Klin Olsem Pipol for Gudfala Waka
“Letem iumi klinim iumiseleva from evri samting wea mekem body and spirit dirty, mekem holy fasin kamap perfect long wei for fraet long God.”—2 CORINTHIANS 7:1.
1. Wanem nao Jehovah askem from olketa wea worshipim hem?
“HU NAO savve go ap long maunten bilong Jehovah, hu nao savve standap long holy ples bilong hem?” King David bilong Israel hem askem disfala kwestin abaotem worship wea Jehovah acceptim. Then hem talem ansa: “Eniwan wea hand bilong hem no guilty and garem heart wea klin, wea no mekem soul bilong Mi kamap iusles samting, or mekem giaman promis.” (Psalm 24:3, 4) For Jehovah, wea garem holy fasin evribit, for acceptim iumi, iumi mas klin and holy. Bifor taem bilong David, Jehovah talem kongregeson long Israel: “Iufala mas holy, bikos mi Jehovah God bilong iufala, mi nao holy.”—Leviticus 11:44, 45; 19:2.
2. Hao nao Paul and James mekhae long wei wea hem important for klin long tru worship?
2 Planti handred year bihaen, aposol Paul raet olsem long olketa Christian long taon bilong Corinth wea dirty fasin hem big tumas: “From iumi garem olketa promis hia, olketa wea mi lovem, letem iumi klinim iumiseleva from evri samting wea mekem body and spirit dirty, mekem holy fasin kamap perfect taem iumi fraet long God.” (2 Corinthians 7:1) Diswan showimaot moa hao, for garem wei for fren witim God and for kasem olketa blessing wea hem promisim, man mas klin and no dirty long body and long spiritual wei. Disaepol James tu raet abaotem worship wea God acceptim taem hem sei: “Kaen worship wea klin and no dirty front long God and Father bilong iumi hem olsem: for lukaftarem olketa pikinini wea no garem dadi and mami and olketa widow woman wea kasem hardfala taem, and for stap klin from world.”—James 1:27.
3. For God acceptim worship bilong iumi, iumi mas ting strong long wanem?
3 From wei for klin and holy barava important part long tru worship, eniwan wea wantem God for appruvim hem mas barava ting strong long wei for kasem diswan. Bat, from pipol distaem garem barava difren standard and idea saed long wei for klin, iumi need for minim and followim wanem hem klin long Jehovah and wea hem acceptim. Iumi need for faendemaot wanem nao God askem from olketa wea worshipim hem and wanem nao hem duim finis for helpem olketa kamap klin and go ahed for stap klin and for hem acceptim olketa.—Psalm 119:9; Daniel 12:10.
Klin for Tru Worship
4. Explainim mining bilong wei for klin wea Bible storyim.
4 Planti pipol tingse for stap klin hem minim for samting no kasem dirty. Bat, insaed Bible, idea bilong wei for stap klin hem showaot long samfala Hebrew and Greek word wea storyim wei for stap klin no long body nomoa bat planti taem saed long fasin and spiritual wei tu. Dastawe, wanfala Bible encyclopedia sei: “Planti taem tufala word hia ‘klin’ and ‘no klin’ no minim nomoa wei for klin long body, bat main wei hem saed long olketa tingting bilong religion. For fitim diswan, principle bilong ‘wei for klin’ hem affectim evri part long living.”
5. Long wanem wei nao Law bilong Moses hem leadim living bilong olketa Israelite saed long wei for klin?
5 Tru nao, Law bilong Moses garem olketa rul and law long evri part long living bilong olketa Israelite, wea showimaot klia wanem nao klin and God acceptim and wanem hem no acceptim. Olsem example, long Leviticus chapter 11 go kasem 15, hem storyim evri instruction wea join witim wei for klin and no klin. Samfala animal no klin, and olketa Israelite mas no kaikaim olketa. Woman wea bornem pikinini bae no klin for lelebet taem. Samfala sik long skin, especially leprosy, and samting wea savve kamaot from private part bilong man and woman bae mekem man for no klin tu. Law hem talem tu wanem olketa shud duim saed long samting wea no klin. Olsem example, long Numbers 5:2, iumi read: “Givim komand long olketa son bilong Israel for olketa sendem go aot from camp eniwan wea garem leprosy and eniwan wea samting kamaot from private part long wei wea no klin and eniwan wea no klin from wanfala soul wea dae.”
6. Wanem nao purpose bilong olketa law saed long wei for klin?
6 For sure, olketa law hia and olketa nara law from Jehovah showimaot olketa tru samting saed long medical and living wea nara pipol long datfala taem no luksavve yet, and olketa Israelite kasem gud samting taem olketa followim. Nomata olsem, God no givim olketa law hia for saed long health nomoa or olsem instruction saed long living nomoa. Olketa part bilong tru worship. From olketa affectim living bilong pipol evriday—kaikai, bornem pikinini, marit, and samfala moa—diswan mekhae long point hao olsem God bilong olketa, Jehovah garem paoa for disaedem samting wea stret and no stret long evri part long living bilong olketa wea olketa dedicatem evribit long Jehovah.—Deuteronomy 7:6; Psalm 135:4.
7. Taem olketa obeyim datfala Law, wanem blessing nao nation bilong Israel bae kasem?
7 Law covenant hem protectim tu olketa Israelite from dirty fasin bilong olketa nation wea stap raonem olketa. Taem olketa faithful for followim Law, insaed diswan hem evri law for stap klin long eye bilong Jehovah, olketa Israelite bae fit for servem God and kasem blessing bilong hem. Jehovah sei olsem long datfala nation: “Sapos iufala obeyim evribit voice bilong mi and keepim covenant bilong mi, then iufala bae kamap spesol samting bilong mi from midolwan long evri narafala pipol, bikos full earth hem bilong mi. And iufala seleva bae kamap for mi wanfala kingdom bilong olketa priest and wanfala holy nation.”—Exodus 19:5, 6; Deuteronomy 26:19.
8. Why nao olketa Christian distaem shud ting strong long samting wea Law hem talem saed long wei for klin?
8 From Jehovah putim insaed long Law instruction long hao olketa Israelite savve kamap klin, holy, and for hem acceptim olketa, waswe, hem no fitim for olketa Christian distaem for markem olketa seleva saed long diswan? Nomata olketa Christian no stap anda long Law, olketa mas remember hao, olsem Paul explainim, evri samting wea stap insaed long Law olketa “olsem shadow long samting wea bae kamap, bat really samting hem bilong Christ.” (Colossians 2:17; Hebrews 10:1) Sapos Jehovah God, wea sei ‘Mi no change,’ ting long wei for klin olsem wanfala important part bilong tru worship long datfala taem, iumi wea stap distaem mas barava ting strong long wei for klin long body, fasin, and spiritual wei sapos iumi laekem hem for appruvim and blessim iumi.—Malachi 3:6; Romans 15:4; 1 Corinthians 10:11, 31.
Klin Long Body Mekem Pipol Acceptim Iumi
9, 10. (a) Why nao wei for klin long body hem important long wanfala Christian? (b) Wanem toktok nao pipol talem planti taem abaotem olketa convention bilong Olketa Jehovah’s Witness?
9 Waswe, wei for klin long body hem still wanfala important part bilong tru worship? Nomata wei for klin long body nomoa hem no mekem man kamap wanfala trufala worshiper bilong God, hem barava fitim for olketa tru worshiper for klin long body fitim living bilong olketa. Especially long disfala taem wea pipol no tinghae long wei for keepim olketa seleva, lukluk bilong olketa, or ples raonem olketa klin, pipol barava luksavve long olketa wea klin. Diswan savve lead go long gud samting, olsem Paul talem for olketa Christian long Corinth: “Mifala no givim eni reason for mekem man stambol, mekem no eniwan savve faendem rong long ministry bilong mifala; bat long evri wei mifala showimaot mifala olketa minister bilong God.”—2 Corinthians 6:3, 4.
10 Planti taem, Olketa Jehovah’s Witness kasem praise from pipol for wei wea olketa klin, followim order, and showimaot respect, and diswan barava showaot long olketa bigfala convention bilong olketa. Olsem example, datfala niuspepa La Stampa sei olsem abaotem wanfala convention wea kamap long province bilong Savona, Italy: “First samting wea man luksavve taem hem wakabaot insaed datfala ples hem wei wea pipol long there klin and followim order.” Bihaen olketa Witness holem wanfala convention long wanfala stadium long São Paulo, Brazil, boss long there talem man wea lukaftarem sekson wea duim klining: “Start long distaem, mifala laekem iufala for klinim stadium olsem hao Olketa Jehovah’s Witness duim.” Narafala bigman bilong sem stadium sei: “Taem Olketa Jehovah’s Witness want for rentim stadium, mifala warim nomoa olketa date. Mifala no warim eni nara samting.”
11, 12. (a) Wanem Bible principle nao iumi shud tingim long saed for keepim iumiseleva klin? (b) Wanem nao olketa kwestin wea iumi shud askem abaotem fasin and living bilong iumi?
11 Sapos wei for klin and followim order long ples bilong iumi for worship hem praisem God wea iumi worshipim, wei for showim olketa fasin hia long living bilong iumi hem important tu. Nomata olsem, taem iumi stap long haos, maet iumi ting iumi garem raet for no hol strong long wei olsem and followim wei wea iumi laekem. And saed long wei for werem kaleko and lukluk, iumi garem freedom for chusim samting wea iumi laek for werem! Bat, long bigfala wei, disfala freedom hem no long evri samting. Tingim taem wea Paul givim warning long olketa nara Christian abaotem wei for chusim samkaen kaikai, taem hem sei: “Go ahed for lukaot for disfala paoa wea iufala garem hem no kamap samting wea mekem olketa wea wik for stambol.” Then hem talem wanfala important principle: “Evri samting fitim law; bat no evri samting hem gud. Evri samting fitim law; bat no evri samting buildimap man.” (1 Corinthians 8:9; 10:23) Hao nao kaonsel bilong Paul fitim iumi saed long wei for klin?
12 Hem fitim stretfala tingting for sei pipol shud expectim wanfala minister bilong God for klin and followim order long living bilong hem. So, iumi shud mek sure haos bilong iumi and area raonem haos hem no spoelem nem bilong iumi, wea hem nao, olketa minister bilong Word bilong God. Wanem kaen witness nao haos bilong iumi showimaot abaotem iumi and olketa samting wea iumi bilivim? Waswe, hem showaot iumi barava want for stap insaed wanfala niu world bilong raeteous fasin wea klin and followim order, wea iumi strong for storyim long nara pipol? (2 Peter 3:13) Olsem tu, lukluk bilong iumiseleva—nomata taem iumi relax or taem iumi duim ministry—savve strongim or daonem message wea iumi talemaot. Olsem example, wanfala man for report for wanfala niuspepa long Mexico hem sei olsem: “Tru nao, bigfala sekson bilong Olketa Jehovah’s Witness hem young pipol, and samting wea barava showaot klia nao hem wei wea olketa klin, werem gudfala kaleko and hao olketa katem hair bilong olketa.” Iumi hapi tumas for garem olketa young pipol olsem midolwan long iumi!
13. Wanem nao iumi savve duim for mek sure evri part long evriday living bilong iumi hem klin and followim order?
13 Tru tumas, hem no isi for mek sure lukluk, olketa samting bilong iumi and haos bilong iumi klin and followim order evritaem. Iumi no needim enikaen spesol machine wea kostim tumas selen for duim diswan, bat iumi need for plan gud and duim evritaem. Mas markem taem for klinim body, kaleko, haos, car, and olketa samting olsem. Wei for busy long ministry, attendim olketa meeting, and study seleva—and tu for duim olketa responsibility bilong iumi long evriday living—hem no givim iumi excuse for no stap klin and gud long eye bilong God and olketa man. Disfala principle wea iumi savve gud long hem, “evriting garem wanfala taem wea set finis” hem fitim tu disfala part long living bilong iumi.—Ecclesiastes 3:1.
Heart wea Klin
14. Why nao hem fitim for iumi sei wei for klin long fasin and spiritual saed hem moa important winim wei for klin long body?
14 Long sem wei wea hem important for klin long body, hem moa important for ting strong long wei for klin long fasin and long spiritual wei. Iumi savve long diswan taem iumi tingim hao Jehovah hem rejectim nation bilong Israel, no from olketa no klin long body, bat bikos olketa dirty saed long fasin and long spiritual wei. Thru long profet Isaiah, Jehovah talem olketa hao from olketa “wanfala nation wea sin, wea pipol duim staka rong,” olketa sakrifaes, or day wea olketa keepim niu moon, sabbath, and tru nao, prea bilong olketa tu hem kamap wanfala hevi long hem. Wanem nao olketa shud duim for mekem God hapi long olketa moa? Jehovah sei: “Wasim iufala seleva; mekem iufala seleva klin; aotem nogud fasin bilong iufala from front long eye bilong mi; finis from wei for duim nogud samting.”—Isaiah 1:4, 11-16.
15, 16. Jesus sei wanem nao mekem man dirty, and hao nao iumi savve kasem gudfala samting from olketa toktok bilong Jesus?
15 For minim gud moa wei wea hem important tumas for klin long fasin and long spiritual wei, tingim samting wea Jesus talem taem olketa Pharisee and scribe sei olketa disaepol bilong hem no klin from olketa no wasim hand bilong olketa bifor olketa kaikai. Jesus stretem olketa taem hem sei: “Hem no samting wea go insaed long mouth bilong hem nao mekem man dirty, bat samting wea kamaot from mouth bilong hem nao mekem man dirty.” Then Jesus sei: “Olketa samting wea kamaot long mouth kamaot from heart, and olketa samting olsem nao mekem man dirty. For example, olketa samting wea kamaot from heart nao hem nogud tingting, min for killim man dae, adultery, fornication, fasin for steal, laea, fasin for tok againstim God. Olketa samting hia nao mekem man dirty; bat for kaikai and no wasim hand firstaem no mekem man dirty.”—Matthew 15:11, 18-20.
16 Wanem nao iumi savve lanem from olketa toktok bilong Jesus? Jesus hem showimaot hao wicked, dirty, and nogud fasin kamaot from heart wea laekem wicked, dirty, and nogud samting. Olsem disaepol James talem, “each wan hem kasem test taem samting wea hemseleva kavetem hem pullim and switim hem.” (James 1:14, 15) So, sapos iumi no want for duim olketa nogud sin wea Jesus storyim, iumi mas aotem and no letem eni feeling olsem for kamap insaed heart bilong iumi. Datwan minim iumi mas careful long wanem iumi readim, lukim, and herem. Distaem, olketa entertainment and advertising company mekem planti saond and piksa wea body wea sin hem laekem. Iumi shud disaed strong for no letem olketa idea olsem for stap insaed heart bilong iumi. Main point nao sapos iumi want for mekem God hapi and hem appruvim iumi, iumi mas evritaem lukluk gud for keepim heart wea klin and no dirty.—Proverbs 4:23.
Kamap Klin for Olketa Gudfala Waka
17. Why nao Jehovah mekem pipol bilong hem kamap klin?
17 Hem barava wanfala blessing and protection hao iumi, witim help bilong Jehovah, savve stap klin front long hem. (2 Corinthians 6:14-18) Nomata olsem, iumi luksavve tu hao Jehovah mekem pipol bilong hem kamap klin for wanfala spesol reason. Paul talem Titus hao Christ Jesus “givim hemseleva for iumi mekem hem savve sevem iumi from evrikaen wei for brekem law and klinim wanfala pipol for hemseleva, wea strong for olketa gudfala waka.” (Titus 2:14) Olsem pipol wea klin, iumi shud strong for olketa wanem kaen waka?
18. Hao nao iumi savve showaot iumi strong for olketa gudfala waka?
18 First and main samting, iumiseleva shud trae hard for talemaot gud nius bilong Kingdom bilong God. (Matthew 24:14) Taem iumi duim olsem, iumi givim hope long pipol evriwea for laef olowe long wanfala earth wea free from evri difren kaen dirty samting. (2 Peter 3:13) Olketa gudfala waka bilong iumi showimaot tu frut bilong spirit bilong God long evriday living, and there nao givim glory long Father bilong iumi long heven. (Galatians 5:22, 23; 1 Peter 2:12) And iumi no forgetim olketa wea no insaed truth wea kasem natural disaster or nogud samting. Iumi tingim disfala kaonsel bilong Paul: “So, from iumi garem taem wea hem fitim, iumi shud duim gud samting long evriwan, bat main wan nao long olketa wea garem sem faith olsem iumi.” (Galatians 6:10) Kaen wei for serve olsem, wea klin heart and klin samting nao muvim iumi for duim, hem samting wea mekem God hapi.—1 Timothy 1:5.
19. Wanem nao olketa blessing wea iumi bae kasem sapos iumi go ahed for keepim hae standard bilong wei for klin—long body, fasin, and spiritual wei?
19 Olsem olketa servant bilong Most Hae, iumi followim disfala toktok bilong Paul: “Mi askem iufala thru long kaenfala fasin bilong God, olketa brata, for givim body bilong iufala olsem sakrifaes wea laef, holy, wea God acceptim, wanfala holy service witim paoa bilong iufala for tingting stret.” (Romans 12:1) Letem iumi go ahed for tinghae long privilege for Jehovah klinim iumi and duim best bilong iumi for keepim hae standard long body, fasin, and spiritual wei. Wei for duim olsem bae mekem iumi respectim seleva and satisfae distaem and tu garem hope for lukim “evri samting bifor”—disfala wicked and dirty system—finis evribit taem God “mekem evri samting kamap niu.”—Revelation 21:4, 5.
Waswe, Iu Remember?
• Why nao olketa Israelite kasem planti law long wei for stap klin?
• Hao nao wei for klin long body hem mekem message wea iumi preachim hem luk naes?
• Why nao wei for klin long fasin and long spiritual saed hem moa important winim wei for klin long body?
• Hao nao iumi showimaot iumi pipol wea “strong for olketa gudfala waka”?
[Olketa Piksa long page 21]
Wei for klin long body hem mekem message wea iumi preachim for luk naes
[Piksa long page 22]
Jesus givim warning hao wicked tingting savve leadim man for duim wicked samting
[Olketa Piksa long page 23]
Olsem pipol wea kamap klin, Olketa Jehovah’s Witness strong for olketa gudfala waka