Information Helpem Audience

FOR givim tok wea teachim audience, iu need for duim moa samting winim wei for storyim gudfala subject. Askem iuseleva: ‘Why nao disfala audience need for herem disfala subject? Wanem nao bae mi talem wea bae mekem audience feel olketa kasem gud samting from disfala story?’

Sapos iu kasem assignment long skul for duim demonstration long wei for witness long samwan, haosholder nao audience bilong iu. Long narataem, maet iu story long full kongregeson.

Samting wea Audience Bilong Iu Savve Finis. Askem iuseleva, ‘Wanem nao audience savve finis abaotem disfala subject?’ Ansa for diswan shud helpem iu luksavve long wanem point for startim tok. Sapos iu givim tok long kongregeson wea garem planti mature Christian, no just talem moa olketa main truth, wea planti long olketa savve finis. Iusim olketa truth hia olsem faondeson. Bat sapos planti niu wan stap long audience tu, iu mas tingim need bilong tufala grup hia.

Changem fast bilong tok bilong iu fitim savve bilong audience. Sapos iu storyim samfala point wea planti savve long hem, storyim lelebet kwiktaem. Bat iu mas moa slow taem iu storyim olketa idea wea maet niu long planti wea lisin, mekem olketa minim gud.

Samting wea Teachim Man. For teach no minim iu mas garem niu samting for talem evritaem. Planti long audience bae just minim evribit olketa truth wea olketa savve finis long hem from simpol wei wea samfala speaker savve teach.

Long field ministry, hem no inaf for talem wanfala nius report for pruvim iumi stap long olketa last day. Iusim Bible for showim mining bilong datfala samting wea happen. For duim olsem bae barava helpem haosholder. Long sem wei, taem iu storyim samting abaotem law bilong nature or olketa plant or animal, hem no goal bilong iu for storyim barava interesting samting saed long science wea haosholder nating herem bifor. Bat, goal bilong iu hem for joinim pruv from nature witim toktok long Bible for showimaot wanfala Creator wea lovem iumi, hem stap. Diswan savve helpem haosholder for tingim samting long difren wei.

For storyim wanfala subject wea audience herem finis planti taem hem wanfala challenge. Bat for kamap wanfala gudfala teacher, iu need for lane hao for duim diswan and win. Hao nao iu savve duim?

Research bae help. Winim wei for storyim nomoa olketa point wea iu rememberim, iusim olketa tul for duim research wea page 33 go kasem 38 story abaotem. Tingim olketa idea long there wea storyim olketa goal wea iu mas trae for kasem. Long research bilong iu, maet iu lane abaotem samting wea happen long history wea pipol no savve tumas abaotem wea barava join witim subject bilong iu. Or maet iu faendem samting insaed nius wea bae showimaot point wea iu plan for storyim.

Taem iu studyim datfala information, ting raonem gud wei for askem olketa kwestin olsem wanem? why? wanem taem? wea? hu? and hao? Olsem example: Why nao diswan hem tru? Hao nao mi savve pruvim? Wanem kaen biliv wea planti pipol garem nao mekem hem hard for samfala minim disfala truth bilong Bible? Why nao hem important? Hao nao diswan shud affectim laef bilong wanfala man? Wanem example nao showimaot hao hem gud for live followim datwan? Disfala truth bilong Bible showimaot wanem samting abaotem fasin bilong Jehovah? Sapos hem fitim information wea iu storyim, maet iu ask: Wanem taem nao diswan hem happen? Hao nao iumi savve iusim disfala information distaem? Maet iu laek for mekem tok bilong iu moa interesting long wei for askem and ansarem samfala kwestin olsem taem iu givim datfala tok.

Audience bilong iu maet savve gud long olketa scripture wea iu need for iusim insaed tok bilong iu. Hao nao iu savve iusim olketa scripture hia long wei wea savve helpem olketa? No readim nating; explainim olketa.

Iu savve storyim wanfala scripture wea audience savve finis long hem long wei for chusim olketa part wea join witim theme bilong tok and then explainim olketa part hia. Lukim hao for duim olsem long scripture olsem Micah 6:8 long New World Translation. Wanem nao “justice”? Diswan storyim standard bilong justice bilong hu nao? Wanem example nao bae iu iusim for explainim mining bilong wei “for showim justice”? Or “for lovem kaenfala fasin”? Wanem nao hambol fasin? Hao nao bae iu storyim datfala information for fitim man wea olo? Information wea iu iusim bae depend long theme, goal bilong iu, audience, and haomas taem iu garem for storyim.

Hem helpem pipol sapos iu talem mining bilong word or toktok long simpol wei. Samfala pipol sapraes for lanem mining bilong “kingdom” long Matthew 6:10. For talem moa mining bilong wanfala word long man wea Christian for longtaem finis savve helpem hem for minim go moa wanfala scripture. Diswan hem klia taem iumi readim 2 Peter 1:5-8 and then minim olketa difren part wea olketa verse hia storyim: faith, gudfala fasin, savve, fasin for kontrolem seleva, fasin for go ahed strong, fasin for lovem God, feeling for olketa brata, and love. Taem iu iusim olketa word wea lelebet semsem, wei for minim each wan savve helpem audience for luksavve hao olketa word hia difren from each other. Diswan hem tru for olketa toktok olsem wisdom, savve, fasin for luksavve, and fasin for minim samting, wea stap long Proverbs 2:1-6.

Maet hem helpem audience sapos iu just story raonem wanfala scripture. Planti pipol sapraes taem olketa luksavve hao long samfala Bible transleison, Genesis 2:7 storyim Adam olsem wanfala living soul and olsem Ezekiel 18:4 talem, olketa soul dae. Wantaem Jesus mekem olketa Sadducee sapraes taem hem storyim Exodus 3:6, wea olketa sei olketa bilivim, and then joinim datwan witim resurrection bilong olketa wea dae finis.—Luke 20:37, 38.

Samfala taem hem helpem audience sapos iu storyim olketa verse wea stap raonem wanfala scripture, samting wea go ahed taem olketa raetem datwan, and hu nao man wea story or man wea lisin. Olketa Pharisee savve gud long Psalm 110. Nomata olsem, Jesus point go long wanfala important samting long firstfala verse. Hem askem olketa: “‘Wanem nao tingting bilong iufala abaotem Christ? Hem son bilong hu?’ Olketa sei long hem: ‘Bilong David.’ Hem sei long olketa: ‘So, why nao David thru long holy spirit kolem hem “Lord,” taem hem sei, “Jehovah sei long Lord bilong mi: ‘Sidaon long raet saed bilong mi go kasem taem mi putim olketa enemy bilong iu andanit long leg bilong iu’ ”? So, sapos David kolem hem “Lord,” hao nao hem son bilong hem?’” (Matt. 22:41-45) Taem iu story raonem olketa scripture olsem Jesus duim, bae iu helpem pipol for ting raonem samting wea olketa readim long Word bilong God.

Taem wanfala speaker hem talem taem wea man raetem wanfala Bible buk or wanem taem nao samting hem happen, hem shud storyim tu living long datfala taem. Long wei olsem, bae hem moa klia long audience why nao datfala buk or samting wea happen hem important.

For markem samting wea iu talem witim nara samting savve helpem audience for minim samting moa. Maet iu markem wanfala idea wea planti pipol garem witim samting wea Bible talem abaotem datfala sem point. Or maet iu markem tufala Bible story wea storyim sem samting. Waswe, samfala samting hem difren? Why nao olsem? Wanem nao iumi savve lanem from diswan? Taem iu duim diswan hem helpem olketa wea lisin for garem niu tingting abaotem datfala subject.

Sapos iu kasem assignment for storyim samting saed long Christian ministry, iu savve mekem tok bilong iu moabeta long wei for reviewim datfala waka firstaem. Story raonem wanem nao for duim, why nao iumi need for duim, and hao nao datwan hem join witim olketa goal bilong iumi olsem Olketa Jehovah’s Witness. Then talem ples, wanem taem, and hao for duim datfala waka.

Waswe sapos long tok bilong iu, iu mas storyim samfala “deep samting bilong God”? (1 Cor. 2:10) Sapos iu start long wei for explainim samfala main point bilong datfala subject, bae hem moa isi for audience minim evri smol point. And sapos long conclusion iu givim shortfala review, audience bae feel satisfae from olketa barava lanem samting.

Kaonsel Abaotem Christian Living. Audience bae barava kasem gud samting sapos iu helpem olketa luksavve hao information long tok bilong iu hem fitim living bilong olketa. Taem iu ting raonem olketa scripture long information bilong iu, askem iuseleva, ‘Why nao disfala information hem stap insaed Bible kam kasem taem bilong iumi?’ (Rom. 15:4; 1 Cor. 10:11) Tingim olketa samting wea audience bilong iu feisim long living bilong olketa. Ting raonem wei wea olketa principle and kaonsel long Bible affectim olketa samting hia. Long tok bilong iu, story raonem olketa Scripture for showimaot hao olketa savve helpem man for deal long wisefala wei witim samting wea hem feisim. Targetim samfala problem. Storyim tingting wea pipol garem and samting olketa duim.

First samting, followim wan or tufala idea antap taem iu preparem wanfala tok. Taem iu kasem moa savve, followim samfala moa. Gogo, audience bae luk forward for herem olketa tok bilong iu, from olketa feel sure olketa bae herem samting wea bae barava helpem olketa.