‘Iu Showimaot Olketa Samting Hia Long Olketa Smol Pikinini’

Waswe, iu laek savve long tru samting abaotem God? Olsem example, hem wanem kaen God, wanem nao hem laekem and no laekem, and wanem nao plan bilong hem for iumi? Iumi savve lanem olketa tru samting abaotem Jehovah God long Bible. Bat no evriwan wea readim Bible bae barava minim olketa samting hia. Why nao olsem? Diswan hem bikos for minim olketa tru samting abaotem God hem spesol samting and samfala nomoa bae minim. Iumi bae storyim wanem Jesus talem abaotem diswan.—Readim Matthew 11:25.

Long disfala verse maet Jesus hem storyim samting wea just happen. Hem nao taem hem tok strong long pipol long thrifala taon long Galilee wea no laek for repent nomata olketa lukim olketa mirakol wea hem duim. (Matthew 11:20-24) So maet iu ting: ‘Why nao pipol lukim olketa mirakol wea Jesus duim and no bilivim olketa tru samting wea hem teachim?’ Diswan hem bikos olketa bighed.—Matthew 13:10-15.

Jesus savve iumi needim tufala samting for minim olketa tru samting abaotem God. Iumi needim God for helpem iumi and iumi need for hambol. Jesus sei: “Mi praisem iu Dadi, wea iu nao rulim heven and earth, bikos iu haedem olketa samting hia from olketa wea wise and skul gud and iu showimaot long olketa wea hambol olsem olketa smol pikinini.” Waswe, iu luksavve why hem spesol samting and samfala nomoa bae minim olketa tru samting wea stap long Bible? Jehovah wea hem “rulim heven and earth” savve disaedem hu nao hem helpem for minim olketa tru samting abaotem hem. Nomata olsem, God laekem evriwan for savve long tru samting. So why nao hem showimaot olketa samting hia long samfala nomoa?

Jehovah laekem olketa wea hambol bat no olketa wea praod. (James 4:6) Hem haedem olketa tru samting from “olketa wea wise and skul gud,” wea minim pipol wea praod and no laekem Jehovah for helpem olketa. (1 Corinth 1:19-21) Bat hem showimaot olketa samting hia long “olketa smol pikinini,” wea minim pipol wea hambol and wea laekem Jehovah for helpem olketa. (Matthew 18:1-4; 1 Corinth 1:26-28) Son bilong God, Jesus, hem lukim olketa wea olsem. Staka bigman bilong religion wea skul gud and wea praod nating minim message bilong Jesus, bat olketa man for fishing wea hambol nao minim datwan. (Matthew 4:18-22; 23:1-5; Acts 4:13) Nomata olsem, samfala wea rich and skul gud wea olketa hambol kamap disaepol bilong Jesus.—Luke 19:1, 2, 8; Acts 22:1-3.

Tingim moa kwestin wea iumi askem long first paragraf: Waswe, iu laek for savve long tru samting abaotem God? Sapos olsem, iu bae hapi for savve God no favorim olketa wea wise and skul gud. Bat hem laek helpem olketa wea praod luk daonem olketa. Sapos iu hambol and laek for studyim Bible, Jehovah savve helpem iu for minim olketa tru samting abaotem hem. And datwan hem spesol samting. Taem iu minim olketa tru samting abaotem God, datwan bae mekem iu for hapi distaem and bae iu kasem “laef olowe” long niu world wea God promisim wea evri samting bae raeteous.a—1 Timothy 6:12, 19; 2 Peter 3:13.