Iu Savve Stap Klin Insaed World Bilong Dirty Fasin

MAN hia hem luk naes tumas. Woman hem garem savve and hem naesbola. Tufala waka for sem kampani. Woman hem lukluk olowe long disfala man. Man hem savve tokhae long disfala woman. Tufala baem olketa present for tufala. No longtaem tufala sleep tugeta nao. Man hia lusim waef bilong hem for disfala woman. Bat gogo, datfala woman disaed for stap witim hasband bilong hem and finisim wei for go witim disfala man. Hem no mas laekem, bat hem trae for go bak long waef bilong hem. Bat, from hem no barava feel sorre, hem nating win. Evriwan hia go ahed witim laef bilong olketa, bat pain hem stap yet.

Pipol distaem no ting long klin fasin saed long sex olsem gudfala mark for keepim. Luk olsem wei for barava aftarem hapi and satisfae olowe nao main samting wea pipol duim distaem. Disfala New Encyclopædia Britannica hem sei: “Adultery hem stap evriwea and, samfala taem, hem staka olsem olketa marit.”

Nomata olsem, Jehovah God laekem marit for “garem honor midolwan evriwan” and for marit bed hem “no kamap dirty.” (Hebrews 13:4) Bible hem sei: “No giamanim iufala seleva. Olketa wea duim fornication, or worshipim idol, or duim adultery, or duim homosexual fasin, or man wea leidaon witim man, . . . bae no kasem kingdom bilong God.” (1 Corinthians 6:9, 10) So, for God hapi long iumi, iumi need for keepim klinfala fasin insaed disfala world wea no klin.

Hao nao iumi savve protectim iumiseleva from nogud paoa wea stap raonem iumi? Long mek-5 chapter bilong Bible buk bilong Proverbs, King Solomon bilong Israel bifor hem givim ansa. Letem iumi lukluk gud long wanem hem talem.

Wei for Tingting for Protectim Iu

“Son bilong mi, lisin gud long wisdom bilong mi,” king bilong Israel hem start for sei. Hem go ahed: “Tanem kam ear bilong iu long savve bilong mi, mekem iu protectim olketa wei for tingting bilong iu; and mouth bilong iu bae keepim savve for stap sef.”—Proverbs 5:1, 2.

For winim olketa temptation for duim dirty fasin, iumi needim wisdom—wei for iusim savve long Bible—and fasin for luksavve, or paoa for luksavve long raet samting from rong samting and for chusim stretfala wei. Iumi kasem encouragement for lukluk gud long wisdom and fasin for luksavve mekem iumi gaedem wei for tingting bilong iumi. Hao nao iumi savve duim olsem? Taem iumi studyim Word bilong God, Bible, iumi need for luksavve long wei wea Jehovah hem duim samting and tanem ear bilong iumi followim will and olketa plan bilong hem. Taem iumi duim olsem, iumi bae leadim wei for tingting bilong iumi followim olketa stretfala road. So wei for tingting wea iumi kasem hem agree witim wisdom and savve bilong God. Taem iumi followim gud, disfala savve hem protectim iumi from trap bilong temptation for duim dirty fasin.

Lukaot Long Smooth Mouth

Reason why iumi needim wei for tingting for keepim barava klinfala fasin long world wea no klin hem from wei bilong dirty pipol savve switim iumi. Solomon givim warning: “Lips bilong wanfala difren woman hem olsem wanfala honeycomb wea fulap witim honey, and mouth bilong hem smooth winim oil. Bat samting wea kamaot bihaen hem saoa tumas olsem wormwood; hem sharp olsem tu-saed sword.”—Proverbs 5:3, 4.

Disfala proverb hem sei disfala nogud woman hem wanfala “difren woman,”—wanfala jury.a Olketa toktok wea hem iusim for switim man wea hem aftarem hem swit olsem honeycomb and smooth winim olive oil. Waswe, planti dirty fasin no start olsem? Olsem example, tingim samting wea kasem Amy, wanfala naesbola secretary wea 27 year. Hem sei: “Disfala man long waka hem evritaem lukluk and tokhae long mi. Hem feel gud taem pipol luksavve long iu. Bat mi barava luksavve hao hem interest long mi for sex nomoa. Olketa wei bilong hem bae no trikim mi.” Planti taem ososo toktok bilong dirty man or woman hem here naes tumas sapos iumi no luksavve wanem nao tru reason bilong hem. For diswan iumi need for iusim wei for tingting.

Samting wea kamaot from dirty fasin hem saoa olsem wormwood and sharp olsem tu-saed sword—soa tumas and kosim dae. Wanfala conscience wea feel nogud, babule nating, or wanfala sik bilong sex savve kamap from kaen fasin olsem. And tingim bigfala pain bilong sorre wea kasem marit partner bilong datwan wea no faithful. Wanfala rong nomoa bilong wei for no faithful savve kosim pain wea savve stap for full laef. Tru nao, dirty fasin givim pain.

Taem hem story abaotem laef bilong wanfala woman wea olabaot, datfala wise king hem go ahed for sei: “Leg bilong hem gogo daon for dae. Olketa step bilong hem hol strong long Sheol seleva. Road bilong laef hem no ting for followim. Road bilong hem go long ples wea hem no savve.” (Proverbs 5: 5, 6) Wei bilong olabaot woman leadim hem for dae—olketa step bilong hem go long Sheol, grev bilong olketa man. Taem iumi tingim hao olketa sik bilong sex, especially AIDS, hem kamap big tumas, olketa toktok hia barava tru tumas! Samting wea kasem hem bae sem tu long olketa wea followim rongfala wei bilong hem.

Witim strongfala kea from heart, datfala king hem sei: “So, olketa son, lisin long mi and no tanawe from toktok bilong mouth bilong mi. Keepim road bilong iu farawe from saed bilong datfala woman, and no go klosap long door bilong haos bilong hem.”—Proverbs 5:7, 8.

Iumi need for stap barava farawe from paoa bilong dirty pipol. Why nao iumi shud followim wei bilong olketa for lisin long nogud music, for lukim nogud hapitaem, and for lukim dirty magasin? (Proverbs 6:27; 1 Corinthians 15:33; Ephesians 5:3-5) And hem krangge samting for pullim interest bilong olketa taem iumi switim olketa or long wei wea iumi werem nogud kaleko olsem olketa!—1 Timothy 4:8; 1 Peter 3:3, 4.

Kost Hem Big Tumas

Wanem moa nara reason for keepim wei bilong iumi farawe from nogud pipol? Solomon hem ansa: “Mekem iu no givim long narawan honor bilong iu, and long olketa year bilong iu samting wea cruel; mekem olketa difren wan no savve satisfaem olketa seleva witim paoa bilong iu, and mekem olketa samting wea iu safa for hem no stap long haos bilong man aotsaed, and bae iu no need for krae long future taem body and olketa part bilong iu kasem end.”—Proverbs 5:9-11.

So, Solomon hem strongim haefala kost bilong wei for foldaon long dirty fasin. Adultery and wei for lusim honor, or respect bilong seleva, tufala stap tugeta. Waswe, hem no samting for shame taem man stap nomoa for satisfaem dirty feeling bilong seleva or bilong narawan? Waswe, diswan no showimaot hao iumi no garem respect for seleva taem iumi barava stap klos saed long sex witim wan wea no marit partner bilong iumi?

So, wanem nao insaed long disfala ‘givim olketa year bilong iumi, paoa bilong iumi, and frut bilong hard waka bilong iumi long wanfala difren man, or man aotsaed’? Wanfala pepa hem sei: “Point bilong olketa verse hia hem klia: Kost bilong wei for no faithful savve hae tumas; from evriting man waka for hem—position, paoa, gudfala living—savve lus thru long olketa narakaen demand bilong datfala woman or from komplen bilong community for compensation.” Dirty fasin savve kost tumas!

Bihaen hem lusim respect and finisim olketa gud samting bilong hem, wanfala krangge man bae krae, and sei: “Hao mi heitim discipline and heart bilong mi nating bin respectim nomata kaonsel tu! And mi nating lisin long voice bilong olketa instructor bilong mi, and long olketa teacher bilong mi mi nating tanem ear. Kwiktaem nomoa mi insaed evrikaen nogud samting long midol long kongregeson and long evriwan wea hipap.”—Proverbs 5:12-14.

No longtaem, disfala sinner talemaot wanem wanfala savveman kolem “wanfala longfala komplen bilong ‘sapos . . . nomoa’: sapos mi lisin nomoa long dadi bilong mi; sapos mi no followim nomoa tingting bilong mi; sapos mi followim nomoa advaes bilong olketa.” Bat disfala luksavve hem leit tumas nao. Klinfala laef bilong disfala man hem nogud nao and gudfala nem bilong hem dirty nao. Hem important tumas for iumi tingim haefala kost bilong wei for duim dirty fasin bifor hem winim iumi!

“Drinkim Wata From Tank Bilong Iuseleva”

Waswe, Bible hem stap kwaet saed long sex? Nomoa nao. Datfala feeling bilong love and strongfala feeling wea stap midolwan man and woman hem present from God. Bat, disfala klos feeling hem for tufala wea marit nomoa. So long wanfala marit man, Solomon hem givim disfala kaonsel: “Drinkim wata from tank bilong iuseleva, wata wea kamaot from well bilong iuseleva. Waswe, hem stret for olketa spring wata bilong iu for stap aotsaed long door, and olketa stream wata bilong iu insaed long pablik ples? Letem olketa stap for iu nomoa, and no for olketa difren man.”—Proverbs 5:15-17.

“Tank bilong iuseleva” and “well bilong iuseleva” hem poetry toktok wea minim waef wea iu lovem. For kasem hapi bilong sex witim hem hem olsem for drinkim naesfala wata. No olsem wata supply long pablik ples, wanfala tank or well hem private property. And man hem kasem kaonsel for garem pikinini long haos witim waef bilong hem and no torowem seed bilong hem olabaot long pablik ples, wea minim, long olketa nara woman. Hem klia tumas, advaes hem for man mas faithful long waef bilong hem.

Datfala wise man hem go ahed for sei: “Letem wata source bilong iu kasem blessing, and hapi witim waef wea iu tekem taem iu young, wanfala mere deer wea iu savve lovem and wanfala naesfala maunten goat. Letem susu bilong hemseleva switim iu evritaem. Witim love bilong hem letem iu fulap witim hapi olowe.”—Proverbs 5:18, 19.

“Wata source,” or well, hem minim wei for satisfae saed long sex. Hapi bilong sex witim marit partner bilong seleva hem wanfala “blessing”—God nao givim. Dastawe, man hem kasem encouragement for hapi witim waef wea hem tekem taem hem young. Long datfala man, waef hia hem fit for kasem love and hem spesol olsem wanfala mere deer, and luk naes olsem maunten goat.

Then Solomon askem tufala kwestin for ting raonem: “So why nao iu, son bilong mi, shud feel hapi witim wanfala difren woman or feelim susu bilong woman aotsaed?” (Proverbs 5:20) Yes, why nao marit man shud lukaotem sex aotsaed long marit, olsem long ples bilong waka, long skul, or long nara ples?

Long olketa marit Christian, aposol Paul givim disfala kaonsel: “Diswan nao mi talem, olketa brata, taem wea stap yet hem short. So, letem olketa wea garem waef stap olsem olketa no garem.” (1 Corinthians 7:29) Wanem nao diswan minim? Olketa follower bilong Jesus Christ mas ‘go ahed for lukaotem kingdom firstaem.’ (Matthew 6:33) Dastawe, tufala wea marit mas no interest tumas long seleva gogo waka bilong Kingdom hem kamap namba tu long laef bilong tufala.

Need for Kontrolem Seleva

Iu savve kontrolem feeling for wantem sex. Olketa wea laekem Jehovah for hapi long olketa mas duim olsem. Aposol Paul hem kaonsel olsem: “Diswan nao will bilong God, mekem iufala kamap holy, iufala mas stap klia from fornication; for evriwan long iufala mas savve hao for keepim body bilong hem holy and garem honor.”—1 Thessalonians 4:3, 4.

So, olketa young pipol shud no hariap for marit taem olketa first garem feeling for laekem sex. Marit minim man givim promis, and hem need for mature for keepim datfala responsibility. (Genesis 2:24) Hem moabeta for weit for ‘ovarem finis young laef’—datfala taem wea feeling bilong sex hem strong and savve twistim wei for disaed. (1 Corinthians 7:36) And tu, hem barava no wise and hem sin for pipol wea laek for marit for duim dirty fasin bikos luk olsem no eni gudfala marit partner hem stap!

“Own Rong Bilong Hem Bae Kasem Wicked Wan”

Main reason why dirty fasin hem rong hem bikos Jehovah—Datwan wea givim laef and wea markem wei bilong man saed long sex—hem no agree long hem. So taem King Solomon givim strongfala reason for garem klin fasin, hem sei: “From olketa wei bilong man hem stap front long eye bilong Jehovah, and hem ting raonem evri gogo bilong hem.” (Proverbs 5:21) Tru nao, no eniting haed long eye bilong God, “wea iumi mas givim ansa long hem.” (Hebrews 4:13) Eni akson wea no klin saed long sex, nomata hem haed and nomata eniting saed long body or living wea bae kamaot, diswan bae spoelem wei wea iumi fren witim Jehovah. Hem krangge samting for lusim peace witim God for garem smolfala dirty hapitaem!

Maet samfala wea no shame for duim dirty fasin luk olsem olketa no savve kasem eni panis—bat datwan no for olowe. Solomon hem talemaot: “Own rong bilong hem bae kasem wicked wan, and insaed olketa rop bilong own sin bilong hem bae olketa kasholem hem. Hem nao bae dae from no eni discipline, and bikos krangge wei bilong hem big tumas hem go rong.”—Proverbs 5:22, 23.

Why nao eniwan long iumi shud go rong? Sapos iumi tingim, buk bilong Proverbs hem warnim iumi finis abaotem olketa wei bilong world for switim man. And hem talem klia olketa kost wea savve kamaot from dirty fasin saed long sex—health bilong iumi, material samting bilong iumi, strong bilong iumi, and respect bilong iumi. Witim datfala klia savve, iumi bae no need for kamap man wea talem kaen toktok bilong “sapos . . . nomoa.” Tru nao, taem iumi followim kaonsel wea Jehovah givim insaed long Word bilong hem, iumi savve stap klin insaed world bilong dirty fasin.

[Footnote]

[Piksa long page 30]

Samting wea kamaot from dirty fasin hem saoa olsem wormwood

[Piksa long page 31]

“Hapi witim waef wea iu tekem taem iu young”