Kwestin From Reader
Long wanem taem nao “Holy Bilong Holy” hem kasem anointing, olsem Daniel 9:24 talemaot?
Daniel 9:24-27 hem wanfala profesi abaotem kakam bilong “Messiah datfala Leader”—datfala Christ. So disfala profesi hao “Holy Bilong Holy” bae kasem anointing, no storyim wei wea disfala Most Holy rum bilong temple long Jerusalem kasem anointing. Bat, disfala toktok “Holy Bilong Holy” storyim temple bilong God long heven—Most Holy long heven—long nambawan spiritual temple bilong Jehovah.a—Hebrews 8:1-5; 9:2-10, 23.
Long wanem taem nao spiritual temple bilong God hem start for waka? Tingim samting wea happen taem Jesus givim hemseleva for baptaes long 29 C.E. Start long datfala taem, Jesus fulfillim toktok bilong Psalm 40:6-8. Bihaen, aposol Paul showim hao Jesus hem prea olsem long God: “Sakrifaes and offering iu no laekem, bat iu preparem wanfala body for mi.” (Hebrews 10:5) Jesus savve hao God “no laekem” olketa for go ahed for offerim olketa animal sakrifaes long temple long Jerusalem. Winim datwan, Jehovah hem redyim wanfala perfect human body for Jesus offerim olsem sakrifaes. Long wei wea talemaot feeling bilong heart bilong hem, Jesus sei moa: “Lukim! Mi kam (insaed long buk olketa raet abaotem mi) for duim will bilong iu, O God.” (Hebrews 10:7) And wanem nao ansa bilong Jehovah? Gospel bilong Matthew hem sei: “Taem hem baptaes finis Jesus hem kamaot from wata; and, lukim! heven hem open, and hem lukim spirit bilong God kamdaon long hem olsem wanfala kurukuru. And tu, lukim! wanfala voice from heven hem sei: ‘Diswan nao Son bilong mi, wea mi lovem, wea mi appruvim.’ ”—Matthew 3:16, 17.
Wei wea Jehovah God acceptim body bilong Jesus olsem wanfala sakrifaes hem minim wanfala altar wea winim altar long temple bilong Jerusalem hem stap nao. Hem wanfala altar fitim “will” bilong God, or arrangement for acceptim human laef bilong Jesus olsem wanfala sakrifaes. (Hebrews 10:10) Wei for anointim Jesus witim holy spirit hem minim God, long datfala taem, hem startim full spiritual temple arrangement.b So, long taem wea Jesus hem baptaes, ples bilong God long heven hem kasem anointing, or stap difren, olsem “Holy Bilong Holy” long nambawan spiritual temple arrangement.
[Olketa Footnote]
a For savve abaotem olketa difren samting long spiritual temple, lukim page 14-19 bilong July 1, 1996, Wastaoa.
b Page 195 bilong buk Tingting Strong Long Profesi Bilong Daniel! lelebet storyim diswan.
[Piksa long page 27]
“Holy Bilong Holy” kasem anointing taem Jesus hem baptaes