Waswe, Will Bilong God Go Ahed for Happen?

“Mekem will bilong iu kamap long earth, olsem long heven.”—Matthew 6:10.

JULIO and Christina feelim bigfala pain and sorre taem olketa lukim fofala pikinini bilong tufala bone gogo olketa dae. Wanfala draeva wea drunk nao bangam car bilong tufala saed long road, and car bilong tufala bone and bosta. Olketa sevem mek-faev pikinini, Marcos, from datfala barava hot fire, bat fire hem bonem finis body bilong hem, wea mekem body bilong hem luk nogud olowe nao. Hem naen year nomoa. Sorre bilong datfala dadi barava big tumas. Hem comfortim hemseleva and famili bilong hem taem hem tok olsem: “Diswan hem will bilong God, iumi mas luksavve long datwan, nomata hem gud or nogud or nomata wanem happen.”

Taem olketa nogud sorre samting olsem happen, staka talem sem samting. Olketa ting, ‘Sapos God garem paoa evribit and hem kea for iumi, diswan minim samting wea happen hem really for helpem iumi nomata maet hem hard for iumi minim.’ Waswe, iu agree witim diskaen tingting?

Tingting for sei will bilong God nao mekem gud or nogud samting for happen, kamap from pipol tingim toktok bilong Jesus long datfala Lord’s Prea, wea toktok bilong hem stap antap. Samfala ting olsem: ‘Will bilong God hem go ahed finis long heven, iaman? Taem iumi prea, ‘Mekem will bilong iu kamap long earth,’ iumi agree hao olketa samting wea kamap long earth hem kamap followim will bilong God, iaman?’

Staka daotem diskaen tingting from olketa ting diswan mekem hem luk olsem God nating warim feeling bilong olketa man wea hem creatim. Olketa ask olsem: ‘Hao nao wanfala God wea love laekem olketa barava nogud samting for happen long pipol wea no garem blame?’ ‘Sapos diswan hem for teachim iumi, bae no eniting nomoa bae iumi lanem.’ Maet iu feel olsem tu.

Saed long diswan, disaepol James, haf brata bilong Jesus, raet olsem: “Taem hem kasem test, no eniwan mas sei: ‘God nao testim mi.’ From man no savve testim God witim nogud samting and hemseleva no testim eniwan.” (James 1:13) God hem no kosim olketa nogud samting. So hem klia, no evriting wea happen long earth tuday hem followim will bilong God. Bible storyim tu will bilong man, will bilong olketa nation, and tu will bilong Devil. (John 1:13; 2 Timothy 2:26; 1 Peter 4:3) Waswe, iu agree hao samting wea happen long famili bilong Julio and Christina hem kanduit will bilong wanfala loving Dadi long heven?

So, wanem nao Jesus really minim taem hem teachim olketa disaepol for prea olsem: ‘Mekem will bilong iu kamap’? Waswe, hem for askem help from God long olketa spesol taem nomoa, or waswe, Jesus teachim iumi for prea for samting wea important and moabeta, or hem change wea iumi evriwan savve hope for kasem? Iumi lukluk moa long wanem Bible talem abaotem diswan.

[Olketa Piksa Credit Linelong page 3]

Car: Dominique Faget-STF/AFP/Getty Images; child: FAO photo/B. Imevbore