Jehovah Hem Lovem Justice
“Mi, Jehovah, mi lovem justice.”—ISAIAH 61:8.
1, 2. (a) Wanem nao “justice” and “injustice” hem minim? (b) Wanem nao Bible talem abaotem Jehovah and justice bilong hem?
DATFALA word “justice” hem minim ‘wei for no saed witim eniwan, no favorim eniwan, and duim samting wea stret and gud.’ Datfala word “injustice” hem minim for saed witim and favorim narawan, duim samting for spoelem narawan.
2 Klosap 3,500 year go finis, Moses raet olsem abaotem Jehovah, Haefala Ruler bilong Universe: “Hem evritaem duim samting wea stret. Hem God wea faithful, and no enitaem hem duim samting wea no stret.” (Deuteronomy 32:4) Winim seven handred year bihaen datwan, God muvim Isaiah for raetem disfala toktok: “Mi, Jehovah, mi lovem justice.” (Isaiah 61:8) Then long first century, Paul hem sei: “Waswe, God duim samting wea no stret? Hard tumas for datwan hem happen!” (Romans 9:14) And long first century tu, Peter hem sei: “God hem no saed witim eniwan, bat hem acceptim nomoa eni man long eni kantri wea fraet long hem and duim raeteous samting.” (Acts 10:34, 35) Tru tumas, “Jehovah hem laekem tumas for duim samting wea stret.”—Psalm 37:28; Malachi 3:6.
Olketa Samting wea No Stret Kamap Big Tumas
3. Hao nao samting wea no stret and wea spoelem pipol hem start long earth?
3 No staka pipol distaem duim samting wea stret. Iumi savve kasem nogud samting from diswan long ples iumi waka, long skul, from olketa bigman bilong gavman, and long olketa narafala wei tu. Nomata insaed famili tu diswan savve kamap. Kaen wei for duim samting wea no stret and wea spoelem pipol hem no happen distaem nomoa. Hem start taem datfala bighed angel wea kamap Satan hem switim first dadi and mami bilong iumi for no obeyim God. Hem barava no stret for Adam, Eve, and Satan iusim long rong wei datfala nambawan freedom for chus wea Jehovah givim long olketa. Rong samting wea olketa duim hem mekem evri man for barava safa and dae.—Genesis 3:1-6; Romans 5:12; Hebrews 2:14.
4. For hao long nao wei for duim samting wea no stret and wea spoelem olketa man hem gohed long history bilong olketa man?
4 Insaed samting olsem 6,000 year start from taem wea olketa no obey long Eden, wei for duim samting wea no stret hem gohed. Diswan hem mas olsem bikos Satan nao hem god bilong disfala world. (2 Corinthians 4:4) Hem man for laea and dadi bilong laea fasin, hem tok spoelem Jehovah and againstim hem tu. (John 8:44) Hem evritaem bihaenem olketa samting wea no stret wea barava spoelem pipol. Olsem example, bifor Flood long taem bilong Noah, God lukim “hao nogud fasin bilong man hem big tumas long earth and evri feeling and tingting wea kam from heart bilong man hem nogud evritaem.” (Genesis 6:5) Wanfala reason for diswan hem bikos Satan barava spoelem fasin bilong pipol. Datkaen wei hem still gohed tu long taem bilong Jesus. Hem sei olsem: “Plande nogud samting kamap long evriday,” wea minim olketa problem wea putim hevi long man, olsem wei for duim samting wea no stret for spoelem narawan. (Matthew 6:34) Bible talem barava tru samting taem hem sei: “Evri creation gohed for sorre and safa kam kasem distaem.”—Romans 8:22.
5. Why nao samting wea no stret wea spoelem nara pipol hem kamap big distaem winim enitaem bifor?
5 So, wei wea pipol duim samting wea no stret wea spoelem nara pipol hem start long taem bilong Adam and hem gohed kam kasem distaem. Diswan hem kamap moa worse distaem winim eni narataem. Why nao olsem? Bikos world hem insaed olketa “last day” for staka year finis, wea mekem olketa man kasem “nogud taem wea hard for deal witim.” Bible sei long taem hia, pipol bae “lovem olketa seleva, lovem selen, mekhae long seleva, praod tumas, tok daonem God, . . . no savve sei thankiu, no loyal, no garem love wea olketa long famili shud garem for each other, no savve agree, tok laea for spoelem narawan, no savve kontrolem seleva, raf tumas, no lovem gudfala fasin, brekem trust, strong for followim tingting bilong olketa seleva, barava praod tumas.” (2 Timothy 3:1-5) Pipol wea garem olketa nogud fasin hia duim enikaen nogud samting wea no stret.
6, 7. Wanem nao samfala samting wea no stret and wea barava spoelem pipol distaem?
6 Insaed tu-thri handred year wea go pas, iumi lukim disfala fasin barava kamap big winim enitaem bifor. Wanfala reason hem from staka war tumas kamap. Olsem example, samfala man wea raetem history sei long World War II nomoa, samting olsem 50 go kasem 60 million pipol nao dae. Bigfala haf long olketa hia hem olketa man, woman, and pikinini wea no joinim army. Bihaen datfala war, staka million man, woman, and pikinini wea no joinim army dae long olketa nara faet tu. Satan nao bihaenem olketa samting olsem wea no stret bikos hem kros fogud and hem savve klosap nao Jehovah bae finisim hem. Profesi long Bible sei olsem abaotem diswan: “Devil hem kam daon long iufala and hem kros tumas from hem savve hem garem shortfala taem nomoa.”—Revelation 12:12.
7 Evri year olketa kantri spendem wan thousand billion dollar for olketa samting saed long army. Tingim nomoa sapos olketa iusim bigfala selen hia for helpem staka handred million pipol wea no garem wanem olketa needim for laef. Samting olsem wan billion pipol no garem inaf kaikai, bat olketa narawan garem staka kaikai. Wanfala report bilong United Nations hem talem hao evri year samting olsem faev million pikinini dae from hangre. Datwan hem samting wea barava no stret! And tingim tu staka baby wea mami killim dae insaed long bele. Olketa sei evri year samting olsem 40 go kasem 60 million baby nao mami killim dae insaed bele! Datwan tu hem barava no stret!
8. Wanem nao only wei for tru justice savve kamap?
8 Olketa gavman no faendem ansa for olketa big problem wea kasem olketa man distaem, and tu, no eni samting wea olketa man trae for duim for stretem olketa problem hia bae win. Bible talem hao long taem bilong iumi “olketa wea wicked and olketa wea giamanim pipol bae just worse go moa, olketa bae giamanim pipol and pipol bae giamanim olketa.” (2 Timothy 3:13) From hem barava kamap wei bilong pipol for duim samting wea no stret, hem hard tumas for olketa man finisim diswan. Datfala God wea showimaot justice nomoa savve finisim diswan. Hem nomoa savve finisim Satan, olketa demon, and wicked pipol.—Jeremiah 10:23, 24.
For Warim Diswan Hem Fitim
9, 10. Why nao Asaph hem feel wikdaon?
9 Long bifor, samfala wea raetem Bible tu no minim why God no duim samting for mekem tru justice and raeteous fasin for kamap. Olsem example, tingim wanfala man wea stap long taem bifor. Datfala smol raeting wea stap bifor Psalm 73 talem nem bilong hem Asaph. Maet Asaph hem wanfala Levite wea garem hae position and wea pleim music long taem wea King David hem rul, or maet diswan hem olketa man wea pleim music instrument from famili bilong Asaph. Asaph and olketa long laen bilong hem raetem plande song wea olketa iusim for worship. Nomata olsem, long wanfala taem, disfala man wea raetem psalm hia hem wikdaon saed long worship bilong hem. Hem lukim wei wea olketa wicked man rich, and luk olsem olketa garem gudfala living and no kasem eni nogud samting.
10 Hem sei olsem: “Mi jealous long olketa man wea tokplas, taem mi lukim wicked pipol stap gud. From olketa no safa taem olketa dae; and bele bilong olketa fat nomoa. Olketa no kasem sem trabol wea kasem nara pipol, and olketa no kasem nogud samting tu.” (Psalm 73:2-8) Bat gogo Asaph luksavve hem rong for garem kaen tingting olsem wea luk long nogud saed bilong samting. (Psalm 73:15, 16) Hem trae for changem tingting bilong hem, bat hem no barava minim why nao hem luk olsem wicked pipol savve duim nogud samting bat no kasem eni panis for datwan, bat plande taem pipol wea raeteous safa.
11. Gogo, wanem nao Asaph hem luksavve long hem?
11 Bihaen, datfala faithful man luksavve hao gogo, Jehovah bae stretem olketa samting olsem. (Psalm 73:17-19) David hem sei: “Hope long Jehovah and followim wei bilong hem, and bae hem givim earth long iu olsem present. Bae iu lukim taem wicked pipol finis.”—Psalm 37:9, 11, 34.
12. (a) Wanem nao plan bilong Jehovah saed long wicked pipol and samting wea no stret? (b) Wanem nao tingting bilong iu abaotem disfala samting wea Jehovah bae duim?
12 Tru nao, long taem wea Jehovah markem, hem plan for finisim wicked fasin and evri samting wea no stret wea spoelem pipol long disfala earth. Datwan hem samting wea nomata olketa Christian wea faithful tu mas tingim evritaem. Jehovah bae finisim pipol wea againstim will bilong hem, and givim reward long olketa wea followim datfala will. “Hem lukluk gud long olketa man. Jehovah hem lukluk gud long man wea raeteous and man wea wicked tu, and soul bilong Hem barava heitim eniwan wea lovem raf fasin. Hem bae sendem kam daon long wicked pipol olketa trap olsem fire and sulphur and wind wea hot tumas . . . From Jehovah hem raeteous; hem lovem olketa raeteous samting wea man duim.”—Psalm 11:4-7.
Wanfala Niu World wea Garem Justice
13, 14. Why nao evri samting insaed niu world bae raeteous and stret?
13 Taem Jehovah distroem world wea pipol spoelem narawan and wea stap anda long paoa bilong Satan, bae Hem mekem wanfala nambawan niu world kamap. Kingdom bilong God long heven wea Jesus teachim olketa follower bilong hem for prea for hem nao bae lukaftarem gud diswan. Wicked fasin and olketa samting wea no stret bae finis bat raeteous fasin and justice nao bae stap, bikos long taem hia nao disfala prea bae barava fulfill: “Mekem kingdom bilong iu kam. Mekem will bilong iu kamap long heven and long earth.”—Matthew 6:10.
14 Bible hem storyim gavman wea bae kamap. Hem bae kaen gavman wea raeteous pipol barava laek for garem. Long datfala taem, Psalm 145:16 bae barava fulfill, wea hem sei olsem: “Iu [Jehovah God] openem hand bilong iu and givim long evri samting wea laef evri samting wea olketa laekem.” And tu, Isaiah 32:1 hem sei: “Wanfala king [Christ Jesus long heven] bae rul long raeteous wei; and olketa prince [olketa wea stand for Christ long earth], bae rul long wei wea showimaot justice.” Isaiah 9:7 hem sei olsem abaotem Jesus Christ wea King: “Paoa wea hem garem olsem prince bae gohed for kamap moa big and peace bae gohed for olowe. Diswan bae showimaot hem datfala king wea sidaon long throne bilong David and wea rulim kingdom bilong hem. Justice and raeteous fasin bae mekem rul bilong hem gohed for olowe. Samting wea mekem diswan kamap nao hem wei wea Jehovah wea komanda bilong olketa army hem barava laek for duim.” Tingim nomoa sapos iu stap long datfala taem and kasem gudfala samting from datfala rul wea duim stret samting!
15. Wanem nao Jehovah bae duim for olketa man insaed long datfala niu world?
15 Insaed niu world bilong God, bae iumi no garem eni reason for talem disfala toktok wea stap long Ecclesiastes 4:1: “Narataem moa mi lukim evri wei wea pipol savve spoelem narawan, and mi lukim pipol krae bat olketa no garem eniwan for comfortim olketa; and olketa wea spoelem olketa garem paoa, dastawe olketa no garem eniwan for comfortim olketa.” Hem tru, from tingting bilong iumi no perfect, hem no isi for tingim wei wea datfala niu world wea raeteous bae hem barava nambawan. Long datfala taem, no eni nogud samting bae stap, bat evriday iumi bae enjoyim staka gudfala samting nomoa. Tru nao, Jehovah bae stretem evri samting wea rong, and hem bae duim olsem long wei wea barava winim wanem iumi savve tingim. Dastawe Jehovah God muvim aposol Peter for raet olsem: “Iumi weitim wanfala niu skae and wanfala niu earth wea hem promisim, wea evriwan bae garem raeteous fasin”!—2 Peter 3:13.
16. Long wanem wei nao “niu skae” hem kamap finis, and long wanem wei nao God hem gohed redyim “niu earth” distaem?
16 Tru nao, datfala “niu skae,” wea hem nao gavman bilong God long heven wea Christ rulim, hem start for rul finis. Long olketa last day distaem, God gohed for hipimap olketa for datfala “niu earth,” wea hem nao niu community bilong pipol long earth wea garem gudfala heart. Klosap seven million pipol nao insaed disfala sekson, and olketa stap long 235 kantri and insaed samting olsem 100,000 kongregeson. Plande million pipol hia gohed for lanem olketa raeteous and stretfala wei bilong Jehovah, and samting wea kamaot from diswan nao, olketa garem wan mind evriwea long world and Christian love nao faondeson bilong diswan. No enitaem long history bifor pipol garem wan mind wea gohed olsem. Olketa wea stap anda long Satan nating savve garem disfala wan mind. Love and wan mind olsem showimaot nambawan taem wea bae kamap insaed niu world bilong God, wea raeteous fasin and justice nao bae stap.—Isaiah 2:2-4; John 13:34, 35; Colossians 3:14.
Satan Bae No Win Taem Hem Attakim Iumi
17. Why nao wei wea Satan attakim pipol bilong Jehovah bae no win?
17 Klosap nao Satan and olketa follower bilong hem bae againstim olketa wea worshipim Jehovah for trae distroem olketa. (Ezekiel 38:14-23) Datwan nao hem samting wea Jesus kolem datfala “big trabol . . . wea nating happen bifor, start long taem wea world hem start kam kasem distaem, and wea bae no happen moa.” (Matthew 24:21) Waswe, Satan bae win long diswan? Nomoa. Bible hem talem iumi disfala promis: “Jehovah hem laekem tumas for duim samting wea stret, and hem bae no lusim olketa wea faithful long hem. Hem bae protectim olketa for olowe; bat pikinini bilong olketa wea wicked bae finis evribit. Olketa wea raeteous bae kasem earth olsem present, and olketa bae stap for olowe long hem.”—Psalm 37:28, 29.
18. (a) Wanem nao God bae duim taem Satan attakim pipol bilong Hem? (b) Wanem gudfala samting nao iu lanem taem iu lukluk long disfala information wea kam from Bible abaotem wei wea justice bae win?
18 Jehovah bae barava feel kros taem Satan and olketa demon bilong hem attakim olketa servant bilong Hem. Jehovah talem disfala profesi thru long Zechariah: “Man wea tasim iufala hem tasim eye bilong mi.” (Zechariah 2:8) Hem olsem samwan hem pokem eye bilong Jehovah. Hem bae stretawe distroem olketa hia. Olketa servant bilong Jehovah nao garem love, wan mind, showimaot peace and obeyim law, winim eni nara pipol long earth. Dastawe datfala wei for attakim olketa hem barava no stret. Datwan wea “lovem justice” bae no acceptim diswan. Samting wea kamaot from diswan nao hem olketa enemy bilong pipol bilong hem bae distroe, justice bae win, and olketa wea worshipim only tru God bae kasem salvation. Olketa nambawan samting wea iumi luk forward long hem barava klosap nao for happen!—Proverbs 2:21, 22.
Hao Nao Bae Iu Ansa?
• Why nao staka pipol tumas duim samting wea no stret and wea spoelem pipol?
• Long wanem wei nao Jehovah bae stretem olketa samting wea no stret and wea spoelem pipol?
• Long disfala study, wanem nao iu tinghae tumas long hem abaotem wei wea justice bae win?
[Piksa long page 9]
Wicked fasin hem kamap big tumas bifor taem bilong Flood, and long “olketa last day” distaem tu
[Piksa long page 10]
Insaed niu world bilong God, bae no eni wicked fasin bat justice and raeteous fasin nao bae stap