Lukaotem Olketa wea Fit
1 Maet hem no isi for followim olketa instruction wea Jesus talem saed long hao for duim preaching waka. Hem sei: “Nomata wanem taon or vilij iufala go long hem, lukaotem eniwan wea fit.” (Matt. 10:11) Hao nao iumi savve win for lukaotem olketa wea fit distaem, from plande taem pipol no stap long haos?
2 Lukluk Gud Long Territory: First samting for duim nao, hem for lukluk gud long territory bilong iu. Maet wanem taem nao pipol stap long haos? Wea nao olketa stap long day? Maet wanem day or taem long day nao olketa hapi for samwan visitim olketa? Gud samting savve kamaot from wei for duim ministry long taem wea fitim schedule and living bilong pipol long territory.—1 Cor. 9:23, 26.
3 Plande pablisa faendem hao pipol stap long haos long evening. Long taem hia samfala no busy tumas and olketa willing for lisin. Maet hem gud for duim telephone witnessing long olketa evening. Olketa nara wei for sharem gud nius witim pipol hem for preach long bisnis territory and olketa pablik ples.
4 Long month bilong spesol waka, wanfala kongregeson arrangem field service grup long olketa Saturday and Sunday for kamap 4 klok long aftanun and evening witnessing long olketa Wednesday and Friday. Olketa duim tu telephone witnessing and bisnis territory. Diswan mekem olketa pablisa barava laekem tumas for duim ministry so kongregeson hia disaed for gohed followim datfala arrangement.
5 Waka Hard for Go Bak: Sapos long territory bilong iu hem no isi for faendem pipol long haos taem iu duim olketa return visit, bifor iu lusim datfala haos, trae for arrangem witim datfala man wanfala taem for iu savve visitim hem moa, duim olsem tu long first kol. Then, mek sure iu go bak long datfala taem. (Matt. 5:37) Sapos hem fitim, maet iu askem telephone namba bilong hem. Diswan savve helpem iu for story moa witim datfala man.
6 Jehovah blessim wei wea iumi waka hard for lukaotem olketa wea fit, and mekem kamap moa big wei wea pipol interest.—Prov. 21:5.