LAEF BILONG CHRISTIAN

Niu Samting wea Bae Kamap Long Meeting Long Midol Week

Start long January 2018, iumi bae storyim samfala study note, piksa, and video wea stap long online study edition bilong English New World Translation of the Holy Scriptures (nwtsty), nomata datfala Bible no stap long languis bilong iumi. Disfala information bae helpem iumi for kasem gud samting taem iumi prepare for olketa meeting. And tu, diswan bae helpem iumi for fren gud witim Dadi bilong iumi, Jehovah!

OLKETA STUDY NOTE

Olketa study note bae storyim culture bilong pipol, olketa ples long Bible, and mining bilong samfala Greek and Hebrew word.

Matthew 12:20

Wick wea klosap for dae: Long bifor olketa savve iusim clay pot wea fulap witim olive oil olsem lamp bilong olketa. Wanfala wick stap insaed long oil and oil hia bae mekem wick for bone. Luk olsem datfala Greek toktok ‘wick wea klosap for dae’ hem minim wick wea hem no laet gud and smoke kamaot long hem. Profesi long Isaiah 42:3 sei Jesus bae sorre and kaen long pipol wea hambol and feel wikdaon, and hem bae no spoelem hope bilong olketa.

Matthew 26:13

Mi talem iufala tru samting: Long Greek languis disfala toktok hem a·menʹ, wea semsem olsem Hebrew word ʼa·menʹ, wea minim “hem olsem nao” or “mas olsem nao.” Staka taem Jesus talem datfala toktok firstaem for showimaot samting wea hem bae talem bae kamap tru. Jesus nomoa savve iusim disfala toktok long wei olsem. Samfala taem Jesus talem a·menʹ tufala taem for strongim moa wanem hem bae talem, olsem hem duim long buk bilong John.—Joh 1:51.

OLKETA PIKSA AND VIDEO

Olketa photo, piksa, and video showim samfala samting wea Bible storyim.

Bethphage, Maunt Olive Tree, and Jerusalem

Disfala video showim wanfala road wea start kam long vilij wea olketa kolem et-Tur distaem. Olketa sei datfala vilij hem Bethphage long taem bilong Bible. Datfala road lead go long Jerusalem from east and go kasem wanfala hae ples long Maunt Olive Tree. Bethany hem stap long east saed long Bethphage, long saed bilong Maunt Olive Tree. Taem Jesus and olketa disaepol go long Jerusalem, olketa savve stap long Bethany, wea distaem olketa kolem el-ʽAzariyeh (El ʽEizariya ), wea minim “Ples Bilong Lazarus” long Arabic languis. Taem Jesus long Bethany hem savve stap long haos bilong Martha, Mary, and Lazarus. (Mt 21:17; Mr 11:11; Lu 21:37; Joh 11:1) Maet Jesus followim road wea iumi lukim long video taem hem lusim haos bilong olketa for go long Jerusalem. Long Nisan 9, 33 C.E., maet Jesus lusim Bethphage taem hem raedem wanfala donkey akrosim Maunt Olive Tree for go kasem Jerusalem.

Road from Bethany go kasem Bethphage
Bethphage
Maunt Olive Tree
Kidron Valley
Ples wea Temple Stap

Nila Insaed Wanfala Bon Long Leg (Heel)

Disfala photo showim wanfala 11.5 centimeter iron nila insaed long bon long leg bilong wanfala man. Long 1968 olketa man for digdig faendem wanfala bon olsem long Jerusalem. Diswan pruvim olketa long Rome bifor savve nilam man long post for killim hem dae. Taem olketa soldia bilong Rome nilam Jesus long post, maet olketa iusim kaen nila olsem. Olketa faendem disfala bon long wanfala box wea olketa wakem long ston (ossuary). Olketa savve putim olketa bon bilong man wea dae finis insaed kaen box olsem taem bon hem drae. Diswan showimaot olketa savve berem man wea dae long post.—Mt 27:35.