Iumi Mas “Againstim Satan” Olsem Jesus Tu Againstim Hem
““Iufala mas againstim Satan mekem hem go from iufala.”—JAS. 4:7.
1. Jesus savve hem bae kasem wanem taem hem stap long earth? Wanem nao bae kamaot from datwan?
JESUS CHRIST hem savve Satan bae againstim hem. Hem savve long diswan from hem tingim wanem God talem long datfala nogud angel wea bighed and wea iusim snek for toktok for hem. God tok olsem long datfala snek: “Mi bae mekem iu and woman hia [organization bilong Jehovah long heven] for iutufala heitim iutufala. Pikinini bilong iu and pikinini bilong woman hia bae tufala heitim tufala. Pikinini bilong woman hia [Jesus Christ] bae killim hed bilong iu and iu bae killim leg bilong hem.” (Gen. 3:14, 15; Rev. 12:9) Datfala scripture talem hao Satan bae killim leg bilong Jesus. Diswan hem minim taem Jesus stap long earth bae hem dae, bat bae hem no dae for olowe. Jehovah bae mekem hem laef bak moa long heven. Scripture hia talem tu Jesus bae killim hed bilong Satan. Diswan minim taem Jesus killim Satan, bae Satan dae for olowe nao.—Readim Acts 2:31, 32; Hebrews 2:14.
2. Wanem nao mekem Jehovah barava savve Jesus bae faithful long hem nomata Satan barava traem hem?
2 Jehovah barava savve hao taem Jesus stap long earth, Jesus bae duim wanem Jehovah talem for hem duim and hem bae againstim Satan. Wanem nao mekem Jehovah barava savve Jesus bae duim datwan? From hem nao wakem Jesus long taem bifor kam and hem savve gud long wei bilong hem. Jehovah savve tu disfala “nambawan wakman” wea hem nao ‘first wan wea hem wakem bifor hem wakem evri nara samting,’hem faithful and obeyim hem. (Prov. 8:22-31; Col. 1:15) God barava savve datfala spesol Son bilong hem bae gohed faithful long hem nomata Satan traem hem long eni samting and bae killim hem dae.—John 3:16.
Jehovah Protectim Pipol Bilong Hem
3. Hao nao tingting bilong Satan abaotem pipol wea worshipim Jehovah?
3 Jesus talem hao Satan nao hem “rulim disfala world.” Hem talem olketa disaepol bilong hem hao from pipol duim nogud samting long hem, pipol bae duim nogud samting long olketa tu. (John 12:31; 15:20) Disfala world wea Satan rulim hem heitim olketa tru Christian from olketa worshipim Jehovah, and olketa preach abaotem samting wea stret and gud. (Matt. 24:9; 1 John 5:19) Main wan wea Satan laek spoelem nao hem olketa anointed Christian wea stap yet long earth. Olketa hia nao bae gogo rul witim Jesus long Kingdom long heven. Satan hem laek spoelem tu olketa Witness bilong Jehovah wea bae stap olowe long paradaes long disfala earth. Bible talem iumi finis: “Enemy bilong iufala, Satan, hem olsem wanfala lion wea hem hangre tumas, hem raraon and singaot bigfala. Hem gohed for lukaotem eniwan for hem kaikaim.”—1 Pet. 5:8.
4. Wanem nao happen long samfala year go finis wea showimaot pipol bilong God no letem Satan spoelem olketa?
4 From Jehovah God nao lukaftarem pipol wea worshipim hem, olketa savve againstim Satan. Tingim diswan: Long 100 year go finis, samfala raf gavman wea rulim samfala kantri trae for killim dae evri Jehovah’s Witness, batawea namba bilong olketa Witness hem big go moa. Distaem hem klosap 7 million wea olketa stap long winim 100,000 kongregeson long full world. Pipol bilong Jehovah stap nomoa, bat olketa raf gavman hia no stap nao!
5. Long wanem wei nao toktok long Isaiah 54:17 hem kamap tru for pipol wea worshipim Jehovah?
5 Taem God hem story long olketa Israelite wea olketa olsem “woman” bilong hem, hem talem disfala promis long olketa: “Olketa samting wea pipol iusim for faetem iu bae iusles nomoa, and eni man wea tok againstim iu bae iu judgem hem long day wea mi markem for datwan. Diswan hem samting for olketa servant bilong Jehovah and bae mi mekem iufala for raeteous.” (Isa. 54:11, 17) Pipol bilong Jehovah evriwea long earth lukim disfala promis bilong hem kamap tru long “olketa last day.” (2 Tim. 3:1-5, 13) Iumi gohed for againstim Satan, and nomata hem iusim eni samting for finisim pipol bilong God, hem nating win nomoa from Jehovah protectim iumi.—Ps. 118:6, 7.
6. Wanem nao profesi bilong Daniel talem bae happen long rul bilong Satan?
6 Klosap nao evri samting wea Satan rul ovarem bae finis taem God finisim disfala world. Holy spirit mekem profet Daniel for raetem disfala toktok: “Long taem bilong olketa king hia [long taem bilong iumi] God long heven bae mekem wanfala kingdom for kamap [long heven] wea no eniwan bae finisim. And bae no eni pipol moa tekovarem datfala kingdom. Disfala kingdom bae barava pisisim and finisim olketa narafala kingdom [wea stap distaem], and hem nomoa bae stap olowe.” (Dan. 2:44) Taem datwan hem happen, rul bilong Satan and olketa gavman bilong man bae no stap nao. Evri samting long disfala world bilong Satan bae finis for olowe nao and Kingdom bilong God nomoa bae rulim full earth.—Readim 2 Peter 3:7, 13.
7. Wanem nao mekem iumi savve iumi wanwan savve againstim Satan?
7 Iumi barava savve Jehovah bae protectim pipol wea worshipim hem and hem bae gohed for givim gud samting long olketa. (Readim Psalm 125:1, 2.) Bat waswe long iumi wanwan? Bible talem hao iumi wanwan savve againstim Satan olsem Jesus tu againstim hem. Profesi wea Jesus talem long aposol John hem showimaot hao “wanfala big crowd” bae againstim Satan nomata hem trae spoelem olketa, and olketa nao bae stap laef taem disfala world hem finis. Bible hem storyim wanem big crowd hia talem: “God bilong iumi wea hem sidaon long throne witim Pikinini Sheepsheep hia [Jesus Christ], tufala nao sevem iumi.” (Rev. 7:9-14) Bible hem talem tu olketa anointed Christian winim Satan and olketa “nara sheepsheep” no letem Satan spoelem olketa tu. (John 10:16; Rev. 12:10, 11) Bat for olketa duim diswan, olketa mas waka hard and prea long God for ‘sevem olketa from Satan.’—Matt. 6:13.
Man wea Showim Nambawan Wei for Iumi Againstim Satan
8. Wanem nao first samting wea Satan talem for traem Jesus taem hem stap long drae ples? Wanem nao Jesus talem for ansarem hem?
8 Satan hem trae for mekem Jesus no faithful long God. Taem Jesus hem stap long wanfala drae ples, Satan talem samfala samting for traem Jesus mekem hem no obeyim Jehovah. Bat Jesus no letem Satan winim hem. Jesus hem showim nambawan wei for iumi followim. From Jesus no kaikai for 40-fala day and 40-fala naet, masbi hem hangre fogud. Satan hem tok olsem long Jesus: “Sapos iu wanfala son bilong God, talem olketa ston hia for kamap bred.” Bat Jesus les for mekius long paoa wea God givim long hem for kasem gud samting for hemseleva. So Jesus ansarem Satan olsem: “Olketa Holy Raeting talem finis, ‘Samting wea mekem man laef nao, hem no kaikai nomoa, bat hem mas evri toktok wea kamaot from mouth bilong Jehovah.’ ”—Matt. 4:1-4; Deut. 8:3.
9. Why nao iumi mas no letem Satan mekem iumi duim olketa nogud samting wea body laekem?
9 Long distaem, Satan hem traem pipol wea worshipim Jehovah tu. Hem iusim samting wea body hem laekem for mekem olketa duim nogud samting. Dastawe iumi mas disaed strong for no foldaon long eni test for durong wea hem big tumas long disfala rabis world distaem. Bible hem tok stret olsem: “Iufala mas savve finis, pipol wea duim olketa nogud samting bae no kasem kingdom bilong God. No laea long iufala seleva. Olketa wea durong witim eniwan, and olketa wea worshipim idol, and olketa wea duim adultery, . . . and olketa man wea durong witim nara man nomoa . . . olketa bae no kasem kingdom bilong God.” (1 Cor. 6:9, 10) Bible talem nao, pipol wea durong and wea no laek lusim rabis wei bilong olketa bae no stap long niu world bilong God.
10. Olsem Matthew 4:5, 6 hem talem, wanem moa Satan talem for traem Jesus mekem Jesus no faithful long God?
10 Bible storyim nara samting moa wea Satan traem Jesus long hem taem hem stap long datfala drae ples. Bible hem story olsem: “Devil tekem hem go insaed long Jerusalem and hem mekem hem standap antap long wall bilong temple. Hem sei long hem: ‘Sapos iu wanfala son bilong God, jamp go daon, bikos olketa Holy Raeting talem finis, ‘Hem bae talem olketa angel for karem iu go, mekem no enitaem iu bangam leg bilong iu long wanfala ston.” ’ ” (Matt. 4:5, 6) Luk olsem Satan laekem Jesus for showimaot bigfala paoa wea hem garem bikos hem nao datfala Messiah. Bat sapos Jesus duim wanem Satan hem talem, God bae no hapi long hem and datwan bae showimaot Jesus hem bighed. Long datfala taem tu, Jesus hem faithful long Jehovah and hem talem toktok bilong wanfala scripture for ansarem Satan. Jesus hem sei olsem: “Olketa Holy Raeting talem finis, ‘Iu mas no testim God bilong iu Jehovah.’ ”—Matt. 4:7; Deut. 6:16.
11. Wanem nao maet Satan trae switim iumi for duim? Sapos iumi duim samting wea hem laekem, wanem nao bae happen?
11 Maet Satan hem switim iumi tu for laek duim samting for kasem bignem. Maet hem switim iumi for laek werem olketa stael kaleko and for lukluk bilong iumi hem followim pipol long disfala world or for duim hapitaem wea no fitim olketa tru Christian. Sapos iumi no followim wanem Bible hem talem bat iumi followim disfala world, iumi mas no tingse olketa angel bae protectim iumi for no kasem olketa nogud samting from wanem iumi duim. Tingim King David. Nomata hem repent from olketa sin wea hem duim witim Bath-sheba, hem kasem nogud samting from wanem hem duim. (2 Sam. 12:9-12) Iumi mas no duim olketa nogud samting for traem Jehovah, olsem for duim olketa samting wea showimaot iumi fren witim world.—Readim James 4:4; 1 John 2:15-17.
12. Olsem Matthew 4:8, 9 storyim, wanem nao Satan traem Jesus long hem? Wanem nao Son bilong God talem go bak long Satan?
12 Satan hem traem Jesus moa for mekem hem laek garem bigfala paoa long disfala world. Hem showim long Jesus evri kantri long disfala world and olketa nambawan samting wea olketa kantri hia garem. Satan sei long Jesus: “Evri samting hia mi bae givim long iu sapos iu baodaon and worshipim mi distaem.” (Matt. 4:8, 9) Barava rabis wei nao Satan duim for switim Jesus for worshipim hem and for no faithful long God! Datfala angel hem faithful long God long firstaem. Bat hem laekem tumas for olketa narawan worshipim hem, and from hem tingim datwan olowe, gogo hem duim sin nao. Hem barava kavetem samting wea no fitim and hem duim olketa rabis samting wea mekem hem kamap Satan. (Jas. 1:14, 15) Bat Jesus hem no olsem. Hem disaed strong for faithful long Dadi bilong hem wea stap long heven. Dastawe hem tok olsem long Satan: “Iu go nao Satan! Olketa Holy Raeting talem finis, ‘Iu mas baodaon long God bilong iu Jehovah, and iu mas worshipim hem nomoa.’ ” Long datfala taem tu Jesus showimaot klia hem againstim Devil. Son bilong God hem nating laek followim world bilong Satan. Hem bae nating worshipim datfala rabis man!—Matt. 4:10; Deut. 6:13; 10:20.
“Iufala Mas Againstim Satan Mekem Hem Go From Iufala”
13, 14. (a) Taem Satan showim evri kantri long world long Jesus, wanem nao hem laek givim long Jesus? (b) Wanem nao Satan duim for trae spoelem iumi?
13 Taem Satan showim evri kantri long disfala world long Jesus, Satan laek givim long Jesus bigfala paoa wea no eni man garem bifor. Wanem Satan laekem nao hem for Jesus lukim evri samting hia and for laekem tu mekem hem tingse hem savve garem bigfala paoa long disfala full earth. Long distaem, Satan hem no showim kam evri kantri long disfala world long iumi, bat hem trae for switim iumi long olketa samting wea iumi lukim, wea iumi herem, and wea iumi tingim.
14 Satan hem rulim disfala world. Hem nao kontrolem evri samting long television, radio, and olketa nara samting olsem. Dastawe staka buk, movie, and music long disfala world hem showim olketa rabis piksa witim raf samting wea olketa man duim. Olketa bisnis showim enikaen advertisement for mekem iumi laek baem staka samting wea iumi no needim. Satan hem gohed for iusim olketa samting hia for pullim iumi for laekem and tingim tumas olketa samting wea iumi lukim and wea iumi herem. Bat taem iumi no laek for readim, lukluk, and herem olketa samting wea no fitim wanem Bible hem talem, hem olsem iumi talem tu disfala toktok: “Iu go nao Satan!” Iumi followim nao wanem Jesus hem duim, from iumi disaed strong for no followim rabis world bilong Satan. Nara samting tu hem showimaot iumi no followim world bilong Satan. Taem iumi stap long ples wea iumi waka, long skul, and taem iumi stap witim olketa relative, iumi no fraet for talemaot iumi wanfala Jehovah’s Witness and iumi followim Jesus.—Readim Mark 8:38.
15. Wanem nao bae helpem iumi for winim Satan?
15 Bihaen mek-thri taem wea Satan no win for mekem Jesus no faithful long God, “Devil go from hem” nao. (Matt. 4:11) Nomata olsem, Satan weitim narataem moa for hem traem Jesus. Bible hem talem olsem: “Bihaen Devil hem traem Jesus [long drae ples], hem lusim hem nao, and hem weitim eni chance for hem savve traem hem moa.” (Luke 4:13) Taem iumi no letem Devil for spoelem iumi, iumi mas thankiu long Jehovah. Bat iumi mas askem God tu for gohed helpem iumi from Satan hem weitim narataem moa for traem iumi wea maet datwan hem long taem wea iumi no tingim. Dastawe iumi mas keakea evritaem and no givap long wanem iumi duim for worshipim Jehovah nomata wanem Satan hem duim for traem iumi.
16. Wanem strongfala paoa nao Jehovah savve givim long iumi? Why nao iumi mas askem God for datwan?
16 From iumi laek againstim Satan, iumi mas prea long God for holy spirit bilong hem from iumi savve bae hem givim iumi datwan. Holy spirit nomoa hem barava strongfala paoa long disfala full universe. Disfala spirit savve helpem iumi for duim olketa samting wea iumiseleva hard for duim. Jesus hem talem olketa disaepol bilong hem hao olketa savve kasem holy spirit long taem wea olketa needim. Hem sei olsem: “Sapos iufala savve hao for givim gudfala present long olketa pikinini bilong iufala nomata iufala wicked [wea minim no perfect], Dadi bilong iufala long heven bae barava givim holy spirit long olketa wea askem hem!” (Luke 11:13) Iumi mas gohed for prea long Jehovah for askem holy spirit bilong hem. From holy spirit stap for helpem iumi for againstim Satan, hem bae hard for hem spoelem iumi. Iumi mas prea evritaem and barava storyim tingting bilong iumi long Jehovah. Nara samting tu, iumi mas werem evri samting for faet wea God hem givim long iumi mekem ‘iumi savve fit for againstim olketa rabis plan bilong Satan.’—Eph. 6:11-18.
17. Wanem samting nao Jesus tingim wea mekem hem savve againstim Devil?
17 Nara samting tu helpem Jesus for againstim Satan, and datfala samting savve helpem iumi. Bible hem talem olsem: “[Jesus] hem hapi taem hem tingim gud samting wea bae hem kasem. Datwan mekem hem fit for no givap taem olketa nilam hem long datfala post. Hem nating shame nomoa, and hem sidaon long raet saed long throne bilong God.” (Heb. 12:2) Iumi tu savve hapi taem iumi mekhae long rul bilong Jehovah, mekhae long holy nem bilong hem, and tingim evritaem datfala hope for iumi laef olowe. Iumi bae hapi fogud taem Satan witim evri plan bilong hem no stap moa for spoelem iumi and taem “God bae givim earth long olketa wea hambol, and olketa bae hapi fogud bikos olketa barava stap gud”! (Ps. 37:11) So iumi mas gohed for againstim Satan olsem Jesus tu againstim hem.—Readim James 4:7, 8.
Wanem Nao Ansa Bilong Iu?
• Wanem samting nao showimaot Jehovah protectim pipol bilong hem?
• Wanem nambawan wei nao Jesus showim long iumi for againstim Satan?
• Wanem nao olketa samting wea iu savve againstim Devil long hem?
[Piksa long page 29]
Sapos iumi followim wei bilong disfala world, iumi enemy bilong God nao
[Piksa long page 31]
Jesus no laek for tekem evri kantri wea Satan showim for hem