Bible Buk Namba 38​—Zechariah

Man wea Raetem: Zechariah

Ples Hem Raetem: Jerusalem

Taem Hem Finis Raetem: 518 B.C.E.

Taem Hem Storyim: 520–518 B.C.E.

HEM stop nao! Hem nao samting wea happen long building waka long temple bilong Jehovah long Jerusalem taem Zechariah start for talem profesi. Solomon buildim firstfala temple insaed 7 1/2 year (1 Ki. 6:37, 38), bat olketa Jew wea go bak long Jerusalem stap for 17 year finis bat building no finis yet. Waka hem stop evribit taem Artaxerxes (maet Bardiya or Gaumata) putim tambu long hem. Bat distaem, nomata datfala tambu stap, waka hem start for go ahed moa. Jehovah iusim Haggai and Zechariah for muvim pipol for startim moa building waka and for go ahed long hem go kasem taem hem finis.—Ezra 4:23, 24; 5:1, 2.

² Bigfala waka nao stap front long olketa. (Zech. 4:6, 7) Olketa no staka olsem sekson wea againstim olketa, and nomata olketa garem wanfala prince from laen bilong David, Zerubbabel, olketa no garem king and olketa stap anda long rul bilong nara kantri. Hem isi tumas for kamap wiki and tingim seleva, nomata datwan hem taem for garem strongfala faith and waka hard! God iusim Zechariah for mekem olketa tingim purpose bilong hem for datfala taem and olketa purpose bilong hem wea moa spesol long future, and diswan strongim olketa long waka wea olketa mas duim. (8:9, 13) Hem no taem for olsem olketa laen dadi bilong olketa wea no tinghae long olketa purpose hia.—1:5, 6.

³ Hu nao Zechariah? Bible story abaotem samting olsem 30 difren man wea garem nem Zechariah. Bat, man wea raetem disfala buk wea garem nem bilong hem, hem “Zechariah son bilong Berechiah son bilong Iddo datfala profet.” (Zech. 1:1; Ezra 5:1; Neh. 12:12, 16) Nem bilong hem (Hebrew, Zekhar·yahʹ) minim “Jehovah Hem Remember.” Buk bilong Zechariah talem klia hao “Jehovah bilong olketa army” rememberim pipol bilong Hem, for deal long gudfala wei witim olketa for saed long nem bilong Hem. (Zech. 1:3) Olketa date insaed disfala buk showimaot hem storyim samting wea happen insaed tufala year. Long “mek-eit month long mek-tu year bilong Darius” (October/November 520 B.C.E.) olketa startim moa waka for buildim temple and Zechariah start for talem profesi. (1:1) Disfala buk talem tu “mek-foa day long mek-naen month, wea hem nao, long Chislev,” long “mek-foa year bilong Darius” (long samting olsem December 1, 518 B.C.E.). (7:1) So, Zechariah talemaot profesi and raetem insaed olketa year bilong 520-518 B.C.E.—Ezra 4:24.

⁴ Olketa wea studyim buk bilong Zechariah bae faendem planti pruv wea showimaot wei wea hem tru. Example nao story abaotem Tyre. Bihaen wanfala attak wea go ahed for 13-year king Nebuchadnezzar bilong Babylon hem spoelem Tyre. Bat diswan no minim Tyre hem finis evribit. Planti year bihaen, Zechariah talemaot hao Tyre bae distroe evribit. Alexander the Great hem winim taon bilong Tyre wea stap long wanfala island taem hem wakem road wea katkros long sea go kasem island; hem bonem datfala taon and long wei olsem hem fulfillim profesi bilong Zechariah wea hem talem tu handred year bifor.a—Zech. 9:2-4.

⁵ Pruv wea barava mekem man bilivim hao disfala buk hem kam from God, hem nao wei wea olketa profesi abaotem Messiah, Christ Jesus hem fulfill, wea iumi savve lukim sapos iumi markem Zechariah 9:9 witim Matthew 21:4, 5 and John 12:14-16; Zechariah 12:10 witim John 19:34-37; and Zechariah 13:7 witim Matthew 26:31 and Mark 14:27. And tu, olketa toktok wea klosap semsem long Zechariah 8:16 and Ephesians 4:25; Zechariah 3:2 and Jude 9; and Zechariah 14:5 and Jude 14. Wei wea Word bilong God hem wan mind hem nambawan samting!

⁶ Samfala wea tok againstim Bible sei wei wea stael bilong raeting hem change start long chapter 9 hem showaot Zechariah no raetem datfala part. Bat, wei wea stael hem change hem fitim wei wea subject hem change. First eitfala chapter storyim samting wea moa important for pipol long taem bilong Zechariah, long chapter 9 go kasem 14, profet luk go long future wea farawe yet. Samfala askem why nao Matthew talem toktok bilong Zechariah, bat sei disfala toktok kam from Jeremiah. (Matt. 27:9; Zech. 11:12) Hem luk olsem samfala taem pipol ting long Jeremiah olsem first wan bilong Lastfala Sekson Bilong Olketa Profet (and no Isaiah, olsem hem stap long Bible bilong iumi distaem); dastawe Matthew, taem hem storyim Zechariah olsem “Jeremiah,” maet followim wei bilong olketa Jew for putim wanfala full sekson bilong olketa Scripture anda long nem bilong first buk bilong datfala sekson. Jesus seleva iusim nem “Olketa Psalm” for minim evri buk wea olketa kolem Olketa Raeting.—Luke 24:44.b

⁷ Go kasem chapter 6, verse 8, disfala buk garem eitfala vision, wea klosap semkaen olsem olketa bilong Daniel and Ezekiel, wea storyim wei for buildim moa temple. Toktok and profesi wea kamap bihaen hem abaotem trufala worship, wei for kamap gud moa, and war bilong day bilong Jehovah.

WEI WEA HEM HELPEM IUMI

²³ Evriwan wea studyim and ting raonem profesi bilong Zechariah bae kasem savve wea strongim faith bilong olketa. Winim 50 taem nao Zechariah storyim “Jehovah bilong olketa army” olsem Datwan wea faet for pipol bilong Hem and protectim olketa, wea givim paoa wea olketa needim. Taem bigfala wei for againstim olketa hem luk olsem bae stopem olketa for finisim waka for buildim moa temple, Zechariah sei: “Diswan nao toktok bilong Jehovah for Zerubbabel, wea sei, ‘“No witim army, or paoa, bat witim spirit bilong mi,” Jehovah bilong olketa army hem sei. Hu nao iu, O bigfala maunten? Front long Zerubbabel iu bae kamap wanfala level land.’” Waka long datfala temple hem finis from help bilong spirit bilong Jehovah. Olsem tu distaem, hardfala samting bae olsem samting nating sapos iumi feisim witim faith long Jehovah. Hem olsem Jesus talem olketa disaepol bilong hem: “Sapos iufala garem faith olsem size bilong mustard seed, iufala savve talem disfala maunten, ‘Muv go from hia and go long there,’ and bae hem go, and no eni samting hem stap wea iufala kanduit for duim.”—Zech. 4:6, 7; Matt. 17:20.

²⁴ Long chapter 13, verse 2 go kasem 6, Zechariah storyim loyal fasin wea hem mark bilong organization bilong Jehovah. Diswan mas winim evri wei for fren, olsem klos wei for fren midolwan olketa relative. Sapos wanfala klos relative talem giaman samting long nem bilong Jehovah, wea minim, talem difren samting from Kingdom message and trae for mekem olketa narawan insaed kongregeson bilong pipol bilong God go difren, olketa famili member bilong datwan mas loyal for saportim eni judicial disison bilong kongregeson. Sem samting tu mas happen long eni klos fren wea talemaot giaman samting, diswan mekem hem feel shame and sorre long heart bikos long rong samting wea hem duim.

²⁵ Olsem olketa firstfala paragraf showimaot, Zechariah barava talemaot profesi abaotem wei wea Jesus go insaed Jerusalem olsem king, “hambol, and hem raed antap long wanfala donkey,” olketa givim hem go for “thirti pis silver,” olketa disaepol bilong hem ranawe long datfala taem, and soldia spiarim hem taem hem hange long stake. (Zech. 9:9; 11:12; 13:7; 12:10) Datfala profesi sei tu hao datfala “Shoot” nao hem buildim temple bilong Jehovah. Wei for markem Isaiah 11:1-10; Jeremiah 23:5; and Luke 1:32, 33 showimaot Jesus Christ nao datwan, wea “bae rul olsem king ovarem haos bilong Jacob for olowe.” Zechariah storyim datfala “Shoot” olsem “wanfala priest antap long throne bilong hem,” wea fitim disfala toktok bilong aposol Paul: “Jesus . . . kamap hae priest long wei bilong Melchizedek for olowe,” and tu “Hem sidaon finis long raet saed bilong throne bilong Majesty long heven.” (Zech. 6:12, 13; Heb. 6:20; 8:1) So, profesi hia point go long datfala “Shoot” olsem Hae Priest and King long raet hand bilong God long heven, and long semtaem hem talemaot Jehovah olsem Sovereign Ruler ovarem evriwan: “And Jehovah mas kamap king ovarem full earth. Long datfala day hem bae showaot klia hao Jehovah hem wanfala nomoa, and nem bilong hem wanfala.”—Zech. 14:9.

²⁶ Taem hem story abaotem datfala taem, profet hia talem moa toktok “long datfala day” samting olsem 20 taem, and datwan endim tu profesi bilong hem. Wei for lukluk long evri taem wea hem kamap showimaot hem day wea Jehovah aotem nem bilong olketa idol and olketa giaman profet. (13:2, 4) Hem day wea Jehovah bae faetem olketa nation wea againstim hem and mekem olketa konfius taem hem distroem olketa and givim ‘valley bilong maunten bilong hem’ olsem sef ples for pipol bilong hem. (14:1-5, 13; 12:8, 9) Tru nao, “Jehovah God bilong olketa bae sevem olketa long datfala day olsem sheep bilong pipol bilong hem,” and olketa bae singaot long each other andanit long vine and fig tree. (Zech. 9:16; 3:10; Mic. 4:4) Hem nambawan day wea Jehovah bilong olketa army “bae stap midolwan” long pipol bilong hem and taem “olketa living wata bae go aot from Jerusalem.” Olketa toktok bilong Zechariah hia storyim samting wea happen “long datfala day” olsem samting wea mekwe for “niu heven and niu earth” wea Kingdom promisim.—Zech. 2:11; 14:8; Rev. 21:1-3; 22:1.

²⁷ Jehovah ask olsem: “Hu nao lukdaonem day bilong olketa smolfala samting?” Lukim! Disfala gudfala living bae kasem full earth: ‘Planti pipol and olketa strongfala nation bae really kam for lukaotem Jehovah bilong olketa army long Jerusalem, and tenfala man from evri languis bilong olketa bae kasholem skirt bilong man wea hem wanfala Jew and sei: “Mifala bae go witim iufala pipol, from mifala herem finis hao God hem stap witim iufala pipol.”’ “Long datfala day” olketa bell long horse tu bae garem toktok “Holy fasin hem bilong Jehovah!” Olketa profesi hia barava gud tumas for tingim, bikos olketa showimaot hao nem bilong Jehovah bae kamap holy thru long Kingdom Seed bilong hem!—Zech. 4:10; 8:22, 23; 14:20.

[Olketa Footnote]