Waswe, Evri Religion Olketa Gud?
WORLD distaem garem staka didifren kaen religion. Wanfala report showimaot hao 19-fala main religion nao stap and samting olsem 10,000 nara religion moa. Pipol savve chusim enikaen religion wea olketa laekem. So waswe, iumi savve chusim eni religion nomoa wea iumi laekem?
Samfala pipol sei olketa difren religion hem olketa didifren road wea go ap long wanfala maunten. Long tingting bilong olketa, olketa sei evri road hia hem gud, bikos evriwan go long sem ples nomoa. Olketa sei wanfala Olmaeti God nomoa stap, so evri religion leadim pipol go long hem.
Waswe, Evri Religion Leadim Pipol Go Long God?
Wanem nao datfala teacher Jesus Christ wea pipol barava respectim sei abaotem diswan? Hem talem olketa disaepol bilong hem olsem: “Go insaed smolfala gate.” Why nao olsem? “Bikos road wea lead go for dae hem waed and gate hem big and hem isi for staka pipol followim datfala road. Bat road wea lead go long laef hem no isi and gate hem smol nomoa, and no staka pipol nao followim datfala road.”—Matthew 7:13, 14, The Holy Bible—New International Version.
Waswe, toktok bilong Jesus hem minim samfala religion lead go for “dae”? Or waswe, Jesus minim olketa wea no biliv long God nomoa olketa followim road wea waed, and olketa wea biliv long God, nomata wanem religion olketa stap long hem, olketa followim smol road wea lead go for laef ?
Stretawe bihaen Jesus talem datfala toktok abaotem tufala road hia, hem sei: “Keakea long olketa laea profet wea olsem olketa wild dog. Olketa talem and duim olketa samting for mekem pipol tingse olketa hambol and kaen olsem wanfala sheepsheep.” (Matthew 7:15, New Century Version) Bihaen hem sei moa: “No evriwan wea sei long mi, ‘Lord, Lord,’ bae go insaed long Kingdom bilong God bat man wea duim wanem Dadi bilong mi long heven laekem nao, bae go insaed.” (Matthew 7:21, Today’s English Version) Sapos eniwan hem sei hem wanfala profet or talem Jesus hem “Lord” bilong hem, hem stret for sei datfala man hem man for lotu, no wanfala man wea no biliv long God. Nomata olsem, Jesus hem talem stret hao no evri religion olketa gud and iumi no savve trustim evri bigman long religion.
Waswe, Man Savve Luksavve Long Datfala Smol Road?
From evri religion no leadim pipol go long God, hao nao bae iu luksavve long smolfala road wea lead go long laef, from staka didifren religion wea stap? Tingim disfala tokpiksa. Sapos iu lus long bush and iu askem samwan for helpem iu. Wanfala man talem iu for go long east. Nara man talem iu for go long west. Nara man talem iu for iuseleva chusim wea nao iu laek followim. Nara man wea hem tu wakabaot long bush showim iu wanfala map and showim iu stretfala road for followim. Hem givim iu datfala map mekem iu savve lukluk long hem taem iu gogo. Iu bae no wari nao bikos iu bae kasem ples wea iu laek for go long hem, iaman!
So hem olsem tu taem iumi chusim wanem religion nao for iumi followim, iumi needim wanfala map wea iumi fit for trustim for helpem iumi savve long trufala religion. Eni map olsem stap? Ia, hem stap. Datfala map hem nao Bible, wea talem olsem: “Evri scripture hem kam from God and hem gud for teachim man, for givim kaonsel, for stretem evri samting, and for stretem iumi followim wanem God talem hem stret.”—2 Timothy 3:16, King James Version.
Maet iu garem wanfala Bible long languis bilong iu wea iu savve iusim for helpem iu savve long trufala religion. Olketa Jehovah’s Witness wea printim disfala Wastaoa, garem wanfala Bible transleison wea iu fit for trustim, hem nao New World Translation of the Holy Scriptures. Bat sapos iu no wanfala Jehovah’s Witness, maet iu savve iusim olketa nara Bible for luksavve long religion wea tru and wea no tru. From diswan, olketa nara story wea kam bihaen long diswan, bae iusim olketa toktok from olketa nara Bible wea olketa nara religion hapi for iusim.
Taem iu readim olketa story hia, markem wanem Bible hem talem witim wanem iu savve finis. Ting raonem toktok bilong Jesus abaotem hao iumi savve luksavve long gudfala religion and nogud religion. Hem sei: “Wanfala gudfala tree bae garem gudfala frut, and nogud tree bae garem rabis frut. Wanfala gud tree no savve garem nogud frut, and wanfala nogud tree no savve garem gudfala frut.” (Matthew 7:17, 18, Contemporary English Version) Bae iumi lukim thrifala gud frut wea Bible storyim wea bae helpem iumi for luksavve long “gudfala tree.”