Word Bilong Jehovah Hem Laef
Olketa Main Point From Buk Bilong Ezekiel—I
YEAR hem 613 B.C.E. Profet Jeremiah stap long Judah and hem gohed strong for talemaot hao Jerusalem klosap for distroe and land bilong Judah bae stap emti. King Nebuchadnezzar bilong Babylon hem tekem finis plande Jew for kamap prisoner. Fofala long olketa nao hem datfala young man Daniel and thrifala fren bilong hem, wea waka insaed kot long Chaldea. Staka long olketa Jew prisoner stap saed long Chebar River long “land bilong olketa long Chaldea.” (Ezekiel 1:1-3) Jehovah markem wanfala man for talemaot message for olketa. Hem markem Ezekiel wea 30 year for kamap wanfala profet.
Ezekiel finis for raetem disfala buk wea garem nem bilong hem long 591 B.C.E., and hem storyim olketa samting wea happen long 613 B.C.E. go kasem 591 B.C.E. Ezekiel barava keepim gudfala record. Hem raetem barava day, month, and year bilong olketa profesi bilong hem. Firstfala part long message bilong Ezekiel hem storyim wei wea Jerusalem lusim paoa for rul and hao hem distroe. Mek-tu part hem storyim olketa judgment message againstim olketa nation wea stap klosap, and lastfala part hem storyim wei wea tru worship bilong Jehovah kamap gud moa. Disfala article hem storyim olketa main point from Ezekiel 1:1–24:27, wea insaed diswan hem olketa vision, profesi, and wei wea Ezekiel actim olketa samting wea bae kasem Jerusalem.
“MI MEKEM IU KAMAP MAN FOR LUKAOT”
Bihaen Ezekiel lukim wanfala vision abaotem nambawan throne bilong Jehovah, hem kasem assignment bilong hem. Jehovah sei olsem long hem: “Mi mekem iu kamap man for lukaot for pipol bilong Israel, and iu mas herem toktok wea mi talem and iu mas go and warnim olketa.” (Ezekiel 3:17) Taem Ezekiel profesi abaotem taem wea olketa soldia raonem Jerusalem and olketa samting wea bae happen, Jehovah talem hem for actim tufala samting hia. Ezekiel talem disfala toktok bilong Jehovah abaotem land bilong Judah: “Mi kam nao and mi tekem kam sword, and bae mi distroem olketa haefala ples bilong iufala.” (Ezekiel 6:3) Hem sei olsem for pipol long datfala ples: “Iu bae kasem datfala crown [wea datwan nao piksarem trabol].”—Ezekiel 7:7.
Long 612 B.C.E., Ezekiel lukim wanfala vision wea hem stap long Jerusalem. Hem lukim olketa barava nogud samting wea gohed for happen insaed temple bilong God! Taem Jehovah sendem army bilong hem long heven (wea “sixfala man” nao piksarem) for finisim olketa apostate, olketa wea garem “wanfala mark long forhed” nomoa bae laef. (Ezekiel 9:2-6) Bat firstaem, man wea werem linen kaleko mas torowem “olketa sakol bilong fire” ovarem datfala taon, wea minim strongfala judgment message bilong God. (Ezekiel 10:2) Nomata “Jehovah bae panisim olketa wea wicked from samting olketa duim,” hem promis for hipimap moa olketa Israelite wea stap long difren ples.—Ezekiel 11:17-21.
Spirit bilong God tekem Ezekiel kam bak long Chaldea. Wanfala profesi wea Ezekiel actim hem showim King Zedekiah and olketa pipol ranawe from Jerusalem. Olketa man and woman wea giaman profet olketa kasem judgment. Jehovah rejectim olketa wea worshipim idol. Judah hem olsem wanfala iusles grape tree. Wanfala ridol abaotem eagle and grape tree hem showimaot barava nogud samting wea bae kasem Jerusalem bikos hem askem Egypt for helpem hem. Long end bilong datfala ridol, Jehovah hem promis ‘hao Hem bae aotem and plantim moa wanfala young shoot antap long wanfala hae maunten.’ (Ezekiel 17:22) Bat long Judah, “no eni iron stik for rul bae stap nao.”—Ezekiel 19:14.
Ansa for Olketa Bible Kwestin:
1:4-28—Wanem nao datfala chariot long heven hem piksarem? Datfala chariot hem piksarem organization bilong Jehovah long heven, wea hem nao olketa faithful spirit. Holy spirit bilong Jehovah nao givim paoa long disfala chariot. Man wea raedem chariot, wea piksarem Jehovah, hem barava nambawan. Lukluk bilong hem olsem wanfala naesfala rainbow.
1:5-11—Hu nao fofala living creature? Long mek-tu vision bilong Ezekiel abaotem datfala chariot, hem showimaot hao fofala living creature hia hem olketa cherub. (Ezekiel 10:1-11; 11:22) Taem hem story moa abaotem olketa hia, hem storyim feis bilong buluka olsem “feis bilong cherub.” (Ezekiel 10:14) Diswan hem fitim bikos long Bible buluka hem piksarem paoa and strong, and iumi savve olketa cherub hem olketa spirit wea barava strong.
2:6—Why nao Jehovah kolem Ezekiel “son bilong man” plande taem? Jehovah kolem Ezekiel long disfala nem for mekem profet hia remember hao nomata hem man wea talemaot message, hem wanfala man nomoa wea barava difren from God wea givim datfala message long hem. Olketa wea raetem olketa Gospel kolem Jesus Christ “Son bilong man” winim 80-fala taem, wea showimaot hem wanfala man and no wanfala angel wea luk olsem man.
2:9–3:3—Why nao datfala scroll bilong krae and sorre singsing hem teist swit long Ezekiel? Samting wea mekem datfala scroll hem teist swit long Ezekiel nao hem tingting bilong hem abaotem assignment bilong hem. Ezekiel hem tinghae long privilege bilong hem for serve olsem profet bilong Jehovah.
4:1-17—Waswe, Ezekiel hem really actim wei wea olketa soldia bae raonem Jerusalem? Wei wea Ezekiel askem Jehovah for iusim difren samting for kukim kaikai and Jehovah letem hem for duim datwan, hem showimaot Ezekiel really actim datfala samting. Wei wea hem leidaon long left saed hem piksarem 390 year wea ten-tribe kingdom bilong Israel duim olketa rong samting, start long 997 B.C.E. go kasem taem wea Jerusalem distroe long 607 B.C.E. Wei wea hem leidaon long raet saed hem piksarem 40-fala year wea Judah sin, start from taem wea Jeremiah kasem appointment olsem wanfala profet long 647 B.C.E. go kasem 607 B.C.E. Insaed long 430 day wea Ezekiel actim diswan, hem kaikaim lelebet kaikai and drinkim lelebet wata nomoa, wea diswan hem profesi wea showimaot hao bigfala hangre nao bae kamap taem olketa soldia raonem Jerusalem.
5:1-3—Wanem nao mining bilong wei wea Ezekiel tekem tu-thri hair from olketa hair wea hem shud torowem go long wind and pasolem olketa hia insaed kaleko bilong hem? Diswan hem for showimaot hao wanfala smol sekson bae go bak long Judah and startim moa tru worship bihaen 70 year wea datfala ples hem stap emti.—Ezekiel 11:17-20.
17:1-24—Tufala big eagle piksarem hu? Long wanem wei nao firstfala eagle aotem olketa young shoot bilong wanfala cedar tree? And hu nao datfala “young shoot” wea Jehovah aotem and plantim moa? Tufala eagle hia piksarem olketa ruler bilong Babylon and Egypt. Firstfala eagle hem kam and sidaon antap long cedar tree, wea minim, hem kam long ruler bilong gavman wea insaed long laen bilong King David. Eagle hia hem aotem olketa young shoot, wea minim hem aotem King Jehoiachin bilong Judah for rul and mekem Zedekiah nao kamap king. Nomata Zedekiah promis for loyal long datfala first eagle, hem askem help from mek-tu eagle, wea piksarem ruler bilong Egypt. Bat hem no kasem datfala help. Olketa tekem hem for kamap prisoner long Babylon and hem mas dae long there. Jehovah aotem tu “wanfala young shoot,” wea hem nao Messiah King. Hem plantim moa Datwan long “wanfala barava hae maunten,” wea minim Maunt Zion long heven. Hem bae kamap wanfala “bigfala cedar tree” wea bae givim olketa trufala blessing for disfala earth.—Revelation 14:1.
Olketa Leson for Iumi:
2:6-8; 3:8, 9, 18-21. Iumi shud no fraet long pipol wea wicked or hol bak for talem message bilong God long olketa, wea insaed diswan hem wanfala warning for olketa. Taem pipol no laek lisin or againstim iumi, iumi shud barava strong olsem wanfala diamond. Nomata olsem, iumi shud keakea for no kamap man wea no garem feeling, no tingim feeling bilong narawan, or raf long pipol. Jesus hem tingim feeling bilong pipol wea hem preach long olketa, and diswan tu shud samting wea muvim iumi for preach long nara pipol.—Matthew 9:36.
3:15. Ezekiel barava “seke fogud” taem hem kasem assignment bilong hem. Hem stap long Tel-abib for “sevenfala day” for ting raonem datfala message wea hem mas talemaot. Waswe, fitim iumi tu for strong for study and ting raonem wanem iumi studyim mekem iumi minim olketa deep spiritual truth?
4:1–5:4. Ezekiel needim hambol fasin and fasin for no fraet for actim tufala profesi hia. Iumi tu shud hambol and no fraet taem iumi duim eni assignment wea God givim long iumi.
7:4, 9; 8:18; 9:5, 10. Iumi mas no feel sorre for olketa wea God judgem olketa.
7:19. Taem Jehovah distroem disfala world, selen bae no fit for sevem man.
8:5-18. Apostate fasin hem spoelem evribit wei wea man fren witim God. “Toktok bilong man wea apostate hem spoelem narafala man.” (Proverbs 11:9) Hem wise for no lisin long olketa apostate.
9:3-6. For man sev long datfala “big trabol” hem barava important for kasem datfala mark, wea minim iumi dedicate and baptaes long God and garem fasin wea showimaot iumi wanfala Christian. (Matthew 24:21) Olketa anointed Christian, wea man wea karem inkhorn bilong secretary hem piksarem, olketa lead for duim waka for markem pipol, wea hem nao waka for preach abaotem Kingdom and mekem pipol kamap disaepol. Sapos iumi laek for gohed garem disfala mark, iumi mas strong for helpem olketa anointed Christian long disfala waka.
12:26-28. Ezekiel hem talem disfala toktok tu long olketa wea tok spoelem message bilong hem: “No eni samting bae stopem toktok bilong [Jehovah] for kamap tru.” Iumi mas duim best bilong iumi for helpem nara pipol for trustim Jehovah bifor hem finisim disfala world.
14:12-23. For kasem laef hem responsibility bilong iumi wanwan. No eni narawan savve duim datwan for iumi.—Romans 14:12.
18:1-29. Iumi wanwan bae kasem samting wea kamaot from wanem iumi duim.
“BAE MI SPOELEM DATWAN EVRIBIT”
Long 611 B.C.E., wea hem mek-seven year wea olketa Israelite stap olsem prisoner, olketa olo man long Israel kam long Ezekiel “for askem direction bilong Jehovah.” Ezekiel storyim history bilong bighed fasin wea olketa Israelite garem and hem warnim olketa hao ‘Jehovah bae aotem sword bilong hem’ for againstim olketa. (Ezekiel 20:1; 21:3) Jehovah hem sei olsem long chief bilong Israel (Zedekiah): “Aotem turban, and tekaotem crown. Olketa samting bae change. Putim datwan wea low go long haefala ples, and datwan wea hae long lowfala ples. Bae mi spoelem datwan evribit. And bae no eniwan werem diswan go kasem taem wea man wea garem right [Jesus Christ] hem kam, and mi mas givim diswan long hem.”—Ezekiel 21:26, 27.
Jehovah accusim Jerusalem for duim olketa rong samting. Olketa rong samting wea Oholah (Israel) and Oholibah (Judah) duim hem showaot klia. Jehovah givim go Oholah “long hand bilong olketa wea barava lovem hem, long hand bilong olketa son bilong Assyria.” (Ezekiel 23:9) Klosap nao Oholibah bae stap emti. Long 609 B.C.E., olketa start for raonem Jerusalem and diswan gohed for 18-fala month. Gogo taem datfala taon hem distroe, olketa Jew bae seke fogud and no savve showimaot sorre bilong olketa nao. Ezekiel mas weit for kasem report hao datfala taon distroe from “man wea ranawe” bifor hem talemaot message bilong God long olketa prisoner long Babylon.—Ezekiel 24:26, 27.
Ansa for Olketa Bible Kwestin:
21:3—Wanem nao datfala “sword” wea Jehovah aotem from kava bilong hem? “Sword” wea Jehovah iusim for judgem Jerusalem and Judah nao hem King Nebuchadnezzar bilong Babylon and army bilong hem. Maet insaed diswan hem olketa strongfala angel wea part long organization bilong God long heven.
24:6-14—Wanem nao datfala rasta insaed pot for kuki hem piksarem? Jerusalem wea olketa soldia raonem hem, hem olsem wanfala big pot for kuki. Rasta insaed long datfala pot hem piksarem nogud fasin, olobaot fasin, wei for no klin, and wei for killim man dae wea gohed long datfala taon. Datfala pot hem barava dirty dastawe nomata olketa putim antap long fire wea olketa iusim sakol for hotem datfala pot, bat rasta hia hem hard for kamaot.
Olketa Leson for Iumi:
20:1, 49. Samting wea olketa olo man bilong Israel talem hem showimaot olketa daotem toktok bilong Ezekiel. Iumi mas keakea for no garem fasin for daotem olketa warning bilong God.
21:18-22. Nebuchadnezzar iusim divination for savve hu nao for attakim firstaem, bat Jehovah nao hem mek sure Nebuchadnezzar bae againstim Jerusalem. Diswan hem showimaot hao olketa demon tu kanduit stopem army bilong Jehovah for duim samting followim plan bilong hem.
22:6-16. Jehovah heitim fasin for tok laea for spoelem narawan, dirty fasin, wei for iusim paoa wea man garem long rong wei, and wei for acceptim olketa bribe. Iumi shud disaed strong for stap klia long wei for duim olketa rong samting hia.
23:5-49. From Israel and Judah saed witim olketa nara nation, diswan mekem olketa followim false worship bilong olketa. Iumi mas no kaban witim pipol wea no worshipim Jehovah from datwan savve spoelem faith bilong iumi.—James 4:4.
Wanfala Message wea Laef and Garem Paoa
Iumi lanem olketa nambawan samting from firstfala 24 chapter insaed Bible buk bilong Ezekiel! Olketa principle wea iumi lanem long hia showimaot wanem nao mekem God rejectim pipol, wei wea iumi savve kasem mercy from God, and why nao iumi shud warnim olketa wea wicked. Profesi abaotem wei wea Jerusalem bae distroe hem showimaot klia hao Jehovah hem wanfala God wea ‘mekem pipol bilong hem savve long olketa niu samting bifor olketa happen.’—Isaiah 42:9.
Olketa profesi olsem wea stap long Ezekiel 17:22-24 and 21:26, 27 hem point go long taem wea Kingdom bilong Messiah hem start for rul long heven. Klosap nao datfala Kingdom bae mekem will bilong God kamap long earth. (Matthew 6:9, 10) Witim strongfala faith iumi luk forward long olketa blessing wea iumi bae kasem anda long Kingdom. Tru nao, “word bilong God hem laef and garem paoa.”—Hebrews 4:12.
[Piksa long page 4]
Wanem nao datfala chariot long heven piksarem?
[Piksa long page 6]
Wei for evritaem duim preaching waka hem helpem iumi for keepim datfala “mark” bilong iumi