Mekem Evri Samting Long Heven and Long Earth Kam Tugeta
“Hem barava want for . . . mekem evri samting kam tugeta moa for wan mind witim Christ, olketa samting long heven and olketa samting long earth.”—EPHESIANS 1:9, 10.
1. Wanem nao Jehovah “barava want” for duim for heven and earth?
PEACE LONG FULL UNIVERSE! Datwan nao nambawan plan bilong Jehovah, wea hem “God bilong peace.” (Hebrews 13:20) Jehovah muvim aposol Paul for sei Hem “barava want for . . . mekem evri samting kam tugeta moa for wan mind witim Christ, olketa samting long heven and olketa samting long earth.” (Ephesians 1:9, 10) Wanem nao toktok wea olketa transleitim “mekem evri samting kam tugeta moa” long disfala verse hem minim? Bible savveman J. B. Lightfoot hem sei: “Datfala toktok showimaot hao evriwan long full universe bae garem wan mind, and no eniwan or eni samting bae mekem wei for divaed kamap, bat evriwan bae wan mind tugeta anda long Christ. Sin and dae, sorre and wei for fail and safa, bae finis.”
“Olketa Samting Long Heven”
2. Hu nao “olketa samting long heven” wea mas kam tugeta?
2 Aposol Peter talem main point bilong datfala nambawan hope bilong olketa tru Christian taem hem raet olsem: “Iumi weitim wanfala niu heven [skae] and niu earth wea hem promisim, wea evriwan bae garem raeteous fasin.” (2 Peter 3:13) Datfala “niu heven [skae]” hem piksarem niu gavman wea rul, datfala Messiah Kingdom. “Olketa samting long heven” wea Paul talem long leta wea hem raetem for olketa long Ephesus bae kam tugeta “for wan mind witim Christ.” God chusim olketa hia for rul witim Christ long heven, wea namba bilong olketa hem smol. (1 Peter 1:3, 4) God baem 144,000 anointed Christian hia “from earth.” Tru nao, hem “baem olketa from midolwan long olketa man” for share witim Christ long Kingdom bilong hem long heven.—Revelation 5:9, 10; 14:3, 4; 2 Corinthians 1:21; Ephesians 1:11; 3:6.
3. Why nao iumi fit for sei olketa anointed wan ‘sidaon long olketa ples long heven’ nomata taem olketa stap yet long earth?
3 Olketa anointed Christian mas born moa witim holy spirit for kamap olketa spiritual son bilong Jehovah. (John 1:12, 13; 3:5-7) From Jehovah adoptim olketa olsem “olketa son” bilong hem, olketa kamap olketa brata bilong Jesus. (Romans 8:15; Ephesians 1:5) From diswan, nomata taem olketa stap yet long earth, hem olsem Jehovah ‘tekem olketa go ap and olketa sidaon tugeta long olketa ples long heven witim Christ Jesus.’ (Ephesians 1:3; 2:6) Olketa garem disfala hae spiritual position bikos ‘olketa kasem mark from holy spirit wea hem promis for givim, wea datwan nao hem for showimaot firstaem samting wea olketa bae kasem’ long heven. (Ephesians 1:13, 14; Colossians 1:5) So, olketa hia nao “olketa samting long heven” wea mas kam tugeta and wea Jehovah markem finis namba bilong olketa.
Wei for Kam Tugeta Hem Start
4. Wanem taem and hao nao wei for mekem “olketa samting long heven” kam tugeta hem start?
4 For fitim datfala “administration” bilong Jehovah, wea hem nao wei for mek sure long olketa samting, wei for mekem “olketa samting long heven” kam tugeta bae start long “barava taem wea hem markem finis.” (Ephesians 1:10) Datfala taem wea hem markem hem Pentecost 33 C.E. Long datfala day, holy spirit hem pour aot long olketa aposol and wanfala grup bilong olketa man and woman wea olketa disaepol bilong Jesus. (Acts 1:13-15; 2:1-4) Diswan showimaot hao datfala niu covenant hem start, and tu, start bilong Christian kongregeson and datfala niu nation wea hem nao spiritual Israel, “datfala Israel bilong God.”—Galatians 6:16; Hebrews 9:15; 12:23, 24.
5. Why nao Jehovah mekem wanfala niu “nation” kamap for changem Israel bifor?
5 Datfala Law covenant wea God mekem witim olketa Israelite hem nating mekem “wanfala kingdom bilong olketa priest and wanfala holy nation” kamap for serve olowe long heven. (Exodus 19:5, 6) Jesus sei olsem long olketa bigman bilong Jew religion: “God bae aotem datfala kingdom bilong God from iufala and givim long wanfala nation wea showimaot olketa frut bilong hem.” (Matthew 21:43) Insaed long datfala nation, wea hem nao spiritual Israel, hem olketa anointed Christian wea insaed long datfala niu covenant. Aposol Peter hem raet olsem long olketa hia: “Iufala nao ‘pipol wea God chusim, sekson bilong olketa priest for rul, wanfala holy nation, wanfala spesol samting bilong hem, for iufala mas talemaot evriwea olketa nambawan fasin’ bilong datwan wea kolem iufala kamaot from darkness go long nambawan laet bilong hem. Bikos long bifor iufala no pipol bilong God, bat distaem iufala kamap pipol bilong God.” (1 Peter 2:9, 10) Israel bifor hem finis for olsem pipol wea insaed covenant witim Jehovah. (Hebrews 8:7-13) Olsem profesi bilong Jesus hem showimaot, God aotem datfala spesol chance for kamap part bilong Messiah Kingdom from olketa and givim long 144,000 member bilong spiritual Israel.—Revelation 7:4-8.
Insaed Long Kingdom Covenant
6, 7. Wanem spesol covenant nao Jesus mekem witim olketa brata bilong hem wea spirit anointim olketa, and diswan bae lead go long wanem for olketa?
6 Long naet wea Jesus startim Memorial bilong dae bilong hem, hem sei olsem long olketa faithful aposol bilong hem: “Iufala nao olketa wea no lusim mi taem mi kasem olketa test; and mi mekem wanfala covenant witim iufala, olsem Dadi bilong mi hem mekem wanfala covenant witim mi, for wanfala kingdom, mekem iufala savve kaikai and drink long tebol bilong mi long kingdom, and sidaon long olketa throne for judgem twelvfala tribe bilong Israel.” (Luke 22:28-30) Long hia Jesus point go long wanfala spesol covenant wea hem mekem witim 144,000 brata bilong hem wea spirit anointim olketa, wea bae ‘faithful nomata sapos olketa mas dae’ and showimaot olketa “win” for duim datwan.—Revelation 2:10; 3:21.
7 Olketa insaed disfala sekson let go long hope for laef olowe long earth olsem man. Olketa bae rul witim Christ long heven, and sidaon long olketa throne for judgem olketa man. (Revelation 20:4, 6) Distaem bae iumi lukluk long olketa nara scripture wea fitim nomoa olketa anointed wan hia and wea showimaot why olketa “nara sheep” no kaikaim bred and drinkim wine long Memorial.—John 10:16.
8. Taem olketa anointed wan kaikaim bred, wanem nao olketa showimaot? (Lukim box long page 15.)
8 Olketa anointed wan bae safa olsem Christ and olketa willing for dae long sem wei wea hem dae tu. Paul, wea hem wanfala bilong datfala sekson, sei hem redi for sakrifaesim eni samting mekem hem savve ‘kasem Christ, mekem hem fit for savve long hem and paoa bilong resurrection bilong hem and share long olketa samting wea hem safa long hem.’ Tru nao, Paul “willing for dae long sem wei wea hem dae.” (Philippians 3:8, 10) Staka anointed Christian kasem sem wei for ‘safa wea lead go long dae wea olketa duim long Jesus.’—2 Corinthians 4:10.
9. Bred long Memorial hem piksarem body bilong hu?
9 Taem Jesus startim Evening Kaikai bilong Lord, hem sei: “Diswan minim body bilong mi.” (Mark 14:22) Hem story abaotem really body bilong hem, wea pipol bae whipim and mekem hem garekil nogud. Bred wea no garem yeast hem tokpiksa wea fitim for body bilong Jesus. Why nao olsem? Bikos insaed Bible, yeast savve minim sin or wicked fasin. (Matthew 16:4, 11, 12; 1 Corinthians 5:6-8) Jesus hem perfect, and body bilong hem long earth no garem eni sin. Hem bae givim datfala perfect body olsem wanfala sakrifaes wea kavarem sin. (Hebrews 7:26; 1 John 2:2) Diswan bae helpem evri faithful Christian, nomata olketa garem hope for laef long heven or laef olowe insaed wanfala paradaes long earth.—John 6:51.
10. Long wanem wei nao olketa wea drinkim wine long Memorial “share long blood bilong Christ”?
10 Paul hem raet olsem abaotem wine wea olketa anointed Christian drinkim long Memorial: “Datfala kap bilong blessing wea iumi blessim, hem wei for share long blood bilong Christ, iaman?” (1 Corinthians 10:16) Long wanem wei nao olketa wea drinkim wine “share long blood bilong Christ”? Diswan no minim olketa share for provaedem datfala ransom sakrifaes, bikos olketa tu needim samwan for baem bak olketa. From olketa garem faith long paoa wea blood bilong Christ garem for baem bak man, God forgivim sin bilong olketa and ting long olketa olsem raeteous wea mekem olketa fit for laef long heven. (Romans 5:8, 9; Titus 3:4-7) Blood wea Christ pourimaot nao hem mekem datfala 144,000 wea bae rul witim Christ kamap holy, wea minim olketa kamap separate, klin from sin for mekem olketa kamap “olketa holy wan.” (Hebrews 10:29; Daniel 7:18, 27; Ephesians 2:19) Tru nao, Christ iusim blood bilong hem for “baem pipol for God from evri tribe and languis and pipol and nation, and . . . mekem olketa kamap wanfala kingdom and olketa priest for God bilong iumi, and olketa bae rul olsem olketa king ovarem earth.”—Revelation 5:9, 10.
11. Wanem nao olketa anointed wan showimaot taem olketa drinkim wine long Memorial?
11 Taem Jesus startim Memorial bilong dae bilong hem, hem givim kap red wine go long olketa faithful aposol bilong hem and sei: “Drink from diswan, iufala evriwan; from diswan minim ‘blood bilong covenant’ bilong mi, wea mi bae pourimaot for plande pipol for forgivim olketa sin.” (Matthew 26:27, 28) Long sem wei wea blood bilong olketa buluka and goat mekem Law covenant midolwan God and nation bilong Israel hem kamap legal, blood bilong Jesus mekem datfala niu covenant wea Jehovah mekem witim spiritual Israel kamap legal tu, wea diswan start long Pentecost 33 C.E. (Exodus 24:5-8; Luke 22:20; Hebrews 9:14, 15) Taem olketa anointed wan drinkim wine wea piksarem “blood bilong covenant,” olketa showimaot olketa insaed long datfala niu covenant and olketa kasem gudfala samting from datwan.
12. Hao nao olketa anointed wan baptaes go long dae bilong Christ?
12 Diswan remindim olketa anointed wan long nara samting tu. Jesus sei olsem long olketa faithful disaepol bilong hem: “Kap wea mi drink from hem, iufala bae drink from hem, and baptaes wea mi bae baptaes long hem, iufala bae baptaes long hem tu.” (Mark 10:38, 39) Bihaen, aposol Paul story abaotem wei wea olketa Christian ‘baptaes go long dae bilong Christ.’ (Romans 6:3) Olketa anointed wan bae sakrifaesim laef bilong olketa. Dae bilong olketa hem olsem sakrifaes bikos olketa let go long hope for laef olowe long earth. Baptism bilong olketa anointed Christian hia hem finis bihaen olketa dae faithful, and olketa resurrect olsem spirit for “rul tugeta olsem olketa king” witim Christ long heven.—2 Timothy 2:10-12; Romans 6:5; 1 Corinthians 15:42-44, 50.
Kaikaim Bred and Drinkim Wine
13. Why nao olketa wea garem hope for laef olowe long earth no kaikaim bred and drinkim wine long Memorial, bat why nao olketa attendim Memorial?
13 From evri samting hia hem join witim wei for pasim go raon bred and wine long taem bilong Memorial, hem klia hao hem bae no fitim for olketa wea garem hope for laef long earth for kaikaim datfala bred and drinkim wine. Olketa wea garem hope for stap long earth luksavve hao olketa no anointed member bilong body bilong Christ, and tu, olketa no insaed long datfala niu covenant wea Jehovah mekem witim sekson wea bae rul witim Jesus Christ. From datfala “kap” hem stand for niu covenant hia, olketa wea insaed long datfala niu covenant nomoa kaikaim bred and drinkim wine. Olketa wea luk forward for kamap perfect and garem laef olowe long earth anda long datfala Kingdom, olketa no baptaes go long dae bilong Jesus and no garem hope for rul witim hem long heven. Sapos olketa kaikaim bred and drinkim wine, diswan bae showimaot samting wea no tru abaotem olketa. So olketa no kaikaim bred and drinkim wine bat olketa attendim Memorial for lukluk and showimaot respect. Olketa tinghae long evri samting wea Jehovah duim for olketa thru long Son bilong hem, wea insaed diswan hem wei for kasem forgiveness long faondeson bilong blood bilong Christ.
14. Hao nao wei for kaikaim bred and drinkim wine hem strongim olketa anointed wan long spiritual wei?
14 Klosap nao Jehovah bae finis for appruvim evribit olketa Christian wea bae rul witim Christ long heven, wea namba bilong olketa hem smol nomoa. Go kasem end long laef bilong olketa long earth, wea olketa bae sakrifaesim, wei for kaikaim bred and drinkim wine long Memorial hem strongim olketa long spiritual wei. Diswan mekem olketa garem feeling hao olketa barava wan mind witim olketa nara anointed brata and sista wea member bilong body bilong Christ. Wei wea olketa kaikaim bred and drinkim wine hem remindim olketa long responsibility wea olketa garem for stap faithful go kasem taem olketa dae.—2 Peter 1:10, 11.
“Olketa Samting Long Earth” Kam Tugeta
15. Hu nao hipap for sapotim olketa anointed Christian?
15 Start long olketa midol year bilong 1930, “nara sheep” wea kakamap staka sapotim olketa anointed wan. Olketa hia no part bilong datfala “smolfala sekson bilong sheep” and olketa garem hope for laef olowe long earth. (John 10:16; Luke 12:32; Zechariah 8:23) Olketa kamap olketa loyal fren bilong olketa brata bilong Christ, and barava help for preachim “disfala gud nius bilong kingdom” for givim witness long evri nation. (Matthew 24:14; 25:40) Taem olketa duim datwan, olketa garem chance for Christ acceptim olketa olsem “sheep” bilong hem taem hem kam for judgem olketa nation and for hem putim olketa long “raet saed” bilong hem. (Matthew 25:33-36, 46) From faith wea olketa garem long blood bilong Christ, olketa bae insaed datfala “big crowd” wea laef thru long “datfala big trabol.”—Revelation 7:9-14.
16. Hu nao bae insaed long “olketa samting long earth,” and hao nao evriwan hia bae garem chance for kamap “olketa pikinini bilong God”?
16 Taem God finis for appruvim datfala 144,000, datwan bae openem wei for hem letem olketa ‘wind for distroem samting’ for kasem wicked world bilong Satan long disfala earth. (Revelation 7:1-4) Insaed long datfala Thousand Year wea Christ and olketa king and priest bilong hem rul, staka bae resurrect and stap witim datfala big crowd long disfala earth. (Revelation 20:12, 13) Olketa hia bae garem chance for stap olowe long earth anda long datfala Messiah King, Christ Jesus. Long end bilong datfala Thousand Year Rul, evri “samting long earth” bae feisim wanfala last test. Olketa wea faithful bae kamap “olketa pikinini bilong God” wea hem adoptim wea stap long earth.—Ephesians 1:10; Romans 8:21; Revelation 20:7, 8.
17. Hao nao plan bilong Jehovah bae fulfill?
17 So, from barava wisefala “administration” bilong Jehovah, wea hem nao wei wea hem mek sure evri samting gohed gud, hem bae fulfillim nao plan bilong hem for “mekem evri samting kam tugeta moa for wan mind witim Christ, olketa samting long heven and olketa samting long earth.” Evri angel long heven and evri man long earth bae stap tugeta long peace, and evriwan bae hapi for stap anda long raeteous rul bilong Jehovah, datfala Nambawan God wea evritaem fulfillim olketa plan bilong hem.
18. Wanem gud samting nao olketa anointed wan and olketa fren bilong olketa bae kasem taem olketa attendim Memorial?
18 Taem smol sekson bilong olketa anointed wan and staka million nara sheep wea fren witim olketa hipap tugeta long April 12, 2006, datwan bae barava strongim faith bilong evriwan! Olketa bae celebratem Memorial bilong dae bilong Christ, from olketa obeyim disfala komand bilong Jesus: “Gohed for duim olsem for rememberim mi.” (Luke 22:19) Evriwan wea attend shud rememberim samting wea Jehovah duim for olketa thru long Son wea hem lovem, Christ Jesus.
Review
• Wanem nao plan bilong Jehovah for olketa samting long heven and olketa samting long earth?
• Hu nao “olketa samting long heven,” and hao nao olketa kam tugeta?
• Hu nao “olketa samting long earth,” and wanem hope nao olketa garem?
[Piksa long page 15]
“Body Bilong Christ”
Long 1 Corinthians 10:16, 17, taem Paul storyim mining bilong bred for olketa brata bilong Christ wea spirit anointim, hem storyim “body” long spesol wei. Hem sei: “Datfala bred wea iumi brekem, hem wei for share long body bilong Christ, iaman? From wanfala bred nomoa stap, iumi, nomata iumi staka, iumi wanfala body nomoa, from iumi evriwan kaikaim datfala wanfala bred.” Taem olketa anointed Christian kaikaim bred long taem bilong Memorial, olketa showimaot olketa wan mind witim olketa nara anointed wan, wea olsem wanfala body wea Christ nao hem Hed.—Matthew 23:10; 1 Corinthians 12:12, 13, 18.
[Piksa long page 15]
Why nao olketa anointed wan nomoa kaikaim bred and drinkim wine?
[Piksa long page 17]
Thru long administration bilong Jehovah, evriwan long heven and earth bae wan mind