Toktok Bilong Jehovah Hem Laef

Olketa Main Point From Buk Bilong Ezekiel​—II

HEM December 609 B.C.E. King bilong Babylon hem kam for raonem Jerusalem. Kam kasem datfala taem, main message bilong Ezekiel for olketa Israelite wea stap olsem prisoner long Babylon hem abaotem wei wea Jerusalem, datfala nambawan taon bilong olketa, hem lusim paoa for rul and hem distroe. Olketa heathen nation bae hapi tumas for lukim pipol bilong God kasem nogud samting. Bat distaem, message bilong Ezekiel hem change. Hem talem profesi abaotem hao olketa heathen nation hia bae kasem judgment. Taem Jerusalem hem lusim paoa for rul 18 month bihaen, message bilong Ezekiel hem change moa, and main samting hem talemaot nao hem nambawan wei wea tru worship bae kamap gud moa.

Long Ezekiel 25:1–​48:35, hem garem olketa profesi abaotem olketa nation wea stap raonem Israel and wei wea God sevem pipol bilong hem.a Olketa scripture hia storyim olketa samting followim taem wea olketa happen, and tu, hem storyim olketa samting followim olketa subject. Bat, Ezekiel 29:17-​20 hem storyim nomoa olketa subject abaotem datfala profesi againstim Egypt. From buk bilong Ezekiel hem part long Bible, message wea stap insaed hem “laef and garem paoa.”​—Hebrews 4:​12.

‘DATFALA PLES BAE KAMAP OLSEM GARDEN BILONG EDEN’

(Ezekiel 25:1–​39:29)

From Jehovah savve finis hao nation bilong Ammon, Moab, Edom, Philistia, Tyre, and Sidon bae hapi for lukim Jerusalem lusim paoa for rul, hem talem Ezekiel for profesi againstim olketa nation hia. Babylon bae tekem evri rich samting bilong Egypt. ‘King bilong Egypt, Pharaoh, and staka pipol wea followim hem,’ olketa olsem wanfala cedar tree wea “sword bilong king bilong Babylon” bae katem daon.​—Ezekiel 31:​2, 3, 12; 32:11, 12.

Samting olsem sixfala month bihaen Jerusalem hem distroe long 607 B.C.E., wanfala man wea ranawe from there hem kam and talem Ezekiel olsem: “Datfala taon hem distroe!” Datfala profet wea ‘no toktok bifor hem start for toktok nao’ long olketa wea stap olsem prisoner. (Ezekiel 33:21, 22) Bae hem talemaot olketa profesi abaotem wei wea pipol bilong God bae kamap gud moa. Jehovah ‘bae markem wanfala shepherd for lukaftarem olketa, olsem servant bilong hem David.’ (Ezekiel 34:23) No eniwan bae stap long Edom, bat land bilong Judah wea stap klosap long Edom bae kamap “olsem garden bilong Eden.” (Ezekiel 36:35) Jehovah promis for protectim pipol bilong hem wea kamap free from wei for prisoner from attak bilong “Gog.”​—Ezekiel 38:2.

Ansa for Olketa Bible Kwestin:

29:​8-​12​—Wanem taem nao no eniwan stap long Egypt for 40-fala year? Bihaen Jerusalem distroe long 607 B.C.E., pipol from Judah wea stap laef ranawe long Egypt nomata profet Jeremiah warnim olketa finis for no go long there. (Jeremiah 24:​1, 8-​10; 42:​7-​22) Egypt hem no sef ples for olketa stap bikos Nebuchadnezzar kam and faet againstim Egypt and tekovarem datfala ples. Maet bihaen datwan nao no eniwan hem stap long Egypt for datfala 40 year. Nomata no eni nara buk long world abaotem history talem hao diswan hem happen, iumi barava sure diswan hem happen bikos Jehovah hem evritaem fulfillim olketa profesi bilong hem.​—Isaiah 55:11.

29:18​—Hao nao ‘evri soldia kamap bolhed, and skin long shoulder bilong olketa kamaot’? From olketa soldia bilong Nebuchadnezzar raonem taon bilong Tyre wea stap long mainland for staka year, helmet wea olketa soldia werem hem mekem olketa kamap bolhed. And tu, skin from shoulder bilong olketa hem kamaot bikos olketa mas karem olketa material for buildim olketa taoa and olketa strongfala wall for protectim olketa.​—Ezekiel 26:​7-​12.

Olketa Leson for Iumi:

29:19, 20. From pipol wea stap long Tyre tekem plande long olketa riches bilong olketa and ranawe long taon bilong olketa long island, King Nebuchadnezzar kasem lelebet riches nomoa taem hem tekovarem Tyre. Nomata Nebuchadnezzar hem wanfala heathen ruler wea praod and tingim hemseleva nomoa, Jehovah givim reward long hem for samting wea hem duim. Hem givim hem Egypt olsem “wages for army bilong hem.” Iumi shud followim disfala example bilong trufala God saed long wei for peim tax long gavman for olketa samting wea olketa duim for iumi. Nomata sapos gavman hem duim samting wea no stret or iusim datfala tax for olketa nogud samting, iumi mas gohed givim tax wea olketa askem.​—Romans 13:​4-7.

33:​7-9. Datfala sekson wea lukaot distaem hem olketa anointed Christian wea stap yet long earth. Olketa hia and olketa fren bilong olketa shud no hol bak for preachim gud nius abaotem Kingdom and for warnim pipol abaotem “big trabol” wea bae kam.​—Matthew 24:21.

33:10-​20. Iumi bae kasem laef sapos iumi stop for duim olketa nogud samting and duim samting wea God laekem. Tru nao, wei bilong Jehovah nao hem “stret.”

36:20, 21. From olketa Israelite no duim olketa samting wea Jehovah laekem wea showimaot olketa nao ‘pipol bilong hem,’ datwan hem spoelem nem bilong God midolwan long olketa nation. Iumi shud no enitaem sei iumi worshipim Jehovah bat no followim samting wea hem talem.

36:25, 37, 38. “Wanfala grup bilong pipol wea holy” stap long spiritual paradaes distaem bikos olketa fren gud witim Jehovah. So iumi wea part long datfala grup shud gohed for stap klin long spiritual wei.

38:​1-​23. Wei for savve hao Jehovah bae sevem pipol bilong hem from attak bilong Gog bilong land bilong Magog hem barava encouragem iumi! Satan wea hem “ruler bilong disfala world” hem garem datfala nem Gog bihaen Jesus aotem hem from heven. Satan and olketa demon bilong hem stap long land bilong Magog long earth.​—John 12:31; Revelation 12:​7-​12.

“LUKLUK GUD LONG EVRI SAMTING WEA MI SHOWIM LONG IU”

(Ezekiel 40:1–​48:35)

Hem mek-fotin year bihaen taon bilong Jerusalem hem distroe. (Ezekiel 40:1) Olketa Israelite mas stap olsem prisoner for fifti-six year moa bifor olketa savve kamap free. (Jeremiah 29:10) Ezekiel hem klosap 50 year. Long wanfala vision Jehovah tekem Ezekiel go long Israel and sei long hem: “Son bilong man, lukluk witim eye bilong iu, and herem witim ear bilong iu, and lukluk gud long evri samting wea mi showim long iu.” (Ezekiel 40:​2-4) Masbi Ezekiel barava hapi for lukim long vision wanfala niu temple!

Datfala nambawan temple wea Ezekiel lukim hem garem 6-fala gate, 30-fala rum for kaikai, Holy ples, Most Holy ples, wanfala altar wea olketa wakem long timba, and wanfala altar for bonem olketa sakrifaes. Wanfala stream wea “ran kamaot” from datfala temple hem kamap wanfala river. (Ezekiel 47:1) Ezekiel lukim tu wanfala vision wea each tribe bilong Israel kasem pis land wea hem start long east saed go long west saed. Midolwan long pis land bilong Judah and Benjamin hem wanfala pis land for gavman iusim. “Temple bilong Jehovah” and “datfala taon” wea garem nem Jehovah-Shammah stap long hem.​—Ezekiel 48:​9, 10, 15, 35, footnote.

Ansa for Olketa Bible Kwestin:

40:3–​47:12​—Wanem nao datfala temple wea Ezekiel lukim long vision hem piksarem? No eniwan buildim disfala mamaeti temple wea Ezekiel lukim long vision. Hem bikos datfala temple hem piksarem spiritual temple bilong God, wea hem nao arrangement for tru worship long taem bilong iumi. (Ezekiel 40:2; Micah 4:1; Hebrews 8:2; 9:​23, 24) Vision abaotem datfala temple hem fulfill long “olketa last day,” taem Jehovah klinim datfala sekson bilong olketa priest. (2 Timothy 3:1; Ezekiel 44:10-​16; Malachi 3:​1-3) Bat datfala vision bae fulfill evribit long Paradaes. Datfala temple long vision hem wanfala promis for olketa Jew wea prisoner hao tru worship bae kamap moa and each famili bilong olketa Jew bae kasem wanfala pis land.

40:3–​43:17​—Why nao wei for measurem datfala temple hem important? For measurem datfala temple hem wanfala saen wea showimaot hao plan bilong Jehovah saed long tru worship bae fulfill.

43:​2-4, 7, 9​—Wanem nao “olketa dead body bilong olketa king” wea olketa mas aotem from temple? Luk olsem olketa dead body hia hem olketa idol. Olketa wea rulim Jerusalem and pipol wea stap long there olketa mekem temple bilong God kamap dirty long wei for worshipim olketa idol, and olketa mekem olketa idol hia kamap olsem olketa king bilong olketa.

43:13-​20​—Wanem nao datfala altar wea Ezekiel lukim long vision hem piksarem? Datfala altar hem piksarem will bilong God saed long ransom sakrifaes bilong Jesus Christ. From God provaedem disfala ransom sakrifaes, hem ting long olketa anointed wan olsem olketa raeteous and datfala “big crowd” olsem olketa klin. (Revelation 7:​9-​14; Romans 5:​1, 2) Maet datwan nao reason why “datfala molten sea” long temple bilong Solomon, wea hem nao wanfala big pool wata for olketa priest swim insaed, hem no stap insaed datfala vision abaotem temple.​—1 Kings 7:​23-​26.

44:10-​16—Sekson bilong olketa priest piksarem hu? Sekson hia piksarem grup bilong olketa anointed Christian long taem bilong iumi. Long 1918, Jehovah sidaon long spiritual temple bilong hem for “klinim” olketa anointed Christian hia. (Malachi 3:​1-5) Olketa wea klin, wea minim olketa wea repent, savve gohed for duim service bilong olketa. Bihaen datwan, olketa mas waka hard for ‘no letem world mekem olketa dirty,’ and long wei olsem olketa showimaot example for datfala tribe wea no serve olsem olketa priest, wea hem nao datfala “big crowd.”​—James 1:​27; Revelation 7:​9, 10.

45:1; 47:⁠13–​48:29​—Wanem nao “datfala land” and wei for sharem land hem piksarem? Datfala land hem piksarem waka bilong pipol bilong God. Nomata wanem ples wanfala worshiper bilong Jehovah hem stap, hem bae stap long datfala land wea kamap gud moa sapos hem gohed for sapotim tru worship. Wei for sharem land bae fulfill long bigfala wei moa long niu world taem evri servant bilong Jehovah wea faithful kasem wanfala pis land for olketa seleva.​—Isaiah 65:17, 21.

45:​7, 16​—Contribution wea pipol givim long olketa priest and datfala chief hem piksarem wanem? Long datfala spiritual temple, diswan hem piksarem sapot wea olketa kasem long spiritual wei​—wea hem nao wei for givim help and for waka tugeta.

47:​1-5​—Wanem nao wata long datfala river wea Ezekiel lukim long vision hem piksarem? Datfala wata hem piksarem olketa spiritual samting wea Jehovah provaedem wea mekem man kasem laef, wea tufala long olketa samting hia hem ransom sakrifaes bilong Christ Jesus and savve abaotem God wea stap long Bible. (Jeremiah 2:​13; John 4:​7-​26; Ephesians 5:​25-​27) Wei wea datfala river kakamap moa deep hem mekem wei for staka niu wan savve followim tru worship. (Isaiah 60:22) Datfala river bae barava ran big witim wata bilong laef long Wan Thousand Year Rul bilong Christ, and olketa nara samting wea part long olketa wata hia hem samfala information moa wea olketa man bae kasem taem “olketa scroll” hem open.​—Revelation 20:12; 22:​1, 2.

47:12​—Wanem nao olketa tree wea garem staka frut piksarem? Olketa tokpiksa tree hia piksarem olketa spiritual samting wea God provaedem for mekem olketa man kamap perfect.

48:15-​19, 30-​35, footnote​—Wanem nao datfala taon long vision bilong Ezekiel hem piksarem? From datfala taon, “Jehovah-Shammah,” stap long land wea hem “no holy,” masbi hem piksarem samting long earth. Luk olsem datfala taon hem piksarem organization bilong God long earth wea givim direction for helpem olketa wea bae stap long datfala raeteous “niu earth.” (2 Peter 3:​13) Wei wea hem garem tufala gate long each saed hem showimaot hem isi for pipol go insaed. Olketa overseer wea lukaftarem pipol bilong God hem olketa man wea pipol no fraet for go story witim olketa.

Olketa Leson for Iumi:

40:14, 16, 22, 26. Olketa karving bilong olketa palm tree wea stap long each saed long olketa gate bilong temple showimaot hao olketa wea garem gudfala fasin nomoa savve go insaed. (Psalm 92:12) Iumi lanem from diswan hao Jehovah acceptim worship bilong iumi only sapos iumi garem gudfala fasin.

44:23. Iumi barava hapi long waka wea datfala sekson bilong olketa priest duim distaem! “Datfala faithful and wise slave” nao lead long wei for provaedem spiritual kaikai long barava taem wea helpem iumi for luksavve long samting wea Jehovah ting long hem olsem klin and no klin.​—Matthew 24:45.

47:​9, 11. Savve, wea hem nao wanfala important part long datfala tokpiksa wata, hem barava helpem pipol long taem bilong iumi. Taem man kasem disfala savve, hem olsem hem laef bak moa long spiritual wei. (John 17:3) Bat olketa wea no acceptim datfala wata bilong laef bae ‘kasem salt,’ wea minim olketa bae finis evribit. Hem barava important for ‘iumi duim best bilong iumi for iusim word bilong truth long stretfala wei’!​—2 Timothy 2:​15.

“Bae Mi Mekem Pipol Ting Long Nambawan Nem Bilong Mi Olsem Hem Holy”

Bihaen last king wea kam from laen bilong David lusim paoa for rul, tru God hem letem plande year go pas firstaem bifor Datwan “wea garem right” for rul hem kam. Nomata olsem, God nating forgetim covenant wea hem mekem witim David. (Ezekiel 21:27; 2 Samuel 7:​11-​16) Profesi bilong Ezekiel storyim wanfala ‘servant bilong Jehovah wea olsem David,’ hem bae kamap wanfala “shepherd” and “king.” (Ezekiel 34:23, 24; 37:22, 24, 25) Jesus Christ nao hem diswan wea kasem paoa for rul long Kingdom. (Revelation 11:15) Jehovah bae “mekem pipol ting long nambawan nem bilong [hem] olsem hem holy” thru long Messiah Kingdom.​—Ezekiel 36:23.

Klosap nao, evriwan wea spoelem holy nem bilong God bae finis. Bat olketa wea mekhae long datfala nem long wei for worshipim Jehovah long stretfala wei bae kasem laef olowe. So hem gud for iumi iusim evribit disfala wata bilong laef wea barava ran big long taem bilong iumi and mekem tru worship kamap main samting long laef bilong iumi.

[Footnote]

[Piksa long page 15]

Datfala nambawan temple long vision bilong Ezekiel

[Piksa long page 16]

Long vision bilong Ezekiel, wanem nao datfala river bilong laef hem piksarem?

[Credit Line]

Pictorial Archive (Near Eastern History) Est.