Bible Buk Namba 23​—Isaiah

Man wea Raetem: Isaiah

Ples Hem Raetem: Jerusalem

Taem Hem Finis Raetem: Bihaen 732 B.C.E.

Taem Hem Storyim:

c. 778–bihaen 732 B.C.E.

DATFALA raf king bilong Assyria barava mekem olketa big and smolfala kingdom long Middle East wari tumas. Main story bilong full area hia hem abaotem secret plan and wei for olketa kingdom hia waka tugeta. (Isa. 8:9-13) Apostate Israel long north klosap safa from disfala secret plan bilong olketa kantri hia, and long semtaem rul bilong olketa king bilong Judah long south klosap foldaon. (2 Ki., chap. 15-21) Olketa go ahed for mekem and iusim olketa niu samting for faet, wea mekem pipol fraet go moa. (2 Chron. 26:14, 15) Wea nao eniwan savve luk long hem for protection and salvation? Nomata pipol and olketa priest story abaotem nem bilong Jehovah long gavman bilong Judah, heart bilong olketa hem tan go long difren ples, firstaem long Assyria and then Egypt. (2 Ki. 16:7; 18:21) Faith bilong olketa long paoa bilong Jehovah hem gogo daon. Nomata samfala no showimaot stret wei wea olketa worshipim idol, olketa go ahed long hypocrite fasin insaed worship, wea kamaot from wei for followim kastom and no trufala wei for fraet long God.

² So hu nao bae tok for Jehovah? Hu nao bae talemaot paoa bilong hem for sevem man? Ansa hem stap: “Mi long hia! Sendem mi.” Isaiah nao talem toktok hia, and hem bin talemaot profesi bifor diswan. Hem year wea King Uzziah wea garem leprosy hem dae, samting olsem 778 B.C.E. (Isa. 6:1, 8) Datfala nem Isaiah hem minim “Salvation bilong Jehovah,” wea hem sem mining witim nem Jesus, (“Jehovah hem Salvation”) nomata olketa raetem long opposite wei. From start go kasem end, profesi bilong Isaiah hem mekhae long wei wea Jehovah hem salvation.

³ Isaiah hem son bilong Amoz (no mixim witim Amos, wea hem nara profet from Judah). (1:1) Bible no storyim born and dae bilong hem, bat kastom biliv bilong olketa Jew sei wicked King Manasseh katem hem long tufala haf witim saw. (Markem Hebrews 11:37.) Olketa raeting bilong hem showimaot hem stap long Jerusalem witim waef bilong hem wea hem wanfala woman profet and tufala son bilong hem wea garem profesi nem. (Isa. 7:3; 8:1, 3) Hem serve long taem bilong fofala king bilong Judah: Uzziah, Jotham, Ahaz, and Hezekiah; luk olsem start from samting olsem 778 B.C.E. (taem Uzziah hem dae, or maet bifor datwan) and go kasem bihaen 732 B.C.E. (mek-14 year bilong Hezekiah), or winim 46 year. Iumi sure hem raetem finis profesi bilong hem long disfala taem tu. (1:1; 6:1; 36:1) Olketa narafala profet wea stap long taem bilong hem, hem Micah long Judah and, long north, Hosea and Oded.—Mic. 1:1; Hos. 1:1; 2 Chron. 28:6-9.

⁴ Isaiah 30:8 strongim wei wea Jehovah nao givim komand long Isaiah for raetem olketa profesi judgment, wea sei: “Kam, raetem olketa long wanfala ston, and raetem tu insaed wanfala buk, mekem olketa savve iusim long future, for wanfala witness for olowe.” Olketa teacher bilong olketa Jew bifor luksavve hao Isaiah nao raetem disfala buk and olketa acceptim olsem first buk bilong olketa main profet (Isaiah, Jeremiah, and Ezekiel).

⁵ Nomata samfala sei wei wea disfala buk changem stael bilong hem from chapter 40 go kasem end hem showimaot wanfala difren man, or “Mek-tu Isaiah,” nao raetem, bat samting wea hem raet abaotem shud explainim datfala change. Staka pruv stap hao Isaiah nao raetem full buk hia wea garem nem bilong hem. Olsem example, wan mind bilong disfala buk hem showaot long disfala toktok, “datfala Holy Wan bilong Israel,” wea stap 12-fala taem long chapter 1 go kasem 39, and 13-fala taem long chapter 40 go kasem 66, wea kasem total bilong 25 taem; bat hem kamap 6-fala taem nomoa long evri nara Hebrew Scripture. Aposol Paul tu givim witness abaotem wei wea buk hia hem wan mind taem hem talem moa olketa toktok from evri part bilong datfala profesi and talem hao man wea raetem diswan, hem Isaiah.—Markem Romans 10:16, 20; 15:12 witim Isaiah 53:1; 65:1; 11:1.

⁶ Interesting samting, start long year 1947, samfala raeting bilong bifor wea olketa tekem kamaot from olketa dark cave no farawe from Khirbet Qumran, klosap long northwest saed bilong Dead Sea. Hem olketa Dead Sea Scroll, wea profesi bilong Isaiah tu insaed diswan. Olketa raetem buk hia long Hebrew languis wea pipol iusim bifor taem bilong olketa Masoretes and, nomata hem klosap 2,000 year old, raeting hem gud yet. So disfala raeting hem samting olsem wan thousand year moa old winim barava oldfala manuscript bilong Masoretic raeting wea stap distaem, wea olketa transleison bilong Hebrew Scripture distaem hem kam from. Samfala spelling and order bilong languis hem lelebet difren, bat hem no difren from Masoretic raeting saed long teaching. Diswan nao trufala pruv hao olketa Bible bilong iumi distaem garem firstfala message bilong Isaiah wea kam from God. And tu, olketa oldfala scroll hia pruvim hao olketa wea againstim disfala buk wea sei tufala “Isaiah” nao stap hem rong, from chapter 40 hem start long lastfala laen bilong column bilong chapter 39, and sentence hia finis long nextfala column. So, hem klia hao datfala man for copy no savve abaotem eni nara man wea raet or wei wea disfala buk hem divaed.a

⁷ Plande pruv stap wea showimaot hao buk bilong Isaiah hem tru. Isaiah hem mek-tu long Moses long wei wea olketa Christian wea raetem Bible talem plande toktok bilong hem winim evri nara profet. And tu, plande old samting bilong history pruvim diswan hem tru, olsem record bilong olketa ruler bilong Assyria, datfala hexagonal prism bilong Sennacherib wea talem story bilong hem abaotem datfala attak long Jerusalem.b (Isa., chap. 36, 37) Olketa old samting long ples wea Babylon stap bifor givim witness abaotem wei wea Isaiah 13:17-22 hem fulfill.c Pruv hem stap long wei wea plande thousand Jew march kam bak from Babylon bifor, taem wanfala king, nem bilong hem Cyrus, mekem olketa kamap free, wea Isaiah raet abaotem klosap 200 year bifor. Maet bihaen olketa showim disfala raeting bilong profet long Cyrus, bikos, taem hem mekem disfala smol sekson bilong olketa Jew kamap free, hem sei hem kasem komand from Jehovah for duim olsem.—Isa. 44:28; 45:1; Ezra 1:1-3.

⁸ Barava spesol samting insaed buk bilong Isaiah hem olketa Messiah profesi. Olketa kolem Isaiah “datfala Evangelist profet,” from olketa profesi wea fulfill long laef bilong Jesus hem plande tumas. For longfala taem Chapter 53 hem wanfala “secret chapter,” no long datfala eunuch bilong Ethiopia nomoa wea Acts chapter 8 hem storyim bat long full sekson bilong olketa Jew tu, wea chapter 53 hem barava storyim klia samting wea olketa bae duim long Jesus, hem olsem man wea lukim nao talem disfala story. Olketa Christian Greek Scripture recordim wei wea disfala chapter bilong Isaiah hem fulfill, olsem olketa scripture long daon showimaot: vs. 1—John 12:37, 38; vs. 2—John 19:5-7; vs. 3—Mark 9:12; vs. 4—Matthew 8:16, 17; vs. 5—1 Peter 2:24; vs. 6—1 Peter 2:25; vs. 7—Acts 8:32, 35; vs. 8—Acts 8:33; vs. 9—Matthew 27:57-60; vs. 10—Hebrews 7:27; vs. 11—Romans 5:18; vs. 12—Luke 22:37. Waswe, no eniwan moa bat God nomoa savve talemaot long stretfala wei samting wea bae happen long future?

WEI WEA HEM HELPEM IUMI

³⁴ Taem iumi ting raonem gud, datfala profesi buk bilong Isaiah hem nambawan buk wea kam from Jehovah God for helpem iumi. Hem showimaot olketa haefala tingting bilong God. (Isa. 55:8-11) Olketa wea talemaot Bible truth long pablik savve iusim Isaiah olsem ples for kasem staka tokpiksa wea savve barava pullim tingting long strongfala wei olsem olketa parabol bilong Jesus. Isaiah mekem iumi for ting strong long krangge fasin bilong datfala man wea iusim sem tree for firewood and for mekem wanfala idol for worshipim. Hem mekem iumi feelim wei wea datfala man wea leidaon long wanfala bed hem feel nogud witim wanfala bed wea smol tumas for hem, and hem mekem iumi herem sleep bilong olketa profet wea olsem olketa iusles dog wea les for singaot. Sapos iumi, olsem Isaiah hem encouragem iumi, ‘lukluk gud insaed buk bilong Jehovah and readim laod,’ iumi savve minim strongfala message bilong hem wea Isaiah garem for taem bilong iumi.—44:14-20; 28:20; 56:10-12; 34:16.

³⁵ Datfala profesi mekhae especially long Kingdom bilong God thru long Messiah. Jehovah seleva hem barava haefala King, and hem nao wan wea sevem iumi. (33:22) Bat, waswe long Messiah seleva? Announcement bilong datfala angel long Mary abaotem datfala pikinini wea bae born showimaot hao Isaiah 9:6, 7 hem bae fulfill taem hem kasem throne bilong David; “and hem bae rul olsem king ovarem haos bilong Jacob for olowe, and kingdom bilong hem bae no savve finis.” (Luke 1:32, 33) Matthew 1:22, 23 showimaot wei wea Jesus hem born from wanfala young gele wea fulfillim Isaiah 7:14 and showim hem olsem “Immanuel.” Samting olsem 30 year bihaen, John Baptaesa kam for preachim hao “kingdom bilong heven kam klosap.” Evriwan long fofala man wea raetem Gospel talem moa toktok bilong Isaiah 40:3 for showimaot hao disfala John nao datwan wea “singaot long wilderness.” (Matt. 3:1-3; Mark 1:2-4; Luke 3:3-6; John 1:23) Taem hem baptaes Jesus kamap datfala Messiah—datfala Anointed Wan bilong Jehovah, datfala rut bilong Jesse—for rul ovarem olketa nation. Olketa mas putim hope bilong olketa long hem, wea fulfillim Isaiah 11:1, 10.—Rom. 15:8, 12.

³⁶ Lukim hao Isaiah hem go ahed for showim klia Messiah datfala King! Jesus read abaotem waka wea hem mas duim from wanfala scroll bilong Isaiah for showimaot hem nao Anointed Wan bilong Jehovah, and then hem go ahed for “talemaot gud nius bilong kingdom bilong God, from,” olsem hem talem, “hem sendem mi for duim diswan.” (Luke 4:17-19, 43; Isa. 61:1, 2) Story bilong fofala Gospel hem fulap witim information abaotem ministry bilong Jesus long earth and hao hem bae dae olsem Isaiah talem finis long chapter 53. Nomata olketa herem gud nius bilong Kingdom and lukim olketa nambawan waka bilong Jesus, olketa Jew no luksavve long diswan bikos heart bilong olketa no biliv, wea diswan fulfillim Isaiah 6:9, 10; 29:13; and 53:1. (Matt. 13:14, 15; John 12:38-40; Acts 28:24-27; Rom. 10:16; Matt. 15:7-9; Mark 7:6, 7) Jesus hem olsem wanfala ston wea mekem olketa stambol, bat hem kamap faondeson konaston wea Jehovah putim long Zion and wea Hem buildim spiritual haos bilong hem antap for fulfillim Isaiah 8:14 and; 28:16.—Luke 20:17; Rom. 9:32, 33; 10:11; 1 Pet. 2:4-10.

³⁷ Olketa aposol bilong Jesus Christ go ahed for iusim gud profesi bilong Isaiah long ministry. Olsem example, for showimaot hao wei for buildimap faith hem needim olketa for duim preaching waka, Paul hem talem toktok bilong Isaiah taem hem sei: “Leg bilong olketa wea talemaot gud nius bilong olketa gudfala samting hem luk naes tumas!” (Rom. 10:15; Isa. 52:7; lukim tu Romans 10:11, 16, 20, 21.) Peter tu talem toktok bilong Isaiah taem hem showimaot wei wea gud nius hem for olowe: “From ‘evri flesh hem olsem grass, and evri glory bilong hem olsem flaoa bilong grass; grass hem kamap drae, and flaoa hem foldaon, bat toktok bilong Jehovah hem stap for olowe.’ So, diswan nao ‘toktok,’ diswan wea olketa talemaot long iufala olsem gud nius.”—1 Pet. 1:24, 25; Isa. 40:6-8.

³⁸ Isaiah showimaot Kingdom hope for future long nambawan wei! Lukim! Hem nao “niu skae and wanfala niu earth,” wea “wanfala king bae rul for raeteous fasin” and olketa prince bae rul for justice. Diswan mekem iumi hapi and singaot witim hapi! (65:17, 18; 32:1, 2) Peter tok olsem moa abaotem datfala hapi message bilong Isaiah: “Bat iumi weitim niu skae and niu earth wea [God] promisim, wea evriwan bae garem raeteous fasin.” (2 Pet. 3:13) Disfala nambawan Kingdom theme kasem full glory long olketa lastfala chapter bilong Revelation.—Isa. 66:22, 23; 25:8; Rev. 21:1-5.   

³⁹ Dastawe, nomata buk bilong Isaiah garem olketa strongfala toktok for olketa enemy bilong Jehovah and for olketa hypocrite man wea tingse olketa servant bilong God, hem point go long nambawan hope bilong Kingdom bilong Messiah wea bae mekem bigfala nem bilong Jehovah kamap holy. Hem help for explainim nambawan truth bilong Kingdom bilong Jehovah and redim heart bilong iumi for expectim “salvation thru long hem.”—Isa. 25:9; 40:28-31.

[Olketa Footnote]