Waswe, Iu Tingim Yet?

Waswe, iu lanem gud samting from olketa Wastaoa magasin wea iu readim no longtaem go nomoa? Trae for ansarem olketa kwestin hia:

• Why nao Messiah mas dae?

Jesus barava pruvim wanfala perfect man savve gohed faithful long God nomata Satan barava traem hem. Nara samting tu, dae bilong Jesus mekem iumi kamap free from sin wea iumi kasem from Adam and mekem wei for iumi savve kasem laef olowe.​—12/15, page 22-23.

• Waswe, evri gud pipol go long heven?

Nomata Jesus promis long olketa disaepol bilong hem for hem bae “redyim ples” for olketa long heven, hem no talem evriwan wea raeteous bae go long there. (John 3:13; 14:2, 3) Jesus prea for God duim samting wea hem plan for duim ‘long earth, long sem wei wea hem duim datwan long heven.’ (Matt. 6:9, 10) So tufala hope nao stap for olketa wea raeteous. Smolfala sekson bae rul witim Christ long heven, bat bigfala sekson bae stap long earth for olowe. (Rev. 5:10)​—1/1, page 6.

• Waswe, God hapi long wei for iusim olketa image and piksa long worship?

Bible hem sei: “Iu mas no wakem for iuseleva wanfala image bilong eni samting long skae or long earth or long wata. Iu mas no baodaon long olketa or worshipim olketa.” (Ex. 20:4, 5) Aposol John talem olketa Christian long first century olsem: “Iufala olketa smol pikinini, keepim iufala seleva from olketa idol.” (1 John 5:21)​—1/1, page 9.

• Hao nao iu savve story gud witim pikinini?

Hem no minim for toktok long pikinini nomoa, bat iu savve askem olketa kwestin and weit for herem ansa bilong hem. Long staka famili, taem for kaikai nao hem taem wea olketa savve story tugeta.​—1/15, page 18-​19.

• Wanem samting nao maet mekem man fit for baptaes moa?

Hem savve baptaes moa sapos long taem wea hem baptaes, hem gohed for duim haed sin wea man savve disfellowship for datwan.​—2/15, page 22.

• Long tokpiksa bilong Jesus abaotem wheat and rabis grass, waka for plantim gudfala seed hem piksarem wanem?

Jesus, wea hem Son bilong man, redyim graon for plantim olketa seed taem hem duim ministry long earth. Then long Pentecost 33 C.E., Jesus start for plantim olketa gudfala seed taem olketa Christian kamap olketa anointed son bilong God, wea olketa nao olketa son bilong Kingdom.​—3/15, page 20.

• Long wanem wei nao olketa angel harvestim tokpiksa wheat distaem and putim long haos bilong Jehovah for keepim datwan? (Matt. 13:30)

Diswan hem gohed long taem wea world hem gogo for finis. Olketa son bilong Kingdom nao olketa tokpiksa wheat wea olketa angel putim long haos bilong Jehovah for keepim datwan. Diswan happen taem olketa kam insaed long tru Christian kongregeson or taem olketa go long heven.​—3/15, page 22.