Wanem Nao Bae Happen Long “End Bilong World”?

Wanem nao iu tingim taem iu herem disfala toktok “End bilong world hem klosap!”? Iu savve tingim preacher wea standap front long evriwan and hem talem datfala toktok wea mekem evriwan barava fraet? Or maet iu tingim man wea standap long street and singaot big long evriwan for repent bifor world hem finis? Olketa samting hia savve mekem samfala pipol wari, olketa narawan no bilivim world bae finis, and samfala mek-fani long kaen toktok olsem.

Bible hem sei: “World bae finis.” (Matthew 24:14) Olketa nara toktok wea Bible iusim for diswan hem “bigfala day bilong Olmaeti God” and “Armageddon.” (Revelation 16:14, 16) Staka religion teachim olketa difren samting abaotem wanem bae happen long datfala taem. Bat Bible storyim tru samting abaotem diswan. Bible helpem iumi tu for luksavve end hem klosap. And nambawan samting wea Bible storyim hem abaotem wanem iumi savve duim for stap laef long datfala taem! Firstaem, bae iumi storyim olketa samting wea no tru abaotem “end bilong world” and wanem bae happen long datfala taem.

SAMTING WEA NO TRU ABAOTEM END BILONG WORLD

1. EARTH BAE BONE LONG FIRE.

   Bible hem sei: “[God] hem wakem strongfala faondeson for disfala earth, and bae hem stap for olowe.” (Psalm 104:5) Datfala scripture and olketa narafala scripture showimaot God bae no distroem disfala earth and hem bae no letem eni narawan for distroem earth tu!—Ecclesiastes 1:4; Isaiah 45:18.

2. ENITAEM NOMOA WORLD SAVVE FINIS.

   Bible sei God markem finis taem for world hem end. Hem sei: “No eniwan savve long wanem day and taem nao datwan bae happen. Nomata olketa angel long heven and Son tu bat no savve. Dadi bilong mi long heven nomoa savve. Gohed for lukaot, gohed for wekap, bikos iufala no savve wanem taem nao God markem for evri samting hia happen.”—Mark 13:32, 33.

3. ASTEROID OR PIPOL BAE DISTROEM EARTH.

   Bible showimaot God bae sendem olketa angel for finisim olketa enemy bilong hem. Revelation 19:11 hem sei: “Mi lukim heven hem open and mi lukim wanfala horse wea kala bilong hem white. Nem bilong man wea sidaon antap long datfala horse hem Faithful and Tru.” And long verse 19 hem sei: “Then mi lukim datfala wild animal witim olketa king long earth and army bilong olketa, evriwan hipap tugeta for faetem datfala man wea sidaon long horse and army bilong hem.”—Revelation 19:11-21.

WANEM BAE HAPPEN LONG END BILONG WORLD

1. GOD BAE FINISIM OLKETA GAVMAN.

   Bible hem sei: “God long heven bae startim wanfala kingdom [gavman] wea bae nating savve finis. And bae no eni pipol moa tekova long datfala kingdom. Datfala kingdom bae smasem and finisim evri gavman hia, and hem nomoa bae stap olowe.” (Daniel 2:44) Olsem iumi storyim finis long point 3, olketa angel bae finisim “olketa king long earth and army bilong olketa,” wea “hipap tugeta for faetem datfala man wea sidaon long horse and army bilong hem.”—Revelation 19:19.

2. GOD BAE FINISIM WAR, WEI FOR RAF, AND OLKETA SAMTING WEA NO STRET.

   Long Psalms hem sei: “[God] bae finisim olketa war long full earth.” (Psalm 46:9) And long Proverbs hem sei: “Olketa wea duim stret samting and olketa wea no garem blame bae stap long earth. Bat olketa rabis pipol bae no stap long earth, and olketa nogud pipol bae finis.” (Proverbs 2:21, 22) God hem sei: “Mi wakem evri niu samting.”—Revelation 21:4, 5.

3. GOD BAE FINISIM OLKETA RELIGION WEA SPOELEM HEM AND OLKETA MAN.

   Bible hem sei: “Olketa profet talem olketa profesi wea no tru, and olketa priest iusim paoa bilong olketa for spoelem pipol. . . . Bat wanem nao bae iufala duim taem end hem kam?” (Jeremiah 5:31) And Jesus Christ hem sei: “Long datfala day staka pipol bae sei long mi: ‘Lord, Lord, mifala talemaot olketa toktok bilong God long nem bilong iu, raosem olketa demon long nem bilong iu, and duim olketa mirakol long nem bilong iu.’ Bat mi bae sei long olketa: ‘Mi nating savve long iufala! Iufala go from mi bikos iufala olketa man for duim olketa nogud samting!’”—Matthew 7:21-23.

4. GOD BAE FINISIM PIPOL WEA DUIM OLKETA NOGUD SAMTING.

   Jesus Christ hem sei: “Samting wea mekem pipol guilty nao hem from datfala laet hem kam long world, bat olketa laekem tumas darkness winim laet bikos olketa duim nogud samting.” (John 3:19) Bible storyim hao God hem finisim olketa nogud pipol long full world long taem bilong Noah. Bible sei wanfala flood nao “finisim pipol wea stap long datfala taem. Diswan hem happen taem wata hem kavarem full earth. . . . God hem markem skae and earth wea stap distaem for mas finis long fire and for stap go kasem taem wea God bae judgem and finisim pipol wea no obeyim hem.”—2 Peter 3:5-7.

Bible comparem “taem wea God bae judgem and finisim pipol wea no obeyim hem” witim wei wea hem “finisim pipol” long taem bilong Noah. Long datfala taem, God no distroem earth bat hem finisim “pipol wea no obeyim hem.” Long taem wea ‘God bae judgem pipol,’ hem bae finisim tu olketa wea no laek for obeyim hem. Bat God bae sevem olketa wea obeyim hem olsem hem duim for Noah and famili bilong hem.—Matthew 24:37-42.

Tingim, bihaen God finisim evri nogud samting wea spoelem pipol, laef long earth bae hem gud tumas! Wanem Bible hem talem abaotem end bilong world hem gudfala nius. Bat maet iu laek for savve: ‘Waswe, Bible storyim wanem taem nao end bae kam? Waswe, hem klosap nao? Wanem nao iumi savve duim mekem iumi stap laef long datfala taem?’