Datfala Lord’s Supper​—Garem Bigfala Mining for Iu

WASWE, Lord’s Supper garem mining wea important and wea affectim iu? For faendaot, bae iumi firstaem storyim mining wea Jesus seleva givim long disfala spesol samting.

Long evening bilong Nisan 14, 33 C.E., Jesus hipap witim 12-fala aposol long wanfala rum long Jerusalem for celebratem Passover wea kamap wantaem evri year. Bihaen olketa kaikaim Passover kaikai, Judas lusim rum for givim go Jesus long olketa enemy. (John 13:21, 26-30) Witim 11-fala aposol wea stap, Jesus startim “evening kaikai bilong Lord.” (1 Corinthians 11:20) Olketa kolem diswan tu Memorial, bikos Jesus komandim olketa follower bilong hem: “Duim diswan for rememberim mi.” Diswan hem only samting wea olketa Christian kasem komand for rememberim.—1 Corinthians 11:24.

Webster’s dictionary hem minim memorial olsem samting wea helpem man for “no forgetim” or “keepim datfala samting long mind.” Long staka ples, pipol buildim wanfala samting or markem wanfala spesol day for rememberim wanfala man or important samting wea happen. Jesus hem iusim kaikai—wanfala kaikai wea bae helpem olketa disaepol bilong hem for no forgetim olketa barava important samting wea happen long datfala day. For olketa wea bae born bihaen, disfala memorial kaikai bae mekem olketa wea celebratem for rememberim bigfala mining bilong samting wea Jesus duim long datfala naet, especially olketa tokpiksa samting wea hem iusim. Olketa wanem tokpiksa samting nao Jesus iusim, and wanem nao olketa minim? Letem iumi lukluk long wanem Bible talem hem happen long datfala naet long 33 C.E.

Olketa Tokpiksa Samting wea Holy

“Hem tekem wanfala bred, talem prea for thankiu, brekem, and givim long olketa, and sei: ‘Diswan hem minim body bilong mi wea mi givim for iufala. Go ahed for duim olsem for rememberim mi.’ ”—Luke 22:19.

Taem Jesus tekem bred and sei, “diswan hem minim body bilong mi,” hem showimaot hao datfala bred wea no garem yeast hem piksarem body bilong hem wea no garem sin, wea hem givim “for laef bilong world.” (John 6:51) Nomata samfala Bible transleison sei “diswan nao [Greek, es·tinʹ] body bilong mi,” Thayer’s Greek-English Lexicon of the New Testament hem sei disfala word planti taem garem mining “for stand for, olsem saen, wea min olsem.” Diswan mekem iumi tingim samting wea olsem tokpiksa.—Matthew 26:26, footnote.

Diswan hem semsem tu witim kap wine. Jesus hem sei: “Disfala kap minim niu covenant wea kamap from blood bilong mi, wea mi bae pourimaot for iufala.”—Luke 22:20.

Long buk bilong Matthew, Jesus sei abaotem datfala kap: “Diswan minim ‘blood bilong covenant’ bilong mi, wea mi bae kapsaetem for planti pipol for forgivim sin.” (Matthew 26:28) Jesus hem iusim wine insaed kap for piksarem blood bilong hem. Blood wea hem kapsaetem bae kamap faondeson bilong “niu covenant” for olketa disaepol wea spirit anointim, wea bae rul olsem king and priest witim hem long heven.—Jeremiah 31:31-33; John 14:2, 3; 2 Corinthians 5:5; Revelation 1:5, 6; 5:9, 10; 20:4, 6.

Wine insaed kap hem for remindim iumi tu hao blood wea Jesus kapsaetem hem for “forgivim sin,” wea openem wei for olketa wea drinkim for kasem hope for laef long heven for rul witim Christ. Dastawe, olketa wea garem hope for laef long heven—wanfala set namba—olketa nomoa kaikaim bred and drinkim wine long Memorial.—Luke 12:32; Ephesians 1:13, 14; Hebrews 9:22; 1 Peter 1:3, 4.

Bat, waswe olketa follower bilong Jesus wea no insaed datfala niu covenant? Olketa hia nao olketa “nara sheep” bilong Lord, wea luk forward, no for rul witim Christ long heven, bat for enjoyim laef olowe long wanfala paradaes earth. (John 10:16; Luke 23:43; Revelation 21:3, 4) Olsem “wanfala big crowd” bilong faithful Christian wea “givim holy service long [God] day and naet,” olketa hapi tumas for hipap for rememberim Lord’s Supper. Toktok and samting olketa duim hem talemaot: “Mifala sev thru long God bilong mifala, wea sidaon long throne, and thru long Lamb.”—Revelation 7:9, 10, 14, 15.

Haomas Taem?

“Go ahed for duim olsem for rememberim mi.”—Luke 22:19.

Haomas taem nao iumi shud duim Memorial for mekem iumi no forgetim dae bilong Christ? Jesus no barava talem. Bat, from hem mekem Evening Kaikai Bilong Lord long Nisan 14, evening bilong Passover, wea olketa Israelite celebratem wantaem evri year, iumi fit for sei Jesus minim for iumi celebratem Memorial long sem wei. Olsem olketa Israelite celebratem wantaem evri year wei wea olketa kamap free from Egypt, olketa Christian tu celebratem wantaem evri year wei wea olketa kamap free from sin and dae.—Exodus 12:11, 17; Romans 5:20, 21.

Wei for rememberim wanfala important samting wantaem evri year hem no niu samting. Olsem example, tingim taem wanfala hasband and waef celebratem wedding anniversary or taem wanfala kantri tingim wanfala important samting wea happen long history bilong hem. Olketa celebratem wantaem evri year long day datfala samting hem happen. Hem interesting hao, for staka handred year bihaen taem bilong Christ, staka wea sei olketa Christian kasem nem Quartodeciman, wea minim “Man wea Keepim Namba Fotin,” bikos olketa celebratem dae bilong Jesus wantaem evri year, long Nisan 14.

Simpol Bat Garem Big Mining

Aposol Paul hem explainim hao wei for celebratem Lord’s Supper bae mekem olketa disaepol bilong Jesus fit for “go ahed for talemaot dae bilong Lord, go kasem taem hem kam.” (1 Corinthians 11:26) So, disfala celebration mekhae long important waka bilong Jesus, thru long dae bilong hem, long wei for fulfillim purpose bilong God.

From hem faithful go kasem taem hem dae, Jesus Christ showimaot Jehovah God olsem wanfala wise and loving Creator and wanfala raeteous Ruler. No olsem samting wea Satan talem and no olsem Adam, Jesus pruvim man savve stap faithful long God nomata hem kasem bigfala hevi.—Job 2:4, 5.

Lord’s Supper hem mekem iumi no lusim wei for tinghae long love for sakrifaesim seleva wea Jesus showimaot. Nomata long olketa barava hard test, Jesus obeyim Dadi bilong hem long perfect wei. Dastawe hem fit for offerim perfect laef bilong hem olsem man for balancem bigfala kaon bilong sin bilong Adam. Olsem Jesus seleva hem explainim, hem kam “for givim soul bilong hem olsem ransom for baem bak planti pipol.” (Matthew 20:28) From diswan, evriwan wea putim faith long Jesus savve kasem forgiveness for sin and kasem laef olowe fitim firstfala purpose bilong Jehovah for olketa man.—Romans 5:6, 8, 12, 18, 19; 6:23; 1 Timothy 2:5, 6.a

Evri samting hia mekhae tu long gudfala fasin and kaenfala fasin bilong Jehovah wea man no fit for kasem wea showaot taem hem mekem wei for olketa man kasem salvation. Bible hem sei: “Thru long diswan love bilong God hem showaot long iumi, bikos God sendem only-born Son bilong hem long world mekem iumi savve kasem laef thru long hem. Disfala love hem olsem, no from iumi lovem God, bat from hem lovem iumi and sendem kam Son bilong hem olsem wanfala sakrifaes for kavarem olketa sin bilong iumi.”—1 John 4:9, 10.

Tru nao, Memorial hem nambawan samting for rememberim! Wei wea hem simpol and no hard for duim hem mekem pipol evriwea long earth wea garem difren kaen living fit for celebratem, bat long semtaem hem keepim important mining bilong hem kam kasem distaem.

Mining Bilong Hem for Iu

Dae bilong Lord bilong iumi Jesus Christ olsem wanfala sakrifaes hem kostim bigfala samting for hem and for Dadi bilong hem, Jehovah. Olsem wanfala perfect man, Jesus hem no olsem iumi wea born kam witim laef wea bae lead go long dae. (Romans 5:12; Hebrews 7:26) Hem savve go ahed for laef olowe. Sapos hem no letem eniwan for killim hem dae, bae hem nating dae. Hem sei: “No eni man hem tekem diswan from mi, bat mi givim diswan from mi want for givim.”—John 10:18.

Nomata olsem, Jesus willing for givim perfect laef bilong hem olsem sakrifaes mekem “thru long dae bilong hem, hem savve finisim datwan wea garem wei for kosim dae, hem nao Devil; and mekem hem savve mekem free evriwan wea from olketa fraet long dae olketa slave bilong sin for full laef bilong olketa.” (Hebrews 2:14, 15) Love wea sakrifaesim seleva bilong Christ hem showaot tu long wei wea hem letem olketa killim hem dae long barava nogud wei. Hem savve gud long wei wea hem bae safa and dae.—Matthew 17:22; 20:17-19.

Memorial hem remindim iumi tu long barava nambawan wei for showimaot love wea kam from Dadi bilong iumi long heven, Jehovah. Hem barava sorre samting for hem, wea hem garem “kaenfala love and garem bigfala mercy,” for herem and lukim “strongfala singaot and krae” bilong Jesus long garden bilong Gethsemane, raf wei wea olketa whipim hem, hangem hem, and wei wea hem isisi dae witim bigfala pain. (James 5:11, footnote; Hebrews 5:7; John 3:16; 1 John 4:7, 8) For tingim bak diswan distaem, planti handred year bihaen, hem mekem staka for barava feel sorre.

Jehovah God and Jesus Christ peim bigfala kost for iumi olketa sinner! (Romans 3:23) Evriday, iumi lukim sorre samting wea kamaot from wei wea iumi sin and no perfect. Nomata olsem, long faondeson bilong faith long ransom sakrifaes bilong Jesus, iumi savve askem God for forgiveness. (1 John 2:1, 2) Diswan mekem iumi fit for enjoyim free wei for story witim God and wanfala klin conscience. (Hebrews 4:14-16; 9:13, 14) And tu, iumi savve garem hope for laef long wanfala paradaes earth for olowe. (John 17:3; Revelation 21:3, 4) Olketa hia and staka moa blessing hem kamaot from disfala best wei wea Jesus sakrifaesim seleva.

Showimaot Wei for Tinghae Long Lord’s Supper

Tru nao, Lord’s Supper hem nambawan wei wea “bigfala kaenfala fasin bilong God wea iumi no fit for kasem” hem showaot. And ransom sakrifaes wea Jehovah God provaedem—wea love bilong Jesus for sakrifaesim seleva mekem kamap—hem barava “free present bilong hem wea winim evri samting.” (2 Corinthians 9:14, 15) Waswe, olketa toktok hia abaotem gudfala fasin bilong God thru long Jesus Christ hem muvim iu for garem feeling for tinghae?

Mifala sure olketa duim olsem. Dastawe, mifala invaetem iu for hipap witim Olketa Jehovah’s Witness for celebratem Memorial bilong dae bilong Jesus. Dis year, Memorial bae kamap long Wednesday, April 16, bihaen sun go daon. Olketa Jehovah’s Witness long ples bilong iu bae hapi for talem iu ples disfala barava important hipap bae kamap long hem.

[Footnote]

[Box/Olketa Piksa long page 6]

“DISWAN HEM BODY BILONG MI” OR “DISWAN HEM MINIM BODY BILONG MI” WHICH WAN NAO STRET?

Taem Jesus sei, “Mi nao door” and, “Mi nao trufala vine,” no eniwan bae ting Jesus nao really door or really vine. (John 10:7; 15:1) Long sem wei tu, taem The New Jerusalem Bible talem toktok bilong Jesus: “Disfala kap nao niu covenant,” iumi no ting diswan minim datfala really kap nao datfala niu covenant. So, taem hem sei datfala bred ‘hem’ body bilong hem, no eni daot stap hao datfala bred hem stand for, or hem piksarem, body bilong hem. Dastawe, transleison bilong Charles B. Williams hem sei: “Diswan hem stand for body bilong mi.”—Luke 22:19, 20.

[Piksa long page 5]

Bred wea no garem yeast and datfala wine piksarem body bilong Jesus wea no garem sin and blood bilong hem wea hem kapsaetem

[Piksa long page 7]

Memorial hem for remindim iumi long bigfala love wea Jehovah God and Jesus Christ showimaot for iumi