Followim Nambawan Missionary
“Iufala mas followim mi, olsem mi tu followim Christ.”—1 COR. 11:1.
1. Why nao iumi mas followim Jesus Christ?
APOSOL Paul hem followim Jesus Christ wea hem nambawan Missionary winim eni narawan. Paul talem olketa Christian brata and sista bilong hem: “Iufala mas followim mi, olsem mi tu followim Christ.” (1 Cor. 11:1) Bihaen Jesus hem wasim leg bilong olketa aposol bilong hem for showimaot wanem hem minim for man hambol, hem talem olketa: “Disfala samting wea mi duim long iufala, hem for showim gudfala wei long iufala, mekem iufala savve duim sem samting tu.” (John 13:12-15) From iumi nao olketa Christian distaem, iumi mas followim Jesus Christ long samting wea iumi talem and duim and long olketa wei bilong iumi.—1 Pet. 2:21.
2. Nomata iu no wanfala missionary wea Governing Body markem, wanem kaen wei nao iu savve showimaot?
2 Long study article bifor diswan, hem storyim hao wanfala missionary hem man wea go for talemaot gud nius long narawan. Aposol Paul hem askem samfala kwestin long diswan. (Readim Romans 10:11-15.) Wanfala kwestin wea hem askem nao olsem: “Hao nao olketa bae herem sapos no eniwan preach?” Then hem talem moa disfala profesi bilong Isaiah: “Leg bilong olketa wea talemaot gud nius bilong olketa gudfala samting hem luk naes tumas!” (Isa. 52:7) Nomata iu no wanfala missionary long difren kantri, iu savve showimaot iu willing for talemaot gud nius taem iu followim Jesus wea strong for duim disfala waka. Long last year, 6,957,852 pablisa nao “duim waka for talemaot gud nius” long 236 kantri.—2 Tim. 4:5.
“Mifala Lusim Evri Samting Finis and Followim Iu”
3, 4. Wanem kaen laef nao Jesus lusim long heven, and wanem nao iumi mas duim for kamap follower bilong hem?
3 Jesus mas “lusim hae position” wea hem garem long heven and “kamap olsem wanfala slave” mekem hem savve finisim waka wea God sendem hem long earth for duim. (Phil. 2:7) Eni samting wea iumi duim for followim Jesus Christ bae nating kasem nao samting wea hem duim taem hem stap long earth. Nomata olsem, iumi savve gohed strong olsem olketa follower bilong hem, and no ting bak long olketa samting wea iumi lusim finis long world bilong Satan.—1 John 5:19.
4 Wanfala taem aposol Peter talem Jesus: “Mifala lusim finis evri samting and mifala followim iu.” (Matt. 19:27) Taem Jesus askem Peter, Andrew, James, and John for followim hem, kwiktaem nomoa olketa leavim fishing net bilong olketa and followim hem. Start long datfala taem olketa lusim bisnis hia and mekem ministry nao kamap main waka bilong olketa. Long buk bilong Luke, hem talem disfala toktok bilong Peter: “Mifala lusim finis olketa samting bilong mifala and mifala followim iu.” (Luke 18:28) Plande long iumi no lusim evri ‘samting bilong iumi’ for followim Jesus. Bat iumi ‘rejectim wei for tingim nomoa wanem iumiseleva laekem’ mekem iumi kamap follower bilong Jesus Christ, and kamap servant bilong Jehovah wea strong for worshipim hem. (Matt. 16:24) Diswan mekem iumi kasem plande gudfala samting. (Readim Matthew 19:29.) Taem iumi followim Jesus Christ and strong for duim ministry, diswan mekem iumi feel hapi. Diswan bae tru tumas sapos iumi helpem samwan for fren witim God and Son bilong hem.
5. Wanem nao wanfala story wea showimaot samting wea man wea stap long nara kantri maet disaed for duim taem hem lanem truth long Bible?
5 Valmir hem wanfala man from Brazil wea stap long bush long Suriname, wanfala kantri long Africa. Waka bilong hem for digdig for gold. Hem man for drink tumas and hem olobaot tu. Taem hem kam long taon, Olketa Jehovah’s Witness startim Bible study witim hem. Hem study evriday, changem staka wei bilong hem, and no longtaem bihaen hem baptaes. From hem luksavve waka bilong hem mekem hem hard for hem followim olketa teaching long Bible, hem salem gudfala bisnis bilong hem and muv go bak long Brazil for helpem famili bilong hem kasem gudfala samting long Bible. Staka pipol wea go stap long olketa difren kantri and lanem truth long Bible, olketa willing for lusim gudfala waka bilong olketa and go bak long kantri bilong olketa for helpem olketa relative and nara pipol for savve long Jehovah. Olketa pablisa olsem barava showimaot olketa willing for talemaot gud nius.
6. Wanem nao iumi savve duim sapos hem hard for iumi muv go long ples wea needim samfala pablisa moa?
6 Samfala Witness muv go long olketa nara ples wea needim samfala pablisa moa for duim preaching waka. Olketa narawan muv go long olketa nara kantri tu. Maet iumi no fit for duim kaen samting olsem, bat iumi savve followim Jesus taem iumi duim best bilong iumi long ministry.
Jehovah Bae Lanem Iumi
7. Olketa wanem skul nao stap for lanem olketa wea laek for savve gud go moa long hao for talemaot gud nius abaotem Kingdom?
7 Long sem wei wea Jehovah hem lanem Jesus, hem savve lanem iumi mekem iumi savve kasem gudfala samting. Jesus talem: “Olketa Profet raetem finis, ‘ . . . Olketa bae kamap pipol wea Jehovah lanem.’” (John 6:45; Isa. 54:13) Distaem iumi garem olketa skul for lanem iumi hao for talemaot gud nius abaotem Kingdom. Iumi evriwan kasem gud samting from Theocratic Ministry Skul long kongregeson bilong iumi. Olketa pioneer kasem gud samting from Pioneer Service Skul. Samfala wea pioneer for longfala taem go long datfala skul mek-tu taem finis. Olketa elder and ministerial servant go long Kingdom Ministry Skul for savve hao for teach gud and hao for helpem olketa brata and sista. Staka elder and ministerial servant wea no marit go long Ministerial Training Skul, wea lanem olketa for helpem olketa narawan for duim preaching waka. And Wastaoa Bible Skul bilong Gilead hem lanem staka brata and sista for kamap missionary long narafala kantri.
8. Wanem nao samfala brata willing for duim mekem Jehovah lanem olketa?
8 Plande Witness bilong Jehovah duim staka samting mekem olketa savve go long olketa skul hia. Yugu wea stap long Canada mas lusim waka bilong hem bikos boss bilong hem no letem hem for go long Ministerial Training Skul. Yugu hem tok olsem: “Mi nating sorre nomoa. For tok stret, sapos olketa letem mi for go long skul hia, maet bae olketa laekem mi for waka olowe for datfala company. Bat distaem mi fit for duim eni assignment wea maet Jehovah givim long mi.” Staka lusim samting wea olketa tinghae long hem bifor mekem God lanem olketa.—Luke 5:28.
9. Wanem story nao showimaot gudfala samting savve kamaot from wei wea man lanem Bible and waka hard?
9 Gud samting savve kamaot from wei wea man lanem Bible and waka hard. (2 Tim. 3:16, 17) Tingim samting wea kasem Saulo wea stap long Guatemala. Hem garem lelebet problem long brain bilong hem taem hem born. Wanfala teacher bilong hem talem mami bilong hem for no forcem hem for lane read bikos datwan bae mekem Saulo feel nogud. So taem Saulo finis skul hem no savve read. Bat wanfala Witness hem iusim disfala buk Lane for Read and Raet for lanem Saulo hao for read. Gogo Saulo savve nao and hem givim tok long Theocratic Ministry Skul. Wantaem mami bilong Saulo kasem teacher bilong hem taem hem gogo long preaching. Taem teacher herem hao Saulo savve read, hem askem mami bilong Saulo for tekem hem kam long week bihaen. Taem Saulo kasem haos bilong datfala teacher, hem askem Saulo, “Wanem nao iu laek for lanem mi?” Saulo readim wanfala paragraf from datfala buk Wanem Nao Really Samting wea Bible Teachim? Datfala teacher hem talem: “Mi hard for bilivim distaem iu nao lanem mi.” Teacher hia hem holem Saulo and hem laek krae.
Teach Long Wei for Kasem Heart
10. Wanem nambawan buk nao iumi savve iusim for lanem pipol olketa truth long Bible?
10 Jesus hem teach followim samting wea hem lanem from Jehovah and from Word bilong Hem. (Luke 4:16-21; John 8:28) Iumi followim Jesus taem iumi obeyim samting wea hem talem and duim wanem Bible hem talem. Diswan minim samting wea iumi evriwan talem and tingim hem semsem mekem iumi garem wan mind. (1 Cor. 1:10) Iumi tinghae tumas long wei wea “faithful and wise slave” wakem olketa Bible buk wea helpem iumi for wan mind long samting iumi lanem pipol, and for duim waka bilong iumi for talemaot gud nius! (Matt. 24:45; 28:19, 20) Wanfala nao hem Wanem Bible Teachim buk wea stap long 179 languis distaem.
11. Hao nao wanfala sista long Ethiopia iusim Wanem Bible Teachim buk taem wanfala woman againstim hem?
11 Wei for iusim Wanem Bible Teachim buk for studyim Bible savve changem olketa wea againstim iumi. Wantaem Lula, wanfala pioneer sista long Ethiopia hem duim Bible study witim wanfala woman. Seknomoa wantok bilong disfala woman wea study hem kam insaed haos and trae stopem tufala. Lula story gud for disfala woman and hem iusim wanfala tokpiksa long chapter 15 bilong Wanem Bible Teachim buk abaotem laea selen. Diswan daonem kros bilong woman hia and hem letem tufala for gohed long study. Long week bihaen, woman hia kam long study and talem hao hem laek studyim Bible tu, and hem laek givim selen for datwan! Gogo hem study thrifala taem insaed wan week and hem gohed gud long spiritual saed.
12. Wanem story nao showimaot olketa young wan savve lanem pipol olketa truth long Bible?
12 Olketa young wan savve iusim Wanem Bible Teachim buk for helpem narawan. Wanfala nao hem Keanu wea stap long Hawaii and hem 11 year. Taem hem readim disfala buk long skul wanfala boy wea tufala wan class askem hem, “Hao nao iufala no celebratem olketa holiday?” For ansarem boy hia, Keanu readim disfala sekson long appendix: “Waswe, Fitim for Iumi Insaed Olketa Celebration Bilong World?” Bihaen datwan, hem showim list bilong evri chapter and askem boy hia wanem chapter nao hem laek lukluk long hem. Boy hia laek studyim Bible nao. Long last service year, Olketa Jehovah’s Witness duim 6,561,426 Bible study. Plande long olketa hia studyim Wanem Bible Teachim buk. Waswe, iu iusim disfala buk long olketa Bible study bilong iu?
13. Hao nao wei for studyim Bible savve barava helpem pipol?
13 Taem iumi studyim Bible witim pipol long Wanem Bible Teachim buk, diswan savve barava helpem olketa wea laek for duim wanem God talem. Wanfala hasband and waef wea spesol pioneer long Norway startim Bible study witim wanfala famili wea kam from Zambia. Disfala famili garem thrifala gele and olketa no laek garem eni pikinini moa. Bat taem mami hem babule, olketa disaed for killim dae datfala baby insaed bele. Tu-thri day bifor olketa go lukim wanfala doctor, olketa studyim disfala chapter “Garem Tingting Bilong God Abaotem Laef.” Chapter hia garem piksa bilong wanfala baby insaed bele and taem hasband and waef hia lukim, tufala disaed for no killim dae baby bilong olketa. Tufala gohed gud long spiritual wei and taem boy bilong tufala hem born, tufala nemim hem followim datfala brata wea study witim olketa.
14. Wanem story nao showimaot hao gudfala samting savve kamaot from wei for followim wanem iumi lanem pipol?
14 Wanfala nambawan wei bilong Jesus for teach hem for followim samting wea hem lanem pipol. From Olketa Jehovah’s Witness followim Jesus long diswan, plande pipol tinghae long olketa. Long New Zealand samfala man stealim basket bilong wanfala bisnisman from car bilong hem. Hem go reportim diswan long wanfala policeman wea talem hem: “Sapos wanfala Jehovah’s Witness nao faendem basket bilong iu, bae iu tekem bak.” Wanfala Witness nao faendem datfala basket. Taem bisnisman hia herem, hem go long haos bilong datfala Witness. Hem hapi tumas from wanfala important pepa bilong hem stap yet insaed long datfala basket. Witness hia talem hem, “From mi wanfala Jehovah’s Witness, mi savve stret samting for mi duim nao hem for givim bak basket bilong iu and evri samting insaed.” Datfala bisnisman hem sapraes tumas from hem tingim nao samting wea policeman talem hem long datfala sem morning. Tru tumas, olketa trufala Christian followim Jesus and olketa teaching long Bible.—Heb. 13:18.
Followim Wei Bilong Jesus for Tingim Pipol
15, 16. Wanem nao iumi savve duim for mekem pipol laek herem story bilong iumi?
15 Wei bilong Jesus for tingim pipol hem mekem olketa laek for herem story bilong hem. Olsem example, love wea hem showimaot and wei wea hem hambol mekem olketa man for laek savve long hem. Hem feel sorre for olketa wea kam long hem and hem talem kaenfala toktok for mekem olketa feel gud, and hem healim plande pipol wea sik tu. (Readim Mark 2:1-5.) Distaem iumi no savve duim mirakol, bat iumi savve mekem pipol laek savve long truth taem iumi showimaot love, iumi hambol, and feel sorre long olketa.
16 Long wanfala farawe island bilong Kiribati wanfala spesol pioneer wea nem bilong hem Tariua hem showimaot wei for feel sorre long wanfala olo man wea nem bilong hem Beere. Nomata datfala man hem no laek for lisin, Tariua lukim hem lelebet cripple and hem feel sorre long hem. Hem askem hem: “Waswe, iu herem finis promis bilong God for pipol wea sik and olo?” Bihaen hem ask olsem hem readim wanfala scripture long profesi bilong Isaiah. (Readim Isaiah 35:5, 6.) From man hia barava laek savve go moa, hem talem olsem, “Staka year nao mi readim Bible and wanfala missionary long lotu bilong mi savve kam visitim mi, bat no enitaem mi lukim datwan long Bible.” Bihaen datwan, Beere hem start for studyim Bible and hem gohed gud long spiritual wei. Tru nao, nomata hem cripple bifor, distaem hem baptaes, hem lukaftarem wanfala isolated grup, and hem savve wakabaot raonem full island for duim preaching waka.
Gohed for Followim Christ
17, 18. (a) Wanem nao iu savve duim for win long wei for talemaot gud nius? (b) Olketa wea tinghae long ministry bilong olketa bae kasem wanem samting?
17 Staka nambawan story olsem hem showimaot hao iumi savve win for talemaot gud nius sapos iumi showimaot olketa wei bilong Jesus. Dastawe hem barava fitim for iumi followim Jesus Christ wea strong for talemaot gud nius!
18 Taem samfala kamap disaepol bilong Jesus long first century, Peter hem ask olsem: “Wanem samting nao bae mifala kasem?” Jesus sei olsem long hem: “Evriwan wea lusim olketa haos or brata or sista or dadi or mami or pikinini or land for mi, bae kasem plande samting moa and bae kasem laef olowe.” (Matt. 19:27-29) Iumi tu bae kasem samting olsem sapos iumi gohed for followim nambawan Missionary, Jesus Christ.
Wanem Nao Ansa Bilong Iu?
• Long wanem wei nao Jehovah lanem iumi for kamap man for talemaot gud nius?
• Why nao hem gud for iusim Wanem Bible Teachim buk long ministry bilong iumi?
• Hao nao iumi savve followim wei bilong Jesus for tingim pipol?
[Piksa long page 17]
Taem Jesus askem Peter, Andrew, James, and John for followim hem, olketa followim hem stretawe
[Piksa long page 19]
Olketa buk olsem “Wanem Bible Teachim” helpem iumi for wan mind long samting iumi lanem pipol