Waswe, Iu Garem Spirit wea No Savve Dae?
“EVRI Scripture hem kam from God and hem gud for teach, for givim kaonsel, for stretem evri samting, for givim discipline long raeteous fasin,” aposol Paul hem raet olsem. (2 Timothy 3:16) Yes, Bible hem wanfala buk bilong truth wea kam from trufala God, Jehovah.—Psalm 83:18.
From Jehovah creatim evri samting, wea insaed diswan hem olketa man, hem savve gud long wanem nao happen long iumi taem iumi dae. (Hebrews 3:4; Revelation 4:11) Insaed long Word bilong hem Bible, hem givim ansa long olketa kwestin abaotem laef bihaen man dae wea tru and mekem man satisfae.
Wanem Nao Spirit?
Long Bible, olketa word wea olketa transleitim “spirit” hem minim “wind.” Bat hem minim moa samting winim wei for tekwind nomoa. Olsem example, man wea raetem Bible James hem sei: “Body wea no garem spirit hem dae finis.” (James 2:26) So, spirit nao mekem body laef.
Disfala paoa wea givim laef long body hem no datfala wind, or air nomoa, wea savve go thru lung. Why nao olsem? Bikos bihaen wei for tekwind hem stop, laef hem still stap insaed olketa cell bilong body for lelebet taem—“for tu-thri minute,” olsem The World Book Encyclopedia talem. From diswan, olketa savve mekem man wea haf-dead laef bak. Bat taem datfala paoa bilong laef hem go aot from olketa cell bilong body, eni wei for trae for mekem man laef bak hem iusles nao. Nomata haomas wind man givim, hem no savve mekem nomata wanfala cell laef bak. So, spirit hem laef-paoa wea man no savve lukim—datfala paoa bilong laef wea keepim olketa cell and man laef. Disfala laef-paoa go ahed thru long wei for tekwind.—Job 34:14, 15.
Waswe, datfala spirit hem duim samting insaed olketa man nomoa? Bible helpem iumi for kasem stretfala ansa long diswan. Wisefala King Solomon luksavve hao olketa man and animal “evriwan garem wanfala spirit,” and hem ask: “Hu nao stap wea savve long spirit bilong olketa son bilong olketa man, sapos hem go ap; and spirit bilong animal, sapos hem go daon long earth?” (Ecclesiastes 3:19-21) So Bible talem hao olketa man and animal garem spirit. Hao nao hem olsem?
Iumi savve markem datfala spirit, or laef-paoa witim electric paoa wea go thru long wanfala machine or eni electric tul. Electric paoa savve duim difren kaen samting, wea depend long wanem kaen tul nao hem givim paoa long hem. Olsem example, paoa nao savve mekem wanfala stove hot, computer for givim information, and television for showim piksa and saond. Nomata olsem, datfala electric paoa no savve kamap datfala samting wea hem mekem for waka. Hem wanfala paoa nomoa. Long sem wei, datfala laef-paoa no garem olketa fasin bilong man or animal wea hem mekem laef. Hem no garem eni fasin and no savve tingting. Olketa man and animal “garem wanfala spirit” nomoa. (Ecclesiastes 3:19) Dastawe, taem man hem dae, spirit bilong hem no go ahed for stap long nara ples olsem wanfala spirit creature.
So, hao nao olketa wea dae finis? And wanem nao happen long datfala spirit taem wanfala man hem dae?
“Iu Bae Go Bak Long Dust”
Taem datfala first man, Adam, hem min for no obeyim komand bilong God, Jehovah sei long hem: “Long swet bilong feis bilong iu, iu bae kaikaim bred go kasem taem iu go bak long graon, bikos iu kamaot from hem. Iu dust nomoa and iu bae go bak long dust.” (Genesis 3:19) Wea nao Adam bifor Jehovah creatim hem from dust? Hem no stap eniwea! Hem no stap long eni ples. So taem Jehovah God sei Adam bae “go bak long graon,” hem minim Adam bae dae and kamap dust long graon. Adam bae no go long ples bilong olketa spirit. Taem Adam dae hem bae olsem bifor, hem no stap long eni ples. Panis bilong hem nao dae—wei for no laef—no wei for go long nara ples.—Romans 6:23.
Waswe long olketa narawan wea dae finis? Ecclesiastes 9:5, 10, talem klia hao nao olketa wea dae finis, wea sei: “Olketa wea dae finis no savve long eni samting . . . No eni waka, no eni plan, no eni savve or kleva tingting, stap long grev.” (Moffatt) So, dae hem wei for no stap. Man wea raetem psalm raetem hao taem wanfala man hem dae, “spirit bilong hem go aot, hem go bak long graon; long datfala day tingting bilong hem finis evribit.”—Psalm 146:4.
Hem klia, olketa wea dae finis no stap long eni ples. Olketa no savve long eni samting. Olketa no savve lukim iu, herem iu, or tok long iu. Olketa no savve helpem iu or spoelem iu. Iu no need for fraetem olketa wea dae finis. Bat hao nao datfala spirit hem “go aot” from man taem hem dae?
Spirit “Go Bak Long Trufala God”
Bible sei taem man hem dae, “spirit seleva go bak long trufala God wea givim.” (Ecclesiastes 12:7) Waswe, diswan minim spirit seleva hem go thru long spes for go long ples wea God hem stap? Nomoa nao! Wei wea Bible iusim datfala word “go bak” hem no evritaem minim wei for muv from wanfala ples go long narawan. Olsem example, God talem olketa Israelite wea no faithful: “ ‘Kam bak long mi, and mi bae kam bak long iufala,’ Jehovah bilong olketa army hem talem.” (Malachi 3:7) Wei wea Israel “kam bak” long Jehovah hem minim wei for tan raon from rong wei and followim raeteous wei bilong God moa. And for Jehovah “kam bak” long Israel hem minim for tingim pipol bilong hem moa. Long tufala example hia, wei for “kam bak” hem saed long tingting and no minim wei for muv from wanfala ples go long nara ples.
Long sem wei, taem man hem dae, no eni really wei for muv from earth for go long eni ples long heven hem happen taem spirit “go bak” long God. Taem datfala paoa go aot from man, God nomoa fit for givim bak long hem. So datfala spirit “go bak long trufala God” long wei wea eni hope for future laef for datfala man hem depend evribit long God.
Olsem example, tingim wanem nao Bible talem abaotem dae bilong Jesus. Man wea raetem Gospel Luke hem sei: “Jesus hem singaot witim bigfala voice and sei: ‘Father, mi putim spirit bilong mi long hand bilong iu.’ Taem hem talem diswan, then hem dae.” (Luke 23:46) Taem spirit bilong Jesus go aot from hem, hem no gogo long heven long really wei. Jesus no resurrect from dae go kasem mek-thri day, and hem 40-fala day moa bifor hem go ap long heven. (Acts 1:3, 9) Bat, taem hem dae, Jesus lusim spirit bilong hem long hand bilong Father bilong hem, from hem trustim evribit wei wea Jehovah fit for mekem hem laef bak.
Tru nao, God nomoa savve mekem man laef bak moa. (Psalm 104:30) Diswan openem wei for nambawan hope!
Wanfala Tru Hope
Bible hem sei: “Hour bae kam wea evriwan wea stap long olketa memory grev bae herem voice bilong [Jesus] and kamaot.” (John 5:28, 29) Tru nao, Jesus Christ promisim hao olketa wea insaed memory bilong Jehovah bae resurrect, or laef bak. Midolwan olketa hia hem olketa servant bilong Jehovah wea aftarem raeteous living. Bat staka million nara pipol dae and nating showimaot sapos olketa bae followim raeteous standard bilong God. Maet olketa no savve long olketa mark bilong Jehovah or olketa no garem inaf taem for mekem olketa change wea olketa need for duim. Olketa olsem stap tu insaed memory bilong God and bae kasem resurrection, from Bible hem sei: “Wanfala resurrection bae kamap for olketa wea raeteous and wea no raeteous.”—Acts 24:15.
Distaem, earth hem fulap witim heit and raoa, raf fasin and kill-kill, pollution and sik. Sapos pipol wea dae finis laef bak moa long diskaen earth, hapi bilong olketa bae stap for shortfala taem nomoa. Bat Creator promisim finis hao hem bae klosap nao finisim disfala world wea Satan datfala Devil bossim. (Proverbs 2:21, 22; Daniel 2:44; 1 John 5:19) Then wanfala raeteous sekson bilong pipol—“niu earth”—bae kamap.—2 Peter 3:13.
Long datfala taem “no eniwan bae sei: ‘Mi sik.’” (Isaiah 33:24) Nomata pain bilong dae bae finis, from God “bae aotem evri wata from eye bilong olketa, and dae bae nomoa, sorre and krae and pain bae nomoa tu. Evri samting bifor hem finis nao.” (Revelation 21:4) Diswan hem nambawan hope for olketa wea stap “long olketa memory grev”!
Taem Jehovah finisim evri wicked fasin from earth, hem bae no distroem olketa raeteous man witim olketa wicked man. (Psalm 37:10, 11; 145:20) Tru nao, “wanfala big crowd” bilong pipol “wea kamaot from evri nation and tribe and pipol and languis” bae winim “datfala big trabol,” wea bae distroem wicked world bilong distaem. (Revelation 7:9-14) So, wanfala bigfala sekson bae stap for welkamim bak olketa wea dae finis.
Waswe, iu luk forward for lukim olketa wea iu lovem moa? Waswe, iu laek for stap olowe long Paradaes long earth? Then iu mas kasem stretfala savve abaotem will and purpose bilong God. (John 17:3) Hem will bilong Jehovah for “evri difren kaen man mas sev and kasem stretfala savve bilong truth.”—1 Timothy 2:3, 4.
[Piksa long page 4]
“Iu dust nomoa and iu bae go bak long dust”
[Piksa long page 5]
Spirit hem olsem electric paoa
[Piksa long page 7]
Resurrection bae givim hapi for olowe