Waka Hard for Strongim Marit wea Garem Problem
“Mi laek talem samting long olketa wea marit wea hem no toktok bilong mi bat hem toktok bilong Lord.”—1 COR. 7:10.
WASWE, IU SAVVE MINIM KAM?
Hao nao God ting long tufala wea marit?
Wanem nao olketa elder savve duim for helpem olketa Christian wea marit bilong olketa garem problem?
Hao nao iumi shud ting long marit?
1. Wanem nao tingting bilong olketa Christian abaotem marit, and why nao olsem?
TAEM tufala Christian marit, tufala talem wanfala promis front long God. Diswan hem samting wea tufala mas barava ting strong long hem. (Eccl. 5:4-6) From Jehovah nao startim marit, hem nao “joinim” hasband and waef tugeta. (Mark 10:9) Samfala taem olketa law bilong kantri saed long marit hem difren from wanem Bible talem. Bat olketa wea worshipim Jehovah mas garem sem tingting olsem hem abaotem marit promis bilong tufala. Diswan hem tru nomata tufala no insaed long truth taem tufala marit.
2. Wanem nao olketa kwestin wea iumi bae storyim?
2 Marit savve mekem hasband and waef barava hapi. Bat wanem nao iumi savve duim sapos marit bilong iumi garem problem? Waswe, marit wea garem problem savve kamap gud moa? Wanem nao savve helpem hasband and waef wea no stap gud tugeta?
WASWE, BAE TUFALA HAPI OR NOMOA?
3, 4. Wanem nao savve happen sapos iumi no mekem wise disison taem iumi chusim marit partner?
3 Taem Christian hasband and waef stap gud tugeta, tufala hapi and datwan mekhae long Jehovah. Bat sapos marit hem brekdaon, datwan savve mekem man barava sorre tumas and kosim olketa bigfala problem. Olketa singol Christian wea redi for marit and wea followim kaonsel bilong God savve garem gudfala marit. Bat Christian wea no mekem wise disison taem hem chusim hasband or waef bilong hem savve feel nogud and sorre bihaen. Olsem example, samfala young wan frenim samwan taem olketa no fit for deal witim olketa responsibility bilong marit laef. Samfala moa frenim samwan wea olketa meetim long Internet. Olketa kwiktaem for marit bat bihaen olketa sorre nao. Samfala narawan duim bigfala sin taem tufala fren, and nomata tufala marit bihaen, hasband no respectim waef and waef no respectim hasband tu.
4 Samfala Christian no maritim “wanfala disaepol bilong Christ” and olketa kasem hard taem bikos partner bilong olketa no worshipim Jehovah. (1 Cor. 7:39) Sapos diswan hem kasem iu, askem God for forgivim iu and helpem iu. Jehovah no aotem olketa problem wea man kasem from hem duim mistek, bat sapos man hem barava repent, Jehovah savve helpem hem for no givap. (Ps. 130:1-4) So traem best bilong iu for mekem God hapi, and “hapi wea Jehovah givim” bae strongim iu.—Neh. 8:10.
TAEM MARIT GAREM PROBLEM
5. Olketa wea marit bilong olketa garem problem mas no garem wanem kaen tingting?
5 Samfala wea marit bilong olketa garem problem maet garem tingting olsem: ‘Ating bae mi finisim nomoa marit bilong mi. Sapos mi maritim narawan nao maet bae mi hapi!’ Maet olketa laek for lusim partner bilong olketa and ting olsem: ‘Mi laek for free moa! Ating bae mi divorcem hem. Nomata mi no free for divorce followim wanem Bible talem, mi savve separate from hem and garem hapi laef moa.’ Olketa Christian shud no garem kaen tingting olsem bat olketa mas traem best for followim kaonsel bilong God and strongim marit bilong olketa.
6. Wanem nao mining bilong samting wea Jesus talem long Matthew 19:9?
6 Maet wanfala Christian wea divorce hem free for marit moa, or maet nomoa tu. Jesus hem sei: “Eniwan wea lusim waef bilong hem and maritim narawan bae spoelem waef bilong hem bikos datwan hem adultery. Bat sapos waef hem durong, hem savve lusim hem.” (Matt. 19:9) Wei for durong hem minim wei for duim adultery and olketa nara bigfala sin saed long sex. Christian wea ting for divorce nomata hem or marit partner bilong hem no durong, mas prea long God for helpem hem garem stretfala tingting.
7. Sapos marit bilong tufala Christian hem brekdaon, wanem nao maet tingting bilong pipol?
7 Taem marit hem brekdaon, maet datwan showimaot man hem no fren gud witim God. Aposol Paul talem barava tru samting taem hem sei: “Sapos man no savve hao for lukaftarem gud famili bilong hem, hard tumas for hem lukaftarem kongregeson bilong God.” (1 Tim. 3:5) Taem tufala evriwan Christian bat marit bilong tufala hem brekdaon, maet pipol tingse tufala preach abaotem wei for garem hapi marit, batawea tufala seleva no followim datwan.—Rom. 2:21-24.
8. Maet wanem nao problem sapos Christian hasband and waef disaed for separate or divorce?
8 Sapos Christian hasband and waef ting for separate or divorce, bat no garem stretfala reason from Bible for duim datwan, luk olsem olketa no fren gud witim Jehovah. Maet wanfala or tufala evriwan no followim olketa Bible principle. Sapos tufala evriwan “trustim Jehovah long full heart,” tufala fit for sevem marit bilong tufala.—Readim Proverbs 3:5, 6.
9. Wanem blessing nao samfala Christian kasem from olketa no kwiktaem lusim partner bilong olketa?
9 Staka marit kamap gud nomata long firstaem hem luk olsem olketa marit hia bae brekdaon. Plande Christian wea garem problem long marit bat wea no kwiktaem for lusim partner bilong olketa, kasem gud samting bihaen. Olsem example, tingim samting wea savve happen taem hasband hem no Witness. Aposol Peter hem sei: “Iufala olketa waef mas stap anda long hasband bilong iufala. Then nomata sapos eniwan long olketa no obeyim toktok bilong God, gudfala wei bilong waef nao bae mekem olketa biliv nomata waef no talem eni samting. Diswan hem bikos olketa lukim gudfala wei bilong iufala and lukim iufala showimaot bigfala respect.” (1 Pet. 3:1, 2) From Christian hem showimaot gudfala wei, maet partner wea no Witness hem kam insaed long truth. Christian wea no lusim partner bilong hem and sevem marit bilong hem, hem mekhae long God, and full famili savve kasem blessing.
10, 11. Wanem kaen samting nao maet mekem marit garem problem, and wanem help nao Christian savve kasem?
10 Staka singol Christian chus for maritim nara Christian wea baptaes bikos olketa laek for mekem Jehovah hapi. Nomata olsem, maet samfala samting hem change wea olketa no expectim. Olsem example, maet marit partner start for garem olketa problem saed long feeling. Or maet hem stop for go preaching and kamap pablisa wea inactive. Tingim samting wea kasem Linda,a wea hem wanfala strong pablisa and gudfala mami. Hem no savve wanem for duim taem hasband bilong hem start for duim samting wea no stret. From hasband no repent, hem disfellowship. Olketa Christian wea kasem kaen samting olsem maet tingse no eni wei for tufala stap gud nao. Wanem nao olketa savve duim?
11 Maet iu ting olsem: ‘Hao, mi mas traem best for sevem marit bilong mi nomata wanem samting hem happen?’ Diswan hem samting wea iuseleva nao mas disaedem. Bat olketa gudfala reason stap for no givap long marit wea kasem problem. God barava lovem olketa Christian wea konsens bilong olketa mekem olketa for no givap nomata marit bilong olketa kasem problem. (Readim 1 Peter 2:19, 20.) Jehovah bae iusim toktok and holy spirit bilong hem for helpem olketa Christian sapos olketa barava traem best for strongim marit bilong olketa.
OLKETA REDI FOR HELPEM IU
12. Hao nao olketa elder bae ting long iumi sapos iumi askem olketa for helpem iumi?
12 Sapos marit bilong iu garem problem, iu savve askem help from olketa mature Christian. Olketa elder nao shepherd long kongregeson and bae hapi for showim iu kaonsel bilong God insaed long Bible. (Acts 20:28; Jas. 5:14, 15) Olketa elder bae no ting daonem iu sapos iu and marit partner storyim bigfala problem wea iutufala garem and askem olketa for help. Olketa bae lovem and respectim iutufala bikos olketa luksavve iutufala barava laek for mekem God hapi.
13. Wanem kaonsel nao stap long 1 Corinth 7:10-16?
13 Taem olketa elder helpem hasband or waef wea marit partner no Witness, olketa savve iusim kaonsel bilong Paul, wea sei: “Mi laek talem samting long olketa wea marit wea hem no toktok bilong mi bat hem toktok bilong Lord. Waef mas no lusim hasband bilong hem. Bat sapos hem lusim hasband bilong hem, hem mas gohed for stap singol nomoa, or go bak long hasband bilong hem. Hasband tu mas no lusim waef bilong hem. . . . Waef, iu no savve sapos iu bae sevem hasband bilong iu or nomoa. And hasband, iu no savve tu sapos iu bae sevem waef bilong iu or nomoa.” (1 Cor. 7:10-16) Hem bigfala blessing taem marit partner hem start for worshipim Jehovah!
14, 15. (a) Wanem nao samfala reason why wanfala Christian waef maet disaed for lusim hasband bilong hem? (b) Why nao Christian mas prea abaotem diswan and no laea long hemseleva?
14 Samfala taem wanfala Christian waef maet disaed for “lusim” hasband bilong hem. Olsem example, samfala waef chus for separate bikos partner no provaed for famili gogo olketa no garem selen or kaikai. Samfala waef chus for separate bikos partner killim hem nogud gogo hem tingse laef bilong hem stap long danger, or partner duim samting wea mekem hem barava hard for hem worshipim God.
15 Man seleva nao bae disaed for separate or nomoa. Bat olketa Christian mas prea abaotem diswan and no laea long olketa seleva. Olsem example, waswe, partner wea no biliv stopem Christian for no worshipim Jehovah? Or waswe, datfala Christian tu garem blame bikos hem no evritaem studyim Bible seleva, attendim olketa meeting, or duim preaching waka?
16. Why nao olketa Christian mas no kwiktaem disaed for divorce?
16 Iumi mas no kwiktaem disaed for divorce. Iumi tinghae long wei wea iumi fren witim God, and iumi tinghae and respectim tu marit wea hem present from God. From iumi worshipim Jehovah, iumi no laek for disaedem eni samting wea bae mekem pipol garem nogud tingting abaotem Jehovah and wea spoelem nem bilong hem. Dastawe hem barava rong for man no faithful long marit partner taem hem plan for lusim hem mekem hem savve maritim narawan.—Jer. 17:9; Mal. 2:13-16.
17. Wanem taem nao bae Christian fit for sei ‘God hem mekem mi for garem peace’?
17 Olketa Christian wea marit partner bilong olketa no Witness mas waka hard for keepim marit bilong olketa strong. Bat sapos datfala marit hem brekdaon nomata Christian traem best for sevem datwan, hem shud no feel guilty sapos partner wea no Witness disaed for lusim hem. Paul hem sei: “Sapos datwan wea no biliv hem go, letem hem go. Sapos olsem, datfala brata or sista no need for stap witim hem nao. God hem mekem iufala for garem peace.”—1 Cor. 7:15.b
TRUST LONG JEHOVAH
18. Nomata maet hem hard for sevem marit, wanem gud samting nao savve kamaot from wei for traem best for sevem datwan?
18 Taem marit bilong iumi garem problem, iumi shud prea for Jehovah mekem iumi strong and evritaem trust long hem. (Readim Psalm 27:14.) Tingim Linda wea iumi storyim finis. For staka year hem traem best for sevem marit bilong hem, bat gogo tufala divorce. Waswe, hem tingse hem hard waka nating? Hem sei: “Nomoa. Wei wea mi waka hard mekem pipol tinghae long truth. Mi garem gudfala konsens. Gud samting nao, diswan helpem dota bilong mitufala for strong long truth and gogo hem dedicate long Jehovah.”
19. Wanem nao savve happen sapos man traem best for sevem marit bilong hem?
19 Wanfala Christian sista wea nem bilong hem Marilyn, hem hapi from hem trustim God and traem best for sevem marit bilong hem. Hem tingting for separate from hasband bikos hem no provaedem need bilong famili, and hasband duim samfala samting wea mekem hem barava hard for Marilyn worshipim Jehovah. Long bifor, hasband bilong hem wanfala elder, bat hem duim samfala raverave samting saed long bisnis. Then hem start for misstim olketa meeting. Bihaen wanfala terrorist attak long taon bilong tufala, sista hia fraet fogud and hem faendem hard for story gud witim hasband bilong hem. Bat then hem luksavve hem tu garem blame for olketa marit problem bilong tufala and hem mas changem samfala samting. Tufala start for story tugeta moa, duim famili study, and attendim olketa meeting evritaem. Olketa elder kaen and helpem tufala. No longtaem bihaen, marit bilong tufala strong bak and tufala hapi fogud. Bihaen, hasband kasem samfala privilege long kongregeson. Marilyn sei hem barava hard samting bat hem lane from datwan, and gud samting nao kamaot.
20, 21. Wanem nao iumi mas disaed strong for duim long marit bilong iumi?
20 Nomata iumi singol or marit, iumi mas gohed strong and mas trust long Jehovah evritaem. Sapos marit bilong iumi garem problem, iumi mas traem best for stretem datwan, and no forget, hasband and waef “no tufala body, bat wanfala nomoa.” (Matt. 19:6) And sapos iu gohed stap witim marit partner bilong iu wea no Witness nomata iutufala garem problem, maet gogo iu hapi sapos hem start for worshipim Jehovah.
21 Nomata wanem hem happen, iumi mas evritaem duim samting wea givim gudfala witness long pipol wea no worshipim Jehovah. Sapos marit bilong iumi garem bigfala problem and iumi tingting for lusim partner bilong iumi, iumi mas ting raonem why iumi laek for duim datwan and no laea long iumiseleva. Iumi mas prea strong long Jehovah, ting raonem wanem Bible talem, and askem help from olketa elder. Barava important samting nao, iumi mas disaed strong for evri samting wea iumi duim hem mekem Jehovah God hapi, and iumi mas showimaot iumi tinghae and respectim marit wea hem nambawan present from Jehovah.
[Olketa Footnote]
a Mifala changem olketa nem.
b Lukim buk “Gohed Kasem Gud Samting From Love Bilong God,” page 219-222; The Watchtower bilong November 1, 1988, page 26-27; September 15, 1975, page 575.
[Blurb long page 10]
Plande Christian wea garem problem long marit bat no kwiktaem givap kasem gud samting
[Blurb long page 12]
Trust long Jehovah evritaem and depend long hem for strongim iu
[Piksa long page 9]
Jehovah blessim Christian wea traem best for strongim marit wea garem problem
[Piksa long page 11]
Olketa long kongregeson savve givim comfort and strongim olketa wea needim help