Waswe, Peter Nao Firstfala Pope?

For longtaem kam finis olketa Catholic iusim toktok bilong Jesus long Matthew 16:18 for pruvim Peter nao first wan wea leadim church. Datfala scripture sei: “Iu nao Peter, and mi bae buildim kongregeson bilong mi long disfala big ston.” Olketa raetem toktok hia long Latin languis long ceiling bilong haos wea olketa kolem St. Peter’s Basilica, long Rome.

Augustine, wanfala Church Father wea pipol respectim, firstaem hem bilivim Peter nao first wan wea leadim kongregeson. Bat gogo taem hem olo hem changem biliv bilong hem abaotem wanem Jesus talem long Matthew 16:18. Long disfala buk Retractations wea Augustine raetem hem sei, Jesus nao leader bilong church (wea minim kongregeson), and no Peter.a

Hem tru, olketa Gospel storyim Peter duim staka important samting. Samfala taem Jesus chusim Peter, James, and John for stap witim hem taem samfala important samting happen. (Mark 5:37, 38; 9:2; 14:33) Jesus givim Peter “olketa key bilong Kingdom bilong God.” Peter iusim olketa key hia for helpem pipol savve long Kingdom. Firstaem hem helpem olketa Jew and olketa wea followim religion bilong olketa Jew, then olketa Samaritan, and bihaen olketa wea no Jew. (Matthew 16:19; Acts 2:5, 41; 8:14-17; 10:45) From Peter hem man for story, samfala taem hem nao savve toktok for saed bilong olketa aposol. (Acts 1:15; 2:14) Nomata olsem, olketa samting hia no minim Peter hem leadim firstfala Christian kongregeson.

Aposol Paul sei Peter duim “waka bilong aposol for preach long pipol wea circumcise.” (Galatians 2:8) Bat samting wea Paul talem long olketa nara verse long datfala chapter showimaot Paul no minim Peter nao leadim kongregeson. Paul storyim nomoa waka bilong Peter for preach long olketa Jew.

Nomata Peter duim samfala important waka, no enitaem long Bible Peter sei hemseleva leadim kongregeson, and Peter no duim eni samting wea showimaot hem tingse hem leadim olketa disaepol. Long leta bilong hem, Peter sei nomoa hem “wanfala aposol” and “wanfala elder.”—1 Peter 1:1; 5:1.