Iumi Garem Nambawan Savve for Givimaot
1 Toktok bilong God garem staka nambawan spiritual kaikai wea iumi barava tinghae long hem. (Ps. 12:6; 119:11, 14) Wanfala taem, Jesus iusim olketa tokpiksa wea storyim olketa difren samting abaotem Kingdom, then hem askem olketa disaepol bilong hem olsem: “Hao, iufala minim evri samting hia wea mi storyim?” Taem olketa sei olketa minim, hem talem olketa: “Sapos olsem, evri teacher wea lane abaotem kingdom bilong God hem olsem wanfala man wea garem olketa barava naesfala samting long haos bilong hem. Datfala man tekem kamaot from haos bilong hem olketa naesfala samting hia. Samfala samting hem niu, and samfala samting hem old.”—Matt. 13:1-52.
2 Olketa trufala teaching long Bible wea iumi lanem taem iumi start for study kamap olketa nambawan olo samting. Taem iumi duim study seleva, and studyim olketa deep samting long Bible, iumi lanem samfala niu trufala teaching moa, olketa niufala nambawan samting. (1 Cor. 2:7) And “datfala wakman wea faithful and wise,” helpem iumi for minim olketa niufala nambawan samting hia.—Matt. 24:45.
3 Iumi barava tinghae long olketa nambawan samting hia nomata hem olo or niu. Datwan mekem iumi for laek kasem training and savve for lanem pipol abaotem Bible and sharem olketa nambawan samting wea iumi lanem.
4 Lane From Wei Bilong Jesus: Long wei wea showaot hem tinghae long olketa nambawan samting hia, Jesus barava waka hard for lanem long nara pipol. Nomata hem barava taed fogud, hem nating stop for tekem olketa nambawan samting hia aot from “stoahaos” bilong hem.—John 4:6-14.
5 Love wea Jesus garem muvim hem for lanem trufala nambawan savve abaotem God wea givim laef olowe long olketa wea no garem trufala savve abaotem God. (Ps. 72:13) Hem barava feel sorre long olketa wea laek for lane abaotem olketa trufala teaching bilong God and datwan muvim hem for “teachim olketa plande samting.”—Mark 6:34.
6 Followim Jesus: Taem iumi tinghae long nambawan samting wea iumi garem, olsem Jesus, iumi bae showim pipol olketa nambawan samting hia from Bible. (Prov. 2:1-5) Nomata samfala taem iumi barava taed, iumi bae willing tumas for storyim olketa trufala teaching long Bible. (Mark 6:34) Wei wea iumi barava tinghae long olketa nambawan samting hia bae mekem iumi for waka hard long preaching and evritaem trae for mekem kamap big go moa.