Samting wea Iu Sure Bae Iu Kasem

“Sapos iu kasem leta from samwan wea sei wanfala relative bilong iu leavim samting for iu, keakea. Maet wanfala kleva konman hem trikim iu.”

Hem nao kaen warning wea United States Postal Inspection Service putim long Web site bilong hem. Why nao olsem? Bikos planti thousand pipol kasem leta wea sei, ‘Wanfala relative bilong iu hem dae and leavim samting for iu.’ Diswan mekem planti for sendem samting olsem $30 U.S. for kasem wanfala report wea bae explainim wea nao datfala samting and hao for kasem. Staka pipol sorre from diswan. Evriwan wea raet go kasem sem report nomoa—no eniwan long olketa kasem eniting.

Olketa trik olsem switim datfala feeling wea man garem for kasem samting. Bat, Bible apim wei for provaedem samting, taem hem sei: “Gudfala man bae leavim samting for givim go long olketa son bilong olketa son.” (Proverbs 13:22) For tok stret, Jesus Christ talem disfala toktok long Sermon Long Maunten wea planti pipol savve abaotem and laekem: “Hapi nao olketa wea garem kwaet fasin, from olketa bae kasem earth.”—Matthew 5:5.

Samting wea Jesus talem mekem iumi tingim toktok bilong King David bilong Israel planti handred year bifor: “Olketa wea garem kwaet fasin bae kasem earth; and olketa bae kasem nambawan hapi long bigfala peace.”—Psalm 37:11.

“Kasem earth”—datwan hem nambawan samting! Bat waswe, iumi savve sure diswan hem no just wanfala kleva trik wea bae tekem samting from iumi? Ia, iumi savve sure. Bikos earth hem wanfala long olketa nambawan creation bilong Jehovah, datwan wea wakem and ownim, hem garem right for givim long eniwan wea hem chusim. Thru long King David, Jehovah talem disfala promis long Son bilong hem wea hem lovem, Jesus Christ: “Askem mi, mekem mi givim olketa nation long iu and full earth olsem samting bilong iu.” (Psalm 2:8) From diswan, aposol Paul storyim Jesus olsem datwan “wea [God] appointim for kasem evri samting.” (Hebrews 1:2) So, iumi savve barava sure hao taem Jesus sei olketa wea garem kwaet fasin “bae kasem earth,” hem no laea, and hem garem paoa for mekem disfala promis kamap tru.—Matthew 28:18.

Important kwestin nao, Hao nao bae datfala promis kamap? Long evri ples distaem, luk olsem pipol wea raf and praod go ahed for win and tekem evriting wea olketa laekem. So, wanem nao olketa wea garem kwaet fasin bae kasem? Nara samting tu, pollution barava spoelem earth, and pipol wea greedy and no tingim future go ahed for iusim olobaot olketa samting wea stap long earth. Waswe, bae iumi kasem earth wea iumi bae laekem? Mifala invaetem iu for readim nextfala article for kasem ansa long olketa and samfala nara important kwestin.

Hao Nao “Olketa wea Garem Kwaet Fasin Bae Kasem Earth”?

“Maet iu savve long toktok bilong Jesus wea sei, ‘olketa wea garem kwaet fasin bae kasem earth.’ Bat olsem iumi lukim from samting wea pipol go ahed for duim long each other and long earth, long tingting bilong iu, olketa wea garem kwaet fasin bae kasem wanem?”—Matthew 5:5; Psalm 37:11.

Disfala kwestin nao Myriam, wanfala Jehovah’s Witness, iusim for startim story long Bible. Man wea hem story witim talem hao, sapos Jesus talem disfala promis then earth hia bae gud and no wanfala ples wea luk nogud.

Datwan ansa bilong man wea hope for gud samting. Bat waswe, hem stret for garem kaen tingting olsem? Ia, from Bible givim iumi strongfala reason for bilivim hao disfala promis bae kamap tru. For tok stret, wei wea datfala promis bae fulfill hem join witim purpose bilong God for olketa man and disfala earth. And iumi sure hao purpose bilong God bae kamap tru. (Isaiah 55:11) So, wanem nao firstfala purpose bilong God for olketa man, and hao nao bae evriting hia kamap?

Purpose Bilong God for Earth Hem for Olowe

Jehovah God creatim earth for wanfala main purpose. “Diswan nao samting wea Jehovah talem, Creator bilong heven, trufala God wea sheipim earth and wakem, datwan wea mekem hem stap strong, wea no wakem for stap nating, wea wakem for pipol stap long hem: ‘Mi nao Jehovah, and no eniwan moa stap.’ ” (Isaiah 45:18) So, main purpose why God wakem earth hem for man stap long hem. And tu, purpose bilong God nao for earth kamap hom bilong olketa man for olowe. “Hem wakem earth long barava ples bilong hem; bae hem stap for olowe.”—Psalm 104:5; 119:90.

Purpose bilong God for earth showaot klia tu long waka wea hem givim long first man and woman. Jehovah sei olsem long Adam and Eve: “Garem pikinini and kamap planti and fulimap earth and lukaftarem, and olketa fish bilong sea and olketa bird bilong heven and evri living samting wea muv long graon mas stap anda long iufala.” (Genesis 1:28) Earth wea God givim Adam and Eve for lukaftarem, bae kamap hom bilong tufala and olketa pikinini for olowe. Planti handred year bihaen, man wea raetem psalm sei: “Saed long heven, heven hem bilong Jehovah, bat hem givim earth long olketa son bilong man.”—Psalm 115:16.

For kasem datfala nambawan hope, Adam and Eve, witim olketa pikinini bilong tufala, mas wanwan acceptim and willing for obeyim Jehovah God olsem Sovereign, datfala Creator and datwan wea givim laef. Jehovah talem klia diswan taem hem givim disfala komand long man: “From evri tree bilong garden iu savve kaikai gogo iu satisfae. Bat from datfala tree bilong savve long gud and nogud samting iu mas no kaikai, from long day wea iu kaikai from hem bae iu dae.” (Genesis 2:16, 17) For Adam and Eve go ahed stap long garden bilong Eden, tufala mas obeyim datfala komand wea simpol and klia. Sapos tufala duim datwan, bae hem showimaot tufala hapi long evriting wea Dadi long heven duim finis for tufala.

Taem Adam and Eve min for no obeyim God taem tufala againstim komand wea hem givim olketa, tufala rejectim Datwan wea givim evriting wea tufala garem. (Genesis 3:6) From diswan, tufala and evri pikinini bilong tufala lusim chance for stap long nambawan Paradaes hom. (Romans 5:12) Waswe, from first man and woman no obeyim God diswan spoelem purpose bilong God for earth?

Wanfala God wea Nating Change

God talemaot disfala toktok thru long profet bilong hem, Malachi: “Mi nao Jehovah; mi nating change.” (Malachi 3:6) Taem wanfala man long France, L. Fillion, wea garem savve saed long Bible hem storyim disfala verse hem sei disfala toktok hem join witim wei wea God bae fulfillim olketa promis bilong hem. Hem raet olsem: “Jehovah hem fit for killim dae olketa nogud pipol, bat from hem nating savve change saed long olketa promis bilong hem, bae hem stap faithful long olketa promis bilong hem, nomata wanem nao kamap.” Evri promis bilong God wea hem talem long man wanwan, wanfala nation, or long evri man, bae hem nating forgetim bat diswan mas fulfill long taem bilong hem. “Hem tingim for olowe olketa promis bilong hem, toktok wea hem talem, go kasem wan thousand genereson.”—Psalm 105:8.

Bat, hao nao iumi savve sure Jehovah nating changem firstfala purpose bilong hem for earth? Iumi savve sure bikos insaed long Word bilong God, Bible, iumi lukim purpose bilong God hem for givim earth long olketa man wea obey. (Psalm 25:13; 37:9, 22, 29, 34) And tu, Bible storyim hao olketa wea Jehovah blessim bae stap sef, each wan sidaon “anda long grape tree and anda long fig tree bilong hemseleva, and no eniwan bae mekem olketa seksek.” (Micah 4:4; Ezekiel 34:28) Olketa wea Jehovah chusim “bae buildim haos and stap insaed; and olketa bae plantim grape plantation and kaikaim frut bilong hem.” Olketa bae stap long peace witim olketa wild animal tu.—Isaiah 11:6-9; 65:21, 25.

Bible storyim lelebet samting abaotem promis bilong God long difren wei. Long taem wea King Solomon hem rul, nation bilong Israel garem taem bilong peace and gudfala living. Anda long rul bilong hem, “Judah and Israel go ahed for garem sef living, evriwan anda long grape tree bilong hemseleva and anda long fig tree bilong hemseleva, from Dan go kasem Beer-sheba, long full taem wea Solomon hem rul.” (1 Kings 4:25) Bible sei Jesus hem “winim Solomon,” and taem hem story abaotem rul bilong Jesus, man wea raetem psalm talem profesi olsem: “Long taem bilong hem olketa raeteous wan bae kamap, and bigfala peace go kasem taem wea moon bae nomoa.” Long datfala taem, “staka kaikai bae stap long earth; antap long olketa maunten hem bae fulap.”—Luke 11:31; Psalm 72:7, 16.

From Jehovah God bae followim toktok bilong hem, bae hem mek sure datfala samting wea hem promis for givim bae hem stap and kamap olsem long firstaem. Long Revelation 21:4, Bible talem iumi hao long niu world wea hem promisim, God “bae aotem krae from eye bilong olketa, and dae bae nomoa, sorre and singaot and pain bae nomoa tu.” Disfala promis nao Paradaes.—Luke 23:43.

Hao for Kasem Datfala Samting wea God Promisim

Wei wea earth bae change for kamap paradaes bae happen anda long wanfala gavman, datfala Kingdom wea Jesus Christ nao King long hem, wea bae rul kam from heven. (Matthew 6:9, 10) First samting datfala Kingdom bae duim hem for “finisim olketa wea spoelem earth.” (Revelation 11:18; Daniel 2:44) Then, Jesus Christ olsem datfala “Prince Bilong Peace” bae fulfillim olketa profesi toktok hia: “Bigfala rul bilong hem olsem prince and peace bae no savve finis.” (Isaiah 9:6, 7) Anda long datfala Kingdom, staka million man, wea insaed diswan hem olketa wea bae laef bak moa, bae garem chance for kasem earth.—John 5:28, 29; Acts 24:15.

Hu nao bae kasem datfala nambawan samting? Tingim toktok bilong Jesus: “Hapi nao olketa wea garem kwaet fasin, from olketa bae kasem earth.” (Matthew 5:5) Wanem nao hem minim for garem kwaet fasin? Samfala dictionary minim “kwaet fasin” olsem kaenfala, balance, and wei for stap anda. Bat, firstfala Greek toktok hem minim moa samting. Tingting bilong William Barclay wea stap long New Testament Wordbook, talem hao mining bilong datfala toktok “hem join witim kaenfala fasin, nomata disfala kaenfala fasin hem strong olsem iron.” Hem showimaot kaen tingting wea mekem man for stand strong and no pei bak long nogud samting wea kasem hem, bikos hem garem gudfala wei for fren witim God, and datfala wei for fren strongim man hia.—Isaiah 12:2; Philippians 4:13.

Man wea garem kwaet fasin acceptim olketa mark bilong God long evri part long laef bilong hem, man hia no followim tingting bilong hemseleva or bilong nara pipol. Hem willing tu for lane, and for Jehovah teachim hem. David, man wea raetem psalm sei: “[Jehovah] bae mekem olketa wea garem kwaet fasin for wakabaot followim judicial disison bilong hem, and hem bae teachim wei bilong hem long olketa wea garem kwaet fasin.”—Psalm 25:9; Proverbs 3:5, 6.

Waswe, bae iu stap witim “olketa wea garem kwaet fasin” wea bae kasem earth? Sapos iu studyim Bible for kasem savve abaotem Jehovah and will bilong hem and followim samting iu lanem, iu tu bae luk forward for kasem wanfala paradaes earth and stap long hem for olowe.—John 17:3.