Waswe, Iu Tingim Narawan Long Sem Wei Olsem Jehovah?
“No eni wei for divaed mas kamap long body . . . Olketa part bilong body mas tingim tu olketa narawan.”—1 COR. 12:25.
1. Wanem nao tingting bilong iu taem iu firstaem kam long spiritual paradaes?
TAEM iumi stop for followim disfala world and iumi start for hipap witim pipol bilong Jehovah, luk olsem long datfala taem iumi hapi tumas long wei wea olketa showimaot wei bilong love and tingim narawan. Olketa wei olsem hem barava difren tumas from olketa rabis wei bilong pipol wea followim Satan! Iumi stap long wanfala spiritual paradaes wea iumi stap gud and waka gud tugeta.—Isa. 48:17, 18; 60:18; 65:25.
2. (a) Wanem nao savve spoelem tingting bilong iumi abaotem narawan? (b) Wanem nao iumi mas duim?
2 Bihaen samfala taem, maet iumi start for garem nogud tingting abaotem olketa brata bilong iumi. Datwan hem from iumi man wea garem sin. Nogud tingting olsem maet mekem iumi tingim nomoa wik point bilong olketa brata and for no tingim olketa gudfala wei bilong olketa. Iumi start nao for no tingim narawan long sem wei olsem Jehovah. Sapos samting olsem kasem iumi, iumi mas ting raonem wei bilong iumi mekem iumi followim gudfala tingting bilong Jehovah.—Ex. 33:13.
Tingting Bilong Jehovah Abaotem Olketa Brata
3. Bible hem markem Christian kongregeson witim wanem?
3 Long 1 Corinthians 12:2-26, Paul hem markem kongregeson bilong olketa anointed Christian witim body wea garem “olketa difren part.” Long sem wei olsem olketa part bilong body difren, olketa long kongregeson tu olketa difren long wei and savve bilong olketa. Nomata olsem, Jehovah hem hapi nomoa long olketa difren wan hia. Hem lovem and tinghae long evriwan long kongregeson. Dastawe, Paul talem iumi for “mas tingim tu olketa narawan” long kongregeson. Maet diswan hem no isi for iumi duim from wei bilong samfala hem difren from wei bilong iumi.
4. Wanem tingting abaotem olketa brata nao iumi mas stretem?
4 Maet iumi start for tingim nomoa olketa wik point bilong olketa brata bilong iumi. Diswan hem olsem iumi lukluk long wanfala smol mark long naesfala white kaleko wea wanfala man werem. Bat Jehovah hem no lukluk long mark hia nomoa, bat hem lukim full naesfala white kaleko and man wea werem tu. Maet wei bilong iumi hem for tingim nomoa wik point, bat Jehovah hem lukluk long wanfala man and hem lukim olketa gudfala wei bilong hem. Sapos iumi trae for olsem Jehovah, diswan bae helpem kongregeson for garem love and waka gud tugeta.—Eph. 4:1-3; 5:1, 2.
5. Why nao hem no fitim for iumi judgem narawan?
5 Jesus luksavve long wei bilong man wea sin for judgem narawan. Hem talem olsem: “Stop for judgem narawan mekem God no judgem iufala.” (Matt. 7:1) Jesus no talem olketa for “no judgem narawan,” hem talem olketa for “stop for judgem narawan.” Hem savve hao staka wea lisin long hem garem wei for judgem narawan. Waswe, maet iumi start for garem wei olsem? Sapos iumi start for garem wei olsem, bae hem fitim iumi for stretem datwan mekem God no judgem iumi. Iumi barava no fit for judgem eniwan wea Jehovah nao markem for duim waka long kongregeson or for talem hao hem no part bilong kongregeson. Hem tru, maet wanfala brata garem samfala wik point bat sapos Jehovah hapi nomoa long hem, hem barava no fitim for iumi les long hem. (John 6:44) Waswe, iumi garem faith hao Jehovah nao leadim kongregeson bilong hem and sapos eni samting wea hem no hapi long hem bae hem stretem datwan?—Readim Romans 14:1-4.
6. Hao nao Jehovah tingim olketa wakman bilong hem?
6 Nambawan samting abaotem Jehovah hem wei wea hem savve tingim iumi olsem wanfala man wea no garem sin long niu world. Hem savve tu long staka samting wea iumi duim finis for muv ahed long spiritual wei. Dastawe hem no tingim nomoa evri wik point wea iumi garem. Psalm 103:12 talem iumi hao “olsem ples wea sun kamap hem farawe from ples wea sun go daon, hem putim olketa sin bilong iumi farawe from iumi.” Iumi wanwan barava hapi from hem duim diswan!—Ps. 103:3.
7. Wanem samting nao iumi lanem from tingting bilong Jehovah abaotem David?
7 Bible showimaot nambawan wei bilong Jehovah for mekhae long olketa gudfala wei wea man garem. God story abaotem David olsem: “Wakman bilong mi David, wea obeyim olketa law bilong mi and witim full heart bilong hem, hem wakabaot followim mi long wei for duim nomoa olketa samting wea mi hapi long hem.” (1 Ki. 14:8) Hem tru, iumi savve David hem duim samfala samting wea no stret. Bat Jehovah hem gohed for mekhae long gudfala wei bilong David from hem luksavve hem garem gudfala heart.—1 Chron. 29:17.
Tingim Olketa Brata Long Sem Wei Olsem Jehovah
8, 9. (a) Long wanem wei nao iumi savve followim Jehovah? (b) Storyim tokpiksa hia and samting wea iumi savve lanem from diswan.
8 Jehovah savve luksavve long evri tingting bilong wanfala man, iumi no savve duim diswan. Diswan barava showimaot hao iumi no fit for judgem narawan. Iumi no savve long evri tingting bilong narafala man. Iumi mas trae for olsem Jehovah long wei wea hem no tingim nomoa wik point, from hem savve hao gogo evri wik point hia bae nomoa nao. Hem bae gud tumas sapos iumi laek for olsem hem long diswan. Diskaen wei bae helpem iumi for fren gud witim olketa brata and sista.—Eph. 4:23, 24.
9 Tingim sapos iu lukim wanfala haos wea barava luk nogud. Maet iu and staka nara pipol tingse haos hia hem nogud nao. Bat taem narafala man lukim hem garem difren tingting from iufala. Hem lukim tu-thri samting wea nogud bat hem luksavve haos hia hem savve wakem gud moa. Hem peim haos hia and hem wakem gud moa. Bihaen hem wakem gud, pipol wea lukim haos hia talem hao hem luk naes tumas. Waswe, iumi savve olsem disfala man wea wakem gud moa disfala haos? Winim wei for tingim nomoa olketa nogud samting abaotem olketa brata bilong iumi, waswe, iumi luksavve long wei wea olketa fit for muv ahed long spiritual wei? Bae iumi lovem olketa brata bilong iumi long sem wei olsem Jehovah sapos iumi tinghae long wei wea olketa followim hem.—Readim Hebrews 6:10.
10. Toktok wea stap long Philippians 2:3, 4 savve helpem iumi long wanem wei?
10 Aposol Paul storyim samfala samting wea savve helpem iumi for fren witim evriwan long kongregeson. Hem talem olketa Christian: “No duim eni samting from iufala laek for raoa or winim narawan from iufala tinghae long iufala seleva, bat hambol nomoa. No tingim nomoa samting wea iufala seleva laekem, bat tingim tu samting wea olketa narawan laekem.” (Phil. 2:3, 4) Wei for hambol bae helpem iumi for garem gudfala tingting abaotem olketa narawan. Wei for tingim samting wea narawan laekem and for tingim gud samting abaotem narawan bae helpem iumi for tingim olketa long sem wei olsem Jehovah.
11. Wanem samting nao kamap long samfala kongregeson?
11 Long taem bilong iumi staka samting happen wea mekem pipol for go stap long olketa difren ples. Distaem staka pipol from olketa difren kantri nao stap long samfala bigfala taon. Samfala wea kam stap long ples bilong iumi olketa laek herem trufala toktok from Bible and olketa hipap witim iumi for worshipim Jehovah. Olketa hia “kam from evri kantri, tribe, pipol, and languis.” (Rev. 7:9) From diswan, staka kongregeson bilong iumi distaem garem pipol from staka difren kantri.
12. Wanem tingting nao iumi mas garem for narawan? Why nao hem no isi samfala taem?
12 Long kongregeson wea iumi stap, iumi mas tingting gud moa long hao iumi tingim narawan. Toktok bilong aposol Peter savve helpem iumi for showimaot “trufala love for olketa brata and garem bigfala love for olketa wea kam from heart.” (1 Pet. 1:22) Taem pipol from difren kantri stap tugeta hem no isi for showimaot trufala love. Maet olketa wea worship witim iumi garem living, skul, material samting, and kastom wea hem barava difren from iumi. Waswe, samfala taem hem no isi for iu savve long tingting or wei bilong samfala? Maet olketa hia garem sem tingting abaotem iu tu. Nomata wanem, Bible talem iumi for “garem love for evri brata.”—1 Pet. 2:17.
13. Wanem tingting wea maet iumi garem iumi mas stretem?
13 Sapos iumi no showimaot love for evri brata, iumi mas stretem tingting bilong iumi mekem iumi showimaot love for olketa. (Readim 2 Corinthians 6:12, 13.) Maet iu garem disfala tingting: “Mi laekem nomoa evri difren kaen pipol bat mi savve tu long samfala wei bilong olketa wea mi les long hem.” Waswe, iu garem tingting olsem enitaem? Diskaen tingting savve showimaot hao maet iumi garem wei for ting daonem man, wea iumi mas aotem. Iumi savve askem iumiseleva, ‘Waswe, mi evritaem trae for savve long pipol wea garem difren kastom from ples bilong mi?’ Wei for askem iumiseleva olketa kwestin olsem savve helpem iumi for lovem and tinghae long disfala Christian famili bilong iumi evriwea long world.
14, 15. (a) Storyim samfala wea stretem tingting bilong olketa abaotem olketa narawan. (b) Hao nao iumi savve followim wanem olketa duim?
14 Bible storyim staka wea stretem tingting bilong olketa, aposol Peter nao wanfala. From Peter hem wanfala Jew, bae hem no laek for go long haos bilong man wea no Jew. So trae for tingim tingting bilong hem hao hem mas go long haos bilong Cornelius wea no Jew! Peter stretem tingting bilong hem from hem luksavve hao God laekem pipol from evri difren kantri for kamap part bilong Christian kongregeson. (Acts 10:9-35) Saul wea bihaen hem kamap aposol Paul, hem stretem tingting bilong hem for no ting daonem man. Hem talem hao long bifor hem heitim olketa Christian and hem “barava gohed for persecutim kongregeson bilong God and for barava spoelem.” Bat taem Lord Jesus stretem Paul, diswan mekem hem for garem gudfala tingting and gogo hem hambol for obeyim olketa wea hem persecutim bifor.—Gal. 1:13-20.
15 Tru tumas, spirit bilong Jehovah savve helpem iumi for stretem tingting bilong iumi. Iumi mas aotem eni tingting wea iumi garem for ting daonem man and “garem sem tingting olsem spirit wea mekem evriwan stap gud tugeta.” (Eph. 4:3-6) Bible talem iumi for “evritaem garem love, from hem nao nambawan wei for garem sem tingting.”—Col. 3:14.
Followim Tingting Bilong Jehovah Taem Iumi Preach
16. Wanem nao God laek duim for pipol?
16 Aposol Paul talem hao “God hem no teksaed.” (Rom. 2:11) Plan bilong Jehovah nao hem for pipol bilong evri kantri for worshipim hem. (Readim 1 Timothy 2:3, 4.) For duim datwan hem mekem wei for “evri kantri, tribe, languis and pipol” for savve long “gud nius wea stap for olowe.” (Rev. 14:6) Jesus talem hao “garden nao hem disfala world.” (Matt. 13:38) Wanem nao diswan hem minim for iu and famili bilong iu?
17. Wanem nao iumi savve duim for helpem evri difren kaen pipol?
17 No evriwan fit for go long olketa farawe ples long world for preachim gud nius abaotem Kingdom long olketa narawan. Bat maet iumi fit for storyim disfala gud nius long pipol from evri difren kantri wea stap long ples bilong iumi. Waswe, iumi stanbae for story witim difren pipol and no pipol wea iumi evritaem story witim olketa nomoa? Hem bae gud tumas sapos iumi trae for preach long eniwan wea no herem yet disfala gud nius.—Rom. 15:20, 21.
18. Long wanem wei nao Jesus showimaot hem tingim pipol?
18 Jesus hem barava laek for helpem evriwan. Hem no preach long wanfala ples nomoa. Bible storyim hao hem “gogo long olketa taon and vilij.” And “taem hem lukim olketa pipol hem feel sorre long olketa” and hem showimaot hem laek for helpem olketa.—Matt. 9:35-37.
19, 20. Wanem nao samfala wei wea iumi savve showimaot iumi tingim evri difren pipol long sem wei olsem Jehovah and Jesus?
19 Hao nao iumi savve showimaot tingting olsem? Samfala trae for preach long pipol long olketa ples wea maet olketa no gogo evritaem long hem. Maet samfala long olketa ples hia hem olketa stoa, ples wea man sidaon for rest lelebet, and bas stop. Samfala narawan lanem niu languis mekem olketa preach long pipol wea kam stap long ples bilong olketa or for preach long pipol wea maet bifor olketa no preach evritaem long pipol hia. Taem iumi savve hao for story lelebet long languis bilong olketa, diswan maet showim olketa iumi tingim olketa. Sapos iumi no fit for lanem narafala languis, waswe, iumi savve duim eni samting for helpem narawan wea lanem narafala languis? Hem no fitim iumi for tok spoelem olketa wea lanem niu languis for preach long pipol from narafala kantri. God hem tinghae long evri man and hem fitim iumi for garem sem tingting tu.—Col. 3:10, 11.
20 Wei for garem tingting olsem God abaotem pipol hem minim iumi mas preach long evri pipol nomata wanem kaen living nao olketa garem. Maet olketa no garem ples for stap, no luk klin, or wei bilong olketa hem olobaot nomoa. Iumi mas no tok spoelem evri pipol from wanfala ples nomata sapos tu-thri man long datfala ples nomoa spoelem iumi. Paul gohed nomoa for preach long pipol from olketa difren ples nomata pipol wea spoelem hem nao kam from olketa ples hia. (Acts 14:5-7, 19-22) Hem savve hao samfala pipol long olketa ples hia bae tinghae long samting wea hem talem.
21. Hao nao wei for garem sem tingting olsem Jehovah for olketa narawan bae helpem iu?
21 Distaem, winim enitaem bifor, iumi mas garem stretfala tingting, hem nao for garem sem tingting olsem Jehovah for olketa brata long kongregeson, disfala Christian famili bilong iumi evriwea long world, and olketa pipol wea iumi preach long olketa. Sapos iumi trae for garem sem tingting olsem Jehovah, diswan bae barava helpem iumi for stap gud and waka gud tugeta. Diswan bae helpem iumi for helpem narawan for tinghae long Jehovah, datfala God “wea no saedem” eniwan, bat hem lovem evriwan from ‘hemseleva nao wakem evriwan.’—Job 34:19.
Wanem Nao Ansa Bilong Iu?
• Wanem tingting abaotem olketa brata nao iumi mas no garem?
• Hao nao iumi savve tingim olketa brata bilong iumi long sem wei olsem Jehovah?
• Wanem samting nao iu lanem abaotem wei for tingim disfala Christian famili bilong iumi evriwea long world?
• Hao nao iumi savve tingim pipol long sem wei olsem Jehovah taem iumi preach?
[Piksa long page 26]
Wanem nao iu savve duim for savve long pipol wea garem difren kastom?
[Piksa long page 28]
Wanem nao iu savve duim for storyim gud nius long samfala pipol moa?