‘Duim Diswan For Rememberim Mi’

1, 2. Wanem nao olketa aposol luksavve long hem taem olketa gogo for Jerusalem?

OLKETA security long Jerusalem lukim first saen bilong niu moon wea just start for showaot. Taem Hae Kot bilong olketa Jew herem datfala nius, olketa talemaot niu month, Nisan, hem start nao. Then olketa laetem olketa fire and kwiktaem pasim go nius hia for mekem pipol savve. Olketa aposol savve taem bilong Pasova hem klosap nao. Masbi olketa savve finis Jesus laek for go long Jerusalem bifor datfala Pasova.

² Long datfala taem, Jesus and olketa aposol bilong hem stap long Perea long narasaed long Jordan River and olketa gogo for Jerusalem. (Matt. 19:1; 20:17, 29; Mark 10:1, 32, 46) Taem month bilong Nisan hem start, olketa Jew savve Pasova bae kamap 13-fala day bihaen datwan, taem sun hem go daon long Nisan 14.

3. Why nao olketa Christian laek savve long date bilong Pasova?

³ Long 2014, date bilong Evening Kaikai Bilong Lord, wea semsem witim date bilong Pasova, bae kamap long April 14, taem sun hem go daon. Datwan bae hem wanfala spesol day for olketa tru Christian and pipol wea interest long truth. Why nao olsem? Hem bikos long samting wea iumi readim long 1 Corinth 11:23-25. Hem sei: “Long datfala naet wea Judas givim Lord Jesus go long enemy, Jesus tekem wanfala bred. Hem prea, then hem brekem datfala bred and sei: ‘Diswan hem piksarem body bilong mi wea mi givim for iufala. Gohed for duim diswan for showimaot iufala rememberim mi.’ Bihaen hem kaikai finis, hem duim sem samting long datfala kap wine.”

4. (a) Olketa wanem kwestin nao hem gud for ting raonem abaotem Memorial? (b) Hao nao iumi savve long date bilong Memorial evri year? (Lukim box “Memorial 2014.”)

⁴ Memorial nomoa celebration wea Jesus talem olketa disaepol bilong hem for celebratem evri year, and bae iu no laek for misstim datwan. Bifor datwan kamap, ting raonem olketa kwestin hia: ‘Wanem nao mi savve duim for redi for Memorial? Wanem nao bred and wine piksarem? Wanem nao bae happen long datfala hipap? Why nao Memorial and bred and wine hem important long mi?’

BRED AND WINE

5. Wanem nao Jesus talem olketa aposol for duim for redi for Pasova?

⁵ Taem Jesus talem olketa aposol for redyim wanfala rum for olketa celebratem Pas-ova, hem no talem olketa for decoratem datfala rum. Bat luk olsem hem laekem olketa wanfala rum wea fitim and klin, and wea garem inaf spes for hem and olketa aposol. (Readim Mark 14:12-16.) Olketa aposol bae redyim tu evri samting for kaikai bilong Pasova, witim tu bred wea no garem yeast, and red wine. Bihaen olketa kaikaim kaikai bilong Pasova, Jesus story abaotem datfala bred and wine.

6. (a) Bihaen olketa kaikaim kaikai bilong Pas-ova, wanem nao Jesus talem abaotem datfala bred? (b) Wanem kaen bred nao iumi iusim long Memorial?

⁶ Aposol Matthew hem stap witim Jesus long datfala Pasova. Taem hem raet abaotem datwan bihaen, hem sei: “Jesus tekem wanfala bred. Hem prea, then hem brekem datfala bred and givim long olketa and sei: ‘Tekem bred hia and kaikaim.’” (Matt. 26:26) Datfala “bred” hem no garem yeast, olsem bred wea olketa iusim for Pasova. (Ex. 12:8; Deut. 16:3) Olketa wakem disfala bred from wholemeal flour and wata, and hem no garem yeast or solt. Hem drae and isi for man brekem olsem bisket. Distaem, bifor day bilong Memorial kamap, maet olketa elder long kongregeson askem samwan for wakem datkaen bred. Olketa mas iusim wholemeal flour and wata, and maet olketa savve iusim lelebet oil for kukim datwan. Long ples wea hem hard for peim wholemeal flour, iu savve mekem flour from rice, barley, corn, or nara grain olsem.

7. Wanem kaen wine nao Jesus iusim long Evening Kaikai Bilong Lord, and wanem kaen wine nao iumi savve iusim long Memorial?

⁷ Then Matthew sei Jesus “tekem wanfala kap wine. Hem prea, then hem pasim go kap hia long olketa, and sei: ‘Iufala drinkim diswan.’” (Matt. 26:27, 28) Datfala wine hem red wine. Iumi savve hem no fresh grape juice bikos taem for harvestim olketa grape hem finis longtaem nao. Taem olketa Israelite celebratem firstfala Pasova long Egypt, olketa no drinkim wine. Nomata olsem, Jesus no sei hem rong for drinkim wine long Pasova. Hem iusim samfala wine long Evening Kaikai Bilong Lord. So olketa Christian distaem tu iusim wine long Memorial. Wanem kaen wine nao hem fitim? Hem red wine wea olketa no mixim witim eni samting, so hem pure olsem blood bilong Jesus. Wine wea fitim hem wine olsem Claret or Burgundy.

SAMTING WEA BRED AND WINE PIKSAREM

8. Why nao olketa Christian barava interest long samting wea bred and wine piksarem?

⁸ Samting wea aposol Paul talem showimaot olketa Christian tu mas celebratem Evening Kaikai Bilong Lord, and no olketa aposol nomoa. Paul talem olketa brata long Corinth Jesus “tekem wanfala bred. Hem prea, then hem brekem datfala bred and sei: ‘Diswan hem piksarem body bilong mi wea mi givim for iufala. Gohed for duim diswan for showimaot iufala rememberim mi.’” (1 Cor. 11:23, 24) So olketa Christian celebratem Memorial wantaem evri year, and olketa barava interest long samting wea bred and wine piksarem.

9. Wanem rong tingting nao samfala garem abaotem bred wea Jesus iusim?

⁹ Long tingting bilong samfala pipol, Jesus no sei: “Diswan hem piksarem body bilong mi” bat hem sei: ‘Diswan nao body bilong mi.’ So olketa tingse long mirakol wei datfala bred hem change for kamap body bilong Jesus. Bat datwan hem no tru.a Hard for olketa faithful aposol tingse datfala bred hem body bilong Jesus, bikos Jesus stap long datfala rum witim olketa and olketa lukim tu datfala bred. Jesus sei datfala bred hem piksarem body bilong hem. Taem Jesus hem teach, plande taem hem storyim samting wea piksarem nara samting.—John 2:19-21; 4:13, 14; 10:7; 15:1.

10. Wanem nao bred wea iumi iusim long Memorial piksarem?

¹⁰ Datfala bred wea olketa aposol lukim and redi for kaikaim hem piksarem body bilong Jesus. Long bifor, pipol bilong Jehovah tingse datfala bred piksarem kongregeson bilong olketa anointed Christian, wea Bible kolem olketa “body bilong Christ.” Olketa garem disfala tingting bikos Jesus brekem datfala bred bat no eni bon bilong hem brek. (Eph. 4:12; Rome 12:4, 5; 1 Cor. 10:16, 17; 12:27) Bat bihaen olketa duim samfala research moa long diswan, olketa luksavve datfala bred hem piksarem physical body bilong Jesus. Plande taem Bible storyim hao Jesus hem “safa taem hem man long earth” and olketa nilam hem long post tu. So bred wea iumi iusim long Memorial piksarem physical body bilong Jesus wea hem sakrifaesim for sin bilong iumi.—1 Pet. 2:21-24; 4:1; John 19:33-36; Heb. 10:5-7.

11, 12. (a) Wanem nao Jesus talem abaotem datfala wine? (b) Wanem nao wine long Memorial hem piksarem?

¹¹ Datwan helpem iumi for minim samting wea Jesus talem abaotem datfala wine. Bible sei: “Bihaen hem kaikai finis, hem duim sem samting long datfala kap wine. Hem sei: ‘Diswan hem piksarem datfala niu agreement wea bae hem start taem mi pourimaot blood bilong mi.’” (1 Cor. 11:25) Plande Bible talem sem samting olsem The Holy Bible, wea Robert Young wakem, wea sei: “Disfala kap nao niu agreement long blood bilong mi.” (Italic raeting hem bilong mifala.) Waswe, kap wea Jesus holem hem nao datfala niu agreement? Nomoa. Jesus story abaotem wine insaed long datfala kap. Wanem nao Jesus sei datfala wine hem piksarem? Hem piksarem blood bilong hem wea hem bae pourimaot olsem wanfala sakrifaes.

¹² Long buk bilong Mark, Jesus hem sei: “Diswan hem piksarem blood bilong mi wea hem nao ‘blood bilong datfala agreement’ wea mi mas pourimaot for mekem plande pipol kasem forgiveness for sin.” (Mark 14:24) So datfala red wine hem piksarem blood bilong Jesus. Blood bilong Jesus peim price for iumi savve kasem forgiveness for olketa sin bilong iumi.—Readim Ephesus 1:7.

WANEM NAO HAPPEN LONG MEMORIAL?

13. Wanem nao happen long Memorial?

¹³ Long firstaem wea iu attendim Memorial witim Olketa Jehovah’s Witness, wanem nao bae iu lukim? Disfala hipap bae kamap long wanfala ples wea fitim and klin, and garem inaf spes for evriwan sidaon and enjoyim datfala meeting. Maet olketa garem samfala simpol flaoa arrangement, bat bae iu no lukim staka decoration, and bae hem no olsem wanfala party. Wanfala elder bae storyim long klia and gudfala wei samting wea Bible talem abaotem Evening Kaikai Bilong Lord. Bae hem storyim hao Christ hem dae for iumi mekem iumi savve laef olowe. (Readim Rome 5:8-10.) Bae hem storyim tufala hope tu wea Bible story abaotem.

14. Wanem tufala hope nao bae speaker story abaotem long Memorial?

¹⁴ Samfala Christian garem hope for rul witim Christ long heven. Smol sekson nomoa garem disfala hope, and olketa faithful aposol tu insaed disfala sekson. (Luke 12:32; 22:19, 20; Rev. 14:1) Staka nara Christian garem hope for laef olowe long paradaes long earth. Long datfala taem, God bae duim wanem hem laek for duim long earth, wea hem nao samting wea olketa Christian prea for hem for longfala taem finis. (Matt. 6:10) Bible storyim nambawan laef wea olketa bae enjoyim for olowe.—Isa. 11:6-9; 35:5, 6; 65:21-23.

15, 16. Long Memorial, wanem nao olketa duim witim datfala bred?

¹⁵ Bihaen speaker storyim tufala hope hia, bae hem sei hem taem nao for duim samting wea Jesus duim long Evening Kaikai Bilong Lord. Samfala bred wea no garem yeast and samfala kap red wine bae stap long wanfala tebol klosap long hem. Bae hem readim scripture wea storyim wanem Jesus duim witim datfala bred. Maet hem readim scripture long Matthew wea sei: “Jesus tekem wanfala bred. Hem prea, then hem brekem datfala bred and givim long olketa and sei: ‘Tekem bred hia and kaikaim. Diswan hem piksarem body bilong mi.’” (Matt. 26:26) Jesus brekem datfala bred for givim long olketa aposol wea sidaon saed long hem. Long Memorial long April 14 bae iu lukim long olketa pleit samfala bred wea no garem yeast.

¹⁶ Bifor olketa pasim raon olketa pleit hia, wanfala brata bae talem shortfala prea. Bae olketa garem inaf pleit mekem hem no tek longtaem tumas for pasim raon datfala bred long evriwan. Olketa no followim eni spesol kastom for duim diswan. Maet no eniwan or maet tu-thri nomoa kaikaim datfala bred, olsem long Memorial long 2013.

17. Long Memorial, wanem nao olketa duim witim wine for followim wanem Jesus duim?

¹⁷ Then, speaker bae readim wanem Jesus duim witim datfala wine. Bible sei: “Hem tekem wanfala kap wine. Hem prea, then hem pasim go kap hia long olketa, and sei: ‘Iufala drinkim diswan. Diswan hem piksarem blood bilong mi wea hem nao “blood bilong datfala agreement” wea mi mas pourimaot for mekem plande pipol kasem forgiveness for sin.’” (Matt. 26:27, 28) For followim wanem Jesus duim, narafala brata bae talem prea and then olketa bae pasim raon datfala red wine long evriwan wea hipap.

18. Nomata no eniwan or tu-thri nomoa kaikaim datfala bred and drinkim datfala wine, why nao hem important for evriwan kam long Memorial?

¹⁸ Olketa wea bae rul witim Christ long heven nomoa bae kaikaim datfala bred and drinkim datfala wine. Klosap evriwan wea kam long Memorial bae just pasim datfala bred and wine go long narawan. (Readim Luke 22:28-30; 2 Tim. 4:18) Nomata olsem, hem important for olketa attendim Memorial. Why nao olsem? Taem olketa duim olsem, olketa showimaot olketa barava tinghae long sakrifaes bilong Jesus. Taem datfala celebration hem gohed, olketa savve ting raonem olketa blessing wea olketa bae kasem from datfala sakrifaes. Olsem example, olketa garem hope for insaed datfala “big crowd” wea bae gohed laef bihaen “datfala big trabol.” Long tingting bilong God olketa raeteous bikos olketa garem faith long sakrifaes bilong Jesus. Hem olsem olketa “wasim kaleko bilong olketa long blood bilong datfala Pikinini Sheepsheep and kaleko bilong olketa kamap white.”—Rev. 7:9, 14-17.

19. Wanem nao iumi savve duim for redi for Memorial and kasem gud samting from datwan?

¹⁹ Wanem nao Olketa Jehovah’s Witness evriwea long world duim for redi for Memorial? Tu-thri week bifor Memorial, iumi traem best for invaetem staka pipol for kam long Memorial. Long olketa day bifor disfala spesol meeting, iumi readim olketa scripture long Bible wea story abaotem wanem Jesus duim and samting wea happen long olketa day bifor Evening Kaikai Bilong Lord long year 33 C.E. Iumi plan for attendim datfala Memorial. Iumi arrive early mekem iumi savve welkamim olketa visitor and no misstim eni part long datfala program. Iumi evriwan, nomata iumi olketa pablisa long kongregeson or iumi visitor, bae kasem gud samting sapos iumi luk followim long Bible bilong iumi olketa scripture wea speaker readim and explainim. Samting wea barava important nao, taem iumi attendim Memorial, iumi showimaot iumi barava tinghae long sakrifaes bilong Jesus and iumi obeyim disfala komand bilong hem wea sei: “Gohed for duim diswan for showimaot iufala rememberim mi.”—1 Cor. 11:24.