Wise Advaes Bilong Solomon Abaotem Wanem for Readim

“WEI for mekem planti buk hem no savve finis, and for iusim tumas taem long olketa buk hia hem samting wea mekem body taed.” (Ecclesiastes 12:12) Solomon, wise King bilong Israel, nating stopem wei for read taem hem raetem olketa toktok hia 3,000 year go finis. Bat hem storyim hao hem important for chusim gud wanem nao iumi readim. Disfala advaes hem barava fitim distaem, bikos olketa wakem staka buk evri year!

Solomon story abaotem “planti buk” wea no savve helpem man. Dastawe hem sei, for iusim tumas taem for readim olketa, hem “mekem body taed” and no givim eni gud samting.

Bat waswe, Solomon minim no eni gudfala buk for helpem man nao? Nomoa, bikos hem raet olsem moa: “Toktok bilong olketa wea wise hem olsem olketa sharp stik for leadim buluka, and olsem nila wea olketa hammerim nao hem olketa wea gohed for hipimap olketa toktok; wanfala shepherd nao givim olketa toktok hia.” (Ecclesiastes 12:11) Hem barava tru, staka buk stap for helpem man long gudfala wei, wea “olsem olketa sharp stik for leadim buluka.” Olketa savve muvim man for duim stret samting. Then, olketa bae helpem man for strong for disaed and no seksek, “olsem nila wea olketa hammerim.”

Wea nao iumi savve faendem wise toktok olsem? Solomon sei, buk wea kam from datfala shepherd, Jehovah, hem nao winim evriwan. (Psalm 23:1) So, best samting wea man savve duim nao, hem for readim datfala buk wea kam from God—Bible. For readim olowe olketa toktok wea kam from God, bae mekem man “fit evribit, barava redi for duim evri gudfala waka.”—2 Timothy 3:16, 17.