Wisdom From God​—Hao Nao Hem Showaot?

“WISDOM bilong poor man olketa lukdaonem, and olketa no lisin long toktok bilong hem.” Witim toktok hia, wise King Solomon finisim datfala story abaotem wanfala hambol bat wise man wea sevem wanfala full taon from wei for distroe. Bat sorre tumas, “no eni man rememberim datfala poor man.”—Ecclesiastes 9:14-16.

Olketa man savve lukdaonem pipol wea no garem staka samting, nomata olketa poor wan hia duim olketa nambawan samting. Diswan happen long Jesus. Isaiah talem profesi olsem abaotem hem: “Olketa man lukdaonem and les long hem, hem man wea bae kasem pain and savve gud long sik.” (Isaiah 53:3) Samfala lukdaonem Jesus nomoa bikos hem no garem position or bignem olsem olketa important leader long taem bilong hem. Nomata olsem, hem garem wisdom wea barava winim wisdom bilong eni man wea sin. Pipol long homtaon bilong Jesus no willing for luksavve hao disfala “son bilong carpenter” showimaot bigfala wisdom and duim strongfala waka. Bat datwan hem bigfala mistek, bikos story hia hem go ahed for sei hao Jesus “no duim planti strongfala waka long there from olketa no garem strongfala faith.” Olketa barava lusim chance!—Matthew 13:54-58.

Iumi shud no mekem sem mistek. “Wisdom kamap raeteous thru long olketa waka bilong hem,” Jesus hem sei. Hem isi for luksavve long olketa wea duim waka bilong God and wea teachim wisdom from heven, no from position wea olketa garem, bat from “gudfala frut” wea olketa showimaot—faith and waka bilong olketa wea garem faondeson long Bible.—Matthew 7:18-20; 11:19.