Finis for Tingim Iumiseleva Nomoa
“[Christ] dae for evriwan mekem olketa wea laef iusim laef bilong olketa no for duim nomoa samting olketa seleva nao laekem.”—2 Corinthians 5:15.
1, 2. Wanem nao datfala komand long Bible wea muvim olketa fasfala follower bilong Jesus for winim selfish fasin?
HEM last naet bilong Jesus long earth. Insaed next tu-thri hour bae hem givim laef bilong hem for evriwan wea bae showimaot faith long hem. Long datfala naet, Jesus talem plande important samting long olketa faithful aposol bilong hem. Hem storyim tu wanfala komand saed long wanfala fasin wea olketa follower bilong hem mas garem. Hem sei: “Mi givim iufala wanfala niu komandment, for iufala mas lovem each other; olsem mi lovem iufala, iufala mas lovem each other tu. From diswan evriwan bae savve iufala nao olketa disaepol bilong mi, sapos iufala lovem each other.”—John 13:34, 35.
2 Olketa tru Christian mas showimaot love for each other wea no selfish and putim need bilong olketa Christian brata bilong olketa fastaem long need bilong olketa seleva. Olketa shud no hol bak nomata for ‘lusim laef bilong olketa for fren bilong olketa.’ (John 15:13) Hao nao olketa fasfala Christian ting long datfala niu komandment? Long raeting bilong Tertullian long mek-tu century wea olketa kolem Apology, hem talem toktok bilong nara pipol wea sei olsem abaotem olketa Christian: ‘Lukim hao olketa lovem each other; hao olketa redi tu for dae for each other.’
3, 4. (a) Why nao iumi shud faet againstim selfish fasin? (b) Wanem nao bae iumi storyim long disfala article?
3 Iumi tu mas “gohed for karem hevi bilong each other, and long wei olsem fulfillim law bilong Christ.” (Galatians 6:2) Nomata olsem, selfish fasin hem main samting wea savve stopem man for obeyim law bilong Christ and for ‘lovem God bilong iumi Jehovah witim full heart, soul, and mind and for lovem neiba bilong iumi olsem iumiseleva.’ (Matthew 22:37-39) Hem wei bilong iumi man wea no perfect for tingim seleva nomoa. And tu, disfala fasin savve kamap moa strong from hevi bilong evriday living, from wei for provaedem need bilong famili, and wei wea pipol trae for winim narawan long skul or long waka. And distaem, selfish fasin bilong olketa man hem kamap moa big. Aposol Paul givim disfala warning: “Long olketa last day . . . olketa man bae barava tingim seleva nomoa.”—2 Timothy 3:1, 2, Phillips.
4 Gogo for end bilong ministry bilong hem long earth, Jesus storyim thrifala samting wea olketa disaepol bilong hem savve duim for helpem olketa winim selfish fasin. Wanem nao thrifala samting hia, and hao nao iumi savve kasem gud samting from olketa instruction bilong hem?
Samting wea Barava Stopem Selfish Fasin!
5. Taem hem preach long north Galilee, wanem nao Jesus talem olketa disaepol bilong hem, and why nao datwan barava here nogud long olketa?
5 Jesus hem preach klosap long Caesarea Philippi long north Galilee. Maet pipol ting long disfala peaceful ples wea luk naes tumas olsem ples for hapitaem and no ples for lane abaotem wei for no selfish. Nomata olsem, taem hem stap long there Jesus start for storyim long olketa disaepol bilong hem hao “hem mas go long Jerusalem and safa long plande samting wea olketa older man and chief priest and scribe olketa bae duim, and [hao] olketa bae killim hem dae, and long mek-thri day hem bae laef bak.” (Matthew 16:21) Diswan mas barava here nogud long olketa disaepol bilong Jesus bikos kam kasem datfala taem, olketa tingse Leader bilong olketa bae startim Kingdom bilong hem long earth!—Luke 19:11; Acts 1:6.
6. Why nao Jesus tok strong long Peter?
6 Stretawe Peter “tekem [Jesus] seleva and tok strong long hem, and sei: ‘Lord, iu no tok olsem; bae disfala samting hard for kasem iu.’” Hao nao Jesus ting long diswan? “Hem tanawe from Peter and sei: ‘Go from mi Satan! Iu trae for mekem mi stambol, bikos tingting bilong iu no olsem tingting bilong God, bat olsem olketa man.’” Tingting bilong tufala barava difren! Jesus no selfish, bat hem willing for duim samting wea God askem hem, nomata hem bae dae long wanfala post tu-thri month bihaen. Peter no laekem Jesus for tingse nogud samting bae happen long hem. Hem sei: “Iu no tok olsem.” Peter no min for mekem Jesus feel nogud. Nomata olsem, Jesus tok strong long Peter for wei wea hem letem Satan affectim hem long datfala taem. Peter ‘no garem tingting bilong God, bat bilong olketa man.’—Matthew 16:22, 23.
7. Olsem Matthew 16:24 storyim, wanem nao Jesus sei olketa follower bilong hem mas duim?
7 Pipol long world distaem talem semkaen samting olsem Peter talem long Jesus. Plande taem world encouragem man for ‘duim gud samting for iuseleva’ or ‘duim samting wea isi nomoa.’ Bat Jesus encouragem olketa follower for garem difren tingting. Hem talem olketa disaepol bilong hem: “Sapos eniwan want for followim mi, hem mas no tingim nomoa wanem hemseleva laekem bat hem mas karem post for man safa long hem and gohed followim mi.” (Matthew 16:24) The New Interpreter’s Bible talem hao “toktok hia no for olketa wea no kamap disaepol yet, bat hem for olketa wea followim Christ finis for ting raonem wanem nao insaed wei for olsem disaepol.” Olketa follower bilong Jesus mas followim thrifala samting hia wea Jesus storyim long disfala scripture. Bae iumi lukluk gud long each wan long thrifala hia.
8. Wanem nao hem minim for no tingim nomoa wanem iumiseleva laekem?
8 Fasfala samting, iumi mas no tingim nomoa wanem iumiseleva laekem. Datfala Greek word wea minim man mas “no tingim nomoa samting wea hemseleva laekem” hem showimaot hao man hem willing for rejectim samting wea hemseleva laekem or wea gud for hemseleva. For no tingim nomoa wanem iumiseleva laekem hem samting wea iumi mas duim evritaem; bat long narasaed, hem no minim iumi mas garem strict living or spoelem iumiseleva. Iumi no ‘bilong iumiseleva,’ long wei wea iumi willing for givim full laef bilong iumi and evri samting insaed long datwan long Jehovah. (1 Corinthians 6:19, 20) Winim wei for tingim seleva, iumi iusim laef bilong iumi for servem and obeyim God. For no tingim nomoa wanem iumiseleva laekem, hem minim iumi disaed strong for duim will bilong God, nomata diswan maet no samting wea man wea no perfect laek for duim evritaem. Iumi showimaot iumi worshipim God nomoa taem iumi dedicate long hem and baptaes. Then iumi trae hard for fulfillim dedication bilong iumi for full laef bilong iumi.
9. (a) Taem Jesus stap long earth, post for man safa long hem piksarem wanem samting? (b) Long wanem wei nao iumi karem post bilong iumiseleva?
9 Mek-tu samting wea iumi mas duim hem for karem post bilong iumi. Long fasfala century, datfala post piksarem wei for safa, kasem shame, and dae. Olketa iusim kaen post olsem for killim dae olketa criminal or hangem body bilong criminal wea dae finis. Taem Jesus sei iumi mas karem post bilong iumiseleva, hem showimaot hao wanfala Christian mas willing for kasem persecution, wei wea pipol heitim hem, or dae tu, from wei wea hem no part bilong disfala world. (John 15:18-20) From olketa Christian standard bilong iumi mekem iumi difren from disfala world, maet pipol ‘tok nogud abaotem iumi.’ (1 Peter 4:4) Diswan savve happen long skul, wakples, or insaed long famili tu. (Luke 9:23) Nomata olsem, iumi willing for gohed strong nomata world heitim iumi bikos iumi finis for tingim iumiseleva nomoa. Jesus sei olsem: “Hapi nao iufala taem pipol tok spoelem iufala and persecutim iufala and laea for talem evri barava nogud samting againstim iufala bikos long mi. Hapi and jampjamp from iufala hapi, from reward bilong iufala hem big long heven.” (Matthew 5:11, 12) Tru nao, no eni samting hem moa important winim wei for God appruvim iumi.
10. Wanem nao hem minim for gohed followim Jesus?
10 Mek-thri samting, Jesus Christ sei iumi mas gohed followim hem. Olsem An Expository Dictionary of New Testament Words, bilong W. E. Vine hem sei, datfala word “followim” hem minim for kamap fren—“samwan wea gogo long sem wei.” Long First John 2:6 hem sei: “Man wea sei hem wan mind witim [God] garem responsibility tu for gohed wakabaot olsem hao datwan [Christ] hem wakabaot.” Hao nao Jesus wakabaot? Bigfala love wea Jesus garem for olketa disaepol bilong hem and dadi bilong hem long heven, stopem hem for selfish. Paul hem raet olsem: “Christ no tingim hemseleva nomoa.” (Romans 15:3) Nomata taem hem taed or hangre, Jesus tingim samting wea nara pipol needim olsem moa important winim need bilong hemseleva. (Mark 6:31-34) Jesus barava duim best bilong hem tu saed long waka for preach and teach abaotem Kingdom. Iumi shud followim example bilong hem taem iumi faithful for fulfillim assignment bilong iumi for ‘mek disaepol long pipol bilong evri nation, and teachim olketa for duim evri samting wea Jesus komandim.’ (Matthew 28:19, 20) Long evri samting wea hem duim, Christ showimaot example for iumi and iumi mas “followim long klos wei.”—1 Peter 2:21.
11. Why nao hem important tumas for iumi no tingim nomoa wanem iumiseleva laekem, bat for karem post bilong iumi, and gohed followim Jesus Christ?
11 Hem barava important for iumi no tingim nomoa wanem iumiseleva laekem, bat for karem post bilong iumi, and gohed followim datwan wea hem nambawan example for iumi. Taem iumi duim olsem hem stopem selfish fasin, wea hem nao fasin wea mekem hard for man showimaot love. And tu, Jesus hem sei: “Man wea want for sevem soul bilong hem bae lusim datwan; bat man wea lusim soul bilong hem for saed bilong mi bae faendem datwan. Bikos hao nao bae hem helpem man sapos hem kasem staka samting bilong disfala world bat lusim soul bilong hem? or wanem nao wanfala man bae givim for sevem soul bilong hem?”—Matthew 16:25, 26.
Iumi No Savve Servem Tufala Masta
12, 13. (a) Datfala young ruler wea askem advaes bilong Jesus hem laek for savve long wanem? (b) Jesus givim wanem kaonsel long datfala young man, and why nao olsem?
12 Samfala month bihaen datfala taem wea Jesus strongim hao olketa disaepol mas no tingim nomoa wanem olketa seleva laekem, wanfala rich young ruler kam long hem and sei: “Teacher, wanem gud samting nao mi mas duim for kasem laef olowe?” Jesus talem hem for “obeyim olketa komandment evritaem” and then hem storyim samfala long olketa komandment hia. Datfala young man hem sei: “Mi followim evri samting hia.” Luk olsem datfala man feel sure hem duim best bilong hem for obeyim olketa komandment wea stap long Law. Dastawe hem ask: “Wanem nao mi short long hem?” For ansarem datfala kwestin, Jesus givim datfala young man wanfala spesol invitation taem hem sei: “Sapos iu want for kamap perfect [“evribit,” New American Standard Bible], go and salem evri samting bilong iu and givim long poor pipol and iu bae garem olketa richfala samting long heven, and kamap follower bilong mi.”—Matthew 19:16-21.
13 Jesus luksavve hao, for datfala young man servem Jehovah witim full soul, hem need for aotem samting wea mekem laef bilong hem busy tumas—riches bilong hem. Wanfala tru disaepol bilong Christ kanduit servem tufala masta. Hem “kanduit slave for God and for Riches.” (Matthew 6:24) Hem need for garem ‘eye wea simpol’ wea lukluk nomoa long olketa spiritual samting. (Matthew 6:22) For givim evri samting wea man ownim long pipol wea poor hem showimaot man no selfish. For changem evri samting hia, Jesus offerim datfala young ruler nambawan privilege for hipimap olketa riches long heven—riches wea savve givim hem laef olowe and bae givim hem chance for rul witim Christ long heven long future. Long datfala taem, hem hard tumas for datfala young man no tingim nomoa wanem hemseleva laekem. “Hem lusim Jesus and hem barava feel nogud, from hem garem plande samting.” (Matthew 19:22) Bat samfala narawan wea followim Jesus duim difren samting.
14. Wanem nao fofala fisherman duim taem Jesus invaetem olketa for followim hem?
14 Samting olsem tufala year bifor datwan, Jesus givim semkaen invitation long fofala fisherman wea nem bilong olketa hem Peter, Andrew, James, and John. Long datfala taem, tufala long olketa trae for kasem fish, and nara tufala busy for fixim olketa net. Jesus sei long olketa: “Kam followim mi, and mi bae mekem iufala fisherman for kasem olketa man.” Gogo, fofala evriwan lusim fishing bisnis and followim Jesus go kasem taem olketa dae.—Matthew 4:18-22.
15. Wanem nao wanfala Witness bilong Jehovah lusim mekem hem savve followim Jesus?
15 Plande Christian distaem followim example bilong fofala fisherman hia winim wei for followim example bilong datfala rich young ruler. Olketa willing for lusim riches and chance for garem bignem long disfala world mekem olketa savve servem Jehovah. Deborah hem sei: “Taem mi 22 year, mi mas mekem bigfala disison.” Hem explainim olsem: “Mi studyim Bible for samting olsem sixfala month finis, and mi laek dedicatem laef bilong mi long Jehovah, bat famili bilong mi barava againstim mi. Olketa barava rich tumas and tingse bae mi spoelem nem bilong famili and mekem olketa kasem bigfala shame sapos mi kamap wanfala Witness. Olketa sei mi garem 24 hour for ting raonem wanem nao mi laekem—richfala living or truth. Famili bilong mi sei sapos mi no finis for kaban witim olketa Witness, olketa bae no leavim eni selen for mi long future. Jehovah helpem mi for mekem stretfala disison and strongim mi for followim datwan. Mi insaed full-taem service for 42 year wea go pas, and mi nating feel sorre long disison bilong mi. From mi rejectim living wea selfish and mekhae long hapitaem nomoa, mi no olsem olketa famili member bilong mi wea no hapi and laef bilong olketa no garem mining. Mi and hasband bilong mi helpem winim wan handred pipol for laenem truth. Olketa spiritual pikinini hia barava moa spesol long mi winim eni riches bilong disfala world.” Plande million Witness bilong Jehovah savve talem semkaen samting. Waswe long iu?
16. Hao nao iumi savve showimaot iumi no iusim laef bilong iumi for duim nomoa samting iumiseleva laekem?
16 Feeling for no duim nomoa samting olketa seleva laekem, muvim plande thousand Jehovah’s Witness for pioneer, wea minim for talemaot Kingdom full taem. Olketa narawan wea living bilong olketa stopem olketa for join insaed long full-taem ministry, garem feeling for laek pioneer and duim best bilong olketa for sapotim waka for preach abaotem Kingdom. Olketa dadi and mami showimaot semkaen fasin taem olketa spendem taem and sakrifaesim samting wea olketa interest long hem mekem olketa savve givim spiritual training long olketa pikinini. Iumi evriwan savve duim samfala samting wea savve showimaot Kingdom hem fasfala samting long laef bilong iumi.—Matthew 6:33.
Love Bilong Hu Nao Muvim Iumi?
17. Wanem nao muvim iumi for no selfish?
17 Hem no isi evritaem for showimaot love wea no selfish. Bat ting raonem wanem nao muvim iumi for duim datwan. Paul hem raet: “Love wea Christ garem hem muvim mifala, from mifala luksavve hao wanfala man dae for evriwan . . . And hem dae for evriwan mekem olketa wea laef iusim laef bilong olketa no for duim nomoa samting olketa seleva nao laekem, bat for live followim man wea dae for olketa and wea resurrect.” (2 Corinthians 5:14, 15) Love bilong Christ nao muvim iumi for finis for tingim seleva. Datwan savve barava muvim iumi! From Christ hem dae for iumi, waswe, iumi luksavve long responsibility bilong iumi for iusim laef bilong iumi for hem? Tru nao, wei wea iumi tinghae long bigfala love wea God and Christ showimaot for iumi, muvim iumi finis for dedicatem laef bilong iumi long God and kamap olketa disaepol bilong Christ.—John 3:16; 1 John 4:10, 11.
18. Why nao hem gud tumas for iumi no iusim laef bilong iumi for iumiseleva nomoa?
18 Waswe, iumi kasem eni gud samting taem iumi no iusim laef bilong iumi for iumiseleva nomoa? Bihaen datfala rich young ruler rejectim invitation bilong Christ and lusim hem, Peter hem sei long Jesus: “Mifala lusim evri samting finis and followim iu; wanem samting nao bae mifala kasem?” (Matthew 19:27) Peter and olketa nara aposol barava no tingim wanem olketa seleva laekem. Wanem nao bae olketa kasem olsem reward for datwan? Fastaem Jesus storyim privilege wea olketa bae kasem for rul witim hem long heven. (Matthew 19:28) Long datfala semtaem, Jesus storyim olketa blessing wea evri follower bilong hem bae kasem. Hem sei: “No eniwan wea lusim haos or brata or sista or mami or dadi or pikinini or garden for saed bilong mi and for saed bilong gud nius wea bae no garem wan handred taems moa long disfala taem . . . and laef olowe long niu world wea bae kam.” (Mark 10:29, 30) Iumi kasem staka samting winim wanem iumi lusim. Olketa spiritual dadi, mami, brata, sista, and pikinini barava important tumas winim eni samting wea iumi lusim for Kingdom! Laef bilong Peter nao barava moabeta winim laef bilong datfala rich young ruler!
19. (a) Trufala hapi hem kamaot from wanem? (b) Bae iumi storyim wanem samting long nextfala article?
19 Thru long toktok bilong hem and samting wea hem duim, Jesus showimaot hao hapi hem kamaot from wei for givim samting and servem nara pipol, no from selfish fasin. (Matthew 20:28; Acts 20:35) Taem iumi no iusim laef bilong iumi for duim nomoa samting wea iumiseleva laekem bat iumi gohed followim Christ, iumi feel barava satisfae long laef bilong iumi distaem and iumi garem hope for laef olowe long future. Hem tru, taem iumi duim olsem, iumi bilong Jehovah nao. Iumi kamap olketa slave bilong God. Why nao disfala wei for slave hem gud tumas? Hao nao datwan affectim olketa disison bilong iumi? Nextfala article bae storyim olketa kwestin hia.
Waswe, Iu Remember?
• Why nao iumi shud faet againstim selfish fasin?
• Wanem nao hem minim for no tingim nomoa wanem iumiseleva laekem, karem post bilong iumi, and for gohed followim Jesus?
• Wanem nao muvim iumi for no iusim laef bilong iumi for duim nomoa samting iumiseleva laekem?
• Why nao hem gud tumas for iumi no iusim laef bilong iumi for iumiseleva nomoa?
[Piksa long page 11]
“Lord, iu no tok olsem; bae disfala samting hard for kasem iu”
[Piksa long page 13]
Wanem nao stopem datfala young ruler for followim Jesus?
[Olketa Piksa long page 15]
Love nao muvim Olketa Jehovah’s Witness for strong for talemaot Kingdom