Toktok Bilong Jehovah Hem Laef
Olketa Main Point From Buk Bilong Matthew
FIRST man for raetem barava interesting story abaotem laef and ministry bilong Jesus hem Matthew. Hem wanfala gud fren bilong Jesus and hem man for kolektem tax bifor. Matthew raetem Gospel bilong hem long Hebrew languis, and then bihaen hem transleitim go long Greek languis. Hem finis for raetem diswan long 41 C.E. and disfala buk hem help for joinim Hebrew Scripture witim Christian Greek Scripture.
Luk olsem Matthew raetem diswan for olketa Jew nomoa. Gospel bilong hem barava interesting and hem muvim heart bilong man. Hem showimaot hao Jesus nao datfala Messiah wea Jehovah promis for sendem kam, datfala Son bilong God. Sapos iumi lukluk gud and ting raonem message insaed disfala buk, datwan bae strongim faith wea iumi garem long tru God, Son bilong hem, and olketa promis bilong Hem.—Heb. 4:12.
“KINGDOM BILONG HEVEN HEM KAM KLOSAP NAO”
Olketa samting wea Matthew raet abaotem no followim evribit taem wea olketa samting hia happen. Datwan hem bikos hem mekhae long olketa teaching bilong Jesus, and tu, theme bilong Bible, wea hem nao Kingdom. Olsem example, hem storyim Sermon long Maunten klosap long start bilong buk, bat really, Jesus talem datfala sermon klosap tufala year bihaen hem startim ministry bilong hem.
Taem Jesus duim ministry bilong hem long Galilee, hem duim olketa mirakol, hem givim instruction long 12-fala aposol bilong hem long hao for duim ministry, hem tok strong long olketa Pharisee, and talem samfala tokpiksa abaotem Kingdom. Then hem lusim Galilee and kam long “border bilong Judea long narasaed bilong Jordan.” (Matt. 19:1) Taem olketa gogo for Judea, Jesus hem sei olsem long olketa disaepol bilong hem: ‘Iumi go long Jerusalem, and olketa bae givim judgment for Son bilong man mas dae, and long mek-thri day hem bae resurrect.’—Matt. 20:18, 19.
Ansa for Olketa Bible Kwestin:
3:16—Long wanem wei nao ‘skae hem open’ taem Jesus hem baptaes? Luk olsem diswan minim Jesus rememberim evri samting wea hem duim taem hem laef long heven bifor.
5:21, 22—Waswe, wei for barava showimaot kros hem moa serious winim wei for keepim kros for longfala taem and no showimaot datwan? Jesus talem warning hao wei for kros long wanfala brata and for keepim datfala kros, hem wanfala sin. Bat for showimaot kros long wei for talem samting wea spoelem man hem moa serious, wea datwan bae mekem man wea duim datwan mas ansa long kot wea moa hae and garem moa paoa winim lokol kot bilong justice.
5:48—Waswe, iumi savve “perfect, olsem hao Dadi bilong [iumi] long heven hem perfect”? Ia, bat no barava olsem Jehovah. Long hia Jesus story abaotem love, and hem talem olketa wea lisin long hem for followim example bilong God and for perfect, wea minim love bilong olketa mas no short long eni wei. (Matt. 5:43-47) Hao nao olsem? Long wei for lovem olketa enemy bilong olketa tu.
7:16—Olketa wanem “frut” nao mekem pipol luksavve religion bilong iumi nao tru wan? Hem no just olketa frut saed long fasin bilong iumi, bat hem olketa samting iumi bilivim tu, wea hem nao olketa teaching wea iumi followim.
10:34-38—Waswe, message long Bible nao samting wea divaedem olketa famili member? Nomoa nao. Olketa wea no worshipim Jehovah nao kosim datwan. Maet olketa chus for rejectim or againstim Christian Wei, wea datwan nao kosim wei for divaed insaed famili.—Luke 12:51-53.
11:2-6—John savve finis Jesus hem Messiah bikos hem stap witim Jesus taem God hem tok kam from heven and talem hao hem acceptim hem, so why nao hem ask sapos Jesus nao “Datwan wea bae kam”? Maet hem ask bikos hem laekem Jesus seleva nao for talem datwan. And tu, John laek for savve sapos wanfala ‘difren man bae kam’ wea bae rul insaed Kingdom and duim evri samting wea olketa Jew hope for hem. Ansa wea Jesus talem showimaot hao no eniwan moa bae kam bihaen long hem.
19:28—Wanem nao “twelvfala tribe bilong Israel” wea bae kasem judgment? Diswan no 12-fala tribe bilong spiritual Israel. (Gal. 6:16; Rev. 7:4-8) Olketa aposol wea Jesus talem datwan long olketa bae insaed datfala spiritual Israel, and olketa bae no judgem olketa member bilong hem. Jesus mekem ‘wanfala covenant witim olketa for rul insaed wanfala kingdom’ and olketa bae ‘wanfala kingdom and olketa priest long God.’ (Luke 22:28-30; Rev. 5:10) Olketa wea insaed spiritual Israel bae “judgem world.” (1 Cor. 6:2) So luk olsem olketa “twelv tribe bilong Israel,” wea kasem judgment from olketa wea sidaon long olketa throne long heven, hem olketa long world wea no part bilong datfala sekson bilong olketa king and priest, wea 12-fala tribe long Atonement Day nao hem piksarem datfala sekson.—Lev., chap. 16.
Olketa Leson for Iumi:
4:1-10. Samting wea happen hia showimaot Satan hem wanfala really angel, no just samting wea piksarem wicked fasin. Hem iusim “samting wea body laekem and samting wea eye laekem and wei for show-off witim samting wea man garem” for traem iumi. Nomata olsem, wei for followim olketa Bible principle bae helpem iumi for gohed faithful long God.—1 John 2:16.
5:1–7:29. Tingim evritaem spiritual need bilong iu. Keepim peace witim olketa narawan. Rejectim dirty tingting. Duim samting wea iu promis for duim. Taem iu prea, hem gud sapos main samting iu storyim hem olketa samting wea join witim plan bilong God, no olketa material need bilong iu. Garem living wea mekem God ting long iu olsem iu rich. Aftarem Kingdom and raeteous fasin bilong God firstaem. No judgem narawan. Duim will bilong God. Tru nao, datfala Sermon long Maunten garem staka gudfala advaes for iumi!
9:37, 38. Iumi askem Masta for “sendem go aot olketa wakman long harvest,” so for followim datfala prea, iumi tu shud busy insaed disfala waka for mekem pipol kamap disaepol.—Matt. 28:19, 20.
10:32, 33. No enitaem iumi shud fraet for storyim faith bilong iumi long narawan.
13:51, 52. Wei for minim olketa samting abaotem Kingdom mekem iumi garem responsibility for teachim olketa narawan and helpem olketa for minim olketa barava important truth abaotem datwan.
14:12, 13, 23. For mekem iumi savve ting raonem olketa spiritual samting, hem barava important for markem olketa kwaet taem for iumi savve duim datwan.—Mark 6:46; Luke 6:12.
17:20. For mekem iumi deal witim olketa problem and hard samting wea olsem olketa maunten and wea savve stopem iumi for muv ahed gud long spiritual wei, iumi needim faith. Iumi shud no ting nating long need for evritaem strongim go moa faith long Jehovah and olketa promis bilong hem.—Mark 11:23; Luke 17:6.
18:1-4; 20:20-28. Wei for no perfect and lotu bilong olketa disaepol bifor wea mekhae long wei for garem hae position, hem mekem olketa tingim tumas wei for garem bignem. Iumi shud waka hard for hambol and rejectim eni tingting for laekem narawan tinghae long iumi. Iumi shud garem stretfala tingting abaotem eni privilege and responsibility wea iumi garem long kongregeson.
“OLKETA BAE GIVIM GO SON BILONG MAN”
Jesus kam long Jerusalem “antap long wanfala donkey“ long Nisan 9, 33 C.E. (Matt. 21:5) Long next day, hem go long temple and klinim datwan. Long Nisan 11, hem teach long temple, judgem olketa scribe and Pharisee, and then bihaen, hem givim datfala ‘saen long olketa disaepol for showimaot hem stap moa and wea showimaot olketa samting wea happen long world bae finis.’ (Matt. 24:3) Long nextfala day hem sei long olketa: “Iufala savve hao bihaen tufala day, passover bae kamap, and olketa bae givim go Son bilong man for olketa nilam hem long post.”—Matt. 26:1, 2.
Bihaen Jesus startim Memorial bilong dae bilong hem long Nisan 14, Judas agree for leadim olketa bigman bilong Jew go long Jesus, olketa arrestim hem, kotem hem, and nilam hem long wanfala post. Long mek-thri day bihaen datwan, God resurrectim hem. Bifor hem go ap long heven, hem talem disfala komand long olketa follower bilong hem: “So iufala go and mekem pipol long evri nation for kamap disaepol bilong mi.”—Matt. 28:19.
Ansa for Olketa Bible Kwestin:
22:3, 4, 9—Long wanem taem nao thrifala invitation go aot for pipol kam long datfala marit feast? Datfala first invitation for hipimap datfala bride sekson hem long taem wea Jesus and olketa follower bilong hem start for preach long 29 C.E., and datwan gohed go kasem 33 C.E. Mek-tu invitation hem start long taem wea Jesus pourimaot holy spirit long Pentecost 33 C.E. and hem gohed go kasem 36 C.E. Tufala invitation hia hem for olketa Jew, and for olketa from difren nation wea followim worship bilong olketa Jew wea Bible kolem olketa proselyte, and olketa Samaritan. Bat mek-thri invitation hem for pipol long olketa road wea aotsaed long taon, wea minim olketa Gentile wea no circumcise. Datwan hem start long 36 C.E. taem datfala bigman long Roman army, Cornelius, hem baptaes, and hem gohed kam kasem distaem.
23:15—Why nao wanfala proselyte bilong olketa Pharisee, wea minim man from difren nation wea start for followim teaching bilong olketa Pharisee, “hem barava moa fit for go long Gehenna” winim olketa Pharisee? Maet samfala wea kamap proselyte bilong olketa Pharisee olketa barava rabis pipol bifor. Bat taem olketa kamap wanfala Pharisee, wea olketa nao wanfala grup wea barava ova tumas long samting olketa duim, olketa kamap worse winim bifor, and maet worse winim olketa teacher bilong olketa wea kasem judgment finis. Dastawe, taem iumi markem olketa witim olketa Jew Pharisee, olketa barava moa fit for go long Gehenna winim olketa Jew Pharisee hia.
27:3-5—Judas hem feel sorre abaotem wanem samting? No eni samting showimaot hao sorre wea Judas feelim hem fasin for repent. Hem no askem God for forgivim hem bat hem talemaot sin bilong hem long olketa chief priest and older man. Hem fitim for Judas barava feel sorre and wari, bikos hem “duim wanfala sin wea panis for datwan hem for dae.” (1 John 5:16) Hem feel sorre, no from hem repent, bat bikos hem no garem eni hope nao.
Olketa Leson for Iumi:
21:28-31. Samting wea hem barava important long Jehovah nao hem for iumi duim will bilong hem. Olsem example, iumi shud busy for share insaed waka for preachim Kingdom and mekem pipol kamap disaepol.—Matt. 24:14; 28:19, 20.
22:37-39. Tufala main komandment hia barava showimaot klia wanem God laekem olketa wea worshipim hem for duim!
[Piksa long page 31]
Waswe, iu busy insaed waka bilong harvest?
[Credit Line]
© 2003 BiblePlaces.com
[Piksa long page 31]
Matthew hem mekhae long theme bilong Bible, wea hem nao Kingdom