Waswe, Iu Savve Finis?
From Jesus hem wanfala carpenter, wanem kaen waka nao hem duim?
Dadi bilong Jesus long earth, Joseph, hem wanfala carpenter. Jesus lanem sem waka tu. Taem hem “thirti year” and startim ministry bilong hem, pipol savve long hem olsem “son bilong datfala carpenter” and hem tu wanfala carpenter.—Luke 3:23; Matthew 13:55; Mark 6:3.
Long ples wea Jesus stap, pipol iusim olketa plow and yoke, wea main part bilong hem olketa wakem from tree. Olketa nara samting wea carpenter savve wakem evritaem hem olketa tebol, chair, stul, box and tu, olketa nara samting olsem door, window, lok and rafta for haos. Olketa savve wakem olketa haos tu.
Long wanfala tokpiksa, John Baptaesa storyim ax wea Jesus and olketa nara carpenter iusim for katem daon tree. Then bihaen, olketa bae katem datfala tree for timba or tekem go long ples for waka. For duim disfala waka, man mas strong and barava waka hard. (Matthew 3:10) Isaiah storyim samfala nara tul wea olketa carpenter iusim, hem sei olsem: “Man wea wakem karving, hem iusim wanfala string; hem markem witim red chalk; hem wakem witim wanfala wood scraper; and hem iusim compass for markem sheip bilong hem.” (Isaiah 44:13) Olketa man for studyim oldfala samting faendem hao olketa long taem bifor iusim olketa iron saw, ston hammer, and bronze nila. (Exodus 21:6; Isaiah 10:15; Jeremiah 10:4) Fitim for iumi tingse Jesus tu iusim olketa samting olsem.
Wanem nao datfala “bank” long tokpiksa wea Jesus storyim, and wanem nao waka bilong olketa bank olsem?
Jesus storyim wanfala boss wea tok kros long wanfala wakman wea nating duim gudfala samting. Hem talem hem olsem: “Hao nao iu no putim nomoa selen bilong mi long bank? Then taem mi kam, bae mi kasem bak selen bilong mi witim samfala selen moa.”—Matthew 25:27.
Olketa bank olsem iumi garem distaem no stap taem Jesus stap long earth. Nomata olsem, wei for kaonem selen and for peim samfala selen moa bihaen hem samting wea pipol duim for longfala taem bifor Jesus kam long earth. Olsem The Anchor Bible Dictionary talem, wei for askem samfala selen moa for olketa kaon hem samting wea staka pipol long Greece duim go kasem mek-foa century B.C.E. Long olketa year wea Rome mekem peace kamap and long evri ples wea Rome rulim, samfala selen moa wea olketa bank askem for olketa kaon hem 4 percent go kasem 6 percent evri year.
Law bilong Moses tambuim wei for askem samfala selen moa long olketa Israelite wea poor wea garem kaon. (Exodus 22:25) Luk olsem disfala rul hem for olketa poor pipol nomoa. Bat olsem tokpiksa bilong Jesus showimaot, wei wea “bank” askem samfala selen moa long olketa wea kaon hem samting wea pipol duim. Olsem Jesus duim evritaem, hem iusim samting wea pipol savve gud abaotem.