‘Olketa wea Raeteous Bae Shaen Braet Olsem Sun’

“Long datfala taem nao olketa wea raeteous bae shaen braet tumas olsem sun insaed kingdom bilong Dadi bilong olketa.”​—⁠MATT. 13:⁠43.

1. Jesus storyim olketa tokpiksa for minim olketa wanem samting abaotem Kingdom?

JESUS CHRIST storyim staka tokpiksa for helpem pipol minim olketa difren samting abaotem Kingdom. Hem “iusim olketa tokpiksa for storyim olketa samting long pipol. Sapos hem talem eni samting, hem mas iusim tokpiksa nao for talem datwan.” (Matt. 13:34) Taem Jesus storyim tokpiksa abaotem man wea plantim olketa seed, wea seed hia nao hem message abaotem Kingdom, hem mekhae long wei wea man wea garem gudfala heart acceptim datfala message. Hem mekhae tu long wanem Jehovah duim for helpem man kamap disaepol. (Mark 4:​3-9, 26-​29) Jesus iusim nara tokpiksa tu for showim hao staka pipol bae acceptim message abaotem Kingdom nomata maet long firstaem man no luksavve hao bae hem olsem. (Matt. 13:​31-​33) Long nara tokpiksa moa, Jesus mekhae long wei wea no evriwan wea laekem message abaotem Kingdom bae laef olowe taem datfala Kingdom rulim olketa man.​—⁠Matt. 13:​47-​50.a

2. Long tokpiksa abaotem wheat and rabis grass, gudfala seed hem piksarem wanem?

² Bat wanfala tokpiksa wea Jesus storyim hem mekhae long waka for hipimap sekson wea bae rul witim Jesus long Kingdom bilong hem. Hem nao tokpiksa abaotem wheat and rabis grass wea Matthew chapter 13 storyim. Long nara tokpiksa, Jesus sei seed wea man plantim hem “message abaotem kingdom.” Bat long disfala tokpiksa abaotem wheat and rabis grass, gudfala seed hem piksarem nara samting. Hem piksarem “olketa son bilong kingdom.” (Matt. 13:​19, 38) Olketa hia bae no stap long earth taem Kingdom rulim olketa man, bat olketa nao “olketa son” wea bae rul long datfala Kingdom.​—⁠Rom. 8:​14-​17; readim Galatians 4:​6, 7.

Tokpiksa Abaotem Wheat and Rabis Grass

3. Storyim problem wea kasem datfala man long tokpiksa and wanem hem disaedem for stretem datwan.

³ Tokpiksa hem olsem: “Kingdom bilong God hem olsem wanfala man wea plantim olketa gudfala seed long planteison bilong hem. Taem evriwan sleep, enemy hem kam and plantim rabis grass midolwan olketa wheat hia, and then hem go. Long semtaem wea datfala wheat hem grow and garem frut, olketa rabis grass grow tu. So olketa wakaman bilong datfala man kam long hem and sei: ‘Boss, iu plantim olketa gudfala seed, iaman? Hao nao hem garem olketa rabis grass insaed?’ Hem sei long olketa, ‘Wanfala enemy nao plantim datwan.’ Olketa sei long hem, ‘Hao, iu laekem mifala for go aotem olketa rabis grass hia?’ Hem sei: ‘Nomoa, nogud iufala aotem olketa wheat taem iufala aotem datfala rabis grass. Letem tufala evriwan grow tugeta go kasem taem for harvestim planteison. Long datfala taem nao, mi bae talem olketa wakaman for go aotem olketa rabis grass firstaem, and for taemapem and bonem olketa. Then mi bae talem olketa for harvestim datfala wheat and putim long haos bilong mi for keepim datwan.’ ”​—⁠Matt. 13:​24-​30.

4. (a) Hu nao man long datfala tokpiksa? (b) Long wanem taem nao Jesus start for plantim olketa gudfala seed, and long wanem wei nao hem duim datwan?

⁴ Hu nao man wea plantim olketa gudfala seed long planteison bilong hem? Bihaen nao Jesus givim ansa taem hem talem mining bilong datfala tokpiksa long olketa disaepol bilong hem. Hem sei: “Man wea plantim olketa gudfala seed hem Son bilong man.” (Matt. 13:37) Jesus nao hem “Son bilong man.” Hem redyim graon for plantim olketa seed taem hem duim ministry long earth for thri and haf year. (Matt. 8:​20; 25:31; 26:64) Then long Pentecost 33 C.E., Jesus start for plantim olketa gudfala seed, wea hem nao “olketa son bilong kingdom.” Diswan hem start taem Jehovah markem Jesus for givim holy spirit long olketa disaepol, wea datwan mekem olketa kamap olketa anointed son bilong God.b (Acts 2:​33) Olketa gudfala seed hia, wea hem wheat, hem grow and garem frut. So Jesus hem plantim olketa gudfala seed hia mekem hem savve hipimap evriwan long sekson wea bae rul witim hem long Kingdom bilong hem.

5. Hu nao enemy long datfala tokpiksa, and hu nao rabis grass piksarem?

⁵ Hu nao disfala enemy, and hu nao rabis grass piksarem? Jesus sei enemy hia hem “Devil.” Rabis grass hem “olketa son bilong Devil.” (Matt. 13:​25, 38, 39) Luk olsem really rabis grass hia wea Jesus storyim hem bearded darnel. Disfala poison grass hem luk olsem wheat wea no garem frut yet. Disfala grass barava piksarem olketa laea Christian wea sei olketa son bilong Kingdom bat nating garem gudfala frut! Olketa laea Christian hia wea sei olketa followim Christ olketa “pikinini” bilong Satan.​—⁠Gen. 3:​15.

6. Long wanem taem nao Satan plantim rabis grass? Long wanem wei nao pipol “sleep” long datfala taem?

⁶ Long wanem taem nao Satan plantim rabis grass hia? Jesus sei Satan hem plantim “taem evriwan sleep.” (Matt. 13:25) Long wanem taem nao diswan? Iumi bae savve long ansa taem iumi readim wanem aposol Paul talem long olketa elder long Ephesus. Hem sei: “Bihaen mi lusim iufala, mi savve samfala man wea olsem wild dog bae kam and joinim iufala and olketa bae no kaen long olketa sheepsheep. And samfala long iufala tu bae talem olketa samting wea no stret for mekem olketa disaepol followim olketa.” (Acts 20:​29, 30) Hem talem olketa elder hia tu for gohed wekap long spiritual wei. Taem olketa aposol laef, olketa “stopem” olketa laea teaching for no kam insaed long kongregeson. Bat taem staka aposol sleep, wea minim taem olketa dae, staka Christian start for sleep long spiritual wei. (Readim 2 Thessalonians 2:​3, 6-8.) Long datfala taem nao staka false teaching start for kam insaed long Christian kongregeson.

7. Waswe, samfala wheat kamap rabis grass? Minim kam.

⁷ Jesus no sei wheat bae kamap rabis grass bat hem sei enemy nao plantim rabis grass midolwan olketa wheat. So disfala tokpiksa no mekhae long wei wea samfala tru Christian lusim truth. Bat hem showimaot Satan waka hard for spoelem Christian kongregeson taem hem mekem samfala rabis pipol kam insaed. Taem lastfala aposol John hem olo, staka man teachim olketa false teaching.​—⁠2 Pet. 2:​1-3; 1 John 2:​18.

“Letem Tufala Evriwan Grow Tugeta Go Kasem Taem for Harvestim Planteison”

8, 9. (a) Why nao olketa disaepol bilong Jesus luksavve samting wea Boss talem long olketa wakaman hem stret? (b) Long wanem wei nao wheat and rabis grass grow tugeta?

⁸ Olketa wakaman bilong Boss story long hem abaotem disfala problem and olketa sei: “Hao, iu laekem mifala for go aotem olketa rabis grass hia?” (Matt. 13:​27, 28) Maet iumi sapraes long wanem Boss hem talem. Hem sei long olketa for letem wheat and rabis grass grow tugeta go kasem taem for harvestim planteison. Olketa disaepol bilong Jesus luksavve samting wea Boss talem hem stret. Olketa savve hem bae hard for man luksavve wanem nao wheat and wanem nao rabis grass wea olketa kolem bearded darnel. Olketa wea savve long agriculture luksavve tu rut bilong disfala bearded darnel savve grow insaed long rut bilong wheat and sapos olketa aotem rabis grass bifor taem for harvestim wheat, maet olketa aotem wheat tu.c Dastawe Boss talem olketa wakaman for weit firstaem!

⁹ Long sem wei tu, insaed staka handred year, olketa religion wea sei olketa Christian plantim staka rabis grass. Olketa rabis grass hia kamap firstaem long olketa Roman Catholic and Orthodox church and bihaen long staka Protestant grup. Long taem hia tu, Jesus plantim samfala gudfala seed long olketa difren ples long world. Boss long disfala tokpiksa hem patient for weitim wheat and rabis grass hia grow tugeta nomata datwan hem longtaem lelebet. Hem weit go kasem taem for harvestim planteison wea bae no longtaem tumas.

Taem for Harvestim Planteison Hem Start

10, 11. (a) Wanem taem nao waka for harvestim planteison hem start? (b) Long wanem wei nao olketa angel harvestim tokpiksa wheat and putim long haos bilong Jehovah for keepim datwan?

¹⁰ Jesus sei: “Taem wea olketa harvestim planteison hem piksarem taem wea world hem gogo for finis, and olketa wakaman hem olketa angel.” (Matt. 13:39) Long olketa last day, waka for hipimap olketa son bilong Kingdom and separatem olketa from datfala rabis grass hem gohed. Aposol Peter story olsem abaotem datwan: “Taem for judgem haos bilong God hem start nao. Firstfala pipol for judgem nao hem pipol wea obeyim God. Sapos iumi nao bae kasem judgment firstaem, wanem nao bae kasem pipol wea no obeyim gud nius bilong God?”​—⁠1 Pet. 4:​17.

¹¹ No longtaem bihaen olketa last day hem start, wea hem nao “taem wea world hem gogo for finis,” hem taem nao for judgem pipol wea sei olketa trufala Christian for luksavve sapos olketa nao “olketa son bilong kingdom” or “olketa son bilong Devil.” Taem waka for harvestim planteison hem start, Bigfala Babylon hem foldaon “firstaem” and “then” waka for harvestim tokpiksa wheat hem start. (Matt. 13:30) Bat long wanem wei nao olketa angel harvestim tokpiksa wheat distaem and putim long haos bilong Jehovah for keepim datwan? Olketa son bilong Kingdom hia wea dae finis olketa go long heven and olketa son bilong Kingdom wea stap yet long earth kam insaed long Christian kongregeson wea organize. Taem olketa stap long disfala kongregeson, olketa worshipim God long wei wea hem laekem and God blessim and protectim olketa.

12. Taem for judgem olketa anointed Christian wanwan hem gohed for hao long?

¹² Nomata olketa anointed Christian kam insaed long Christian kongregeson wea organize, wei for judgem olketa wanwan hem gohed distaem. Bat diswan bae gohed for hao long? Jesus sei judgment hia bae followim “taem” bilong harvest. (Rev. 14:​15, 16) Hem bae gohed long taem wea world hem gogo for finis go kasem taem God markem finis evri anointed Christian long forhed bilong olketa.​—⁠Rev. 7:​1-4.

13. Long wanem wei nao olketa wea piksarem rabis grass mekem olketa narawan for sin? Wanem nogud samting nao olketa duim?

¹³ Hu nao bae olketa angel aotem from Kingdom? Long wanem wei nao olketa hia wea olketa angel aotem mekem narawan for sin and wanem nogud samting nao olketa duim? (Matt. 13:41) Olketa bigman bilong olketa religion wea sei olketa Christian wea piksarem rabis grass, olketa laea long plande million pipol for staka handred year. Olketa teachim olketa samting wea nating mekhae long God, wea “mekem olketa narawan for sin.” Olketa teachim pipol hao olketa nogud man bae bone olowe long hellfire and teachim Trinity wea mekem pipol konfius. Staka bigman bilong religion showimaot nogud example long olketa sheepsheep bikos olketa fren witim world and samfala duim olketa rabis samting saed long sex. (Jas. 4:⁠4) Nara samting tu, olketa religion wea sei olketa Christian letem nomoa for pipol long church bilong olketa for durong. (Readim Jude 4.) Nomata olketa bigman duim olketa nogud samting hia, olketa act olsem olketa holy and worshipim God. Olketa son bilong Kingdom mas hapi tumas from olketa angel separatem olketa from olketa rabis grass hia and olketa no followim olketa laea teaching wea mekem pipol for sin!

14. Wanem nao mekem olketa bigman feel sorre tumas and krae?

¹⁴ Wanem nao mekem olketa bigman wea piksarem rabis grass feel sorre tumas and krae? (Matt. 13:42) “Olketa son bilong Devil” feel nogud tumas bikos “olketa son bilong kingdom” mekem pipol luksavve wanem olketa duim and teachim hem olsem poison. Olketa sorre tumas tu bikos staka pipol long church bilong olketa no sapotim olketa nao and olketa bigman hia no savve kontrolem olketa.​—⁠Readim Isaiah 65:​13, 14.

15. Taem olketa angel bonem olketa rabis grass long fire, wanem nao datwan piksarem?

¹⁵ Taem olketa angel aotem olketa rabis grass and bonem long fire, wanem nao datwan piksarem? (Matt. 13:40) Hem piksarem samting wea bae kasem olketa rabis grass. Taem olketa angel torowem olketa long bigfala fire, long tokpiksa wei datwan minim olketa bae finis for olowe. (Rev. 20:14; 21:⁠8) Olketa laea Christian hia wea piksarem rabis grass bae finis long taem bilong “bigfala trabol.”​—⁠Matt. 24:⁠21.

Olketa “Bae Shaen Braet Tumas Olsem Sun”

16, 17. Wanem nao Malachi talem abaotem spiritual temple bilong God, and wanem taem nao profesi hia start for kamap tru?

¹⁶ Long wanem taem nao olketa wea piksarem wheat “shaen braet tumas olsem sun”? (Matt. 13:43) Malachi profesi abaotem taem wea God bae klinim temple bilong hem. Hem sei: “Jehovah wea hem leader bilong olketa angel hem sei: ‘Seknomoa trufala Lord wea iufala lukaotem, hem bae kam long temple bilong Hem witim man for talem message abaotem agreement wea iufala weitim. Ia, trufala Lord bae kam!’ ‘Bat hu nao bae redi long datfala day wea hem kam? And hu nao bae fit for standap taem hem kam? Trufala Lord bae olsem fire wea aotem rabis from silver and gold and olsem soap wea aotem dirty long kaleko. Hem mas sidaon olsem man for bonem silver and gold for aotem rabis bilong hem and hem mas klinim olketa son bilong Levi. Hem mas klinim olketa olsem fire hem klinim gold and silver. And olketa bae kamap pipol bilong Jehovah wea duim olketa stret samting taem olketa givim olketa samting long hem.’ ”​—⁠Mal. 3:​1-3.

¹⁷ Datfala profesi start for kamap tru long 1918 taem Jehovah witim Jesus Christ, wea hem nao “man for talem message abaotem agreement,” kam for klinim spiritual temple. Taem tufala klinim finis temple, Malachi talem wanem nao hem happen. Hem sei: “Iufala bae luksavve man wea raeteous hem difren from man wea no raeteous. And iufala bae luksavve man wea worshipim God hem difren from man wea no worshipim hem.” (Mal. 3:​18) Bigfala waka wea olketa tru Christian duim bihaen datwan showimaot taem for harvestim planteison hem start long datfala taem.

18. Wanem nao Daniel talem bae happen long taem bilong iumi?

¹⁸ Profet Daniel story abaotem taem bilong iumi taem hem sei: “Olketa wea garem wei for luksavve bae shaen braet tumas olsem olketa laet long skae. And olketa wea teachim nara pipol for followim stretfala wei bae shaen braet tumas olsem olketa star long skae for olowe.” (Dan. 12:⁠3) Hu nao olketa hia wea shaen braet tumas? Hem olketa anointed Christian, wea olketa nao piksarem wheat wea Jesus storyim long tokpiksa abaotem wheat and rabis grass! Olketa long big crowd barava luksavve ‘olketa angel aotem’ olketa rabis grass wea piksarem olketa laea Christian and separatem olketa from olketa wheat. Taem disfala big crowd join witim olketa long spiritual Israel wea stap yet long earth, olketa hia tu savve shaen braet tumas long disfala world wea dark fogud.​—⁠Zech. 8:​23; Matt. 5:​14-​16; Phil. 2:​15.

19, 20. “Olketa son bilong kingdom” luk forward long wanem samting, and wanem nao bae iumi storyim long study bihaen diswan?

¹⁹ Distaem “olketa son bilong kingdom” luk forward for kasem nambawan reward bilong olketa for go long heven. (Rom. 8:​18, 19; 1 Cor. 15:53; Phil. 1:​21-​24) Bat go kasem datfala taem, olketa mas gohed for faithful. Olketa mas gohed shaen braet tumas, wea minim olketa mas difren from “olketa son bilong Devil.” (Matt. 13:38; Rev. 2:​10) Iumi evriwan hapi tumas bikos iumi lukim “olketa son bilong kingdom” shaen braet tumas olsem sun and olketa barava difren from “olketa son bilong Devil”!

²⁰ Bat long wanem wei nao olketa son bilong Kingdom and big crowd wea garem hope for laef olowe long earth taem Kingdom rulim olketa, olketa wanfala sekson nomoa? Study bihaen diswan bae ansarem datfala kwestin.

[Olketa Footnote]

Waswe, Iu Tingim Yet?

Long tokpiksa abaotem wheat and rabis grass, wanem nao olketa samting hia piksarem?

• Gudfala seed

• Man wea plantim seed

• Waka for plantim seed

• Enemy

• Rabis grass

• Taem for harvestim planteison

• Haos bilong Jehovah for keepim gudfala seed

• Wei for feel sorre tumas and krae

• Bigfala fire

[Olketa Piksa long page 20]

Jesus start for plantim gudfala seed long Pentecost 33 C.E.

[Piksa long page 23]

Olketa angel harvestim tokpiksa wheat and putim long haos bilong Jehovah for keepim datwan

[Credit Line]

Pictorial Archive (Near Eastern History) Est.