Jehovah Givim Evriday Need Bilong Iumi

“Finis for wari tumas; from . . . Dadi bilong iufala savve iufala needim olketa samting hia.”—LUKE 12:29, 30.

1. Hao nao Jehovah provaedem samting for olketa animal wea hem creatim?

WASWE, iu lukim taem wanfala sparrow or nara bird hem luk aotem kaikai long graon? Maet iu laek savve wanem nao hem faendem long graon for kaikaim. Long Sermon bilong hem long Maunten, Jesus showim hao iumi savve lanem samting from wei wea Jehovah feedim olketa bird. Hem sei: “Lukluk gud long olketa bird long skae, from olketa no savve plantim seed or harvestim or keepim long stoahaos; bat Dadi bilong iufala long heven hem feedim olketa. Waswe, iufala no savve hao iufala moa important winim olketa?” (Matthew 6:26) Long olketa nambawan wei, Jehovah provaedem kaikai for evri samting wea hem creatim.—Psalm 104:14, 21; 147:9.

2, 3. Wanem spiritual leson nao iumi lanem from wei wea Jesus teachim iumi for prea for bred for evriday?

² Bat, why nao Jesus askem insaed example prea bilong hem: “Givim mifala kaikai for tuday”? (Matthew 6:11) Iumi savve lanem samfala deep spiritual leson from disfala simpol toktok. First samting, hem mekem iumi tingim hao Jehovah hem Datwan wea Provaed. (Psalm 145:15, 16) Olketa man savve plantim and lukaftarem seed, bat God nomoa savve mekem olketa samting grow, long spiritual and physical saed. (1 Corinthians 3:7) Samting iumi kaikaim and drinkim hem wanfala present from God. (Acts 14:17) Wei for askem hem for givim iumi wanem iumi needim each day showim long hem hao iumi no ting nating long olketa samting hia. Bat, wei for ask olsem no minim for iumi no fulfillim responsibility bilong iumi for duim waka sapos iumi fit for duim olsem.—Ephesians 4:28; 2 Thessalonians 3:10.

³ Mek-tu samting, wei wea iumi ask for “bred for disfala day” showimaot iumi shud no ova tumas for wari abaotem future. Jesus sei tu: “No wari and sei, ‘Wanem nao bae mifala kaikaim?’ or, ‘Wanem nao bae mifala drinkim?’ or, ‘Wanem nao bae mifala werem?’ From evri samting hia nao samting wea olketa nation luk aotem. Father bilong iufala long heven hem savve iufala needim evri samting hia. So, go ahed for luk aotem firstaem kingdom and raeteous fasin bilong hem, and iufala bae kasem olketa narafala samting hia. So, no wari abaotem next day, from next day bae garem wari bilong hemseleva.” (Matthew 6:31-34) Datfala prea for “bred for disfala day” showimaot example for garem living wea simpol wea followim “love for God witim wei for satisfae nomoa.”—1 Timothy 6:6-8.

Spiritual Kaikai Each Day

4. Wanem samting wea happen long living bilong Jesus and olketa Israelite nao mekhae long wei wea hem important for kasem spiritual kaikai?

⁴ Wei for prea for bred for each day shud remindim iumi tu long need for kaikaim spiritual kaikai each day. Nomata hem hangre tumas bihaen hem no kaikai for longfala taem, Jesus againstim temptation bilong Satan for changem olketa ston for kamap bred, taem hem sei: “Olketa raetem finis, ‘Man mas laef, no long bred nomoa, bat long evri toktok wea kamaot from mouth bilong Jehovah.’ ” (Matthew 4:4) Long hia Jesus talem toktok bilong profet Moses, wea sei olsem long olketa Israelite: “[Jehovah] mekem iufala shame and letem iufala for hangre and feedim iufala witim manna, wea iufala nating savve long hem and olketa dadi bilong iufala tu nating savve long hem; for mekem iufala savve hao bred nomoa no mekem man laef bat evri toktok wea kamaot from mouth bilong Jehovah nao mekem man laef.” (Deuteronomy 8:3) Wei wea Jehovah provaedem manna hem no only provaedem physical kaikai for olketa Israelite bat hem teachim spiritual leson long olketa tu. Wan samting nao, each wan mas “tekem wanem hem needim for each day.” Sapos olketa tekem winim wanem olketa needim for each day, leftova bae start for smel and garem olketa worm. (Exodus 16:4, 20) Nomata olsem, diswan no happen long mek-six day taem olketa hipimap dabol kaikai for fitim Sabbath day tu. (Exodus 16:5, 23, 24) So manna hem mekem olketa barava ting strong long wei wea olketa mas obey and hao laef bilong olketa hem depend no long bred nomoa bat tu long “evri toktok wea kamaot from mouth bilong Jehovah.”

5. Hao nao Jehovah provaedem spiritual kaikai for iumi evriday?

⁵ Olsem tu, evriday iumi need for kaikaim spiritual kaikai wea Jehovah provaedem thru long Son bilong hem. For kasem datwan, Jesus appointim wanfala “faithful and wise slave” for provaedem “kaikai long barava taem” for famili bilong faith. (Matthew 24:45) Datfala faithful slave sekson provaedem staka spiritual kaikai saed long olketa pablikeson wea helpem iumi for studyim Bible and olketa encouragem iumi tu for readim Bible evriday. (Joshua 1:8; Psalm 1:1-3) Olsem Jesus, iumi tu savve kasem strong long spiritual wei taem iumi duim best for lane abaotem will bilong Jehovah and duim datwan.—John 4:34.

Forgivim Olketa Sin

6. Iumi mas askem forgiveness for wanem kaen sin, and Jehovah bae willing for aotem olketa sapos iumi willing for duim wanem samting?

⁶ Next samting long example prea hem nao diswan: “Forgivim olketa kaon bilong mifala, olsem mifala tu forgivim olketa wea kaon long mifala.” (Matthew 6:12) Long hia Jesus no story abaotem olketa kaon saed long selen. Hem storyim wei for iumi kasem forgiveness for olketa sin bilong iumi. Long story bilong Luke abaotem example prea, hem sei: “Forgivim olketa sin bilong mifala, from mifala seleva tu forgivim evriwan wea duim rong long mifala.” (Luke 11:4) So taem iumi sin, hem olsem iumi kaon long Jehovah. Bat loving God bilong iumi willing for ‘rabem aot,’ or aotem datfala kaon sapos iumi really repent, “tan raon,” and askem hem for forgivim iumi long faondeson bilong faith wea iumi garem long ransom sakrifaes bilong Christ.—Acts 3:19; 10:43; 1 Timothy 2:5, 6.

7. Why nao iumi shud prea evriday for God forgivim iumi?

⁷ Long narasaed, iumi sin taem iumi fail for kasem olketa mark bilong Jehovah saed long raeteous fasin. From iumi born witim sin, iumi evriwan talem, duim, and tingim rong samting or iumi fail for duim samting iumi shud duim. (Ecclesiastes 7:20; Romans 3:23; James 3:2; 4:17) Dastawe, nomata iumi luksavve sapos iumi sin or nomoa long day, evriday iumi need for askem God for forgivim olketa sin bilong iumi.—Psalm 19:12; 40:12.

8. Wei for prea for forgiveness shud muvim iumi for duim wanem, and wanem gud samting nao bae kamaot from diswan?

⁸ Witim faith long paoa bilong blood bilong Christ for baem bak man, taem iumi prea for forgiveness iumi shud honest for lukluk gud long iumiseleva, repent, and talemaot rong. (1 John 1:7-9) For pruvim hao iumi really wantem samting wea iumi askem, iumi mas ask for forgiveness witim “olketa waka wea fitim wei for repent.” (Acts 26:20) Then iumi savve trustim hao Jehovah bae willing for forgivim olketa sin bilong iumi. (Psalm 86:5; 103:8-14) Samting wea bae kamaot from diswan nao bigfala peace long mind “peace bilong God wea winim evri tingting bilong man,” wea bae “protectim heart [bilong iumi] and tingting [bilong iumi] thru long Christ Jesus.” (Philippians 4:7) Bat, example prea bilong Jesus teachim iumi moa samting saed long wanem iumi mas duim for kasem forgiveness for olketa sin bilong iumi.

For Kasem Forgiveness, Iumi Mas Forgive

9, 10. (a) Wanem toktok nao Jesus joinim go long datfala example prea, and diswan hem strongim wanem point? (b) Hao nao Jesus showimaot go moa wei wea iumi need for forgivim pipol?

⁹ Interesting samting, datfala toktok “forgivim olketa kaon bilong mifala, olsem mifala tu forgivim olketa wea kaon long mifala,” hem only part bilong example prea wea Jesus storyim go moa. Taem hem finisim datfala prea, hem sei moa: “Bikos sapos iufala forgivim sin bilong olketa man, Dadi bilong iufala long heven bae forgivim iufala tu; bat sapos iufala no forgivim olketa man sin bilong olketa, Dadi bilong iufala tu bae no forgivim olketa sin bilong iufala.” (Matthew 6:14, 15) So, Jesus showimaot klia hao wei for Jehovah forgivim iumi hem depend long wei wea iumi willing for forgivim nara pipol.—Mark 11:25.

¹⁰ Long narafala taem, Jesus talem wanfala tokpiksa wea showimaot need for iumi forgivim narawan sapos iumi laekem Jehovah for forgivim iumi. Hem story abaotem wanfala king wea kaen tumas for finisim bigfala kaon bilong wanfala slave bilong hem. Bihaen, datfala king hem givim strong panis long datfala sem man bikos hem no want for finisim wanfala smol kaon wea nara slave garem long hem. Jesus endim disfala tokpiksa witim disfala toktok: “Long sem wei tu Dadi bilong mi long heven bae deal witim iufala sapos iufala wanwan no forgivim brata bilong hem from heart bilong iufala.” (Matthew 18:23-35) Datfala leson hem klia tumas: Kaon bilong sin wea Jehovah forgivim each wan long iumi hem big tumas winim eni sin wea eniwan maet duim againstim iumi. And tu, Jehovah forgivim iumi evriday. So, barava fitim for iumi forgivim sin wea nara pipol duim long iumi samfala taem.

11. Wanem kaonsel wea aposol Paul givim nao iumi bae followim sapos iumi wantem Jehovah for forgivim iumi, and wanem gud samting nao bae kamaot from datwan?

¹¹ Aposol Paul hem raet olsem: “Kamap kaen long narawan, garem fasin for kea, willing for forgivim narawan olsem God tu thru long Christ hem willing for forgivim iufala.” (Ephesians 4:32) Wei wea evriwan willing for forgive hem apim peace midolwan long olketa Christian. Paul talem tu disfala toktok: “Olsem olketa wea God chusim, wea holy and wea hem lovem, iufala mas werem fasin for kea, kaenfala fasin, hambol tingting, kwaet fasin, and long-safaring. Go ahed for patient witim each other and willing for forgivim each other sapos eniwan garem reason for komplen againstim narawan. Olsem Jehovah hem willing for forgivim iufala, iufala mas duim olsem tu. Bat, witim evri samting hia, iufala mas werem love, from hem nao perfect wei for keepim wan mind.” (Colossians 3:12-14) Evri samting hia hem insaed long disfala prea wea Jesus teachim long iumi: “Forgivim olketa kaon bilong mifala, olsem mifala tu forgivim olketa wea kaon long mifala.”

Protection Taem Kasem Temptation

12, 13. (a) Wanem nao maet mining bilong next samting wea Jesus askem long datfala example prea? (b) Hu nao main wan for Testim man, and wanem nao mining bilong wei wea iumi prea for no go insaed long temptation?

¹² Next samting wea Jesus askem long example prea hem: “No letem mifala go insaed temptation.” (Matthew 6:13) Waswe, Jesus sei for iumi askem Jehovah for no testim iumi? Nomoa, bikos disaepol James raetem diswan witim paoa bilong holy spirit: “Taem hem kasem test, no eniwan mas sei: ‘God nao testim mi.’ From man no savve testim God witim nogud samting and hemseleva no testim eniwan.” (James 1:13) And tu, man wea raetem psalm hem sei: “Sapos olketa mistek nao samting wea iu luk aotem, O Jah, O Jehovah, hu nao savve standap?” (Psalm 130:3) Jehovah no lukluk for evri mistek iumi duim, and hem barava no trae for testim iumi for iumi mekem mistek. So, wanem nao disfala part long example prea hem minim?

¹³ Datwan wea trae for testim iumi, for mekem iumi foldaon long kleva trik bilong hem, and for kaikaim iumi tu hem Devil Satan. (Ephesians 6:11, footnote) Hem Main Wan for Testim man. (1 Thessalonians 3:5) Taem iumi prea for no go insaed temptation, iumi askem Jehovah for no letem iumi foldaon taem iumi kasem temptation. Iumi askem hem for helpem iumi for “Satan hem no win ovarem iumi,” for iumi no foldaon long olketa temptation. (2 Corinthians 2:11) Iumi prea for go ahed for stap long “secret ples bilong Most Hae,” for kasem spiritual protection wea Jehovah promis for givim olketa wea luksavve long sovereign rul bilong Hem long evri samting olketa duim.—Psalm 91:1-3.

14. Wanem promis nao aposol Paul talem wea mekem iumi sure Jehovah bae no lusim iumi sapos iumi luk long Hem taem iumi kasem temptation?

¹⁴ Iumi savve sure hao sapos datwan nao samting iumi laekem tumas, wea iumi talemaot insaed prea and showim long samting iumi duim, Jehovah bae hard for lusim iumi. Aposol Paul comfortim iumi olsem: “No eni difren temptation savve kasem iufala, only temptation wea kasem evri man nomoa. Bat God hem faithful, and hem bae no letem eni temptation kasem iufala wea iufala no fit for winim, bat witim datfala temptation hem bae mekem wei for iufala savve stand strong.”—1 Corinthians 10:13.

“Sevem Mifala From Wicked Wan”

15. Why nao hem moa important winim eni narataem for iumi prea for Jehovah sevem iumi from wicked wan?

¹⁵ Insaed olketa manuscript wea man fit for trustim bilong Christian Greek Scripture, example prea bilong Jesus hem finis witim disfala toktok: “Sevem mifala from wicked wan.”a (Matthew 6:13) Wei for kasem protection from Devil hem moa important long disfala taem bilong end. Satan and olketa demon bilong hem go ahed for faet witim olketa anointed remnant, “wea obeyim olketa komandment bilong God and wea garem waka for witness abaotem Jesus,” and tu olketa fren bilong olketa, datfala “big crowd.” (Revelation 7:9; 12:9, 17) Aposol Peter hem kaonselem olketa Christian olsem: “Keepim gudfala tingting bilong iufala, luk aot gud. Enemy bilong iufala, Devil, hem wakabaot olsem wanfala lion wea singaot strong, and luk aotem samwan for kaikaim. Bat standap againstim hem, strong long faith.” (1 Peter 5:8, 9) Satan hem laek for stopem preaching waka bilong iumi, and thru long olketa sekson bilong hem long earth—nomata olketa bilong religion, bisnis, or politik—hem trae for mekem iumi fraet. Bat, sapos iumi stand strong, Jehovah bae sevem iumi. Disaepol James hem raet olsem: “Stap anda long God; bat againstim Devil, and hem bae ranawe from iufala.”—James 4:7.

16. Wanem nao olketa samting wea Jehovah provaedem for helpem olketa servant bilong hem wea kasem test?

¹⁶ Jehovah letem Son bilong hem for kasem test. Bat bihaen Jesus againstim Devil, and iusim Word bilong God for protectim hemseleva, Jehovah sendem olketa angel for strongim hem. (Matthew 4:1-11) Long sem wei tu, Jehovah iusim olketa angel bilong hem for helpem iumi sapos iumi prea witim faith and mekem hem ples bilong iumi for haed. (Psalm 34:7; 91:9-11) Aposol Peter raet olsem: “Jehovah savve hao for sevem pipol wea garem fasin for lovem God from test, bat for keepim pipol wea no raeteous for day bilong judgment, for finis evribit.”—2 Peter 2:9.

Wei for Sev Evribit Hem Klosap

17. Taem hem givim iumi example prea, hao nao Jesus putim olketa samting long barava ples bilong olketa?

¹⁷ Long example prea, Jesus putim olketa samting long barava ples bilong olketa. Main samting iumi shud interest long hem nao for mekem bigfala nem bilong Jehovah kamap holy. From samting for duim diswan nao hem datfala Kingdom bilong Messiah, iumi prea for Kingdom for kam for finisim evri kingdom or gavman wea no perfect, and for mek sure will bilong God hem kamap evribit long earth olsem hem kamap long heven. Hope bilong iumi for laef olowe insaed wanfala paradaes earth hem depend long wei for mekem nem bilong Jehovah kamap holy and wei wea full universe luksavve long raeteous sovereign rul bilong hem. Bihaen iumi prea for olketa important samting hia, iumi savve prea for olketa samting iumi needim for each day, wei for forgivim olketa sin bilong iumi, and sev from olketa temptation and olketa wei wea datfala wicked wan Devil Satan hem trae for trikim iumi.

18, 19. Hao nao example prea bilong Jesus helpem iumi for go ahed luk aot and mekem hope bilong iumi ‘strong go kasem end’?

¹⁸ Wei wea iumi bae sev evribit from datfala wicked wan and nogud system bilong hem, hem klosap tumas. Satan hem savve hem garem “shortfala taem nomoa” for showimaot long earth wei wea hem “kros tumas,” main wan nao long olketa faithful servant bilong Jehovah. (Revelation 12:12, 17) Long datfala saen wea garem planti part bilong “end bilong disfala system,” Jesus profesi abaotem olketa barava spesol samting, wea samfala no happen yet. (Matthew 24:3, 29-31) Taem iumi lukim olketa samting hia happen, hope bilong iumi for sev bae kamap moa braet. Jesus hem sei: “Taem evri samting hia start for happen, standap stret and liftimap hed bilong iufala, from taem for sevem iufala hem kam klosap nao.”—Luke 21:25-28.

¹⁹ Shortfala example prea wea Jesus givim long olketa disaepol bilong hem showim iumi long barava gudfala wei wanem for talem insaed olketa prea bilong iumi taem end hem kam klosap. Iumi feel sure hao go kasem end, Jehovah bae go ahed for provaedem wanem iumi needim each day, long spiritual and physical wei. Wei wea iumi luk aot gud witim prea bae helpem iumi for “hol strong long trust wea iumi garem long firstaem go kasem end.”—Hebrews 3:14; 1 Peter 4:7.

[Footnote]

Review

• Wanem nao insaed long prea bilong iumi for kasem “bred for disfala day”?

• Explainim mining bilong prea “forgivim olketa rong bilong mifala, olsem mifala tu forgivim olketa wea duim rong long mifala.”

• Wanem nao hem minim taem iumi askem Jehovah for no letem iumi go insaed temptation?

• Why nao iumi need for prea “sevem mifala from wicked wan”?

[Piksa long page 15]

Iumi mas forgivim nara pipol sapos iumi want for kasem forgiveness

[Piksa Credit Line long page 13]

Lydekker