“Teachim Olketa for Duim Evri Samting wea Mi Komandim Long Iufala”
“So go and mek disaepol . . . , teachim olketa for duim evri samting wea mi komandim long iufala.”—MATTHEW 28:19, 20.
1. Wanem story nao kamap midolwan disaepol Philip and wanfala man from Ethiopia?
DATFALA man from Ethiopia hem bin kam from farawe for kasem Jerusalem. Long there hem worshipim God wea hem lovem, Jehovah. For sure hem lovem tu Word bilong God. Taem hem go bak insaed wanfala chariot, hem readim wanfala copy bilong olketa raeting bilong profet Isaiah. Long datfala taem nao Philip, wanfala disaepol bilong Christ, hem meetim hem. Philip askem datfala man from Ethiopia: “Waswe, iu minim samting wea iu readim?” Datfala man hem ansa: “Hao nao bae mi minim sapos no eniwan leadim mi?” So Philip go ahed for helpem disfala trufala student bilong Bible for kamap wanfala disaepol bilong Christ.—Acts 8:26-39.
2. (a) Hao nao ansa wea datfala man from Ethiopia talem hem important? (b) Wanem nao olketa kwestin wea iumi bae story raonem wea join witim komand bilong Christ for mek disaepol?
2 Ansa wea man from Ethiopia talem hem important. Hem sei: “Hao nao bae mi minim sapos no eniwan leadim mi.” Tru nao, hem needim samwan for leadim hem for minim wanem hem readim. Disfala toktok showimaot wanfala important instruction wea Jesus givim long komand bilong hem for mek disaepol. Wanem instruction nao datwan? For kasem ansa, iumi go ahed lukluk long toktok bilong Jesus wea stap long Matthew chapter 28. First study article hem storyim olketa kwestin saed long why? and wea? Distaem bae iumi lukluk long tufala moa kwestin wea join witim komand bilong Christ for mek disaepol—wanem? and wanem taem?
“Teachim Olketa for Duim Evri Samting”
3. (a) Hao nao samwan savve kamap disaepol bilong Jesus Christ? (b) Wei for mek disaepol hem minim for teachim wanem tu?
3 Wanem nao iumi mas teachim for helpem nara pipol kamap olketa disaepol bilong Christ? Jesus talem disfala komand long olketa follower bilong hem: “So go and mek disaepol long pipol bilong evri nation, baptaesim olketa long nem bilong Father and bilong Son and bilong holy spirit, teachim olketa for duim evri samting wea mi komandim long iufala.” (Matthew 28:19, 20) So, iumi mas teachim olketa samting wea Christ komandim.a Bat, wanem nao bae helpem samwan wea lanem olketa komandment bilong Jesus no for kamap wanfala disaepol nomoa bat tu for go ahed for olsem wanfala disaepol? Wanfala main samting hem showaot long toktok bilong Jesus wea hem chusim gud. Lukim hao hem no sei: ‘Teachim olketa evri samting wea mi komandim long iufala.’ Bat, hem sei: ‘Teachim olketa for duim evri samting wea mi komandim long iufala.’ (Matthew 19:17) Wanem nao datwan hem minim?
4. (a) Wanem nao hem minim for duim samting wea samwan komandim? (b) Givim example long hao iumi teachim samwan for duim olketa samting wea Christ komandim.
4 For duim samting wea samwan komandim hem minim for “duim samting followim” wanfala komand—for obeyim, or followim. So, hao nao iumi teachim samwan for duim samting or obeyim olketa samting wea Christ komandim? Well, tingim wei wea man wea teachim narawan for draev hem teachim student bilong hem for obeyim olketa law bilong road. Hem maet teachim olketa law bilong road long student bilong hem. Bat, for teachim student bilong hem hao for obeyim olketa rul hia, hem mas directim student taem student hem draev and traem best for followim wanem hem lanem. Long sem wei tu, taem iumi studyim Bible witim pipol, iumi teachim olketa komandment bilong Christ long olketa. Bat, iumi need tu for directim olketa student taem olketa traem best for followim instruction bilong Christ long evriday living and long ministry. (John 14:15; 1 John 2:3) So, for followim evribit komand bilong Christ for mek disaepol hem minim iumi mas kamap teacher and directim olketa tu. Taem iumi duim datwan, iumi followim example wea Jesus and Jehovah showimaot.—Psalm 48:14; Revelation 7:17.
5. Why nao maet samwan wea iumi studyim Bible witim hem hol bak for obeyim komand bilong Christ for mek disaepol?
5 For teachim nara pipol for duim olketa samting wea Jesus komandim hem minim tu for helpem olketa for obeyim komand for mek disaepol. Samfala wea iumi studyim Bible witim maet ting long datwan olsem hard samting tumas. Nomata olketa strongfala member bilong eni church bilong Christendom bifor, maet olketa bigman long religion bilong olketa nating teachim olketa for go and mek disaepol. Samfala bigman bilong church talem stret hao saed long wei for teachim pipol bilong olketa for preach, olketa church bilong Christendom fail evribit. Taem hem story abaotem komand bilong Jesus for go evriwea long world and helpem enikaen difren pipol for kamap disaepol, savveman John R. W. Stott hem sei: “Wei wea iumi fail for obeyim mining bilong disfala komand nao hem bigfala wik point bilong olketa Christian saed long waka for talemaot gud nius distaem.” Hem sei moa: “Samting mifala duim evritaem nao hem for talemaot message bilong mifala from farawe. Samtaem mifala olsem pipol wea givim advaes long man wea redy for draon bat mifala standap sef long saedsea nomoa. Mifala no jamp insaed sea for sevem hem. Mifala fraet for tuwet.”
6. (a) Taem iumi helpem wanfala Bible student, hao nao iumi savve followim example bilong Philip? (b) Hao nao iumi savve showimaot iumi interest long Bible student taem hem start for tekpart long preaching waka?
6 Sapos samwan wea iumi studyim Bible witim, hem bifor stap insaed wanfala religion wea olketa member “fraet for tuwet,” maet hem wanfala challenge for hem winim fraet bilong hem, and obeyim komand bilong Christ for mek disaepol. Hem bae needim help. Dastawe, iumi need for patient taem iumi givim hem instruction and directim hem long wei wea mekem moa deep savve bilong hem and muvim hem for duim samting, long sem wei wea olketa teaching bilong Philip givim savve long man from Ethiopia and muvim hem for baptaes. (John 16:13; Acts 8:35-38) And tu, wei wea iumi want for teachim olketa Bible student for duim samting wea Jesus komandim for mek disaepol hem muvim iumi for waka tugeta witim olketa for leadim olketa taem olketa go aot firstaem long Kingdom preaching waka.—Ecclesiastes 4:9, 10; Luke 6:40.
“Evri Samting”
7. For teachim nara pipol for ‘duim evri samting’ hem minim for teachim wanem komand?
7 Iumi no teachim nomoa olketa niu disaepol for mek disaepol. Jesus givim instruction long iumi for teachim narawan for “duim evri samting” wea hem komandim. Insaed datwan hem tufala main komand—for lovem God and lovem neiba. (Matthew 22:37-39) Hao nao iumi savve teachim wanfala niu disaepol for followim olketa komandment hia?
8. Givim example bilong hao iumi savve teachim wanfala niu disaepol for followim komand for showimaot love.
8 Tingim moa tokpiksa bilong man wea lane for draev. Taem student hem draev midolwan olketa nara trak and teacher hem sidaon saed long hem, student hem lane no long wei for lisin long teacher bilong hem nomoa bat taem hem lukluk long olketa nara draeva tu. Olsem example, teacher maet talem hem hao nara draeva hem kaen for letem hem go firstaem; or wanfala draeva wea daonem laet bilong hem mekem hem no spoelem eye bilong draeva wea kam front long hem; or wanfala draeva wea willing for helpem samwan wea trak bilong hem brekdaon. Olketa example olsem teachim gudfala samting long datfala student wea hem savve followim taem hem draev. Long sem wei tu, wanfala niu disaepol wea gogo long road for laef hem lane no from teacher bilong hem nomoa bat from example bilong olketa difren wan wea hem lukim insaed long kongregeson tu.—Matthew 7:13, 14.
9. Hao nao wanfala niu disaepol lanem mining bilong komand bilong Jesus for showimaot love?
9 Olsem example, wanfala Bible student maet lukim wanfala singol dadi or mami wea traem best for kam long Kingdom Hall witim olketa smol pikinini bilong hem. Maet hem lukim wanfala wea feel sorre wea faithful for kam long olketa meeting nomata hem stragol witim sorre feeling wea no savve finis, wanfala olo widow wea tekem kam olketa nara olo long each kongregeson meeting, or wanfala teenager wea help for klinim Kingdom Hall. Bible student hia maet lukim wanfala elder long kongregeson wea faithful for lead long field service nomata hem garem staka responsibility insaed long kongregeson. Maet hem meetim wanfala Witness wea disable and no savve lusim haos bat hem encouragem evriwan wea visitim hem long spiritual wei. Datfala student maet lukim wanfala hasband and waef barava changem living bilong tufala for lukaftarem olo dadi and mami. Taem hem lukim olketa Christian hia wea kaen, givim help, and man fit for trustim, datfala niu disaepol lanem from example bilong olketa wanem nao hem minim for obeyim komand bilong Christ for lovem God and neiba, especially olketa spiritual brata and sista bilong iumi. (Proverbs 24:32; John 13:35; Galatians 6:10; 1 Timothy 5:4, 8; 1 Peter 5:2, 3) Long disfala wei, each member bilong Christian kongregeson savve kamap—and shud kamap—wanfala teacher and man wea directim narawan.—Matthew 5:16.
“Go Kasem End Bilong Disfala System”
10. (a) Iumi bae go ahed for mek disaepol go kasem wanem taem? (b) Wanem example nao Jesus showimaot saed long wei for duim olketa assignment?
10 Iumi shud go ahed for mek disaepol go kasem wanem taem? Insaed full taem wea end bilong disfala system hem go ahed. (Matthew 28:20) Waswe, bae iumi fulfillim disfala part long komand bilong Jesus? Olsem wanfala kongregeson evriwea long world, iumi disaed strong for duim datwan. Insaed olketa year wea go pas, iumi hapi for givim taem, strong, and olketa samting iumi garem for luk aotem pipol wea “garem fasin fitim laef olowe.” (Acts 13:48) Distaem, Olketa Jehovah’s Witness iusim winim thri million hour each day insaed year for duim waka for preach abaotem Kingdom and mek disaepol evriwea long world. Iumi duim olsem bikos iumi followim example bilong Jesus. Hem sei: “Kaikai bilong mi hem for duim will bilong datwan wea sendem mi kam, and for finisim waka bilong hem.” (John 4:34) Iumi tu barava laek for duim datwan. (John 20:21) Iumi no laek for startim nomoa datfala waka wea iumi kasem komand for duim; iumi laek for finisim tu.—Matthew 24:13; John 17:4.
11. Wanem nao happen long samfala Christian brata and sista bilong iumi, and wanem kwestin nao iumi shud askem iumiseleva?
11 Long semtaem, iumi feel sorre taem iumi lukim samfala brata kamap wik long spiritual saed and from diswan olketa wikdaon or stop for obeyim komand bilong Christ for mek disaepol. Waswe, eni wei stap wea iumi savve helpem olketa kaban moa witim kongregeson and start moa for mek disaepol? (Romans 15:1; Hebrews 12:12) Wei wea Jesus helpem olketa aposol bilong hem taem olketa wik for lelebet taem hem showimaot samting wea iumi savve duim distaem.
Showim Feeling for Kea
12. (a) Bifor Jesus hem dae, wanem nao olketa aposol bilong hem duim? (b) Hao nao Jesus deal witim olketa aposol bilong hem nomata olketa garem bigfala wik point?
12 Long end long ministry bilong Jesus long earth, taem hem klosap for dae, olketa aposol “lusim hem and ranawe.” Olsem Jesus bin talem, olketa ‘ranawe go long haos bilong olketa seleva.’ (Mark 14:50; John 16:32) Hao nao Jesus deal witim olketa fren bilong hem hia wea kamap wik long spiritual saed? No longtaem bihaen hem resurrect, Jesus sei olsem long samfala follower bilong hem: “No fraet! Go, talem olketa brata bilong mi, mekem olketa savve go long Galilee; and long there bae olketa lukim mi.” (Matthew 28:10) Nomata olketa aposol showim finis hao olketa garem olketa bigfala wik point, Jesus go ahed for kolem olketa “olketa brata bilong mi.” (Matthew 12:49) Hem no lus hope long olketa. Long wei olsem, Jesus showimaot mercy and wei for forgive, long sem wei wea Jehovah showimaot mercy and wei for forgive. (2 Kings 13:23) Hao nao iumi savve followim example bilong Jesus?
13. Hao nao iumi shud ting long olketa wea kamap wik long spiritual wei?
13 Iumi shud garem strong feeling for kea for olketa wea wikdaon or wea stop for tekpart long ministry. Iumi rememberim yet olketa waka wea olketa brata duim bifor wea showimaot love bilong olketa, maet samfala duim for staka year. (Hebrews 6:10) Iumi barava missim wei for kaban witim olketa. (Luke 15:4-7; 1 Thessalonians 2:17) So, hao nao iumi savve showimaot iumi kea for olketa?
14. Long wei for followim example bilong Jesus, hao nao iumi savve helpem samwan wea wik?
14 Jesus talem olketa aposol bilong hem wea feel wikdaon hao olketa shud go long Galilee mekem olketa savve lukim hem long there. Hem olsem Jesus invaetem olketa for attendim wanfala spesol meeting. (Matthew 28:10) Long sem wei tu distaem, iumi encouragem olketa wea wik long spiritual saed for attendim olketa meeting long Christian kongregeson, and maet iumi need for duim olsem tu-thri taem. Saed long olketa aposol, gud samting kamaot from datfala invitation, bikos “elevenfala disaepol go long Galilee long datfala maunten, ples wea Jesus arrange for olketa meet.” (Matthew 28:16) Iumi kasem bigfala hapi taem olketa wea wik acceptim tu invitation bilong iumi and start moa for attendim olketa Christian meeting!—Luke 15:6.
15. Hao nao iumi savve followim example bilong Jesus for welkamim olketa wea wik wea kam long olketa meeting?
15 Wanem nao bae iumi duim taem wanfala Christian wea wik hem kam long Kingdom Hall? Wanem nao Jesus duim taem hem lukim olketa aposol bilong hem, wea faith bilong olketa kamap wik for lelebet taem, olketa kam long ples hem markem for meet tugeta? “Jesus kam and story witim olketa.” (Matthew 28:18) Hem no standap farawe and lukluk strong long olketa bat hem go long olketa. Tingim hapi feeling bilong olketa aposol taem Jesus duim samting firstaem! Iumi tu want for duim samting firstaem and barava welkamim olketa wea wik long spiritual wei wea trae for kam bak long Christian kongregeson.
16. (a) Wanem nao iumi savve lanem from wei wea Jesus deal witim olketa follower bilong hem long Galilee? (b) Hao nao iumi savve showimaot tingting bilong Jesus abaotem olketa wea wik? (Lukim footnote.)
16 Wanem moa Jesus hem duim? First samting, hem talem wanfala announcement: “Evri paoa nao mi kasem.” Mek-tu samting, hem givim wanfala assignment: “So go and mek disaepol.” Mek-thri samting, hem talem wanfala promis: “Mi stap witim iufala evriday.” Bat waswe, iu lukim wanem nao Jesus no duim? Hem no tok strong long olketa disaepol bilong hem from wik point and wei wea olketa garem daot. (Matthew 28:17) Waswe, disfala wei wea hem duim hem kasem gud samting? Ia. No longtaem bihaen datwan, olketa aposol go ahed moa for “teach and talemaot gud nius.” (Acts 5:42) Taem iumi followim example bilong Jesus hao for ting abaotem and hao for deal witim olketa wea wik, iumi savve kasem semkaen hapi samting tu long kongregeson bilong iumi.b—Acts 20:35.
“Mi Stap Witim Iufala Evriday”
17, 18. Wanem wei for strongim iumi nao toktok bilong Jesus, “mi stap witim iufala evriday” hem givim?
17 Last toktok bilong assignment wea Jesus givim, “Mi stap witim iufala evriday,” hem strongim evriwan wea waka hard for fulfillim komand bilong Christ for mek disaepol. Nomata wanem samting olketa enemy maet duim againstim waka bilong iumi for preach abaotem Kingdom and nomata wanem kaen laea toktok olketa talem abaotem iumi, iumi no garem eni reason for fraet. Why nao olsem? Leader bilong iumi Jesus wea garem ‘full paoa long heven and earth,’ hem stap witim iumi for sapotim iumi!
18 Promis bilong Jesus for “mi stap witim iufala evriday” hem barava comfortim man tu. Taem iumi waka hard for followim komand bilong Christ for mek disaepol, samfala day bae iumi hapi and tu samfala nara day bae iumi sorre. (2 Chronicles 6:29) Samfala long iumi kasem bigfala sorre taem samwan wea iumi lovem hem dae. (Genesis 23:2; John 11:33-36) Olketa narawan deal witim wei for olo, taem health and strong bilong olketa gogo daon. (Ecclesiastes 12:1-6) Olketa narawan mas deal witim taem wea feeling for sorre hem big tumas. (1 Thessalonians 5:14) And staka long iumi stragol saed long selen. Nomata iumi kasem olketa challenge olsem, iumi win long ministry bikos Jesus hem stap witim iumi “evriday,” nomata long olketa day wea iumi barava stragol.—Matthew 11:28-30.
19. (a) Olketa wanem instruction nao insaed long komand bilong Jesus for mek disaepol? (b) Wanem nao mekem iumi fit for fulfillim komand bilong Jesus?
19 Olsem iumi lukim long tufala study article hia, komand bilong Jesus hem join witim staka samting. Jesus talem iumi why and wea nao iumi shud obeyim komand bilong hem. Hem talem iumi tu wanem iumi shud teachim and go kasem wanem taem nao iumi shud duim datwan. Tru, wei for fulfillim disfala komand hem wanfala challenge. Bat from paoa bilong Christ hem sapotim iumi and wei wea hem stap witim iumi, iumi fit for duim! Datwan barava tru, iaman?
[Olketa Footnote]
a Wanfala buk hem strongim hao Jesus no sei ‘baptaesim olketa and teachim olketa” bat hem sei “baptaesim olketa . . . teachim olketa.” So, disfala komand for baptaes and teach “hem no really minim . . . tufala samting.” Bat, “for teachim man hem samting wea go ahed, wea happen bifor man baptaes . . . and bihaen hem baptaes.”
b Moa information long hao for ting abaotem olketa wea wik hem stap long Wastaoa bilong February 1, 2003, page 15-18.
Hao Nao Bae Iu Ansa?
• Hao nao iumi teachim narawan for followim komand bilong Jesus?
• Wanem nao olketa leson wea niu disaepol savve lanem from olketa narawan insaed kongregeson?
• Wanem nao iumi savve duim for helpem olketa wea kamap wik long spiritual wei?
• Wanem strong and comfort nao iumi kasem from promis bilong Jesus “mi stap witim iufala evriday”?
[Olketa Piksa long page 15]
Iumi need for teachim and directim narawan
[Olketa Piksa long page 17]
Niu disaepol lanem olketa gud leson from example bilong olketa narawan