Waswe, Evri Religion Worshipim Sem God?
“Mi garem religion finis, and mi bae no change. And nomata wanem religion iu joinim hem olraet nomoa, bikos evri religion worshipim sem God.”
WASWE, enitaem iu herem eniwan tok olsem? Staka pipol tingse eni religion nomoa savve helpem olketa for savve long God and for kasem laef. Nara samting wea staka pipol bilivim nao, hem hao evri religion garem gud and nogud saed, and no eni religion savve sei olketa nomoa tru wan wea worshipim God.
Staka pipol distaem garem datkaen tingting. And olketa sei pipol wea no garem datkaen tingting, olketa nao garem tingting wea no stret. Wanem nao tingting bilong iu? Waswe, iu tingse evri religion worshipim sem God? Waswe, hem olraet for joinim eni religion nomoa?
Waswe, Eni Samting Difren?
Wanfala buk talem hao samting olsem 9,900 religion nao stap evriwea long world and samfala stap long staka ples and staka million pipol nao joinim. Samfala talem hao long evri 100 pipol, 70 nao joinim wanfala long faevfala main religion, and olketa hia nao Buddhist, Christian, Hindu, Muslim, and Jew. Sapos evri religion worshipim sem God, then teaching bilong faevfala religion hia, hao olketa storyim God, and teaching bilong olketa abaotem plan bilong God shud klosap semsem. Waswe, eni pruv showimaot datwan?
Wanfala savveman bilong Roman Catholic Hans Küng, talem hao olketa main religion garem samfala teaching wea semsem abaotem hao olketa man shud ting long narawan. Klosap evriwan tambuim wei for killkill, laea, steal, durong witim narawan long famili, and olketa teachim wei for showimaot respect long olketa dadi and mami and for lovem olketa pikinini. Bat hao olketa main religion story abaotem God and staka nara samting hem barava difren.
Tingim hao olketa Hindu worshipim staka difren god, bat olketa Buddhist no savve sapos wanfala God hem stap. Olketa Muslim sei wanfala God nomoa stap. And olketa church wea sei olketa Christian sei God hem wanfala nomoa, bat klosap evriwan long olketa sei God hem wanfala Trinity. Nomata long olketa church hia, olketa tu garem olketa didifren biliv. Catholic church biliv hao hem stret for worshipim Mary, mami bilong Jesus, bat olketa nara church no biliv olsem. Catholic church stopem famili planning, bat staka long olketa nara church no duim olsem. And olketa nara church no savve agree sapos wei wea man durong witim man or woman witim woman hem olraet nomoa.
Waswe, hem stret for tingse olketa religion wea garem olketa didifren biliv olsem worshipim sem God? Nomoa. Olketa didifren biliv hia mekem pipol konfius abaotem hu nao God, and wanem hem laekem from olketa wea worshipim hem.
Waswe, Olketa Religion Waka Tugeta or Nomoa?
Sapos evri religion worshipim sem God, luk olsem evriwan hia bae trae hard for mekem evriwan stap gud tugeta. Bat waswe, hem nao wanem olketa duim? Nomoa, olketa samting wea happen bifor showimaot hao olketa religion mekem pipol for faet and no stap gud tugeta. Tingim olketa story hia.
Start long mek-11 century go kasem mek-13 century, olketa kantri wea sei olketa Christian go faetem olketa Muslim. Long mek-17 century long Europe, olketa Catholic faetem olketa nara church long datfala Thirti Year War. Bihaen India kasem independence from Great Britain long 1947, olketa Hindu and Muslim start nao for faet. No longtaem go nomoa olketa Catholic and olketa nara church long Northern Ireland faet for staka year. Kam kasem distaem, olketa Jew and Muslim long Middle East no stap gud tugeta. Bat World War II nao hem barava nogud winim evri faet hia. Pipol from faevfala main religion joinim datfala faet and olketa faetem tu pipol long religion bilong olketa seleva.
Tru nao, olketa religion long world nating mekem pipol stap gud tugeta, and olketa no mekem pipol for worshipim sem God tu. Bat olketa mekem pipol for teksaed and konfius abaotem hu nao God and hao nao for worshipim hem. Dastawe, man wea laek for worshipim trufala God mas tingting gud firstaem. Hem nao wanem oldfala buk Bible talem iumi for duim.
Chus Seleva Hu Nao Iu Bae Worshipim
Bible talem stret hao for worshipim trufala God long stretfala wei, dastawe iumi shud tingting gud and chusim wanfala wei. Joshua wea worshipim Jehovah, talem olsem long olketa long Israel bifor: “Chusim tuday hu nao iufala bae worshipim, iufala bae worshipim olketa god wea olketa laen dadi bilong iufala wea stap narasaed long River olketa worshipim, or olketa god bilong olketa Amorite wea iufala stap long land bilong olketa. Bat mi and famili bilong mi, mifala bae worshipim Jehovah.” Samfala year bihaen, profet Elijah talem pipol for olketa tu mas chus. Hem sei: “Hao long nao bae iufala followim tufala difren tingting? Sapos Jehovah nao hem trufala God, go followim hem, bat sapos hem Baal [wanfala god long Canaan], iufala go followim hem.”—Joshua 24:15, 16; 1 Kings 18:21.
Olketa scripture hia and samfala nara scripture showimaot hao olketa wea laek for worshipim trufala God mas chusim gud wanfala wei. Hem semsem tu distaem. Sapos iumi laek for worshipim trufala God, iumi tu mas chusim stretfala wei for duim datwan. Bat wanem nao savve helpem iumi for chusim stretfala wei for worship? Hao nao bae iumi luksavve long olketa wea worshipim trufala God?
Trufala Wei Bilong Pipol wea Worshipim God
Jesus story olsem abaotem olketa trufala wei bilong pipol wea worshipim God and olketa wea no garem olketa wei hia: “Pipol no harvestim olketa grape or fig from nila grass, iaman? Olsem tu, evri gudfala tree bae garem gudfala frut, bat evri nogud tree bae garem rabis frut. Gudfala tree no savve garem rabis frut and nogud tree no savve garem gudfala frut. . . . So long sem wei, iufala bae luksavve long olketa laea profet hia from samting wea olketa duim.” Tru nao, pipol bae luksavve long olketa trufala wei bilong pipol wea worshipim God from wanem olketa duim. Wanem nao olketa duim?—Matthew 7:16-20.
Firstfala samting, trufala worship mekem pipol for stap tugeta and showimaot love. Jesus story olsem long olketa disaepol bilong hem: “Mi givim wanfala niu law long iufala. Iufala mas lovem iufala evriwan. Mi lovem iufala, and iufala tu mas lovem iufala evriwan long sem wei. Sapos iufala lovem iufala evriwan, pipol bae savve iufala olketa disaepol bilong mi.” Olketa disaepol bilong Christ mas showimaot love long narawan, mekem pipol luksavve olketa nao showimaot trufala wei bilong pipol wea worshipim God.—John 13:34, 35.
Fitim datwan, olketa trufala Christian bae no go long war and faetem nara Christian. Waswe, olketa church followim datwan tu? Long World War II, Olketa Jehovah’s Witness nomoa wanfala religion wea no sapotim datfala war. Bishop bilong Protestant Church long Hannover, Germany bifor Dr. Hanns Lilje, talem olsem abaotem olketa Witness: “Olketa nomoa wanfala grup wea no joinim army taem Hitler rulim Germany.” Taem datfala war gohed, staka Witness long staka kantri kasem hard taem from olketa chus for no joinim or mekhae long datfala war.
Wanem moa nara wei bilong olketa trufala disaepol wea Jesus maet tingim? Jesus sei olsem taem hem talem Lord’s prea: “Dadi bilong mifala long heven, mifala laekem nem bilong iu for stap holy. Mifala laekem kingdom bilong iu for kam. Duim samting wea iu plan for duim long earth, long sem wei wea iu duim datwan long heven.” Jesus barava laekem nem bilong God, Jehovah, for stap holy. Hem talemaot hao hem laekem Kingdom bilong God for mekem wanem Jehovah laekem long earth for kamap tru. Wanem religion moa mekhae long disfala nem Jehovah, and talemaot hao Kingdom bilong God nomoa savve mekem pipol stap gud tugeta long earth? Olketa Jehovah’s Witness talemaot gud nius abaotem Kingdom long 236 kantri and ples, and givimaot olketa buk long winim 470 languis.—Matthew 6:9, 10.
And, Olketa Jehovah’s Witness followim wei bilong Jesus for no teksaed long politik and olketa raoa. Jesus sei olsem abaotem olketa disaepol bilong hem: “Olketa no olsem pipol long world, olsem mi tu no olsem pipol long world.” And olketa Witness bilivim hao “evri scripture hem kam from God and hem gud for teachim man, for givim kaonsel, for stretem evri samting, and for givim discipline followim wanem God talem hem stret, mekem man bilong God barava fit and redi for duim evri gudfala waka.”—John 17:14, 17; 2 Timothy 3:16, 17.
Trufala Religion Hem Difren
Olketa willing for givim laef for narawan, laekem nem bilong Jehovah for stap holy, talemaot Kingdom bilong God, no part long world, and bilivim Bible. Olketa wei hia bilong olketa trufala Christian hem difren from olketa nara religion. Wanfala woman wea story gud witim Olketa Jehovah’s Witness talem olsem: “Mi savve long staka religion, and klosap evriwan semsem nomoa. Iufala nomoa barava difren from olketa nara religion.”
Tru tumas, evri religion no worshipim sem God. Bat wanfala grup nomoa hem difren from olketa nara religion. Hem nao Olketa Jehovah’s Witness, wea distaem namba bilong olketa hem winim seven million long full world. From olketa followim and mekhae long wanem Bible talem, olketa duim samting wea no eni nara grup or organization fit for duim. Hem nao wei wea olketa mekem pipol from olketa difren kantri, languis, living, and tribe for stap gud tugeta and worshipim trufala God, Jehovah. Olketa bae hapi for helpem iu for lane abaotem trufala God, and for savve long wanem hem laekem iu for duim, and for stap gud and sef witim olketa wea worshipim God long stretfala wei. Waswe, iu interest long datwan?
[Piksa Page 28] Buddhist woman: © Yan Liao/Alamy; Hindu holy man: © imagebroker/Alamy;
[Piksa long page 29]: Man reading Koran: Mohamed Amin/Camerapix; Jewish man: Todd Bolen/Bible Places.com
GENIA SAVILOV/AFP/Getty Images
Orthodox priest hem blessim army long Ukraine long 2004
Olketa Jehovah’s Witness helpem pipol evriwea for lane abaotem God and Kingdom bilong hem