Go Ahed for Followim Olketa Samting Iufala Lanem

“Evri samting wea iufala lanem and acceptim and herem and lukim long saed bilong mi, followim evri samting hia; and God bilong peace bae stap witim iufala.”—PHILIPPIANS 4:9.

1, 2. Waswe, Bible affectim living bilong pipol wea sei olketa Christian and acceptim Bible? Explainim.

“RELIGION Kamap Moa Strong, bat Gudfala Fasin Hem Gogo Daon.” Diswan hem heding insaed datfala niusleta Emerging Trends wea storyim wanem olketa faendemaot from wanfala survey long United States. Long datfala kantri, luk olsem namba bilong pipol wea attendim church and sei religion hem barava important long olketa hem kamap moa big. Bat, datfala report sei: “Nomata olketa gudfala namba hia, staka pipol bilong America kwestinim paoa wea faith garem long living bilong pipol wanwan and olsem wanfala community.”

² Diswan hem no wei bilong datfala kantri nomoa. Evriwea long world, staka pipol wea sei olketa Christian and acceptim Bible no letem Bible affectim laef bilong olketa. (2 Timothy 3:5) Leader bilong wanfala research grup hem sei: “Mifala still respectim Bible, bat for spendem taem for readim, studyim, and followim—datwan hem samting bilong bifor.”

3. (a) Hao nao Bible affectim olketa wea kamap trufala Christian? (b) Hao nao olketa follower bilong Jesus followim kaonsel bilong Paul long Philippians 4:9?

³ Bat, diswan hem difren for olketa trufala Christian. Wei for followim kaonsel from Word bilong God hem changem tingting and fasin bilong olketa. And datfala niu fasin wea olketa showimaot hem isi for pipol lukim. (Colossians 3:5-10) For olketa wea followim Jesus, Bible hem no buk wea stap nating long cupboard. Aposol Paul talem olketa Christian long Philippi: “Evri samting wea iufala lanem and acceptim and herem and lukim long saed bilong mi, followim evri samting hia; and God bilong peace bae stap witim iufala.” (Philippians 4:9) Olketa Christian duim moa samting winim wei for acceptim truth from Word bilong God. Olketa duim samting followim wanem olketa lanem, evritaem followim olketa Bible kaonsel—insaed famili, long wakples, insaed kongregeson, and long evri nara part long laef.

4. Why nao hem wanfala challenge for followim olketa law bilong God?

⁴ For followim olketa law and principle bilong God hem no isi. Iumi stap insaed wanfala world wea anda long paoa bilong Devil Satan, wea Bible kolem “god bilong disfala system.” (2 Corinthians 4:4; 1 John 5:19) So, hem important for iumi gard againstim eniting wea bae stopem iumi for faithful long Jehovah God. Hao nao iumi savve keepim faithful fasin?

Hol Strong Long “Datfala Plan Bilong Healthy Toktok”

5. Wanem nao mining bilong toktok bilong Jesus: “Followim mi olowe”?

⁵ Wanfala part bilong wei for followim wanem iumi lanem hem for loyal for saportim trufala worship, nomata olketa wea no biliv againstim iumi. Fasin for stand strong hem needim hard waka. Jesus hem sei: “Sapos eniwan want for kam bihaenem mi, hem mas lusim will bilong hemseleva and karem torture stake bilong hem and followim mi olowe.” (Matthew 16:24) Jesus no sei iumi shud followim hem for wanfala week, wanfala month, or wanfala year nomoa. Bat, hem sei: “Followim mi olowe.” Toktok bilong hem showimaot hao iumi kanduit kamap wanfala disaepol bilong hem for lelebet taem nomoa. For loyal for saportim trufala worship hem minim for faithful long wei wea iumi chus for followim nomata wanem samting kamap. Hao nao iumi savve duim diswan?

6. Wanem nao datfala plan bilong healthy toktok wea olketa first-century Christian lanem from Paul?

⁶ Paul encouragem man wea waka witim hem, Timothy, olsem: “Go ahed for followim datfala plan bilong healthy toktok wea iu herem from mi witim faith and love wea join witim Christ Jesus.” (2 Timothy 1:13) Wanem nao Paul hem minim? Greek word for “plan” hem really storyim wanfala drawing bilong wanfala artist. Nomata hem no luk evribit olsem really samting, hem showim olketa sheip and kala wea mekem man wea interest garem main idea abaotem wanem nao man drawim. Olsem tu, plan bilong truth wea Paul teachim long Timothy and olketa narawan hem no for ansarem evribit evri kwestin wea bae kamap. Nomata olsem, olketa teaching hia hem inaf—olsem wanfala drawing—for mekem honest pipol garem main idea bilong wanem Jehovah expectim from olketa. Bat for mekem God hapi, olketa need for hol strong long datfala plan bilong truth thru long wei for followim wanem olketa lanem.

7. Hao nao olketa Christian savve hol strong long plan bilong healthy toktok?

⁷ Long first century, olketa man olsem Hymenaeus, Alexander, and Philetus apim olketa idea wea no fitim “datfala plan bilong healthy toktok.” (1 Timothy 1:18-20; 2 Timothy 2:16, 17) Hao nao olketa firstfala Christian fit for stap klia from wei for letem olketa apostate pullim olketa go difren? Thru long wei for studyim gud olketa toktok bilong Bible and followim long living. Olketa wea followim example bilong Paul and olketa nara faithful man fit for luksavve and rejectim eniting wea no followim plan bilong truth wea olketa lanem. (Philippians 3:17; Hebrews 5:14) Winim wei for ‘olketa kwestin and wei for argue abaotem olketa word spoelem tingting bilong olketa,’ olketa muv ahed long stretfala wei bilong worship bilong God. (1 Timothy 6:3-6) Iumi duim sem samting taem iumi go ahed for followim olketa truth iumi lanem. Hem barava strongim faith bilong iumi for lukim staka million evriwea long earth wea go ahed for servem Jehovah olketa hol strong long plan bilong Bible truth wea olketa lanem.—1 Thessalonians 1:2-5.

Rejectim “Olketa Giaman Story”

8. (a) Hao nao Satan trae for distroem faith bilong iumi distaem? (b) Wanem warning from Paul nao stap long 2 Timothy 4:3, 4?

⁸ Satan hem trae for brekem faithful fasin bilong iumi thru long wei for plantim daot abaotem olketa samting wea iumi lanem finis. Distaem, olsem long first century, olketa apostate and samfala narawan laek for spoelem faith bilong olketa wea honest. (Galatians 2:4; 5:7, 8) Samfala taem olketa iusim nius pipol for spreadim giaman story or for laea stret abaotem wei wea pipol bilong Jehovah duim samting and why. Paul givim warning finis hao olketa bae win for tanem samfala awe from truth. Hem raet: “From wanfala taem bae kam wea olketa bae no acceptim healthy toktok, bat, for fitim wanem olketa laekem, olketa bae hipimap olketa teacher for switim ear bilong olketa; and olketa bae tanem ear bilong olketa awe from truth, and olketa bae lisin long olketa giaman story.”—2 Timothy 4:3, 4.

9. Wanem nao maet Paul tingim taem hem sei “olketa giaman story”?

⁹ Winim wei for hol strong long plan bilong healthy toktok, “olketa giaman story” kasholem interest bilong samfala. Olketa wanem giaman story? Maet Paul tingim olketa kastom story, olsem olketa insaed Tobit,a wanfala buk bilong apocrypha. Olketa giaman story hia maet olketa story wea gogo raon for kasholem interest bilong pipol. For “fitim wanem olketa laekem,” samfala moa maet letem pipol wea no keepim standard bilong God or wea judgem olketa wea lead insaed long kongregeson, for giamanim olketa. (3 John 9, 10; Jude 4) Nomata wanem nao mekem olketa stambol, samfala chus for followim laea winim truth from Word bilong God. Gogo olketa stop for followim samting olketa lanem, and diswan spoelem olketa long spiritual wei.—2 Peter 3:15, 16.

10. Wanem nao samfala giaman story bilong distaem, and hao nao John mekhae long need for careful?

¹⁰ Iumi savve stap klia from wei for tan go long olketa giaman story distaem, thru long wei for lukluk gud and chus gud saed long wanem iumi herem and readim. Olsem example, radio and television hem planti taem mekhae long dirty fasin. Staka pipol mekhae long wei for daotem sapos God hem stap and tu wei for biliv God no stap. Pipol for tokdaonem Bible mekfani long wei wea Bible sei hem kam from God. And olketa apostate distaem go ahed for plantim daot long mind bilong olketa Christian for trae and spoelem faith bilong olketa. Abaotem wanfala danger wea klosap semsem wea kamap from olketa giaman profet long first century, aposol John givim warning: “Olketa wea mi lovem, no bilivim evri toktok from spirit, bat testim evri toktok from spirit for lukim sapos olketa kam from God, bikos planti false profet stap finis long world.” (1 John 4:1) So iumi need for careful.

11. Wanem nao wanfala wei for testim and faendaot sapos iumi insaed long faith?

¹¹ Dastawe, Paul hem raet: “Go ahed for testim sapos iufala insaed long faith.” (2 Corinthians 13:5) Datfala aposol encouragem iumi for go ahed for testim iumiseleva sapos iumi go ahed yet for followim full Christian biliv. Sapos iumi garem wei for laek lisin long pipol wea komplen olowe, iumi need for lukluk long iumiseleva witim prea. (Psalm 139:23, 24) Waswe, iumi garem wei for lukaotem wik point bilong pipol bilong Jehovah? Sapos olsem, why? Waswe, hem from iumi feel nogud long samting samwan talem or duim long iumi? Sapos olsem, waswe, iumi garem yet gudfala balance long wei for tingim olketa samting hia? Eni hard samting iumi feisim distaem hem no for olowe. (2 Corinthians 4:17) Sapos iumi kasem wanfala test insaed kongregeson, why nao iumi shud finis from wei for servem God? Sapos iumi feel nogud from wanfala samting, bae hem moabeta for iumi duim best for stretem and then leavim long hand bilong Jehovah.—Psalm 4:4; Proverbs 3:5, 6; Ephesians 4:26.

12. Wanem gud example nao pipol bilong Beroea showim for iumi?

¹² Winim wei for judgem hard tumas, letem iumi keepim gudfala spiritual wei for tingim information wea iumi kasem from wei for study seleva and from olketa kongregeson meeting. (1 Corinthians 2:14, 15) And winim wei for kwestinim Word bilong God, hem moa wise for garem tingting bilong olketa long Beroea long first century wea olketa lukluk gud long olketa Scripture! (Acts 17:10, 11) Then, letem iumi followim wanem iumi lanem, rejectim olketa giaman story and hol strong long truth.

13. Hao nao maet iumi no min for duim bat iumi talem giaman story?

¹³ Iumi need for gard againstim narakaen giaman story. Staka story for kasholem interest bilong pipol gogo raon, staka taem thru long E-mail. Hem wise for iumi careful witim olketa story olsem, especially sapos iumi no savve wea nao olketa start from. Nomata sapos wanfala Christian wea staka respectim nao sendem datfala experience or story, maet hem no savve long really samting wea happen. Dastawe hem important for iumi careful long wei for talem moa or sendem raon olketa story wea iumi no really sure long hem. For sure, iumi bae no laek for talem moa “kastom story,” or “giaman story wea spoelem holy samting.” (1 Timothy 4:7; New International Version) From iumi garem responsibility for talem tru samting long each other, hem wise for iumi stap klia from eniting wea savve kosim iumi for talem samting wea bihaen showaot olsem hem no tru.—Ephesians 4:25.

Gud Samting wea Kamaot From Wei for Followim Truth

14. Olketa wanem gud samting nao kamaot from wei for followim olketa samting wea iumi lanem from Word bilong God?

¹⁴ Wei for followim wanem iumi lanem thru long study seleva and olketa Christian meeting bae mekem iumi kasem planti gud samting. Olsem example, maet iumi faendem hao iumi bae fren gud moa witim olketa wea garem sem biliv. (Galatians 6:10) Hao iumi feel abaotem olketa samting bae kamap moabeta taem iumi followim olketa Bible principle. (Psalm 19:8) And tu, taem iumi followim wanem iumi lanem, iumi ‘mekem teaching bilong God luk gud tumas’ and bae pullim kam pipol long trufala worship.—Titus 2:6-10.

15. (a) Hao nao wanfala young wan kasem strong for givim witness long skul? (b) Wanem nao iu lanem from disfala experience?

¹⁵ Midolwan Olketa Jehovah’s Witness hem staka young wan wea followim wanem olketa lanem thru wei wea olketa seleva studyim Bible and olketa Christian pablikeson and taem olketa attendim evritaem olketa kongregeson meeting. Gudfala fasin bilong olketa hem bigfala witness long olketa teacher and olketa nara student long skul. (1 Peter 2:12) Tingim Leslie, wanfala 13-year-old girl long United States. Hem sei bifor hem savve faendem hard for story long olketa skulfren abaotem faith bilong hem, bat wanday datwan hem change. “Class story abaotem wei wea pipol trae for sellim olketa samting. Wanfala girl apim hand and sei Olketa Jehovah’s Witness tu olsem.” Olsem wanfala Witness, wanem nao Leslie duim? Hem sei: “Mi defendim faith bilong mi, wea mi sure hem mekem evriwan sapraes, from planti taem mi kwaet long skul.” Wanem nao kamaot from wei wea Leslie no fraet? “Mi fit for givim wanfala brochure and wanfala tract long datfala student, bikos hem garem olketa nara kwestin,” Leslie hem sei. Jehovah hapi tumas taem olketa young wan wea followim wanem olketa lanem no fraet for givim witness long skul!—Proverbs 27:11; Hebrews 6:10.

16. Hao nao Theocratic Ministry Skul hem helpem wanfala young Witness?

¹⁶ Nara example hem bilong Elizabeth. From taem hem seven year and evri year wea hem go long primary skul, disfala young girl invaetem olketa teacher bilong hem go long Kingdom Hall evritaem hem garem wanfala assignment long Theocratic Ministry Skul. Sapos wanfala teacher no savve attend, Elizabeth stap bihaen skul and givim tok for teacher herem. Long lastfala year bilong hem long hae skul, Elizabeth raetem wanfala ten-page report abaotem olketa gud samting wea man kasem from Theocratic Ministry Skul and hem storyim front long fofala teacher. Olketa askem hem tu for showim hao nao for givim wanfala tok long Theocratic Ministry Skul, wea hem chusim subject “Why Nao God Letem Wicked Fasin for Go Ahed?” Education program wea Olketa Jehovah’s Witness provaedem thru long Theocratic Ministry Skul hem barava helpem Elizabeth. Hem wanfala nomoa long staka young wan wea givim praise long Jehovah taem olketa followim olketa samting wea olketa lanem from Word bilong hem.

17, 18. (a) Bible givim wanem kaonsel saed long honest fasin? (b) Hao nao honest fasin bilong wanfala Jehovah’s Witness hem affectim wanfala man?

¹⁷ Bible encouragem olketa Christian for duim evri samting long honest wei. (Hebrews 13:18) Wei for no honest savve spoelem wei for fren witim pipol and, moa important, witim Jehovah. (Proverbs 12:22) Fasin wea mekem pipol trustim iumi hem pruvim wei wea iumi followim wanem iumi lanem, and hem muvim staka for respectim Olketa Jehovah’s Witness.

¹⁸ Tingim disfala experience bilong Phillip, wanfala man long army. Hem lusim wanfala cheque wea hem saenem finis bat no raetem eni amount long hem and no savve hem lusim kasem taem hem kasem moa long post. Wanfala Jehovah’s Witness nao faendem datfala cheque, and wanfala note stap witim wea sei biliv bilong religion bilong hem nao muvim hem for givim bak. Phillip barava sapraes. Hem sei: “Olketa fit for aotem full $9,000 bilong mi!” Wanfala taem bifor, hem feel nogud from samwan stealim hat bilong hem long church. Wanfala wea hem savve long hem nao tekem hat bilong hem, bat wanfala stranger nao givim go bak wanfala cheque wea hem savve iusim for tekem evri selen bilong hem! Tru tumas, olketa honest Christian givim honor long Jehovah God!

Go Ahed for Followim Wanem Iu Lanem

19, 20. Olketa wanem gud samting nao bae iumi kasem taem iumi followim olketa samting iumi lanem from Bible?

¹⁹ Olketa wea followim wanem olketa lanem from Word bilong God kasem staka gud samting. Disaepol James hem raet: “Man wea luk insaed long perfect law wea bilong freedom and wea go ahed long diswan, disfala man, from hem kamap, no man wea herem samting and forgetim, bat man wea duim datfala waka, hem bae hapi taem hem duim datwan.” (James 1:25) Tru nao, sapos iumi duim samting followim wanem iumi lanem from Bible, iumi bae garem trufala hapi and bae moa fit for deal witim olketa hevi long living. Winim evri samting, iumi bae garem blessing bilong Jehovah and hope bilong laef olowe!—Proverbs 10:22; 1 Timothy 6:6.

²⁰ So, go ahed for waka hard for studyim Word bilong God. Hipap evritaem witim olketa wea worshipim Jehovah, and lisin gud long information wea iu kasem long olketa Christian meeting. Followim wanem iu lanem, go ahed for followim, and “God bilong peace bae stap witim iufala.”—Philippians 4:9.

[Footnote]

Waswe, Iu Remember?

• Wanem nao “datfala plan bilong healthy toktok,” and hao nao iumi savve hol strong long hem?

• Olketa wanem “giaman story” nao iumi need for rejectim?

• Olketa wea duim wanem olketa lanem from Word bilong God kasem wanem gudfala samting?

[Piksa long page 17]

Hao nao olketa firstfala Christian fit for stap klia from wei for letem olketa apostate pullim olketa go difren?

[Olketa Piksa long page 18]

Nius, internet, and olketa apostate savve mekem daot kamap

[Piksa long page 19]

Hem no wise for sharem raon olketa report wea no garem pruv

[Olketa Piksa long page 20]

Long wakples, long skul, and olketa nara ples, Olketa Jehovah’s Witness followim wanem olketa readim insaed Word bilong God