“Iufala Bae Talem Pipol Abaotem Mi”
“[Jesus] sei long olketa: ‘. . . Iufala bae talem pipol abaotem mi . . . long evri farawe ples long earth.’”—ACTS 1:7, 8.
1, 2. (a) Hu nao nambawan man for witness abaotem Jehovah? (b) Wanem nao mining bilong nem bilong Jesus, and wanem nao hem duim for helpem olketa Jew for fren bak witim Jehovah?
TAEM olketa tekem Jesus long kot, hem no fraet for sei olsem long Pontius Pilate, wea hem bigman bilong Judea: “Mi born kam long disfala world for talem olketa tru samting. Man wea followim tru samting hem savve herem wanem mi talem.” (Readim John 18:33-37.) Staka year bihaen, aposol Paul sei Jesus “hem no fraet for barava story gud long Pontius Pilate.” (1 Tim. 6:13) From iumi stap long nogud world wea Satan kontrolem, iumi tu mas no fraet for gohed preach olsem Jesus, wea hem “datfala faithful and tru witness.”—Rev. 3:14.
2 Long bifor, evri Jew garem waka for witness abaotem Jehovah, bat Jesus nao hem nambawan witness winim eni narawan. (Isa. 43:10) Bifor Jesus hem born, wanfala angel sei olsem long Joseph, dadi wea adoptim hem: “Iu mas nemim hem Jesus, from hem bae sevem pipol bilong hem from sin bilong olketa.” (Matt. 1:20, 21) Long Hebrew languis, datfala nem Jesus hem minim “Jehovah Nao Savve Sevem Iumi.” Hem plan bilong Jehovah for iusim Jesus for mekem olketa man kamap free from sin and dae. Jesus talem olketa Jew olketa mas repent from sin bilong olketa mekem olketa savve fren bak witim Jehovah. (Matt. 10:6; 15:24; Luke 19:10) Jesus hem preach abaotem Kingdom bilong God. Bible buk Mark sei olsem: “Jesus go long Galilee and hem preachim datfala gud nius bilong God. Hem sei: ‘Distaem nao hem taem wea God markem, and Kingdom bilong God hem kam klosap. Iufala mas repent, and biliv long datfala gud nius.’” (Mark 1:14, 15) Jesus hem strong for preach and hem nating fraet. Hem no fraet tu for tok againstim olketa bigman bilong Jew religion, and datwan nao hem wanfala reason why olketa bigman hia killim hem dae.—Mark 11:17, 18; 15:1-15.
“OLKETA NAMBAWAN SAMTING WEA GOD DUIM”
3. Wanem nao happen thrifala day bihaen Jesus hem dae?
3 Wanfala nambawan samting nao happen thrifala day bihaen Jesus hem dae. Jehovah mekem hem laef bak. Hem no laef bak olsem wanfala man bat olsem wanfala spirit. (1 Pet. 3:18) For pruvim hem laef bak Jesus change for kamap man, and hem kam long olketa disaepol bilong hem. Long day wea hem laef bak, samting olsem faevfala taem nao olketa difren disaepol lukim hem.—Matt. 28:8-10; Luke 24:13-16, 30-36; John 20:11-18.
4. Wanem nao Jesus explainim long olketa disaepol long mek-faev taem wea hem kam long olketa, and wanem nao hem sei olketa mas duim?
4 Long mek-faev taem wea hem kam long olketa disaepol, olketa aposol and olketa narawan tu hipap tugeta. Then hem helpem olketa for luksavve wei wea hem dae and laef bak hem mekem samting wea olketa Holy Raeting talem kamap tru. Lastfala samting wea hem duim long datfala important meeting nao, hem talem olketa disaepol bilong hem wanem olketa mas duim. Hem sei: “Long nem bilong hem pipol bae preach long evri kantri and talem pipol for repent mekem God forgivim sin bilong olketa.” Then hem sei: “Start long Jerusalem go kasem olketa nara ples, iufala mas storyim olketa samting hia wea iufala lukim.”—Luke 24:44-48.
5, 6. (a) Why nao Jesus sei: “Iufala bae talem pipol abaotem mi”? (b) Wanem nao message wea olketa disaepol bilong Jesus bae talem long pipol?
5 So long lastfala taem wea Jesus kam long olketa disaepol bilong hem, wea hem long mek-40 day bihaen hem laef bak, olketa aposol minim gud disfala komand bilong hem: “Iufala bae talem pipol abaotem mi long Jerusalem, long evri ples long Judea and long Samaria, and long evri farawe ples long earth.” (Acts 1:8) From olketa disaepol hia olketa Israelite, olketa mas witness abaotem Jehovah. Bat start long datfala taem olketa mas talem pipol abaotem Jesus tu. Wanem nao datwan hem minim?
Olsem olketa disaepol bilong Jesus duim long first century, iumi talem pipol abaotem plan bilong Jehovah for future (Lukim paragraf 5, 6)
6 Start long datfala taem, olketa mas talem pipol Jehovah hem iusim Jesus for sevem olketa man. Disfala wei wea Jehovah iusim Jesus for sevem pipol hem winim wanem Jehovah duim for sevem olketa Israelite long bifor. Wei wea Jesus hem dae and laef bak, hem mekem wei for pipol kamap free from sin and dae. Taem Jehovah anointim olketa disaepol bilong Jesus long holy spirit long Pentecost 33 C.E., olketa start for talem pipol abaotem “olketa nambawan samting wea God duim.” Staka pipol wea herem disfala message olketa repent, showimaot faith long sakrifaes bilong Jesus, and olketa baptaes. Long datfala taem Jesus kasem paoa long heven, and Jehovah iusim hem for helpem staka thousand pipol long earth for kasem laef olowe.—Acts 2:5, 11, 37-41.
“PRICE FOR BAEM BAK STAKA PIPOL”
7. Olketa samting wea happen long Pentecost 33 C.E. hem showimaot wanem?
7 Olketa samting wea happen long Pentecost 33 C.E. showimaot Jehovah hem acceptim perfect sakrifaes bilong Jesus olsem ransom for mekem pipol kamap free from sin. (Heb. 9:11, 12, 24) Jesus sei hem kam “for givim laef bilong hem, wea datwan hem price for baem bak staka pipol.” (Matt. 20:28) Waswe, olketa Jew nomoa kasem gud samting from datfala ransom sakrifaes bilong Jesus? Nomoa, datfala ransom hem “aotem sin bilong evri pipol long disfala world!” God hem “laekem tumas for evri difren kaen man mas sev.”—1 Tim. 2:4-6; John 1:29
8. Wanem nao helpem olketa disaepol for gohed preach, and wanem nao kamaot from datwan?
8 Olketa disaepol bilong Jesus long first century no fraet for gohed talem pipol abaotem hem. Wanem nao helpem olketa for gohed strong olsem? Hem no from strong bilong olketa seleva bat holy spirit bilong Jehovah nao strongim olketa for gohed preach long pipol. (Readim Acts 5:30-32.) Samting olsem 27 year bihaen Pentecost 33 C.E., Bible sei olketa disaepol bilong Jesus preach long “evriwan long earth.” Olketa Jew and olketa wea no Jew tu “herem tru samting, wea hem nao datfala gud nius.”—Col. 1:5, 23.
9. Wanem nao Jesus talem bae happen long Christian kongregeson?
9 Bat sorre samting nao, samfala long kongregeson start for teachim samfala samting wea no tru. (Acts 20:29, 30; 2 Pet. 2:2, 3; Jude 3, 4) Gogo olketa apostate hia spoelem evri kongregeson. Jesus talem disfala wei for apostate bae gohed go kasem “taem wea world hem gogo for finis.” (Matt. 13:37-43) Long October 1914, Jehovah markem Jesus for kamap King long Kingdom bilong God. Long datfala taem nao “olketa last day” bilong world bilong Satan hem start.—2 Tim. 3:1.
10. (a) Wanem important date nao olketa anointed Christian talem pipol abaotem? (b) Wanem nao happen long October 1914, and hao nao iumi savve long datwan?
10 Winim 30 year bifor October 1914, olketa anointed Christian start for talem pipol Kingdom bilong God bae start for rul long datfala important date. Samting wea helpem olketa for luksavve long datwan nao hem profesi bilong Daniel abaotem datfala big tree wea olketa bae katem and wea bae grow moa bihaen. (Dan. 4:16) Jesus storyim wanfala saen wea bae helpem olketa disaepol bilong hem for luksavve long taem wea hem kamap King and olketa last day start nao. Olketa samting wea happen long world start long 1914 showimaot Jesus hem kamap King long datfala year. (Matt. 24:3, 7, 14; Luke 21:24) Wanfala long olketa “nambawan samting wea God duim” wea iumi preach abaotem distaem, hem wei wea Jehovah mekem Jesus kamap King long Kingdom long 1914.
11, 12. (a) Wanem nao happen long 1919? (b) Pipol bilong God luksavve long wanem samting long 1935? (Lukim piksa long start bilong study.)
11 No longtaem bihaen Jesus Christ kamap King long 1914, hem start for helpem olketa anointed Christian kamap free from “Bigfala Babylon,” wea hem nao evri false religion. (Rev. 18:2, 4) Long 1919, bihaen World War 1 hem finis, olketa anointed Christian free for preach long staka ples long world. Olketa talem pipol gud nius abaotem Kingdom bilong God and wei wea ransom savve sevem man. Samting wea kamaot from diswan nao, staka thousand pipol moa lanem truth and God anointim olketa for rul witim Christ long heven.
12 Long 1935, pipol bilong God luksavve Christ hem gohed for hipimap tu “olketa nara sheepsheep” bilong hem. Distaem, plande million nara sheepsheep from staka kantri raonem world nao worshipim Jehovah. Olketa hia witim olketa anointed Christian followim example bilong Christ long wei wea olketa no fraet for preach long nara pipol. Olketa nara sheepsheep luksavve only wei for kasem laef olowe hem for olketa showimaot faith long sakrifaes bilong Jesus. Olketa savve sapos olketa gohed strong for duim preaching waka and duim wanem God laekem long laef bilong olketa, bae olketa no dae long “datfala big trabol” and laef long niu world bilong God.—John 10:16; Rev. 7:9, 10, 14.
GOHED STRONG FOR TALEMAOT GUD NIUS
13. From iumi Olketa Jehovah’s Witness, wanem nao iumi laek for gohed duim, and wanem nao bae helpem iumi for gohed strong?
13 Iumi garem spesol privilege for talem pipol abaotem “olketa nambawan samting” wea Jehovah duim finis, and abaotem olketa samting wea hem promis for duim long future. Hem tru, samfala taem hem no isi for gohed duim disfala waka. Maet pipol les for herem message bilong iumi or maet olketa persecutim iumi tu. Sapos datwan kasem iumi, iumi savve followim example bilong Paul and olketa wea waka witim hem. Paul sei: “God strongim mifala for talemaot gud nius long iufala nomata datwan hem barava no isi for mifala duim.” (1 Thess. 2:2) Iumi mas duim wanem iumi promisim taem iumi dedicate long God. Iumi laek for faithful long Jehovah long datfala taem wea disfala nogud world bilong Satan bae finis. (Isa. 6:11) Iumi no savve duim diswan long strong bilong iumiseleva. Olsem olketa Christian long first century, iumi mas askem Jehovah for givim iumi holy spirit bilong hem mekem iumi savve “kasem strong wea winim strong bilong man.”—Readim 2 Corinth 4:1, 7; Luke 11:13.
14, 15. (a) Hao nao pipol ting long olketa Christian long first century, and wanem nao Peter talem for encouragem olketa? (b) From iumi Olketa Jehovah’s Witness, wanem nao iumi mas no forgetim sapos pipol persecutim iumi?
14 Distaem, staka million pipol sei olketa Christian, bat olketa duim olketa samting wea God heitim and God no hapi long olketa. (Titus 1:16) Long first century, plande pipol no worshipim God long wei wea hem acceptim, and staka pipol heitim olketa tru Christian. Aposol Peter encouragem olketa Christian taem hem sei: “Sapos pipol tok spoelem iufala bikos long nem bilong Christ, iufala hapi nomoa, bikos . . . spirit bilong God . . . hem stap long iufala.”—1 Pet. 4:14.
15 Waswe, distaem tu “pipol tok spoelem” Olketa Jehovah’s Witness “bikos long nem bilong Christ”? Yes. Nomata iumi witness abaotem Jehovah, iumi story long pipol tu abaotem Jesus and talem olketa hem King long Kingdom bilong God. Pipol persecutim Jesus tu bikos hem witness abaotem Jehovah. Hem talem olketa wea againstim hem: “Mi kam long nem bilong Dadi bilong mi, bat iufala no biliv long mi.” (John 5:43) So taem eniwan againstim iu bikos iu gohed for preach, iu mas no forget datwan showimaot God hem hapi long iu and holy spirit bilong hem stap long iu.
16, 17. (a) Hao nao pipol bilong Jehovah raonem world ting long preaching waka? (b) Wanem nao iu laek for gohed duim?
16 Nara samting wea hem gud for tingim tu, distaem staka pipol raonem world nao kam insaed organization bilong Jehovah. Nomata long olketa territory wea iumi duim staka taem, samfala pipol stap yet wea willing for lisin long disfala nambawan gud nius. So taem iumi faendem eniwan wea interest, iumi shud go bak for duim return visit and trae for studyim Bible witim olketa. Then iumi savve helpem olketa for savve long Jehovah mekem olketa savve dedicate long hem and baptaes. Iumi barava tinghae long disfala waka. Sarie wea stap long South Africa, hem duim preaching waka for winim 60 year finis. Hem sei: “Mi barava tinghae long ransom sakrifaes bilong Jesus bikos datwan mekem mi fit for fren gud witim Jehovah, wea hem rulim full universe, and mi hapi tumas for talem pipol abaotem nambawan nem bilong hem.” Hem and hasband bilong hem, Martinus, helpem thrifala pikinini bilong tufala and staka nara pipol for worshipim Jehovah. Sarie sei tu: “No eni nara waka hem mekem man satisfae olsem disfala preaching waka. Jehovah iusim holy spirit bilong hem for strongim iumi evriwan for gohed duim disfala waka wea savve sevem laef bilong pipol.”
17 Nomata iumi baptaes finis or nomoa, iumi shud tinghae long privilege wea iumi garem for hipap witim pipol bilong Jehovah evriwea long world. So iumi laek for gohed duim gud preaching waka, and no letem eni samting long disfala nogud world bilong Satan for spoelem wei wea iumi fren witim Jehovah. Sapos iu duim datwan, iu bae mekem Jehovah kasem praise, wea hem Dadi bilong iumi long heven, and wea iumi garem nem bilong hem.