“Bae Mi Stap Witim Iufala”

1. (a) Storyim tokpiksa abaotem olketa wheat and rabis grass. (b) Wanem nao Jesus sei datfala tokpiksa hem minim?

WANFALA tokpiksa bilong Jesus abaotem Kingdom hem storyim farmer wea plantim olketa gudfala seed bilong wheat, and enemy wea plantim rabis grass midolwan olketa wheat hia. Olketa rabis grass grow witim olketa wheat, bat farmer talem olketa wakaman bilong hem for “letem tufala evriwan grow tugeta go kasem taem for harvestim planteison.” Long taem bilong harvest olketa wakaman bonem olketa rabis grass, and harvestim datfala wheat. Jesus nao storyim mining bilong datfala tokpiksa. (Readim Matthew 13:24-30, 37-43.) Wanem nao datfala tokpiksa minim? (Lukim chart “Olketa Wheat and Rabis Grass.”)

2. (a) Wanem nao disfala tokpiksa bilong Jesus hem showimaot? (b) Wanem nao bae iumi storyim long disfala study?

² Disfala tokpiksa hem showimaot wanem Jesus bae duim for hipimap olketa anointed Christian wea bae rul witim hem long Kingdom, and long wanem taem hem bae duim datwan. Datfala wheat piksarem olketa anointed Christian olsem wanfala grup. Jesus start for plantim seed long Pentecost 33 C.E. Waka for harvestim wheat bae finis taem olketa anointed Christian wea laef yet long earth taem disfala world hem finis olketa kasem mark and then olketa go long heven. (Matt. 24:31; Rev. 7:1-4) Long sem wei wea man wea standap antap long wanfala maunten savve luk daon long evri farawe ples, disfala tokpiksa mekem iumi fit for luksavve long olketa samting wea happen insaed long samting olsem 2,000 year. Disfala tokpiksa bilong Jesus story abaotem taem man plantim seed, taem seed hia hem grow, and taem for harvest. Long disfala study bae iumi story abaotem taem for harvest.a

JESUS STAP WITIM OLKETA

3. (a) Wanem nao happen long start bilong mek-tu century? (b) Hu nao askem kwestin long Matthew 13:28, and wanem nao datfala kwestin? (Lukim endnote tu.)

³ Long start bilong mek-tu century C.E., “olketa rabis grass grow” taem olketa laea Christian start for kamap. (Matt. 13:26) Kasem mek-foa century, olketa laea Christian kamap staka winim olketa anointed Christian. Long disfala tokpiksa, olketa wakaman askem Boss sapos olketa savve aotem olketa rabis grass hia.b (Matt. 13:28) Wanem nao Boss, wea piksarem Jesus, hem talem?

4. (a) Samting wea Jesus talem abaotem olketa wheat and rabis grass hem showimaot wanem? (b) Wanem taem nao hem moa isi for luksavve hu nao olketa anointed Christian?

⁴ Jesus sei olsem abaotem olketa wheat and rabis grass: “Letem tufala evriwan grow tugeta go kasem taem for harvestim planteison.” Diswan showimaot samfala anointed Christian wea wheat piksarem olketa stap long earth start long first century kam kasem distaem. Jesus sei tu long olketa disaepol: “Bae mi stap witim iufala go kasem taem wea world hem finis.” (Matt. 28:20) So Jesus bae protectim olketa anointed Christian go kasem taem wea world hem finis. Nomata olsem, from olketa laea Christian kamap staka bihaen first century, for longfala taem iumi no barava savve hu nao olketa anointed Christian. Bat samting olsem 40 year bifor harvest hem start, hem moa isi for luksavve hu nao olketa anointed Christian. Hao nao olsem?

WANFALA MAN ‘REDYIM EVRI SAMTING’

5. Long wanem wei nao profesi bilong Malachi hem kamap tru long first century?

⁵ Winim foa handred year bifor Jesus storyim tokpiksa abaotem wheat and rabis grass, Jehovah iusim Malachi for talem profesi abaotem samfala samting wea bae happen wea tokpiksa bilong Jesus storyim tu. (Readim Malachi 3:1-4.) John Baptaesa nao ‘man for talem message wea redyim evri samting.’ (Matt. 11:10, 11) Taem John Baptaesa kam long 29 C.E., nation bilong Israel klosap for kasem judgment. Jesus nao mek-tu man for talem message wea profesi bilong Malachi storyim. Tufala taem nao Jesus klinim temple long Jerusalem. Wantaem hem long start long ministry bilong hem, and mek-tu taem hem long end long ministry bilong hem. (Matt. 21:12, 13; John 2:14-17) So waka bilong Jesus for klinim temple hem gohed for samfala year.

6. (a) Long wanem wei nao profesi bilong Malachi hem kamap tru long taem bilong iumi? (b) Wanem taem nao Jesus lukluk gud long spiritual temple? (Lukim endnote tu.)

⁶ Long wanem wei nao profesi bilong Malachi hem kamap tru long taem bilong iumi? Samfala year bifor 1914, Charles Russell and olketa wea waka tugeta witim hem duim semkaen waka olsem John Baptaesa. Olketa studyim Bible for savve gud long wanem Bible teachim. Olketa helpem pipol for garem stretfala savve abaotem ransom sakrifaes bilong Christ, olketa showimaot hellfire hem laea teaching, and olketa talemaot rul bilong olketa wea no Jew hem klosap for finis. Long datfala taem, staka religion stap wea sei olketa tru Christian. Bat hu long olketa hia nao hem wheat long tokpiksa bilong Jesus? For ansarem datfala kwestin, Jesus start for lukluk gud long datfala spiritual temple long 1914. Datfala waka for lukluk gud and klinim spiritual temple hem start long 1914 go kasem start bilong 1919.c

TAEM FOR LUKLUK GUD AND KLINIM SPIRITUAL TEMPLE

7. Taem Jesus lukluk gud long spiritual temple long 1914, wanem nao hem lukim?

⁷ Taem Jesus startim waka for lukluk gud long spiritual temple, wanem nao hem lukim? Hem lukim wanfala smol sekson bilong Olketa Bible Student wea iusim strong and selen bilong olketa for duim preaching waka for winim 30 year finis.d Masbi Jesus and olketa angel barava hapi from olketa rabis grass bilong Satan no spoelem smol sekson hia wea wheat piksarem! Nomata olsem, Jesus need for mekem “olketa son bilong Levi,” wea minim olketa anointed Christian, for kamap klin. (Mal. 3:2, 3; 1 Pet. 4:17) Why nao hem need for duim datwan?

8. Wanem nao happen bihaen 1914?

⁸ Klosap long end bilong 1914, samfala Bible Student feel nogud bikos olketa no go long heven. Long 1915 and 1916, from pipol againstim organization, olketa no strong for duim preaching waka. Samting wea moa worse, bihaen Brata Russell dae long October 1916, samfala Bible Student againstim olketa wea lead long organization. Fofala long sevenfala director bilong Watch Tower Bible and Tract Society no agree long disison for Brata Rutherford kamap president bilong Society. Olketa trae for kosim wei for divaed midolwan long olketa brata, bat long August 1917, olketa lusim Bethel. Datwan hem wanfala wei wea Jesus klinim organization. And tu, samfala Bible Student wea fraet long man stop for worshipim God. Bat staka Bible Student willing for changem samfala samting mekem olketa kamap klin long tingting bilong God. So Jesus ting long olketa olsem wheat wea piksarem olketa tru Christian. Hem rejectim olketa laea Christian, wea minim tu pipol long evri religion wea sei olketa Christian. (Mal. 3:5; 2 Tim. 2:19) Then wanem nao happen? For savve long diswan, iumi lukluk moa long tokpiksa abaotem olketa wheat and rabis grass.

WANEM NAO HAPPEN LONG TAEM FOR HARVEST?

9, 10. (a) Wanem nao bae iumi storyim distaem? (b) Wanem nao first samting wea happen long taem for harvest?

⁹ Jesus sei: “Taem wea olketa harvestim planteison hem piksarem taem wea world hem gogo for finis.” (Matt. 13:39) Taem for harvest hem start long 1914. Distaem bae iumi storyim faevfala samting wea Jesus sei bae happen long taem for harvest.

¹⁰ First samting, hem waka for aotem olketa rabis grass. Jesus sei: “Long datfala taem nao, mi bae talem olketa wakaman for go aotem olketa rabis grass firstaem, and for taemapem [olketa].” Bihaen 1914, olketa angel start for “aotem” olketa rabis grass, wea piksarem olketa laea Christian, taem olketa separatem olketa from “olketa son bilong Kingdom,” wea hem nao olketa anointed Christian.”—Matt. 13:30, 38, 41.

11. Wanem nao main samting wea mekem olketa tru Christian difren from olketa laea Christian?

¹¹ Taem waka for aotem olketa rabis grass hem gohed, hem isi for luksavve wei wea wheat hem barava difren from rabis grass. (Rev. 18:1, 4) Long 1919, evri samting showimaot Bigfala Babylon hem foldaon finis. Wanem nao main samting wea mekem olketa tru Christian difren from olketa laea Christian? Preaching waka. Olketa wea leadim waka wea Olketa Bible Student duim sei hem important for evri Christian mas duim waka for preach abaotem Kingdom. Olsem example, wanfala pepa wea olketa pablisim long 1919, wea title bilong hem To Whom the Work Is Entrusted, encouragem evri anointed Christian for duim haos tu haos waka. Datfala pepa sei: “Hem barava bigfala waka, bat hem waka bilong Lord, and hem nao bae strongim iumi for duim datwan. Iu nao garem privilege for duim disfala waka.” Wanem nao Olketa Bible Student duim? The Watch Tower long 1922 sei start long datfala taem, Olketa Bible Student duim moa samting long preaching waka. Gogo, waka for preach from haos tu haos hem kamap mark bilong olketa faithful Christian hia. Diswan hem semsem kam kasem distaem.

12. Wanem taem nao Jesus start for hipimap olketa anointed Christian?

¹² Mek-tu samting, hem waka for harvestim wheat. Jesus talem olketa angel: “Harvestim datfala wheat and putim long haos bilong mi for keepim datwan.” (Matt. 13:30) Olketa harvestim datfala wheat long wei for hipimap olketa anointed Christian insaed Christian kongregeson start kam long 1919. Datfala harvest bae happen tu taem olketa anointed Christian wea laef yet long earth taem world hem finis olketa go long heven.—Dan. 7:18, 22, 27.

13. Wanem nao Revelation 18:7 showimaot abaotem tingting bilong datfala jury woman, wea hem nao Bigfala Babylon?

¹³ Mek-thri samting, olketa feel sorre tumas and krae. Bihaen olketa angel taemapem rabis grass, wanem nao happen? Jesus sei olsem abaotem olketa wea “rabis grass” piksarem: “Long ples hia nao bae olketa feel sorre tumas and krae.” (Matt. 13:42) Waswe, datwan happen distaem? Nomoa. Olketa religion wea sei olketa Christian, wea part long Bigfala Babylon, sei olsem abaotem olketa seleva: “Mi wanfala queen, and mi no widow woman, and no enitaem bae mi sorre.” (Rev. 18:7) Olketa tingse olketa nao garem paoa and olsem “wanfala queen” wea savve kontrolem olketa bigman bilong politik. Distaem, olketa laea Christian wea rabis grass piksarem olketa no krae bat olketa bighed and tokplas. Bat klosap nao bae olketa no olsem.

14. (a) Long wanem taem nao olketa laea Christian bae “feel sorre tumas,” and why nao olsem? (b) Hao nao wei wea iumi minim Matthew 13:42 distaem hem join witim samting wea Psalm 112:10 hem talem? (Lukim endnote.)

¹⁴ Bihaen evri false religion finis long taem bilong datfala big trabol, pipol wea sapotim olketa religion hia bae lukaotem sef ples for haed bat bae olketa no savve faendem datwan. (Luke 23:30; Rev. 6:15-17) Then bae olketa krae from olketa no wei nao and “feel sorre tumas” bikos olketa luksavve bae olketa dae. Olsem Jesus talem long profesi abaotem datfala big trabol, long datfala taem olketa “bae hitim chest bilong olketa seleva from olketa sorre tumas.”e—Matt. 24:30; Rev. 1:7.

15. Wanem nao bae happen long olketa wea rabis grass piksarem, and wanem taem nao datwan bae happen?

¹⁵ Mek-foa samting, torowem olketa long bigfala fire. Wanem nao bae happen long olketa wea rabis grass piksarem? Olketa angel bae “torowem olketa long bigfala fire.” (Matt. 13:42) Datwan hem minim wei for finis for olowe. So pipol wea sapotim olketa false religion bae dae long Armageddon, wea hem lastfala part bilong datfala big trabol.—Mal. 4:1.

16, 17. (a) Wanem nao last samting wea Jesus talem long disfala profesi? (b) Why nao iumi sei taem wea diswan bae kamap tru hem long future?

¹⁶ Mek-faev samting, shaen braet tumas. Last samting wea Jesus talem long disfala profesi hem olsem: “Long datfala taem nao olketa wea raeteous bae shaen braet tumas olsem sun insaed Kingdom bilong Dadi bilong olketa.” (Matt. 13:43) Wanem taem nao bae datwan happen, and long wea? Disfala profesi bae kamap tru long future, and hem storyim samting wea bae happen long heven, no long earth.f Tingim tufala reason why iumi sei olsem.

¹⁷ Firstfala reason hem bikos Jesus storyim wanem taem diswan bae happen. Hem sei: “Long datfala taem nao olketa wea raeteous bae shaen braet tumas.” Taem Jesus talem disfala toktok “long datfala taem,” hem storyim taem wea ‘olketa angel torowem rabis grass long bigfala fire.’ Datwan bae happen long lastfala part bilong datfala big trabol. So taem wea olketa anointed Christian bae “shaen braet tumas” mas happen long datfala semtaem tu. Mek-tu reason hem bikos Jesus storyim wea nao diswan bae happen. Jesus sei olketa wea raeteous bae ‘shaen insaed Kingdom.’ Wanem nao diswan minim? Bihaen firstfala part bilong datfala big trabol, olketa faithful anointed Christian wea laef yet long earth olketa kasem mark finis. Then, olsem Jesus talem, olketa bae go long heven. (Matt. 24:31) Long heven nao olketa bae shaen “insaed Kingdom bilong Dadi bilong olketa,” and no longtaem bihaen Armageddon bae olketa join witim olketa nara anointed Christian long heven for kamap gele wea ‘maritim datfala Pikinini Sheepsheep.’—Rev. 19:6-9.

GUD SAMTING WEA IUMI KASEM

18, 19. Wanem gud samting nao iumi kasem from iumi minim tokpiksa bilong Jesus abaotem olketa wheat and rabis grass?

¹⁸ Wanem gud samting nao iumi kasem from disfala tokpiksa bilong Jesus? Iumi kasem thrifala gud samting. First samting, disfala tokpiksa helpem iumi for minim why Jehovah letem olketa nogud samting gohed. Hem “patient witim pipol wea hem kros long olketa” mekem hem savve redyim “pipol wea hem showimaot mercy long olketa,” wea diswan minim olketa anointed Christian wea wheat piksarem.g (Rome 9:22-24) Mek-tu samting, disfala tokpiksa strongim wei wea iumi trust long God. Taem disfala world gogo for finis, olketa enemy bilong iumi bae strong for againstim iumi, “bat olketa bae no win.” (Readim Jeremiah 1:19.) Long sem wei wea Jehovah protectim olketa anointed Christian long staka handred year wea go pas, Dadi bilong iumi long heven bae iusim Jesus and olketa angel for protectim iumi “go kasem taem wea world hem finis.”—Matt. 28:20.

¹⁹ Mek-thri samting, disfala tokpiksa helpem iumi for luksavve hu nao olketa Christian wea wheat piksarem. Why nao datwan barava important? Taem iumi savve hu nao olketa, iumi bae fit for savve long ansa bilong wanfala kwestin wea Jesus askem taem hem storyim profesi bilong hem abaotem olketa last day. Hem ask olsem: “Hu nao datfala wakaman wea faithful and wise?” (Matt. 24:45) Tufala study bihaen bae ansarem datfala kwestin.