bae diswan mekem problem kamap and spoelem hapi bilong feast?’ Winim wei for feel nogud from hem no kasem invitation, wanfala Christian wea garem fasin for luksavve maet sendem message for tok hapi long tufala hia wea marit and for blessing bilong Jehovah stap witim tufala. Maet hem tingting for helpem tufala tu long wei for sendem wanfala present for sharem hapi long wedding day bilong tufala.—Ecclesiastes 7:9; Ephesians 4:28.

Hu Nao Garem Responsibility?

Long samfala part long Africa, olketa garem kastom wea olketa olo relative nao bae lukaftarem wedding arrangement. Tufala wea bae marit maet hapi long diswan, bikos tufala no need for wari saed long selen, and tu maet tufala tingse tufala no garem responsibility for eniting wea maet happen. Bat, bifor tufala acceptim eni help from olketa relative wea laek for help, tufala shud mek sure olketa bae respectim wanem tufala laekem.

Nomata Jesus hem Son bilong God wea “kam daon from heven,” Bible no talem hem nao tekovarem and leadim evri samting long datfala wedding long Cana. (John 6:41) Bat, Bible hem sei nara man nao hem “bigman long feast.” (John 2:8) So, disfala man nao mas givim ansa long niufala famili hed, hem nao datfala man wea just marit.—John 2:9, 10.

Olketa Christian relative shud respectim disfala niu famili hed wea God markem. (Colossians 3:18-20) Hem nao man wea bae karem responsibility for eniting wea happen long wedding bilong hem. Hem tru, man wea just marit shud balance and, sapos hem fitim, hem shud tingim wanem nao waef, dadi and mami bilong hemseleva, and olketa in-law bilong hem laekem. Bat, sapos olketa relative strong for arrangem samting wea difren from tingting bilong tufala hia wea bae marit, then tufala maet need for rejectim help bilong olketa long kaenfala wei and mekem smol wedding nomoa wea tufala nao baem. Long disfala wei, no eni samting bae happen wea mekem tufala feel nogud bihaen. Olsem example, long wanfala Christian wedding long Africa, wanfala relative wea no biliv nao lukaftarem datfala wedding and hem duim samting for honorim olketa laen dadi wea dae finis!

Samfala taem tufala wea just marit go long honeymoon bifor wedding celebration hem finis. Long taem olsem, disfala hasband shud askem samfala wea fit for mek sure celebration hem followim olketa mark bilong Bible and hem finis long gudfala taem.

Plan Gud and Balance

Luk olsem, planti kaikai nao stap long wedding wea Jesus attendim, bikos Bible kolem datwan wanfala marit feast. Olsem iumi readim finis, planti wine stap tu. Iumi sure, gudfala music and dance wea showimaot respect hem go ahed bikos diswan hem wei bilong olketa Jew. Jesus showim diswan long tokpiksa bilong hem abaotem datfala olabaot son. Long story hia, datfala rich dadi hapi tumas long son bilong hem wea repent and kam bak dastawe hem sei: “Letem iumi kaikai and garem hapitaem.” Jesus hem sei datfala celebration garem “music and pipol dance.”—Luke 15:23, 25.

Bat point wea mekem iumi interest, Bible no storyim eni music and dance long wedding long Cana. For tok stret, olketa story insaed Bible abaotem wedding nating tok abaotem dance. Luk olsem long taem bilong olketa faithful servant bilong God insaed long Bible, dance no savve kamap olowe and hem no main part long wedding bilong olketa. Waswe, iumi savve lanem eniting from diswan?

Long samfala Christian wedding long Africa, olketa iusim strongfala electric saond system. Music savve laod tumas gogo olketa guest no savve herem narawan taem olketa story. Samfala taem kaikai nao short bat no dance wea olabaot. Winim wei for olsem marit feast, kaen hipap olsem maet kamap excuse for dance party nomoa. And tu, laod music planti taem savve pullim kam pipol wea mek-trabol, olketa stranger wea no kasem invitation.

From olketa story insaed Bible abaotem wedding no mekhae long music and dance, waswe, diswan no fit for gaedem tufala wea planim wedding wea bae honorim Jehovah? Nomata olsem, taem olketa prepare for samfala wedding long South Africa no longtaem go nomoa, samfala young Christian wea olketa chusim for standap witim girl hia wea marit iusim planti hour for practicem stael dance. For planti month olketa iusim staka taem long diswan. Bat olketa Christian need for “baem taem” for “olketa samting wea moa important” olsem preaching waka, study seleva, and attendim olketa Christian meeting.—Ephesians 5:16; Philippians 1:10.

Taem iumi tingim haomas wine nao Jesus provaedem, hem luk olsem datfala wedding long Cana hem wanfala stael wan. Bat, iumi sure datfala hipap hem no mek-noise and olketa guest no ova tumas long alcohol olsem hem savve happen long samfala Jew wedding. (John 2:10) Hao nao iumi sure long diswan? Bikos Lord Jesus Christ hem stap long there. Winin eni man, Jesus nao bae barava careful for obeyim komand bilong God abaotem nogud kaban: “No stap midolwan long olketa wea savve drinkim tumas wine.”—Proverbs 23:20.

So, sapos tufala wea bae marit disaed for garem wine or nara alcohol drink long wedding, tufala shud markem samfala wea fit for barava kontrolem diswan. And sapos tufala disaed for garem music, tufala shud chusim olketa gudfala music and markem samwan wea fit for hem chekim laod bilong music. Hem mas no letem olketa guest for tekova and pleim nogud music or apim music for laod tumas. Sapos olketa letem dance, olketa savve duim diswan long wei wea showimaot respect and no ova tumas. Sapos samfala relative wea no biliv or Christian wea no mature duim nogud dance or kaen wea mekem dirty feeling kamap, datfala man wea just marit maet need for changem datkaen music or ask long kaenfala wei for stopem datfala dance. Sapos nomoa, wedding bae kamap wild and mekem pipol stambol.—Romans 14:21.

Bikos long olketa danger wea stap long samfala kaen dance bilong distaem, laod music, and free alcohol, samfala Christian man wea marit disaed for no garem olketa samting hia long wedding bilong olketa. Samfala tokdaonem olketa long diswan, bat iumi shud praisem olketa bikos olketa no laek for duim eniting wea bae putim shame long holy nem bilong God. Long narasaed, samfala man wea bae marit arrangem gudfala music, taem for dance, and givimaot alcohol long balance wei. Nomata wanem, man wea bae marit nao garem responsibility for wanem hem letem for go ahed long wedding bilong hem.

Long Africa samfala wea no mature lukdaonem Christian wedding wea showimaot respect and sei hem olsem olketa attendim wanfala funeral. Bat, datwan hem no balance tingting. Olketa wicked waka bilong body savve givim hapi for lelebet taem, bat bihaen, hem mekem conscience bilong Christian feel nogud and putim shame long nem bilong God. (Romans 2:24) Long narasaed, holy spirit bilong God givim trufala hapi. (Galatians 5:22) Planti Christian hasband and waef hapi for luk go bak long wedding day bilong olketa, from olketa savve hem wanfala taem bilong hapi and no wanfala “reason for mekem man stambol.”—2 Corinthians 6:3.

Welsh and Elthea tingim yet planti gudfala toktok from olketa relative wea no biliv wea attendim wedding bilong tufala. Wanfala hem sei: “Mifala taed long olketa wedding distaem wea mek-noise tumas. Hem barava naes for attendim wanfala difren wedding wea followim stretfala fasin.”

Point wea barava important, olketa Christian wedding wea hapi and showimaot respect hem honorim dat Wan wea startim marit, Jehovah God.

[Box/​Piksa long page 22]

CHEKLIST FOR WANFALA WEDDING PARTY

• Sapos iu invaetem relative wea no biliv for givim wanfala tok, waswe, iu mek sure finis bae hem no duim eniting wea join witim kastom wea no fitim Christian?

• Sapos iu laekem music, waswe, iu chusim finis olketa gud wan nomoa?

• Waswe, bae olketa pleim music laod fitim?

• Sapos iu letem dance, waswe, bae hem showimaot respect?

• Waswe, olketa bae givimaot alcohol long balance wei nomoa?

• Waswe, iu markem samfala wea fitim for kontrolem haomas nao for givimaot?

• Waswe, iu markem finis gudfala taem for wedding party mas finis?

• Waswe, iu markem samfala for stap long there for mek sure evri samting followim order go kasem taem hem finis?