Talem “Naesfala Toktok” for Mekem Famili Hapi

DAVID weit gogo hem start kros nao. Hem weitim waef bilong hem aotsaed long haos and lukluk evritaem long hanwas bilong hem. Taem Diane, waef bilong hem kamaot from haos David hem barava kros narawe nao.

Hem tok strong long hem olsem: “Iu hao ia. Iu evritaem leit nomoa! Waswe, hem hard tumas for iu redi kwiktaem?”

Diane feel nogud tumas. Hem krae and ran go bak insaed long haos. David luksavve hem duim samting wea no stret. Toktok wea hem talem hem spoelem evri samting. Wanem nao bae hem duim? Hem brith big and wakabaot isisi go bak insaed long haos.

Luk olsem plande kasem problem olsem. Waswe, iu enitaem sorre from toktok wea iu talem? Taem iumi no tingting gud bifor iumi toktok, iumi savve talem toktok wea bihaen iumi sorre from iumi talem datwan. Dastawe Bible hem talem olsem: “Heart bilong man wea raeteous hem ting raonem hao for ansa.”​—Proverbs 15:28.

Bat taem iumi kros, feel nogud or fraet iumi hard for tingting gud bifor iumi toktok. Diswan hem barava tru taem iumi story witim olketa long famili. Maet iumi kwiktaem for sei narawan nao no stret or tok daonem hem. Datwan savve mekem man feel nogud or startim raoa.

Wanem gudfala samting nao iumi savve duim? Hao nao iumi savve bossim feeling bilong iumi? Iumi savve lanem samfala gud samting from Solomon wea raetem Bible.

Ting Raonem Firstaem Wanem for Talem and Hao for Talem

Solomon wea raetem Bible buk bilong Ecclesiastes showimaot hem tingting gud abaotem hao laef hem iusles nomoa. Hem sei: “Mi heitim laef.” Hem sei tu hao hem “barava iusles.” (Ecclesiastes 2:​17; 12:8, footnote) Disfala Bible buk no storyim nomoa olketa samting wea Solomon no hapi long hem. Long lastfala part bilong datfala buk, Solomon talem hao hem “trae for faendem olketa naesfala toktok and for raetem olketa stretfala toktok bilong truth.” (Ecclesiastes 12:10) Narafala Bible transleison talem hao hem “trae for minim olketa samting hia long wei wea gud and barava stret.”​—Contemporary English Version.

Solomon luksavve hao hem mas bossim feeling bilong hemseleva. Hem olsem hem askem hemseleva: ‘Waswe, samting wea mi laek for talem hem barava tru or stret? Sapos mi talem olketa toktok hia, bae olketa narawan laek for herem?’ From hem trae for talem “olketa naesfala toktok” wea tru, diswan helpem hem for no letem feeling bilong hem bossim tingting bilong hem.

From Solomon duim olsem, hem raetem wanfala nambawan buk wea garem staka savve bilong God abaotem laef. (2 Timothy 3:​16, 17) Waswe, wei wea Solomon story abaotem diswan savve helpem iumi for tok long kaenfala wei long olketa long famili? Tingim disfala story.

Lane for Bossim Feeling Bilong Iu

Tingim sapos wanfala boy finis skul and kam long haos witim skul report bilong hem bat hem luk sorre. Dadi bilong hem lukluk long skul report and lukim wanfala subject wea no garem gudfala grade. Dadi hia kwiktaem kros and hem tingim plande taem wea boy bilong hem no duim homwak. Dadi hia laek shout olsem: “Iu lesy tumas! Sapos iu gohed olsem iu bae wanfala iusles man stret!”

Bifor disfala dadi hem barava kros, hem gud for askem hemseleva, ‘Waswe, samting mi tingim hem tru or stret?’ Diswan bae helpem hem for garem stretfala tingting and no duim samting wea followim feeling bilong hem nomoa. (Proverbs 17:27) Waswe, boy bilong hem bae iusles for olowe from hem no garem gudfala grade long wanfala subject? Waswe, hem barava lesy, or hem no duim homwak bikos hem no minim datfala subject? Bible plande taem mekhae long wei for tingting gud raonem samting. (Titus 3:2; James 3:​17) Dadi or mami mas storyim “stretfala toktok bilong truth” for helpem pikinini for kamap gud.

Trae for Talem Olketa Gudfala Toktok

Taem dadi hia savve wanem for talem, maet hem askem hemseleva, ‘Hao nao mi savve talem naesfala toktok mekem boy bilong mi hapi for herem?’ Tru nao, hem no isi for evritaem talem naesfala toktok. Bat hem gud for olketa dadi and mami tingim hao olketa young wan savve kwiktaem feel iusles. Olketa savve tingting tumas long wanfala samting olketa duim wea no stret and start garem nogud tingting abaotem olketa seleva. Sapos dadi or mami kwiktaem for kros diswan savve mekem young wan for tingim hemseleva olsem iusles nomoa. Colossians 3:​21 hem talem olsem: “No mekem pikinini bilong iufala feel nogud, mekem heart bilong olketa no kamap hevi.”

Taem dadi or mami talem toktok olsem, “Iu wanfala iusles pikinini nomoa,” diswan bae mekem pikinini ting daonem hemseleva. Klosap evritaem hem no fitim for talem datkaen toktok. Sapos dadi or mami gohed for tok spoelem hem evritaem datwan bae mekem pikinini hia tingse hem iusles nomoa. Datwan bae mekem pikinini feel nogud and tu, hem no tru.

Plande taem hem gud tumas for mekhae long gud samting nomoa. Dadi wea iumi storyim finis maet talem samting olsem: “Boy bilong mi, mi lukim iu feel nogud bikos iu no garem gudfala grade long wanfala subject. Mi savve iu waka hard for duim olketa skul waka bilong iu. Hem gud for iumi storyim eni problem wea maet iu garem long disfala subject mekem iu kamap gud long hem.” For hem helpem boy bilong hem, dadi savve askem samfala kwestin for helpem hem luksavve sapos eni nara problem hem stap.

Wei for story gud olsem hem winim wei for kros tumas. Bible hem talem olsem: “Gudfala toktok . . . hem swit long soul and healim olketa bon.” (Proverbs 16:24) Olketa pikinini and olketa narawan long famili bae gohed gud taem peace and love hem stap long famili.

“Samting wea Heart Fulap Long Hem”

Tingim datfala story abaotem wanfala hasband. Hem bae gud tumas sapos hem talem “naesfala toktok” wea tru and no for kros and talem nogud toktok long waef bilong hem. Eni hasband wea kasem sem samting shud askem hemseleva olsem: ‘Nomata waef mas trae hard for no leit, waswe, hem tru hao hem evritaem leit? Waswe, hem fitim for mi storyim diswan distaem? Waswe, wei for tok kros and tok daonem hem bae helpem hem for no leit?’ Sapos iumi askem iumiseleva olketa kaen kwestin olsem diswan bae helpem iumi for no spoelem olketa wea iumi lovem.​—Proverbs 29:11.

Bat waswe sapos taem wea famili story tugeta hem evritaem kamap taem for raoa nomoa? Iumi need for tingim wanem nao mekem iumi for talem olketa toktok hia. Samting iumi talemaot taem iumi wari or taem iumi kasem hevi savve showimaot wanem kaen man nao iumi. Jesus talem olsem: “Samting wea heart fulap long hem, mouth hem talem.” (Matthew 12:​34) Toktok wea iumi talem hem showimaot samting iumi tingim, samting iumi laekem, and wei bilong iumi.

Waswe, iumi evritaem tingim gud saed bilong samting? Sapos hem olsem toktok bilong iumi and samting iumi storyim bae showimaot datwan. Waswe, hem wei bilong iumi for strict tumas, tingim nogud saed, or judgem narawan? Sapos hem olsem, maet iumi mekem olketa narawan feel nogud long samting wea iumi talem or long wei wea iumi talem samting. Maet iumi no luksavve hao tingting or samting iumi talem hem kamap nogud. Maet iumi tingse tingting bilong iumi abaotem samting nao hem stret. Bat iumi mas no laea long iumiseleva.​—Proverbs 14:12.

Hem gud nao iumi garem Word bilong God. Bible savve helpem iumi for luksavve long tingting bilong iumi sapos hem stret or nomoa. (Hebrews 4:​12; James 1:​25) Nomata wanem nao wei bilong famili bilong iumi, iumi evriwan savve changem tingting and fasin sapos iumi laek for duim datwan.​—Ephesians 4:​23, 24.

Iumi savve iusim Bible for lukluk long hao iumi story witim olketa narawan bat wanfala nara wei hem stap tu. Askem olketa narawan. Olsem example, for faendaot sapos iu gohed gud long diswan or nomoa askem hasband or waef or pikinini for talemaot tingting bilong olketa long diswan. Story witim wanfala mature fren wea savve gud long iu. Iumi need for hambol for acceptim wanem olketa talem and for changem eni samting iumi need for changem.

Tingting Gud Bifor Iu Toktok!

Sapos iumi no laek mekem olketa narawan feel nogud long toktok iumi talem, iumi mas duim samting wea Proverbs 16:23 hem talem: “Wisefala pipol bae tingting gud bifor olketa toktok, dastawe toktok bilong olketa savve muvim narawan.” (Today’s English Version) Maet hem no isi for evritaem bossim feeling bilong iumiseleva. Bat sapos iumi trae for minim olketa narawan and no tok daonem or spoelem olketa, diswan bae helpem iumi for evritaem talem naesfala toktok.

Hem tru, iumi evriwan savve duim samting wea no stret. (James 3:2) Samfala taem iumi no tingting gud bifor iumi toktok. (Proverbs 12:18) Bat Word bilong God savve helpem iumi for tingting gud bifor iumi toktok and for tingim olketa narawan firstaem. (Philippians 2:4) Iumi laek for talem “naesfala toktok” bilong truth taem iumi story. Diswan hem barava tru taem iumi story witim olketa long famili. Taem iumi duim datwan, toktok bilong iumi bae helpem and no spoelem olketa wea iumi lovem.​—Romans 14:19.

[Piksa long page 12]

Wanem nao iu savve duim mekem iu no sorre from toktok wea iu talem?