Olketa Earthquake, Bible Profesi, and Iu

BIFOR hem dae, Jesus talemaot olketa samting wea bae happen and living wea bae kamap taem disfala world go insaed “taem bilong end bilong disfala system.” Hem talem hao olketa samting olsem sik, no inaf kaikai, and olketa bigfala war bae showimaot hao iumi insaed datfala taem. Hem sei tu hao “olketa bigfala earthquake” bae kamap “long planti ples.” (Matthew 24:3, 7; Luke 21:10, 11) Waswe, Jesus hem story abaotem taem bilong iumi?

Planti pipol sei nomoa. Olketa talem hao namba bilong olketa earthquake no kamap moa big insaed olketa year wea go pas. For tok tru, datfala U.S. National Earthquake Information Center reportim hao namba bilong olketa earthquake wea strong bilong hem 7.0 and go ap hem “no kamap moa big” thru long mek-20 century.a

Bat, lukim hao wei wea datfala profesi bilong Jesus bae fulfill hem no depend long namba or paoa bilong earthquake for kamap moa big. Samting Jesus talem hem hao olketa bigfala earthquake bae kamap long planti ples. And tu, hem sei hao diswan hem samting wea markem “start bilong pain bilong trabol.” (Matthew 24:8) For measurem trabol, hem no depend long haomas earthquake or namba bilong olketa long Richter scale, bat long hao olketa affectim pipol.

Tru nao, olketa earthquake kosim planti trabol long taem bilong iumi. For tok stret, insaed mek-20 century, olketa disaster olsem killim dae planti million pipol or kosim staka for no garem eni ples for stap. Olketa savveman sei hao olketa man fit for stopem wei wea planti dae. “Long olketa kantri wea poor,” BBC Nius report olsem, “winim wei for followim olketa law wea kontrolem hao man wakem olketa building planti taem olketa buildim staka haos wea cheap and wea kwiktaem for buildim for fitim need bilong planti pipol wea kam for stap long taon.” Ben Wisner, wanfala savveman long disaster long olketa area raonem taon hem sei olsem abaotem tufala bigfala disaster wea happen no longtaem go nomoa: “No olketa earthquake nao killim olketa pipol hia. Bat hem from wei wea man mekem mistek, no kea, corruption, and greedy fasin.”

Tru nao, samfala taem, main samting wea danger tumas long taem bilong earthquake hem wei wea man selfish and no kea. Hem interesting, hao kaen fasin olsem hem barava showaot klia insaed nara Bible profesi abaotem “olketa last day” bilong disfala system. Bible sei, insaed datfala taem, pipol bae “tingim seleva nomoa, lovem selen,” and “no garem feeling.” (2 Timothy 3:1-5, The Amplified Bible.) For join witim toktok bilong Jesus abaotem end bilong disfala system, disfala profesi hem showimaot klia pruv hao iumi kakam moa klos long taem wea God bae mekem olketa man wea kasem trabol kamap free from evriting wea kosim pain and wei for safa distaem—insaed diswan hem olketa bigfala earthquake.—Psalm 37:11.

Waswe, iu laek for lanem moa samting abaotem disfala hope wea garem faondeson long Bible? Askem Olketa Jehovah’s Witness long area bilong iu, or raet long address wea fitim long page 5.

[Footnote]