Hao for Winim Wik Point Bilong Iumi
“Wei for obeyim body minim dae.”—ROMANS 8:6.
1. Hao nao samfala ting long body bilong man, and wanem kwestin nao hem gud for ting raonem?
“MI BAE praisem iu from iu wakem mi long nambawan wei.” (Psalm 139:14) Man for raetem psalm, David, hem sing olsem taem hem ting raonem wanfala long olketa samting wea Jehovah creatim—body bilong man. Bat long difren wei from datfala praise, samfala teacher bilong religion ting long body olsem ples bilong sin for haed and tul bilong hem. Samfala kolem body olsem ‘samting wea haedem wei for no garem savve, faondeson bilong rabis fasin, samting for taetem iumi long sin, wicked cage, grev wea wakabaot.’ Hem tru hao aposol Paul sei: “Insaed long body bilong mi, no eni gud samting hem stap.” (Romans 7:18) Bat waswe, diswan minim iumi no wei nao from iumi trap insaed body wea sin?
2. (a) Wanem nao mining bilong “wei for obeyim body”? (b) Wanem faet nao hem go ahed midolwan long “body” and “spirit” bilong pipol wea laek for mekem God hapi?
2 Samfala taem Bible iusim “body” for piksarem man wea no perfect from hem kasem sin from bighed Adam. (Ephesians 2:3; Psalm 51:5; Romans 5:12) Samting wea iumi kasem from hem mekem iumi garem ‘wik point long body.’ (Romans 6:19) And Paul givim warning: “Wei for obeyim body minim dae.” (Romans 8:6) “Wei for obeyim body” hem minim for letem samting wea body wea sin wantem for kontrolem and muvim iumi. (1 John 2:16) So sapos iumi trae for mekem God hapi, wanfala faet go ahed evritaem midolwan long spiritual fasin and body bilong iumi wea sin, wea no givap for trae forcem iumi for duim “olketa waka from body.” (Galatians 5:17-23; 1 Peter 2:11) Bihaen Paul storyim disfala faet wea go ahed insaed long hem, hem singaot: “Mi wanfala iusles man nomoa! Hu nao bae sevem mi from disfala body wea bae dae?” (Romans 7:24) Waswe, Paul kanduit winim olketa temptation? Bible ansa witim strongfala no!
Tru Samting Abaotem Temptation and Sin
3. Hao nao planti ting long sin and temptation, bat wanem warning nao Bible givim againstim diskaen tingting?
3 Planti distaem no acceptim idea bilong sin. Samfala iusim word “sin” olsem oldfala word for minim smol mistek bilong man. Olketa no luksavve hao “iumi evriwan mas showaot klia front long judgment chair bilong Christ, mekem each wan savve kasem wanem fitim hem for olketa samting wea hem duim thru long body, for olketa samting wea hem duim, nomata gud or nogud.” (2 Corinthians 5:10) Maet samfala narawan showimaot olketa ting nating long temptation. Samfala pipol followim wei bilong living wea mekhae long wei for satisfaem body kwiktaem, nomata saed long kaikai, sex, hapitaem, or for win. Olketa no just laekem evri samting bat olketa laekem distaem nao! (Luke 15:12) Olketa tingim nomoa hapi wea olketa savve kasem distaem bat no future hapi bilong “datfala really laef.” (1 Timothy 6:19) Bat, Bible teachim iumi for ting long careful wei and for lukluk long future, stap klia long eni samting wea bae spoelem spiritual fasin bilong iumi. Wanfala Bible proverb hem sei: “Wise man wea lukim finis trabol hem protectim hemseleva; olketa wea no garem savve and wea go pas finis safa long trabol.”—Proverbs 27:12.
4. Wanem kaonsel nao Paul givim long 1 Corinthians 10:12, 13?
4 Taem Paul raet long olketa Christian long Corinth—taon wea dirty fasin big tumas—hem givim warning wea fitim againstim temptation and paoa bilong sin. Hem sei: “Man wea tingse hem standap mas lukaot nogud hem foldaon. No eni difren temptation savve kasem iufala, only temptation wea kasem evri man nomoa. Bat God hem faithful, and hem bae no letem eni test kasem iufala wea iufala no fit for winim, bat witim datfala temptation hem bae openem wei for iufala savve stand strong.” (1 Corinthians 10:12, 13) Iumi evriwan—young and olo, man and woman—kasem planti temptation long skul, waka, or nara ples. So, letem iumi lukluk gud long toktok bilong Paul and lukim wanem mining nao hem garem for iumi.
No Ova Tumas for Trustim Seleva
5. Why nao hem danger for ova tumas for trustim seleva?
5 Paul hem sei: “Man wea tingse hem standap mas lukaot nogud hem foldaon.” (1 Corinthians 10:12) Hem danger for ova tumas for trustim strong bilong fasin bilong iumi. Diswan showimaot iu no minim gud paoa bilong sin. From olketa pipol olsem Moses, David, Solomon, and aposol Peter foldaon long sin, waswe, iumi shud feel olsem iumi hard for foldaon? (Numbers 20:2-13; 2 Samuel 11:1-27; 1 Kings 11:1-6; Matthew 26:69-75) Proverbs 14:16 hem sei: “Wise wan hem fraet and tanawe from nogud fasin, bat krangge wan hem kamap kros and trustim hemseleva.” And tu, Jesus hem sei: “Spirit hem willing, bat body hem wik.” (Matthew 26:41) From evri man wea no perfect kanduit missim feeling for wantem nogud samting, iumi need for tinghevi long warning bilong Paul and againstim temptation, bikos sapos nomoa, iumi stap long danger for foldaon.—Jeremiah 17:9.
6. Wanem taem and hao nao iumi shud prepare for temptation?
6 Hem wise for prepare for trabol wea maet seknomoa kamap. King Asa luksavve taem bilong peace nao hem stretfala taem for buildim samting for protection. (2 Chronicles 14:2, 6, 7) Hem savve bae hem tu leit for prepare taem eniwan attak. Long sem wei tu, best taem for disaed wanem for duim taem temptation kamap hem taem mind bilong iumi no kasem yet hevi from wanfala test. (Psalm 63:6) Daniel and olketa fren bilong hem wea fraet long God mekem disison for faithful long law bilong Jehovah bifor olketa kasem hevi for kaikaim spesol kaikai bilong king. So, olketa no hol bak for followim disison bilong olketa and no kaikaim kaikai wea no klin. (Daniel 1:8) Bifor eni temptation kamap, letem iumi strongim disison bilong iumi for stap klin long fasin. Then iumi bae garem strong for againstim sin.
7. Why nao iumi kasem comfort for savve hao olketa narawan win finis for againstim temptation?
7 Iumi barava kasem comfort from toktok bilong Paul: “No eni difren temptation savve kasem iufala, only temptation wea kasem evri man nomoa”! (1 Corinthians 10:13) Aposol Peter hem raet: “Standap againstim [Devil], strong long faith, from iufala savve hao semkaen wei for safa hem kasem full sekson bilong olketa brata bilong iufala long world.” (1 Peter 5:9) Yes, olketa narawan kasem semkaen temptation and win for againstim olketa witim help bilong God, and iumi tu savve olsem. Bat, olsem olketa tru Christian wea stap long wicked world, iumi evriwan savve bae iumi kasem temptation enitaem. So, hao nao iumi savve sure for winim olketa wik point bilong iumi and temptation for duim sin?
Iumi Savve Againstim Temptation!
8. Wanem nao wanfala main wei for stap klia long temptation?
8 Wanfala main wei for finis for “slave long sin” hem for stap klia long temptation taem iu fit for duim. (Romans 6:6) Proverbs 4:14, 15 encouragem iumi for: “No go insaed long road bilong olketa wicked wan, and no wakabaot insaed road bilong olketa nogud man. Stap klia long hem, no go insaed long hem, tanawe from hem, and go pas long hem.” Planti taem iumi fit for savve firstaem sapos wanfala samting bae lead go long sin. Dastawe, klia samting for duim olsem Christian hem for “go pas,” stap klia from eniwan and eni samting and eni ples wea savve startim rong feeling and mekem kamap strongfala feeling wea no klin.
9. Hao nao Bible mekhae long wei for ranawe from temptation?
9 For ranawe from temptation hem nara main wei for winim temptation. Paul givim kaonsel: “Ranawe from fornication.” (1 Corinthians 6:18) Hem raet: “Ranawe from wei for worshipim idol.” (1 Corinthians 10:14) Datfala aposol warnim Timothy tu for ranawe from strong feeling for wantem material riches, and “from olketa samting wea young pipol wantem.”—2 Timothy 2:22; 1 Timothy 6:9-11.
10. Wanem nao tufala barava difren example wea showim why hem important for ranawe from temptation?
10 Tingim King David bilong Israel. Taem hem lukluk kamdaon from ruf bilong haos bilong hem, hem lukim wanfala woman wea luk naes tumas hem swim, and heart bilong hem fulap long rong feeling. Hem shud lusim ruf and ranawe from temptation. Bat, hem laek faendaot abaotem disfala woman—Bath-sheba—and barava nogud samting nao kamaot from diswan. (2 Samuel 11:1–12:23) Long narasaed, wanem nao Joseph duim taem waef bilong masta bilong hem trae for forcem hem for leidaon witim hem? Bible talem iumi: “Taem hem [woman hia] tok long Joseph evriday hem nating lisin long hem [woman] for leidaon witim hem, for stap witim hem.” Nomata olketa komand long Law Bilong Moses no stap, wea olketa no kasem yet, Joseph ansarem woman hia olsem: “Hao nao mi savve duim disfala barava nogud samting and sin againstim God?” Wanday woman hia kasholem hem, and sei: “Leidaon witim mi!” Waswe, Joseph stap long there and trae for minim long hem? Nomoa. Hem “ranawe go aotsaed.” Joseph nating letem temptation for duim sex kamap. Hem ranawe!—Genesis 39:7-16.
11. Wanem nao iumi savve duim sapos sem temptation kamap planti taem?
11 Samtaem wei for ranawe hem minim man hem fraet, bat planti taem wei for go awe from wanfala samting wea happen hem nao wisefala wei. Maet iumi kasem wanfala sem temptation wea kamap planti taem long waka. Nomata sapos maet iumi no fit for changem waka bilong iumi, maet samfala nara wei stap for go awe from samting wea mekem temptation kamap. Iumi need for ranawe from eni samting wea iumi savve hem rong, and iumi shud disaed strong for duim samting wea stret nomoa. (Amos 5:15) Long nara ples, wei for ranawe from temptation hem minim for stap klia long Internet insaed computer wea showim piksa abaotem sex and olketa ples bilong hapitaem wea no stret. Maet hem minim tu for torowem wanfala buk or faendem samfala niu fren—olketa wea lovem God and wea savve helpem iumi. (Proverbs 13:20) Nomata wanem temptation hem kamap for duim sin, hem wise for iumi disaed strong for rejectim.—Romans 12:9.
Wei wea Prea Savve Help
12. Wanem nao iumi askem from God taem iumi prea: “No letem mifala go insaed temptation”?
12 Paul givim disfala promis for encouragem iumi: “God hem faithful, and hem bae no letem eni temptation kasem iufala wea iufala no fit for winim, bat witim datfala temptation hem bae openem wei for iufala savve stand strong.” (1 Corinthians 10:13) Wanfala wei wea Jehovah helpem iumi hem taem hem ansarem prea bilong iumi for deal witim temptation. Jesus Christ teachim iumi for prea olsem: “No letem mifala go insaed temptation, bat sevem mifala from wicked wan.” (Matthew 6:13) For ansarem prea olsem wea kam from heart, Jehovah bae no letem iumi foldaon long temptation; hem bae sevem iumi from Satan and olketa kleva trik bilong hem. (Ephesians 6:11, footnote) Iumi shud askem God for helpem iumi luksavve long olketa temptation and garem strong for againstim olketa. Sapos iumi barava askem hem for no letem iumi fail taem iumi kasem temptation, hem bae helpem iumi mekem Satan, datfala “wicked wan,” no winim iumi.
13. Wanem nao iumi shud duim taem iumi evritaem kasem wanfala sem temptation?
13 Tru nao, iumi need for prea strong taem iumi kasem evritaem wanfala sem temptation. Samfala temptation savve mekem strongfala faet kamap insaed long iumi witim tingting and fasin bilong iumi wea barava mekem iumi tingim wei wea iumi really wik. (Psalm 51:5) Olsem example, wanem nao iumi savve duim sapos iumi feel nogud tumas taem iumi tingim moa samfala nogud fasin wea iumi garem bifor? Waswe sapos iumi kasem temptation for duim datkaen fasin moa? Winim wei for trae daonem nomoa olketa feeling olsem, storyim disfala problem long Jehovah insaed prea—planti taem sapos iu need for olsem. (Psalm 55:22) Witim paoa bilong Word bilong hem and holy spirit, hem savve helpem iumi for aotem tingting wea no klin from mind bilong iumi.—Psalm 19:8, 9.
14. Why nao hem important for prea for deal witim wik point bilong iumi?
14 Taem hem luksavve olketa aposol laek sleep long garden bilong Gethsemane, Jesus encouragem olketa: “Go ahed for lukaot and prea evritaem, mekem iufala no foldaon long temptation. Hem tru, spirit hem willing, bat body hem wik.” (Matthew 26:41) Wanfala wei for winim temptation hem for luksavve long olketa difren kaen wei wea temptation savve kamap and for savve long hem nomata taem hem no showaot klia. Hem barava important tu for prea abaotem datfala temptation kwiktaem mekem iumi redy long spiritual wei for faet againstim. From temptation affectim iumi long olketa samting wea iumi barava wik long hem, iumiseleva kanduit faet againstim. Hem barava important for prea bikos strong bilong God savve strongim wei wea iumi againstim Satan. (Philippians 4:6, 7) Maet iumi needim tu spiritual help and prea bilong “olketa older man bilong kongregeson.”—James 5:13-18.
Duim Samting for Againstim Temptation
15. Wanem nao insaed long wei for againstim temptation?
15 Witim wei for stap klia long temptation taem iumi fit for duim, iumi mas duim samting for againstim go kasem taem hem finis or taem wanfala change hem kamap. Taem Satan mekem temptation for Jesus, Jesus againstim Devil go kasem taem Devil go awe. (Matthew 4:1-11) Disaepol James raet olsem: “Againstim Devil, and hem bae ranawe from iufala.” (James 4:7) Wei for againstim temptation hem start taem iumi iusim Word bilong God for strongim mind bilong iumi and disaed strong for followim olketa standard bilong hem. Hem gud for baeheartim and ting raonem samfala main scripture abaotem wik point bilong iumiseleva. Hem bae wise for faendem wanfala mature Christian—maet elder—for iumi storyim wari bilong iumi and iumi savve askem help long hem taem temptation kamap.—Proverbs 22:17.
16. Hao nao iumi savve keepim stret fasin?
16 Bible barava encouragem iumi for werem niu fasin. (Ephesians 4:24) Diswan minim for letem Jehovah sheipim and changem iumi. Taem Paul raet long Timothy wea waka witim hem, hem sei: “Aftarem raeteous fasin, fasin for lovem God, faith, love, fasin for stand strong, kwaet fasin. Faetem nambawan faet bilong faith, hol strong long laef olowe wea God kolem iu long hem.” (1 Timothy 6:11, 12) Iumi savve “aftarem raeteous fasin” taem iumi waka hard for studyim Word bilong God for barava savve gud abaotem fasin bilong hem and then taem iumi showimaot fasin wea fitim olketa mark bilong hem. Wanfala full schedule bilong olketa Christian waka, olsem for preachim gud nius and attendim olketa meeting, hem barava important tu. Wei for kam klosap long God and iusim gud evri spiritual samting wea hem provaedem bae helpem iumi grow long spiritual wei and keepim stret fasin.—James 4:8.
17. Hao nao iumi savve God bae no lusim iumi long taem bilong temptation?
17 Paul promisim iumi hao eni temptation wea iumi kasem bae nating winim strong wea iumi kasem from God for deal witim. Jehovah bae ‘openem wei for iumi savve stand strong.’ (1 Corinthians 10:13) Tru tumas, God no savve letem wanfala temptation kamap big tumas gogo iumi short long spiritual strong for stap faithful, sapos iumi go ahed for depend long hem. Hem laekem iumi win for duim samting for againstim temptation for duim rong samting front long hem. Winim datwan, iumi savve garem faith long promis bilong hem: “Mi bae nating lusim iu and bae nating forgetim iu.”—Hebrews 13:5.
18. Why nao iumi savve sure iumi fit for winim wik point bilong iumi?
18 Paul hem savve wanem bae kamaot from faet bilong hemseleva againstim wik point bilong hem. Hem no ting long hemseleva olsem sin nao bossim and hem no wei nao. Bat, hem sei: “Wei wea mi ran hem no olabaot; wei wea mi hit hem no for hitim air nating; bat mi whipim body bilong mi and leadim olsem wanfala slave, from nogud bihaen mi preach long narafala pipol, miseleva nao duim samting wea God no appruvim.” (1 Corinthians 9:26, 27) Iumi tu savve winim faet againstim body wea no perfect. Thru long Bible, olketa Bible buk, olketa Christian meeting, and olketa nara mature Christian, loving Father bilong iumi long heven givim planti reminder wea helpem iumi for live followim stretfala wei. Witim help bilong hem, iumi savve winim wik point bilong iumi!
Waswe, Iu Remember?
• Wanem nao hem minim for “obeyim body”?
• Hao nao iumi savve prepare for temptation?
• Wanem nao iumi savve duim for deal witim temptation?
• Wanem nao waka bilong prea taem iumi deal witim temptation?
• Why nao iumi savve iumi fit for winim wik point bilong iumi?
[Olketa Piksa long page 10]
Bible no showimaot iumi kanduit winim temptation
[Piksa long page 12]
For ranawe from temptation hem wanfala main wei for stap klia long sin